ರಾಜಸ್ಥಾನದ 41 ಜಿಲ್ಲೆಗಳ ಪೈಕಿ 37 ಜಿಲ್ಲೆಗಳಲ್ಲಿ ಶುಕ್ರವಾರ ನಡೆಯುತ್ತಿರುವ ಜಿಲ್ಲಾ ಪರಿಷತ್ ಮತ್ತು ಪಂಚಾಯತ್ ಸಮಿತಿ ಚುನಾವಣೆಗಳ ಮತ ಎಣಿಕೆಯಲ್ಲಿ ಪ್ರತಿಪಕ್ಷ ಕಾಂಗ್ರೆಸ್ ಸ್ಪಷ್ಟ ಮುನ್ನಡೆ ಸಾಧಿಸಿದೆ. ರಾಜ್ಯ ಚುನಾವಣಾ ಆಯೋಗದ ಇತ್ತೀಚಿನ ಅಂಕಿಅಂಶಗಳ ಪ್ರಕಾರ, ಫಲಿತಾಂಶ ಘೋಷಣೆಯಾದ 6,520 ಪಂಚಾಯತ್ ಸಮಿತಿ ಸ್ಥಾನಗಳ ಪೈಕಿ ಕಾಂಗ್ರೆಸ್ 3,234 ಹಾಗೂ ಆಡಳಿತಾರೂಢ ಬಿಜೆಪಿ 1,935 ಸ್ಥಾನಗಳಲ್ಲಿ ಜಯ ಗಳಿಸಿವೆ. ಪ್ರಕಟಿತ 281 ಜಿಲ್ಲಾ ಪರಿಷತ್ ಸ್ಥಾನಗಳಲ್ಲಿ ಕಾಂಗ್ರೆಸ್ 170 ಮತ್ತು ಬಿಜೆಪಿ 96 ಸ್ಥಾನಗಳನ್ನು ಗೆದ್ದಿವೆ.
ಉಳಿದಂತೆ ಪಂಚಾಯತ್ ಸಮಿತಿಗಳಲ್ಲಿ ಪಕ್ಷೇತರರು 553, ರಾಷ್ಟ್ರೀಯ ಲೋಕತಾಂತ್ರಿಕ ಪಕ್ಷ (ಆರ್ಎಲ್ಪಿ) 448, ಭಾರತ ಆದಿವಾಸಿ ಪಕ್ಷ (ಬಿಎಪಿ) 250, ಸಿಪಿಐ(ಎಂ) 50, ಬಿಎಸ್ಪಿ 48 ಮತ್ತು ಎಎಪಿ 2 ಸ್ಥಾನಗಳಲ್ಲಿ ಗೆಲುವು ಸಾಧಿಸಿವೆ. ಜಿಲ್ಲಾ ಪರಿಷತ್ನಲ್ಲಿ ಸಿಪಿಐ(ಎಂ) ಮತ್ತು ಪಕ್ಷೇತರರು ತಲಾ 5, ಆರ್ಎಲ್ಪಿ 4 ಹಾಗೂ ಬಿಎಸ್ಪಿ 1 ಸ್ಥಾನ ಪಡೆದಿವೆ. ಒಟ್ಟು 1,403 ಜಿಲ್ಲಾ ಪರಿಷತ್ ಮತ್ತು 8,245 ಪಂಚಾಯತ್ ಸಮಿತಿ ವಾರ್ಡ್ಗಳಿಗೆ ನಾಲ್ಕು ಹಂತಗಳಲ್ಲಿ ಮತದಾನ ನಡೆದಿತ್ತು. ಹಾಲಿ ಸಂಸ್ಥೆಗಳ ಅವಧಿ ಮುಂದಿನ ತಿಂಗಳು ಪೂರ್ಣಗೊಳ್ಳಲಿರುವ ಕಾರಣ ಕೋಟಾ, ಬಾರಾ, ಕರೌಲಿ ಮತ್ತು ಶ್ರೀಗಂಗಾನಗರ ಜಿಲ್ಲೆಗಳ ಮತ ಎಣಿಕೆಯನ್ನು ಡಿಸೆಂಬರ್ 17ಕ್ಕೆ ಮುಂದೂಡಲಾಗಿದೆ.
2023ರ ಡಿಸೆಂಬರ್ನಲ್ಲಿ ಮಾಜಿ ಮುಖ್ಯಮಂತ್ರಿ ವಸುಂಧರಾ ರಾಜೆ ಸೇರಿದಂತೆ ಹಿರಿಯ ನಾಯಕರನ್ನು ಬದಿಗೊತ್ತಿ, ಮೊದಲ ಬಾರಿಯ ಶಾಸಕ ಭಜನ್ ಲಾಲ್ ಶರ್ಮಾ ಅವರಿಗೆ ಬಿಜೆಪಿ ಮುಖ್ಯಮಂತ್ರಿ ಪಟ್ಟ ಕಟ್ಟಿತ್ತು. ಶರ್ಮಾ ಆಡಳಿತಕ್ಕೆ ಮೂರು ವರ್ಷ ತುಂಬುತ್ತಿರುವ ಹೊತ್ತಿನಲ್ಲಿ ನಡೆಯುತ್ತಿರುವ ಈ ಪಂಚಾಯತ್ ರಾಜ್ ಚುನಾವಣೆ ಸರ್ಕಾರದ ಎರಡನೇ ದೊಡ್ಡ ಪರೀಕ್ಷೆಯಾಗಿದೆ. ರಾಜ್ಯದಾದ್ಯಂತ 2.7 ಕೋಟಿಗೂ ಹೆಚ್ಚು ಮತಗಳು ಚಲಾವಣೆಯಾಗಿದ್ದು, 2028ರ ವಿಧಾನಸಭಾ ಚುನಾವಣೆಗೆ ಮುನ್ನ ಜನರ ನಾಡಿಮಿಡಿತದ ಸೂಚಕವಾಗಿ ಗಮನ ಸೆಳೆದಿದೆ.
ಕಳೆದ ಸೆಪ್ಟೆಂಬರ್ನಲ್ಲಿ ನಡೆದ ನಗರ ಸ್ಥಳೀಯ ಸಂಸ್ಥೆಗಳ ಚುನಾವಣೆಯಲ್ಲಿ ಬಿಜೆಪಿ ಬಹುತೇಕ ಮಂಡಳಿಗಳನ್ನು ವಶಪಡಿಸಿಕೊಂಡಿದ್ದರೂ, ಬಿಜೆಪಿ ಮತ್ತು ಕಾಂಗ್ರೆಸ್ ನಡುವಿನ ಮತ ಹಂಚಿಕೆ ಅಂತರ ಕೇವಲ ಶೇ 0.91ರಷ್ಟಿತ್ತು. ರಾಜಸ್ಥಾನದಲ್ಲಿ ಆಡಳಿತಾರೂಢ ಪಕ್ಷವೇ ಸಾಮಾನ್ಯವಾಗಿ ನಗರ ಮತ್ತು ಗ್ರಾಮೀಣ ಸ್ಥಳೀಯ ಸಂಸ್ಥೆಗಳಲ್ಲಿ ಮೇಲುಗೈ ಸಾಧಿಸುವುದು ವಾಡಿಕೆ. ಆದರೆ ನಗರ ಭಾಗದಲ್ಲಿ ಪ್ರಬಲ ಪೈಪೋಟಿ ನೀಡಿದ್ದ ಕಾಂಗ್ರೆಸ್, ಗ್ರಾಮೀಣ ಮತದಾರರ ಬೆಂಬಲದೊಂದಿಗೆ ಇನ್ನಷ್ಟು ಉತ್ತಮ ಫಲಿತಾಂಶದ ನಿರೀಕ್ಷೆಯಲ್ಲಿತ್ತು.
ರಾಜ್ಯದ ಪ್ರಮುಖ ಸಚಿವರ ಕ್ಷೇತ್ರಗಳಲ್ಲೇ ಬಿಜೆಪಿಗೆ ತೀವ್ರ ಹಿನ್ನಡೆಯಾಗಿದೆ. ಸಿಕರ್ ಜಿಲ್ಲೆಯ ಅಜೀತ್ಗಢ ಪಂಚಾಯತ್ ಸಮಿತಿಯ ವಾರ್ಡ್ 17ರಲ್ಲಿ ಸಚಿವ ಝಾಬರ್ ಸಿಂಗ್ ಖರ್ರಾ ಅವರ ಪತ್ನಿ ಶಾಂತಿ ದೇವಿ, ಕಾಂಗ್ರೆಸ್ ಅಭ್ಯರ್ಥಿ ಸರಿತಾ ದೇವಿ ವಿರುದ್ಧ 51 ಮತಗಳಿಂದ ಸೋಲು ಕಂಡಿದ್ದಾರೆ. ಇಲ್ಲಿನ 17 ಸ್ಥಾನಗಳಲ್ಲಿ ಕಾಂಗ್ರೆಸ್ 13, ಬಿಜೆಪಿ 3 ಹಾಗೂ ಪಕ್ಷೇತರರು 1 ಸ್ಥಾನ ಗೆದ್ದಿದ್ದಾರೆ. ಜೈಪುರದಲ್ಲಿ ಸಚಿವ ರಾಜ್ಯವರ್ಧನ್ ಸಿಂಗ್ ರಾಠೋಡ್ ಪ್ರತಿನಿಧಿಸುವ ಝೋಟ್ವಾರಾ ಕ್ಷೇತ್ರದ 15 ಸ್ಥಾನಗಳಲ್ಲಿ ಬಿಜೆಪಿ ಕೇವಲ 1 ಸ್ಥಾನಕ್ಕೆ ಸೀಮಿತವಾಗಿದೆ.
ಘೋಷಿತ ಸ್ಥಾನಗಳ ಫಲಿತಾಂಶವು ಸರ್ಕಾರದ ಆಡಳಿತದ ಬಗೆಗಿನ ಅಸಮಾಧಾನಕ್ಕೆ ಗ್ರಾಮೀಣ ಮತದಾರರು ನೀಡಿರುವ ಉತ್ತರ ಎಂದು ಕಾಂಗ್ರೆಸ್ ಪ್ರತಿಪಾದಿಸಿದೆ. ಮತ್ತೊಂದೆಡೆ, ‘ಡಬಲ್ ಎಂಜಿನ್’ ಸರ್ಕಾರವು ಗ್ರಾಮ, ಬಡವರು ಮತ್ತು ರೈತರ ಕಲ್ಯಾಣಕ್ಕೆ ಬದ್ಧವಾಗಿದ್ದು, ನಿರಂತರ ಜನಸೇವೆಯೇ ಪಕ್ಷದ ಶಕ್ತಿ ಎಂದು ಮುಖ್ಯಮಂತ್ರಿ ಭಜನ್ ಲಾಲ್ ಶರ್ಮಾ ಚುನಾವಣಾ ಪ್ರಚಾರದಲ್ಲಿ ಹೇಳಿದ್ದರು.
2028ರ ವಿಧಾನಸಭಾ ಚುನಾವಣೆಗೆ ಎರಡು ವರ್ಷ ಬಾಕಿ ಇರುವಾಗ, ಗ್ರಾಮೀಣ ಭಾಗದ ಈ ಫಲಿತಾಂಶ ಉಭಯ ಪಕ್ಷಗಳ ಮುಂದಿನ ರಾಜಕೀಯ ನಡೆಗೆ ದಿಕ್ಸೂಚಿಯಾಗಲಿದೆ.




