‘ದಲಿತ ವ್ಯಕ್ತಿಯ ಚಿತೆಯಿಂದ ಬರುತ್ತಿರುವ ಹೊಗೆಯು ಪಕ್ಕದಲ್ಲೇ ಇರುವ ‘ಬ್ರಾಹ್ಮಣರ ಸ್ಮಶಾನ ಭೂಮಿ’ಯ ಕಡೆಗೆ ಹೋಗುತ್ತದೆ. ಇದರಿಂದ ಆ ಜಾಗವು ಅಪವಿತ್ರಗೊಳ್ಳುತ್ತದೆ’ – ಇದು ಜಾತೀಯತೆಯ ಪರಮಾವಧಿ. ಈ ಜಾತಿ ಕ್ರೌರ್ಯವು ಮಧ್ಯಪ್ರದೇಶದ ಹಳ್ಳಿಯೊಂದರಲ್ಲಿ ಘಟಿಸಿದೆ. ಘಟನೆಯು ‘ಬದುಕಿದ್ದಾಗ ಜಾತಿ ನಿಂದನೆ, ಸತ್ತ ಮೇಲೂ ಅಸ್ಪೃಶ್ಯತೆ’ ಎನ್ನುವ ಕಹಿ ಸತ್ಯಕ್ಕೆ ಮಧ್ಯಪ್ರದೇಶದ ಕನ್ನಡಿ ಹಿಡಿದಿದ್ದು, ಸತ್ತ ಮೇಲಾದರೂ ಮನುಷ್ಯನಿಗೆ ಗೌರವ ಸಿಗಬಹುದು ಎಂಬ ಆಶಯವನ್ನು ಹೊಸಕಿಹಾಕಿದೆ.
ಇತ್ತೀಚೆಗೆ, ಮಧ್ಯಪ್ರದೇಶದ ಹಳ್ಳಿಯೊಂದರಲ್ಲಿ ನಿಧನರಾಗಿದ್ದ ದಲಿತ ವ್ಯಕ್ತಿಯೊಬ್ಬರ ಅಂತ್ಯಸಂಸ್ಕಾರವನ್ನು ಸಮುದಾಯದ ಸಂಪ್ರದಾಯದಂತೆ ನೆರವೇರಿಸಲಾಗುತ್ತಿತ್ತು. ಆದರೆ, ಚಿತೆಗೆ ಬೆಂಕಿ ಇಟ್ಟು ದಹನ ಪ್ರಕ್ರಿಯೆ ಆರಂಭವಾಗುತ್ತಿದ್ದಂತೆಯೇ ಅಲ್ಲಿಗೆ ಬಂದ ಪ್ರಬಲ ಜಾತಿಯ (ಬ್ರಾಹ್ಮಣ) ಕೆಲವು ವ್ಯಕ್ತಿಗಳು ಅಂತ್ಯಸಂಸ್ಕಾರವನ್ನು ಅರ್ಧಕ್ಕೆ ನಿಲ್ಲಿಸುವಂತೆ ಒತ್ತಡ ಹೇರಿದ್ದಾರೆ. ‘ದಲಿತರನ್ನು ಸುಟ್ಟರೆ, ಅಲ್ಲಿಂದ ಹೊಮ್ಮುವ ಹೊಗೆ, ತಮ್ಮ ಸ್ಮಶಾನದೆಡೆಗೆ ಬರುತ್ತದೆ. ಆ ಜಾಗ ಅಪವಿತ್ರಗೊಳ್ಳುತ್ತದೆ’ ಎಂದು ಅಮಾನವೀಯ ವಾದ ಮುಂದಿಟ್ಟಿದ್ದಾರೆ.
ಮೃತ ದಲಿತ ವ್ಯಕ್ತಿಯು ತಾವು ಬದುಕಿದ್ದ ಜೀವಿತಾವಧಿಯುದ್ದಕ್ಕೂ ಜಾತಿಯ ಕಾರಣಕ್ಕಾಗಿ ತಾರತಮ್ಯ, ದ್ವೇಷ, ಅವಮಾನ ಹಾಗೂ ಅಸ್ಪೃಶ್ಯತೆಯ ಕಹಿಯನ್ನು ಉಂಡಿದ್ದರು. ಆದರೆ, ಮರಣದ ನಂತರವೂ ಅವರಿಗೆ ಕನಿಷ್ಠ ಗೌರವ ಸಿಗದ ಪರಿಸ್ಥಿತಿ ನಿರ್ಮಾಣವಾಗಿದೆ. ಬದುಕಿದ್ದಾಗ ಮುಟ್ಟಿಸಿಕೊಳ್ಳದ ಸಮಾಜ, ಸತ್ತ ಮೇಲೆ ಅವರ ದೇಹದಿಂದ ಹೊರಬರುವ ಹೊಗೆಯನ್ನೂ ‘ಅಸ್ಪೃಶ್ಯ’ ಎಂದು ಪರಿಗಣಿಸಿದೆ. ಮೃತನ ಹೊಗೆ ತಗುಲಿದರೆ ಸತ್ತ ಹಿರಿಯರೂ ಅಪವಿತ್ರರಾಗುತ್ತಾರೆ ಎಂಬ ಮೂಢ ಹಾಗೂ ಜಾತಿವಾದಿ ನಂಬಿಕೆಯು ‘ಮಾನವೀಯತೆಯ ಶವದ ಮೇಲೆ ಬ್ರಾಹ್ಮಣ್ಯ ಮೆರೆಯುತ್ತಿದೆ’ ಎಂಬುದನ್ನು ತೋರಿಸಿದೆ.
ಈ ಇಡೀ ಘಟನೆಯಲ್ಲಿ ಅತ್ಯಂತ ನಾಚಿಕೆಗೇಡಿನ ಸಂಗತಿಯೆಂದರೆ, ಸಂತ್ರಸ್ತ ದಲಿತ ಕುಟುಂಬಕ್ಕೆ ರಕ್ಷಣೆ ನೀಡಬೇಕಾಗಿದ್ದ ಕಾನೂನು ಸುವ್ಯವಸ್ಥೆ ಮತ್ತು ಪೊಲೀಸ್ ಇಲಾಖೆಯೇ ಜಾತೀಯತೆಯ ಜಾಲದಲ್ಲಿ ಸಿಲುಕಿರುವುದು. ಘಟನಾ ಸ್ಥಳಕ್ಕೆ ಬಂದ ಪೊಲೀಸರು ನೊಂದ ಕುಟುಂಬದ ಪರವಾಗಿ ನಿಲ್ಲುವ ಬದಲು, ಮೇಲ್ವರ್ಗದವರ ಒತ್ತಡಕ್ಕೆ ಮಣಿದು ದಲಿತ ಕುಟುಂಬದ ಮೇಲೆಯೇ ದಬ್ಬಾಳಿಕೆ ನಡೆಸಿದ್ದಾರೆ. ಇಡೀ ಪೊಲೀಸ್ ಆಡಳಿತ ವ್ಯವಸ್ಥೆಯು ಒಳಗಿನಿಂದ ಜಾತಿವಾದಿ ಮನಸ್ಥಿತಿಯಿಂದ ಕೊಳೆತುಹೋಗಿರುವುದಕ್ಕೆ ಇದು ಸಾಕ್ಷಿಯಾಗಿದೆ. ಸಂತ್ರಸ್ತರನ್ನು ಅಸಹಾಯಕರನ್ನಾಗಿ ಮಾಡಿದೆ.
क्या आपको पता है धुएँ कि भी जाति होती है 👇
— Ritu Choudhary (@RituChoudhryINC) May 24, 2026
मध्य प्रदेश में एक दलित की चिता जलने से केवल इसलिए रोक दी गई क्योंकि उसका धुआं “ब्राह्मणों के श्मशान” तक चला जाता…
उस पर भी शर्मनाक ये कि पुलिस भी दलित परिवार पर ही दवाब डाल रही है क्यूं की पुलिस प्रशासन खुद जातिवाद से अंदर तक सड़ा… pic.twitter.com/8oDF2LFqFE
ಘಟನೆಯ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ತೀವ್ರ ಆಕ್ರೋಶಕ್ಕೆ ಕಾರಣವಾಗಿದೆ. ನೊಂದ ದಲಿತ ಕುಟುಂಬಕ್ಕೆ ನ್ಯಾಯ ಸಿಗಬೇಕೆಂದು ಮತ್ತು ಜಾತೀಯತೆ ಪ್ರದರ್ಶಿಸಿದ ಪೊಲೀಸರು ಮತ್ತು ಬ್ರಾಹ್ಮಣ ಸಮುದಾಯದವರ ವಿರುದ್ಧ ಕಠಿಣ ಕಾನೂನು ಕ್ರಮ ಜರುಗಿಸಬೇಕೆಂಬ ಆಗ್ರಹ ಭುಗಿಲೆದ್ದಿದೆ.
