ಮಹಾನಗರ ಪಾಲಿಕೆಯ ಚುನಾಯಿತ ಸದಸ್ಯರು ತಮಗೆ ಬರುವ ಲಂಚ ಅಥವಾ ಕಮಿಷನ್ ಹಣವನ್ನು ‘ಪ್ರಾಮಾಣಿಕ’ವಾಗಿ ಮತ್ತು ‘ಸಮ’ನಾಗಿ ಹಂಚಿಕೊಳ್ಳುವುದಾಗಿ ಗಂಗಾಜಲವನ್ನು ಕೈಯಲ್ಲಿ ಹಿಡಿದು ಪ್ರಮಾಣ ವಚನ ಸ್ವೀಕರಿಸಿರುವ ವಿಚಿತ್ರ ಮತ್ತು ಆಘಾತಕಾರಿ ಘಟನೆಯೊಂದು ಬೆಳಕಿಗೆ ಬಂದಿದೆ. ಬಿಜೆಪಿ ಆಡಳಿತ ಇರುವ ಉತ್ತರ ಪ್ರದೇಶದ ಶಹಜಹಾನ್‌ಪುರ ಮಹಾನಗರ ಪಾಲಿಕೆಯಲ್ಲಿ ಈ ಘಟನೆ ನಡೆದಿದೆ. ಘಟನೆಯ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.
ವೈರಲ್ ವಿಡಿಯೋದಲ್ಲಿ ಕೌನ್ಸಿಲರ್‌ಗಳು ಕೈಯಲ್ಲಿ ಗಂಗಾಜಲದ ಪಾತ್ರೆಯನ್ನು ಹಿಡಿದುಕೊಂಡು ನಿಂತಿರುವುದು ಕಂಡುಬಂದಿದೆ. ನಗರ ಪಾಲಿಕೆಯಿಂದ ಅಥವಾ ಯಾವುದೇ ಕೆಲಸಗಳಿಂದ ಬರುವ ಅಕ್ರಮ ಆದಾಯ/ಲಂಚದ ಹಣವನ್ನು ಒಟ್ಟು 60 ಜನ ಕೌನ್ಸಿಲರ್‌ಗಳಿಗೆ ಸಮಾನವಾಗಿ ಹಂಚಲಾಗುವುದು ಎಂದು ವ್ಯಕ್ತಿಯೊಬ್ಬ ಪ್ರಮಾಣ ವಚನ ಬೋಧಿಸಿದ್ದು, ಉಳಿದವರು ಅದನ್ನು ಪುನರಾವರ್ತಿಸಿದ್ದಾರೆ.
ಕೌನ್ಸಿಲರ್‌ಗಳು ಕೇವಲ ಹಣ ಹಂಚಿಕೊಳ್ಳಲು ಮಾತ್ರವಲ್ಲದೆ, ಈ ವಿಚಾರದಲ್ಲಿ ಗುಂಪಿನ ಯಾವುದೇ ಸದಸ್ಯನಿಗೆ ಅಥವಾ ಕೌನ್ಸಿಲರ್‌ಗೆ ಕಾನೂನುಬಾಹಿರವಾಗಿ ತೊಂದರೆ ಅಥವಾ ತನಿಖೆ ಎದುರಾದರೆ, ಎಲ್ಲರೂ ಒಟ್ಟಾಗಿ ನಿಂತು ಆತನ ಬೆಂಬಲಕ್ಕೆ ನಿಲ್ಲುತ್ತೇವೆ ಎಂದೂ ಶಪಥ ಮಾಡಿದ್ದಾರೆ.
ಲಂಚ ಮತ್ತು ಭ್ರಷ್ಟಾಚಾರದ ಹಣ ಹಂಚಿಕೊಳ್ಳುವ ಅಕ್ರಮ ಕೆಲಸಕ್ಕಾಗಿ ಪ್ರಮಾಣ ವಚನ ಮಾಡಿರುವುದು ಮತ್ತು ಅದಕ್ಕಾಗಿ ಗಂಗಾಜಲವನ್ನು ಬಳಸಿಕೊಂಡಿದ್ದರ ವಿರುದ್ಧ ಸಾರ್ವಜನಿಕ ವಲಯದಲ್ಲಿ ತೀವ್ರ ಆಕ್ರೋಶ ವ್ಯಕ್ತವಾಗಿದೆ.
ಘಟನೆಯ ವೀಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದ್ದಂತೆ ಮಹಾನಗರ ಪಾಲಿಕೆ ಆಡಳಿತ ಎಚ್ಚೆತ್ತುಕೊಂಡಿದೆ. ತನಿಖೆಗೆ ಆದೇಶಿಸಿದೆ.
ಶಹಜಹಾನ್‌ಪುರ ಪಾಲಿಕೆ ಆಯುಕ್ತರಾದ ಸೌಮ್ಯಾ ಗುರುರಾಣಿ ಪ್ರತಿಕ್ರಿಯಿಸಿದ್ದು, “ಈ ವಿಡಿಯೋ ಹಳೆಯದು (ನವೆಂಬರ್ 2025ರದ್ದು) ಎಂದು ಹೇಳಲಾಗುತ್ತಿದ್ದರೂ, ಘಟನೆಯ ತೀವ್ರತೆಯನ್ನು ಪರಿಗಣಿಸಿ ತನಿಖೆಗೆ ಆದೇಶಿಸಲಾಗಿದೆ. ವರದಿ ಬಂದ ನಂತರ ಸೂಕ್ತ ಕ್ರಮ ಕೈಗೊಳ್ಳಲಾಗುವುದು” ಎಂದು ತಿಳಿಸಿದ್ದಾರೆ.
