ಚೀನಾ-ನೇಪಾಳ ಗಡಿಯ ಗೈರಾಂಗ್‌ ಬಳಿ ಸಂಭವಿಸಿದ ಭೀಕರ ಪ್ರವಾಹದಲ್ಲಿ ಸಿಲುಕಿ, ಕೈಲಾಸ ಮಾನಸಸರೋವರ ಯಾತ್ರೆ ಮುಗಿಸಿ ಮರಳುತ್ತಿದ್ದ ಈಶಾ ಫೌಂಡೇಶನ್‌ನ 77 ಯಾತ್ರಿಗಳು ನಾಪತ್ತೆಯಾಗಿದ್ದಾರೆ. ಬುಧವಾರ ಗಡಿಯ ವಲಸೆ ಕಚೇರಿಯಲ್ಲಿದ್ದಾಗ ಏಕಾಏಕಿ ಅಪ್ಪಳಿಸಿದ ಪ್ರವಾಹದಿಂದಾಗಿ ಕಚೇರಿ ಕಟ್ಟಡ ಕೊಚ್ಚಿಹೋಗಿದ್ದು, ಯಾತ್ರಿಗಳ ಹಾಗೂ ಅಲ್ಲಿನ ಸಿಬ್ಬಂದಿಯ ಸಂಪರ್ಕ ಸಂಪೂರ್ಣವಾಗಿ ಕಡಿತಗೊಂಡಿದೆ.
ನಾಪತ್ತೆಯಾದವರಲ್ಲಿ ಆಸ್ಟ್ರೇಲಿಯಾದಲ್ಲಿ ನೆಲೆಸಿರುವ ಧಾರವಾಡ ಮೂಲದ 39 ವರ್ಷದ ಶಿವಪ್ರಸಾದ್ ರಾಕೇಶ್ ನಾಯಕ ಕೂಡ ಸೇರಿದ್ದಾರೆ. ಈಶಾ ಫೌಂಡೇಶನ್‌ನ ‘ಎಸ್-3’ ತಂಡದಲ್ಲಿದ್ದ ಇವರು, ಬುಧವಾರ ಮುಂಜಾನೆ 3.30ರ ಸುಮಾರಿಗೆ ಕುಟುಂಬಸ್ಥರಿಗೆ ಕರೆ ಮಾಡಿ ತಾವು ಹಿಂದಿರುಗುತ್ತಿರುವುದಾಗಿ ತಿಳಿಸಿದ್ದರು. ಆ ಬಳಿಕ ಪ್ರವಾಹಕ್ಕೆ ಸಿಲುಕಿ ಸಂಪರ್ಕ ಕಳೆದುಕೊಂಡಿದ್ದು, ಆಸ್ಟ್ರೇಲಿಯಾದಲ್ಲಿರುವ ಪತ್ನಿ ಹಾಗೂ ಧಾರವಾಡದಲ್ಲಿರುವ ಅವರ ಕುಟುಂಬಸ್ಥರು ಪತ್ತೆಗಾಗಿ ಸರ್ಕಾರದ ನೆರವು ಕೋರಿದ್ದಾರೆ.
ಇದೇ ವೇಳೆ, ಪ್ರತ್ಯೇಕವಾಗಿ ಯಾತ್ರೆ ಕೈಗೊಂಡಿದ್ದ ಹಾವೇರಿ ಜಿಲ್ಲೆ ರಟ್ಟಿಹಳ್ಳಿಯ 6 ಕುಟುಂಬಗಳ 12 ಮಂದಿ ನೇಪಾಳದ ಪೋಖರಾದಲ್ಲಿ ಸುರಕ್ಷಿತವಾಗಿದ್ದಾರೆ. ಪೋಖರಾದಿಂದ ಕಾಠ್ಮಂಡುವಿಗೆ ತೆರಳುವಾಗ ಪ್ರವಾಹದ ಬಗ್ಗೆ ಸ್ಥಳೀಯರಿಂದ ಮುನ್ನೆಚ್ಚರಿಕೆ ಪಡೆದು ಮತ್ತೆ ಪೋಖರಾಕ್ಕೆ ಮರಳಿದ್ದಾಗಿ ಅವರು ವಿಡಿಯೊ ಸಂದೇಶದ ಮೂಲಕ ಸ್ಪಷ್ಟಪಡಿಸಿದ್ದಾರೆ. ಹೆದ್ದಾರಿ ಸಂಪರ್ಕ ಕಡಿತಗೊಂಡಿರುವುದರಿಂದ ಅವರು ಸದ್ಯ ಸುರಕ್ಷಿತವಾಗಿ ಅಲ್ಲೇ ಉಳಿದುಕೊಂಡಿದ್ದಾರೆ.
ಈಶಾ ಫೌಂಡೇಶನ್‌ನಿಂದ ಈ ಬಾರಿ ಒಟ್ಟು 21 ತಂಡಗಳು ಕೈಲಾಸ ಯಾತ್ರೆ ಕೈಗೊಂಡಿದ್ದವು. ನಾಪತ್ತೆಯಾಗಿರುವ 77 ಮಂದಿಯ ತಂಡದಲ್ಲಿ ಅಮೆರಿಕ, ಕೆನಡಾ, ಆಸ್ಟ್ರೇಲಿಯಾ, ಬ್ರಿಟನ್ ಸೇರಿದಂತೆ ಹಲವು ದೇಶಗಳ ನಾಗರಿಕರಿದ್ದಾರೆ. ಈವರೆಗೆ 495 ಮಂದಿ ಸುರಕ್ಷಿತವಾಗಿ ಮರಳಿದ್ದು, 743 ಯಾತ್ರಿಗಳು ಟಿಬೆಟ್ ಹಾಗೂ 148 ಮಂದಿ ನೇಪಾಳದಲ್ಲಿ ಸುರಕ್ಷಿತವಾಗಿದ್ದಾರೆ ಎಂದು ಫೌಂಡೇಶನ್ ಸ್ಪಷ್ಟಪಡಿಸಿದೆ.
ಪ್ರವಾಹದ ಭೀಕರತೆಗೆ ರಸ್ತೆ, ಸೇತುವೆ ಮತ್ತು ಸಂಪರ್ಕ ಜಾಲಗಳು ಸಂಪೂರ್ಣ ನಾಶವಾಗಿರುವುದರಿಂದ ರಕ್ಷಣಾ ಕಾರ್ಯಾಚರಣೆಗೆ ತೀವ್ರ ಹಿನ್ನಡೆಯಾಗಿದೆ. ಈಶಾ ಫೌಂಡೇಶನ್ ಸಂಸ್ಥಾಪಕ ಸದ್ಗುರು ಜಗ್ಗಿ ವಾಸುದೇವ್ ಅವರು ಖುದ್ದಾಗಿ ಆ ಪ್ರದೇಶದಲ್ಲಿ ಬೀಡುಬಿಟ್ಟಿದ್ದು, ಅಧಿಕಾರಿಗಳು ಹಾಗೂ ತಮ್ಮ ಸ್ವಯಂಸೇವಕರ ತಂಡದೊಂದಿಗೆ ರಕ್ಷಣಾ ಕಾರ್ಯಾಚರಣೆಯ ಪ್ರಯತ್ನದಲ್ಲಿ ನಿರತರಾಗಿದ್ದಾರೆ.
