ಕರೂರು ಕಾಲ್ತುಳಿತ ದುರಂತದ ಸಂತ್ರಸ್ತರ ಸ್ಮರಣಾರ್ಥ ಸ್ಮಾರಕ ನಿರ್ಮಾಣ ಮಾಡಲಾಗುದು. ರಾಜಕೀಯದಿಂದಾಗಿ ಮುಂದೆಂದೂ ಇಂತಹ ಘಟನೆಗಳು ನಡೆಯಬಾರದು ಎಂದು ತಮಿಳುನಾಡು ಮುಖ್ಯಮಂತ್ರಿ ಸಿ ವಿಜಯ್ ಜೋಸೆಫ್ ಹೇಳಿದ್ದಾರೆ.
2025ರ ಸೆಪ್ಟೆಂಬರ್‌ನಲ್ಲಿ ವಿಜಯ್ ಬಹಿರಂಗ ಸಭೆ ವೇಳೆ ಕರೂರಿನಲ್ಲಿ ಕಾಲ್ತುಳಿತ ಸಂಭವಿಸಿದ್ದು 41 ಮಂದಿ ಸಾವನ್ನಪ್ಪಿದ್ದಾರೆ. ಮೃತಪಟ್ಟವರ ಕುಟುಂಬ ಸದಸ್ಯರಿಗೆ ಉದ್ಯೋಗ ನೇಮಕಾತಿ ಪತ್ರಗಳನ್ನು ವಿತರಿಸಲು ತಮಿಳುನಾಡು ಸರ್ಕಾರಕ್ಕೆ ಮದ್ರಾಸ್ ಹೈಕೋರ್ಟ್‌ನ ಮದುರೈ ಪೀಠವು ಶುಕ್ರವಾರ ಷರತ್ತುಬದ್ಧ ಅನುಮತಿ ನೀಡಿದೆ.
ತಮಿಳಗ ವೆಟ್ರಿ ಕಳಗಂ (ಟಿವಿಕೆ) ನೇತೃತ್ವದ ರಾಜ್ಯ ಸರ್ಕಾರವು ಕರೂರಿನಲ್ಲಿ ಈ ಕಾರ್ಯಕ್ರಮವನ್ನು ಆಯೋಜಿಸಲು ಕೋರ್ಟ್ ಹಸಿರು ನಿಶಾನೆ ತೋರಿದ್ದು, ವಿಜಯ್ ಕರೂರಿನಲ್ಲಿ ಕಾರ್ಯಕ್ರಮ ನಡೆಸಿದ್ದಾರೆ. ಇನ್ನು ಆದೇಶ ಪತ್ರವು ತಾತ್ಕಾಲಿಕವಾಗಿರಲಿದ್ದು, ನ್ಯಾಯಾಂಗ ಪರಿಶೀಲನೆಗೆ ಒಳಪಟ್ಟಿರುತ್ತದೆ ಎಂದು ಹೈಕೋರ್ಟ್ ಸ್ಪಷ್ಟಪಡಿಸಿದೆ.
ಇದನ್ನೂ ಓದಿ: ಕರೂರು ದುರಂತ: ತಮಿಳುನಾಡು ಸಿಎಂ ವಿಜಯ್, ಇತರರ ಹೇಳಿಕೆ ವಿರುದ್ಧ ಸುಪ್ರೀಂ ಮೆಟ್ಟಿಲೇರಿದ ಡಿಎಂಕೆ
ದುರಂತದ ನಂತರ ಜಿಲ್ಲೆಗೆ ಮೊದಲ ಬಾರಿಗೆ ಭೇಟಿ ನೀಡಿದ ಸಿಎಂ ವಿಜಯ್, “ರ‍್ಯಾಲಿ ನಡೆದ ದಿನದಂದು ಪೊಲೀಸರು ತಮ್ಮನ್ನು ದಿಕ್ಕು ತಪ್ಪಿಸಿದ್ದರು. ಕಾರ್ಯಕ್ರಮವನ್ನು ಮುಂದುವರಿಸುವ ವಿಚಾರದಲ್ಲಿ ನಾವು ಪೊಲೀಸರನ್ನು ನಂಬಿದೆವು. ಈ ಕಾಲ್ತುಳಿತವು ನನ್ನ ಜೀವನದ ಅತ್ಯಂತ ನೋವಿನ ಕ್ಷಣ. ಇದು ನನ್ನನ್ನು ಇಂದಿಗೂ ಕಾಡುತ್ತಿದೆ” ಎಂದು ಹೇಳಿದರು.
ಇನ್ನು “ಒಬ್ಬ ವ್ಯಕ್ತಿ ಎಷ್ಟೇ ಯಶಸ್ಸನ್ನು ಕಂಡರೂ, ಜೀವನದಲ್ಲಿ ಇಂತಹ ಘಟನೆಗಳು ಎದುರಾಗುತ್ತವೆ. ನಾನು ಕರೂರು ಪ್ರವೇಶಿಸಿದಾಗ ಅವರು (ಪೊಲೀಸರು) ನನ್ನನ್ನು ತಡೆಯಬಹುದಿತ್ತಲ್ಲವೇ” ಎಂದು ಜನರನ್ನು ಪ್ರಶ್ನಿಸಿದರು. ಹಾಗೆಯೇ, “ಸಭೆಯನ್ನು ರದ್ದುಗೊಳಿಸುವ ಸಂಪೂರ್ಣ ಹಕ್ಕು ಅವರಿಗಿತ್ತು. ಆದರೆ ಅವರು ರದ್ದುಗೊಳಿಸಲಿಲ್ಲ, ಬದಲಿಗೆ ಅವರೇ ನನ್ನನ್ನು ಮುನ್ನಡೆಸಿಕೊಂಡು ಹೋದರು” ಎಂದು ದೂರಿದರು.
“ಇದಕ್ಕೆ ನಿಜವಾಗಿಯೂ ಯಾರು ಜವಾಬ್ದಾರರು… ಇದನ್ನು ಸಂಚು ರೂಪಿಸಿ ಮಾಡಿದ್ದು ಯಾರು” ಎಂದು ಪ್ರಶ್ನಿಸಿದ ವಿಜಯ್ ಪೊಲೀಸರ ಮೇಲಿನ ಟೀಕೆಯನ್ನು ಅಂದು ಅಧಿಕಾರದಲ್ಲಿದ್ದ ಡಿಎಂಕೆ ಕಡೆಗೆ ತಿರುವಿದರು. ಕಾಲ್ತುಳಿತದ ತಕ್ಷಣದ ನಂತರ ತಾವು ಮೌನವಾಗಿದ್ದರ ಕುರಿತು ಕೇಳಿಬಂದ ಟೀಕೆಗಳಿಗೂ ತಿರುಗೇಟು ನೀಡಿದರು.
“ನಾನು ಮನೆಯಲ್ಲಿ ತೀವ್ರ ನೋವು ಮತ್ತು ನಿರಾಶೆಯಿಂದ ನಲುಗುತ್ತಿದ್ದಾಗ, ನೀವು ನನ್ನನ್ನು ನೋಡಿ ಅಪಹಾಸ್ಯ ಮಾಡಿದಿರಿ. ನಾನು ‘ಅಡಗಿಕೊಂಡಿದ್ದೇನೆ’ ಎಂದು ಹೇಳಿದಿರಿ. ನಮ್ಮ ರಾಜಕೀಯ ವಿರೋಧಿಗಳು ಮತ್ತು ಪೊಲೀಸರು ಸೇರಿ ಈ ಕಾಲ್ತುಳಿತವನ್ನು ಪ್ರೇರೇಪಿಸಲು ‘ಸಂಚು’ ರೂಪಿಸಿದ್ದರು” ಎಂದು ದೂರಿದರು.
“ಪೊಲೀಸರು ಅಲ್ಲಿ ಸಾಕಷ್ಟು ಸಿಬ್ಬಂದಿಯನ್ನು ನಿಯೋಜಿಸಿದ್ದರೇ? ಅವರು ನಾಚಿಕೆಯಿಲ್ಲದೆ ನನ್ನನ್ನು ದೂಷಿಸಿದರು. ಎಂ.ಕೆ. ಸ್ಟಾಲಿನ್ ಅವರು ವಿಧಾನಸಭೆಯಲ್ಲಿ ಇದರ ಬಗ್ಗೆ ರಾಜಕೀಯ ಮಾಡಿದರು. ಪಕ್ಷದ ಯಶಸ್ವಿ ಚುನಾವಣಾ ಪ್ರಚಾರವನ್ನು ಹಳಿ ತಪ್ಪಿಸುವ ಪ್ರಯತ್ನವಾಗಿ ಈ ದುರಂತವನ್ನು ವ್ಯವಸ್ಥಿತವಾಗಿ ಸೃಷ್ಟಿಸಲಾಗಿದೆ ಎಂದು ಟಿವಿಕೆ ವಾದವನ್ನು ಪುನರುಚ್ಚರಿಸಿದರು.
