ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ನೈಸರ್ಗಿಕ ಅನಿಲದ (LNG) ವೆಚ್ಚ ಹೆಚ್ಚುತ್ತಿರುವ ನಡುವೆ ದೇಶದ ಪ್ರಮುಖ ನಗರಗಳಲ್ಲಿ ಸಂಕುಚಿತ ನೈಸರ್ಗಿಕ ಅನಿಲ (ಸಿಎನ್‌ಜಿ) ದರದಲ್ಲಿ ಹೆಚ್ಚಳವಾಗಿದೆ. ಪ್ರಮುಖ ನಗರ ಅನಿಲ ವಿತರಣಾ ಸಂಸ್ಥೆಯಾದ ಇಂದಿರಾಗಾಂಧಿ ಗ್ಯಾಸ್ ಲಿಮಿಟೆಡ್ (IGL) ಸಿಎನ್‌ಜಿ ದರವನ್ನು ಪ್ರತಿ ಕೆಜಿಗೆ ₹3.89 ರಷ್ಟು ಹೆಚ್ಚಿಸಿದೆ. ಪರಿಷ್ಕೃತ ನೂತನ ದರಗಳು ಶನಿವಾರ ಬೆಳಿಗ್ಗೆ 6 ಗಂಟೆಯಿಂದಲೇ ಜಾರಿಗೆ ಬಂದಿವೆ. ಆದರೆ ಕೆಲವು ನಗರಗಳಲ್ಲಿ ದರ ಸ್ಥಿರವಾಗಿದೆ.
ಪಶ್ಚಿಮ ಏಷ್ಯಾದಲ್ಲಿ ಉಂಟಾಗಿರುವ ಉದ್ವಿಗ್ನ ವಾತಾವರಣದಿಂದಾಗಿ ಹಡಗುಗಳ ಸಂಚಾರಕ್ಕೆ ಅಡಚಣೆಯಾಗಿದೆ. ಜಾಗತಿಕ ಮಾರುಕಟ್ಟೆಯಲ್ಲಿ ಸ್ಪಾಟ್ ಎಲ್‌ಎನ್‌ಜಿ ಬೆಲೆಗಳು ತೀವ್ರವಾಗಿ ಏರಿಕೆಯಾಗಿವೆ. ಹೀಗಾಗಿ ಅನಿಲ ಖರೀದಿ ವೆಚ್ಚ ಹೆಚ್ಚಾಗಿದ್ದು, ಆ ಹೊರೆಯನ್ನು ಸರಿದೂಗಿಸಲು ಸಂಸ್ಥೆಯು ಈ ದರ ಪರಿಷ್ಕರಣೆ ಮಾಡುವುದು ಅನಿವಾರ್ಯವಾಗಿದೆ ಎಂದು ಐಜಿಎಲ್ ಸ್ಪಷ್ಟಪಡಿಸಿದೆ.
ಇದನ್ನೂ ಓದಿ: ಕಚ್ಚಾ ತೈಲ ದರ ಕುಸಿತವಾದರೂ ಪೆಟ್ರೋಲ್, ಡಿಸೇಲ್ ಬೆಲೆ ಯಾಕೆ ಇಳಿಸಿಲ್ಲ: ಖರ್ಗೆ ಪ್ರಶ್ನೆ
ಈ ನಡುವೆ ಬೆಲೆ ಕಡಿಮೆಯಾದಾಗ ಗ್ರಾಹಕರ ಮೇಲಿನ ಹೊರೆಯನ್ನು ಕಡಿಮೆ ಮಾಡುವುದಿಲ್ಲ ಎಂಬ ಆರೋಪಗಳೂ ಇವೆ. ಸಂಘರ್ಷವು ಸುಮಾರು ಆರು ತಿಂಗಳಿನಿಂದ ಮುಂದುವರೆದಿದೆ. ಈಗ ಕಚ್ಚಾ ತೈಲದ ಬೆಲೆಗಳು ಬ್ಯಾರೆಲ್‌ಗೆ $90 ಕ್ಕಿಂತ ಹೆಚ್ಚಾಗಿದೆ. ಆದರೆ ಆರಂಭದಲ್ಲಿ ಪ್ರತಿ ಬ್ಯಾರೆಲ್‌ಗೆ $126ಕ್ಕೂ ಅಧಿಕವಾಗಿತ್ತು. ಆ ವೇಳೆ ದರ ಏರಿಕೆ ಮಾಡಿದ್ದು ಇನ್ನೂ ಕಡಿಮೆ ಮಾಡಲಾಗಿಲ್ಲ. ನಿರಂತರವಾಗಿ ದರ ಏರಿಸಲಾಗುತ್ತಿದೆ.
ಪ್ರಮುಖ ನಗರಗಳ ಇಂದಿನ ಪರಿಷ್ಕೃತ ಸಿಎನ್‌ಜಿ ದರಗಳು (ಪ್ರತಿ ಕೆಜಿಗೆ)
| ನಗರ | ದರ (₹) | ಹೊಸ ದರ (₹) |
| ಬೆಂಗಳೂರು | ₹97.00-₹102.50 | ₹97.00-₹102.50 |
| ದೆಹಲಿ | ₹83.09 | ₹86.98 |
| ನೋಯ್ಡಾ ಮತ್ತು ಗಾಜಿಯಾಬಾದ್ | ₹91.70 | ₹95.59 |
| ಗುರುಗ್ರಾಮ | ₹88.12 | ₹92.01 |
| ಮುಂಬೈ | ₹86.00 | ₹86.00 |
ಇಂಧನ ದರ ಏರಿಕೆಯಿಂದಾಗಿ ಆಟೋ ರಿಕ್ಷಾ, ಟ್ಯಾಕ್ಸಿಗಳು, ಆಪ್ ಆಧಾರಿತ ಕ್ಯಾಬ್ ಸೇವೆಗಳು ಹಾಗೂ ವಾಣಿಜ್ಯ ಸರಕು ಸಾಗಣೆ ವಾಹನಗಳ ನಿರ್ವಹಣಾ ವೆಚ್ಚ ಅಧಿಕವಾಗಲಿದೆ. ಇದರಿಂದ ಸಾರ್ವಜನಿಕ ಸಾರಿಗೆ ದರ ಮತ್ತು ನಿತ್ಯಬಳಕೆಯ ವಸ್ತುಗಳ ಸಾಗಣೆ ವೆಚ್ಚ ಹೆಚ್ಚಾಗುವ ಆತಂಕ ಸಾರ್ವಜನಿಕರಲ್ಲಿ ಎದುರಾಗಿದೆ.
ಮುಂಬೈನಲ್ಲಿ ಮಹಾನಗರ ಗ್ಯಾಸ್ ಲಿಮಿಟೆಡ್ (MGL) ಸೇವೆ ಒದಗಿಸುತ್ತದೆ. ಬೆಂಗಳೂರಿನಲ್ಲಿ ಗೇಲ್ ಗ್ಯಾಸ್ ಲಿಮಿಟೆಡ್ ಕಾರ್ಯನಿರ್ವಹಿಸುತ್ತದೆ. ಹಾಗಾಗಿ ಈ ಎರಡು ನಗರಗಳಲ್ಲಿ ಸಿಎನ್‌ಜಿ ಬೆಲೆ ಏರಿಕೆಯಾಗಿಲ್ಲ. ಬೆಂಗಳೂರಿನಲ್ಲಿ ಮಾರ್ಚ್-ಮೇ ಅವಧಿಯಲ್ಲಿ ಹಂತ-ಹಂತವಾಗಿ ದರ ಏರಿಕೆಯಾಗಿ ಈಗಾಗಲೇ ₹97.00 ರಿಂದ ₹102.50 ರಷ್ಟಿದೆ.
