ಕಾಯ್ದೆ-ನಿಯಮಗಳನ್ನು ಸರಿಯಾಗಿ ವಿಶ್ಲೇಷಿಸದೆ, ಕಾನೂನುಬಾಹಿರವಾಗಿ ಮತ್ತು ‘ಅತಿಯಾದ ಅವಸರ’ದಿಂದ ಆದೇಶ ಹೊರಡಿಸುತ್ತಿರುವ ಮಹಾರಾಷ್ಟ್ರ ಆಹಾರ ಮತ್ತು ಔಷಧ ಆಡಳಿತ ಮಂಡಳಿಯನ್ನು (FDA) ಬಾಂಬೆ ಹೈಕೋರ್ಟ್ ತರಾಟೆಗೆ ತೆಗೆದುಕೊಂಡಿದೆ. ಖಡಕ್ ಐಎಎಸ್ ಅಧಿಕಾರಿ ತುಕಾರಾಮ್ ಮುಂಡೆ ನೇತೃತ್ವದ ಎಫ್‌ಡಿಎ ತೆಗೆದುಕೊಂಡಿದ್ದ ಎರಡು ಬೃಹತ್ ಕ್ರಮಗಳನ್ನು ಕೋರ್ಟ್ ಟೀಕಿಸಿದೆ. ಈ ಬೆನ್ನಲ್ಲೇ, ಇಲಾಖೆಯು ತನ್ನ ಆದೇಶಗಳನ್ನು ಹಿಂಪಡೆದುಕೊಂಡಿದೆ.
ಸಿಪ್ಲಾ ಸಂಸ್ಥೆಯ ಪರವಾನಗಿ ರದ್ದು ಮತ್ತು ಮುಂಬೈ ಕ್ರಿಕೆಟ್ ಅಸೋಸಿಯೇಷನ್ (MCA) ಆವರಣದ ರೆಸ್ಟೋರೆಂಟ್‌ಗಳ ಕಾರ್ಯಾಚರಣೆ ಅಮಾನತುಗೊಳಿಸುವ ಎಫ್‌ಡಿಎ ಆದೇಶವನ್ನು ಪ್ರಶ್ನಿಸಿ ಹೈಕೋರ್ಟ್‌ನಲ್ಲಿ ಅರ್ಜಿ ಸಲ್ಲಿಸಲಾಗಿತ್ತು. ಅರ್ಜಿಯ ವಿಚಾರಣೆ ನಡೆಸಿರುವ ಪ್ರಭಾರ ಮುಖ್ಯ ನ್ಯಾಯಮೂರ್ತಿ ರವೀಂದ್ರ ಘುಗೆ ಮತ್ತು ನ್ಯಾಯಮೂರ್ತಿ ಗೌತಮ್ ಅಂಕಡ್ ಅವರಿದ್ದ ಪೀಠವು ಎಫ್‌ಡಿಎ ವಿರುದ್ಧ ಅಸಮಾಧಾನ ವ್ಯಕ್ತಪಡಿಸಿದೆ.
“ನೈಸರ್ಗಿಕ ನ್ಯಾಯ ತತ್ವಗಳನ್ನು ಗಾಳಿಗೆ ತೂರಿ ಎಫ್‌ಡಿಎ ಅಧಿಕಾರಿಗಳು ವರ್ತಿಸುತ್ತಿದ್ದಾರೆ. ನೀವೇನು ನಿಮ್ಮನ್ನು ಪ್ರಭುಗಳು ಅಂದುಕೊಂಡಿದ್ದೀರಾ? ನೀವು ಏನು ಬೇಕಾದರೂ ಮಾಡಬಹುದೇ?” ಎಂದು ಪೀಠ ಕಿಡಿಕಾರಿದೆ.
ಪುಣೆಯಲ್ಲಿರುವ ಪ್ರಖ್ಯಾತ ಔಷಧ ತಯಾರಿಕಾ ಸಂಸ್ಥೆ ‘ಸಿಪ್ಲಾ’ ಘಟಕದ ಪರವಾನಗಿಯನ್ನು ಎಫ್‌ಡಿಎ ರದ್ದುಗೊಳಿಸಿತ್ತು. ಆದರೆ, ಸರ್ಕಾರದ ಸಾರ್ವಜನಿಕ ರಜಾದಿನದಂದು ಸಂಸ್ಥೆಯ ಪ್ರತಿನಿಧಿಗೆ ಇ-ಮೇಲ್ ಕಳುಹಿಸಿ ವಿಚಾರಣೆಗೆ ಕರೆದು, ಏಕಪಕ್ಷೀಯವಾಗಿ ಕ್ರಮ ಕೈಗೊಳ್ಳಲಾಗಿದೆ ಎಂದು ಸಿಪ್ಲಾ ಆರೋಪಿಸಿದೆ. ಈ ವಿಚಾರವಾಗಿ ಎಫ್‌ಡಿಎ ನಡೆಯನ್ನು ಹೈಕೋರ್ಟ್ ಕಟು ಶಬ್ದಗಳಿಂದ ಟೀಕಿಸಿದೆ. ಇಲಾಖೆಯು ನಿಯಮಬಾಹಿರವಾಗಿ ವರ್ತಿಸಿದೆ ಎಂದು ನ್ಯಾಯಪೀಠ ಕರೆದಿದೆ. ಈ ಬಳಿಕ, ಎಫ್‌ಡಿಎ ತನ್ನ ಪರವಾನಗಿ ರದ್ದತಿ ಆದೇಶವನ್ನು ವಾಪಸ್ ಪಡೆದಿದೆ.
ಅಂತೆಯೇ, ಮುಂಬೈ ಕ್ರಿಕೆಟ್ ಅಸೋಸಿಯೇಷನ್ (MCA) ಆವರಣದಲ್ಲಿದ್ದ 5 ಪ್ರಮುಖ ರೆಸ್ಟೋರೆಂಟ್‌ಗಳ ಕಾರ್ಯಾಚರಣೆಯನ್ನು ಎಫ್‌ಡಿಎ ಅಮಾನತುಗೊಳಿಸಿತ್ತು. ಆದರೆ, ಇತ್ತೀಚಿನ ತಪಾಸಣೆಯಲ್ಲಿ ಈ ರೆಸ್ಟೋರೆಂಟ್‌ಗಳು 88% ರಷ್ಟು ಆಹಾರ ಭದ್ರತಾ ನಿಯಮಗಳನ್ನು ಕಟ್ಟುನಿಟ್ಟಾಗಿ ಪಾಲಿಸುತ್ತಿರುವುದು ಕಂಡುಬಂದಿದೆ ಎಂಬುದನ್ನು ನ್ಯಾಯಾಲಯ ಗಮನಿಸಿದ್ದು, ನಿಯಮ ಪಾಲನೆಯಾಗಿದ್ದರೂ, ಪರವಾನಗಿ ಎಮ್‌ಸಿಎ ಹೆಸರಲ್ಲಿದ್ದರೂ, ರೆಸ್ಟೋರೆಂಟ್ ನಡೆಸುತ್ತಿರುವುದು ಬೇರೆ ಸಂಸ್ಥೆ ಎಂಬ ಕ್ಷುಲ್ಲಕ ತಾಂತ್ರಿಕ ಕಾರಣ ನೀಡಿ ಅಮಾನತು ಆದೇಶ ನೀಡಿದ್ದನ್ನು ಹೈಕೋರ್ಟ್ ಖಂಡಿಸಿದೆ.
ಈ ಎರಡೂ ಪ್ರಕರಣಗಳಲ್ಲಿ ಎಫ್‌ಡಿಎಗೆ ಎಚ್ಚರಿಕೆ ನೀಡಿರುವ ಹೈಕೋರ್ಟ್, “ಪರಿಸ್ಥಿತಿಯನ್ನು ಪ್ರಾಯೋಗಿಕವಾಗಿ ನೋಡಬೇಕೆಂದು ನಾವು ಎಷ್ಟೇ ಹೇಳಿದರೂ, ಅಧಿಕಾರಿಗಳು ಹಟಮಾರಿತನದಿಂದ ಆದೇಶ ಹೊರಡಿಸುತ್ತಿದ್ದಾರೆ. ಸೊಳ್ಳೆಯನ್ನು ಕೊಲ್ಲಲು ಕತ್ತಿ ಬಳಸುವ ಅಗತ್ಯವೇನಿತ್ತು? ಪದೇ ಪದೇ ಇಲಾಖೆಗೆ ಬುದ್ಧಿ ಹೇಳಿ ನಮಗೂ ಸಾಕಾಗಿದೆ, ಈಗ ಅಧಿಕಾರಿಗಳ ವಿರುದ್ಧ ನ್ಯಾಯಾಂಗ ನಿಂದನೆ ಕ್ರಮ ಜರುಗಿಸಿ ಜೈಲಿಗೆ ಕಳುಹಿಸುವ ಸಮಯ ಬಂದಿದೆ” ಎಂದು ಹೈಕೋರ್ಟ್ ಕಠುವಾಗಿ ಹೇಳಿದೆ.
ನ್ಯಾಯಾಲಯದ ತೀವ್ರ ಆಕ್ಷೇಪದ ನಂತರ ಎಫ್‌ಡಿಎ ತನ್ನ ಆದೇಶವನ್ನು ಹಿಂಪಡೆದಿದೆ. ರೆಸ್ಟೋರೆಂಟ್‌ಗಳಿಗೆ ಮತ್ತೆ ಸೇವೆಯನ್ನು ಆರಂಭಿಸಲು ಹೈಕೋರ್ಟ್ ಅನುಮತಿ ನೀಡಿದೆ. ಇಲಾಖೆಗೆ ನಿಯಮಗಳ ಜಾರಿ ಮುಖ್ಯವೇ ಹೊರತು ಕಾನೂನನ್ನು ಮೀರಿ ವರ್ತಿಸುವುದಲ್ಲ ಎಂದು ಪೀಠವು ಸ್ಪಷ್ಟವಾಗಿ ಹೇಳಿದೆ.
