ಬಿಜೆಪಿ ಭಕ್ತ, ಮೋದಿ ಹಿಂಬಾಲಕ, ಜೀ ಮಾಧ್ಯಮ ಸಂಸ್ಥೆಯ ಮಾಜಿ ಮುಖ್ಯಸ್ಥ ಸುಭಾಷ್ ಚಂದ್ರ ಅವರ ಬೃಹತ್ ಸಾಲ ಮನ್ನಾಕ್ಕೆ ‘ರಾಷ್ಟ್ರೀಯ ಕಂಪನಿ ಕಾನೂನು ನ್ಯಾಯಮಂಡಳಿ’ (National Company Law Tribunal – NCLT) ಸಮ್ಮತಿಸಿದೆ. ಸುಭಾಷ್ ಚಂದ್ರ ಅವರ ಸುಮಾರು 22,006 ಕೋಟಿ ರೂಪಾಯಿಗಳ ಒಟ್ಟು ಸಾಲದ ಪೈಕಿ ಕೇವಲ 6.5 ಕೋಟಿ ರೂಪಾಯಿಗಳನ್ನು ಪಾವತಿಸಿ ಪ್ರಕರಣ ಇತ್ಯರ್ಥಪಡಿಸಿಕೊಳ್ಳಲು NCLT ಅನುಮತಿ ನೀಡಿದೆ. ಪರಿಣಾಮ, ಸಾಲ ನೀಡಿದ ಬ್ಯಾಂಕುಗಳಿಗೆ ಬರೋಬ್ಬರಿ 99.97% ರಷ್ಟು ಬೃಹತ್ ನಷ್ಟ ಉಂಟಾಗಿದೆ. ಎನ್‌ಸಿಎಲ್‌ಟಿಯ ಈ ನಿರ್ಧಾರವನ್ನು ಉಲ್ಲೇಖಿಸಿ ವಿದೇಶದಲ್ಲಿ ತಲೆಮರೆಸಿಕೊಂಡಿರುವ ಉದ್ಯಮಿ ವಿಜಯ್ ಮಲ್ಯ ಅವರು ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದ ಕೇಂದ್ರ ಸರ್ಕಾರ ಮತ್ತು ಭಾರತೀಯ ಸಾಲ ಮರುಪಾವತಿ ವ್ಯವಸ್ಥೆಯನ್ನು ಲೇವಡಿ ಮಾಡಿದ್ದಾರೆ. ‘ಇದೇ ಭಾರತೀಯ ನ್ಯಾಯ’ ಎಂದು ವ್ಯಂಗ್ಯವಾಡಿದ್ದಾರೆ.
ಸುಭಾಷ್ ಚಂದ್ರ ಅವರ ವೈಯಕ್ತಿಕ ದಿವಾಳಿತನದ ಪರಿಹಾರ ಪ್ರಕ್ರಿಯೆಯಲ್ಲಿ ಸಾಲ ಮನ್ನಾಕ್ಕೆ ಸಾಲದಾತ ಬ್ಯಾಂಕುಗಳು ತೀವ್ರ ಆಕ್ಷೇಪ ವ್ಯಕ್ತಪಡಿಸಿದ್ದವು. 22,006 ಕೋಟಿ ರೂಪಾಯಿ ಸಾಲಕ್ಕೆ ಪ್ರತಿಯಾಗಿ 6.25 ಕೋಟಿ ರೂಪಾಯಿ ಸಾಲ ಮರುಪಾವತಿ ಮತ್ತು 25 ಲಕ್ಷ ರೂಪಾಯಿ ಪ್ರಕ್ರಿಯೆ ವೆಚ್ಚವನ್ನು ಸಾಲಗಾರ ಸುಭಾಷ್ ಚಂದ್ರ ಅವರಿಂದ ಪಡೆಯುವುದು ಅತ್ಯಂತ ಅಲ್ಪ ಮೊತ್ತ ಎಂದು ಎಲ್‌ಐಸಿ ಹೌಸಿಂಗ್ ಫೈನಾನ್ಸ್ ಸೇರಿದಂತೆ ಹಲವು ಬ್ಯಾಂಕುಗಳು ಪ್ರಬಲ ವಿರೋಧ ವ್ಯಕ್ತಪಡಿಸಿದ್ದವು. ಎಲ್‌ಐಸಿ ಹೌಸಿಂಗ್ ಫೈನಾನ್ಸ್ ತನಗೆ ಬರಬೇಕಿದ್ದ 1,322 ಕೋಟಿ ರೂಪಾಯಿ ಸಾಲಕ್ಕೆ ಬದಲಾಗಿ ಕೇವಲ 38 ಲಕ್ಷ ರೂಪಾಯಿ ಅಂದರೆ 0.028%ರಷ್ಟು ಮೊತ್ತ ಮಾತ್ರ ಸಿಗಲಿದೆ. ಇದು ಸಂಸ್ಥೆಗೆ ಭಾರೀ ನಷ್ಟ ಉಂಟುಮಾಡಲಿದೆ ಎಂದು ವಾದಿಸಿತ್ತು. ಆದಾಗ್ಯೂ, ಆಕ್ಷೇಪಗಳನ್ನು NCLT ನ್ಯಾಯಾಂಗ ಸದಸ್ಯ ನೀಲೇಶ್ ಶರ್ಮಾ ಅವರು ತಳ್ಳಿಹಾಕಿದ್ದಾರೆ.
ಗಮನಾರ್ಹವಾಗಿ, ಈ ಸಾಲ ಮನ್ನಾ ಮತ್ತು ಪರಿಹಾರ ಪ್ರಕ್ರಿಯೆಯ ವಿರುದ್ಧ ಸಾಲದಾತ ಸಂಸ್ಥೆಗಳಲ್ಲಿ ಕೇವಲ 20%ಗಿಂತ ಕಡಿಮೆ ಹಣಕಾಸು ಸಂಸ್ಥೆಗಳು ಮಾತ್ರವೇ ಹಕ್ಕು ಚಲಾಯಿಸಿವೆ. ಉಳಿದ 80.81%ರಷ್ಟು ಸಂಸ್ಥೇಗಳು ಈ ಪ್ರಕ್ರಿಯೆಯ ಪರವಾಗಿವೆ ಎಂದು ನ್ಯಾಯಮಂಡಳಿ ತಿಳಿಸಿದೆ. ಸುಭಾಷ್ ಚಂದ್ರ ಅವರ ಪ್ರಸ್ತುತ ವೈಯಕ್ತಿಕ ಆಸ್ತಿಯ ಮೌಲ್ಯವು ಈ ಕೊಡುಗೆಗಿಂತ ತೀರ ಕಡಿಮೆಯಿದ್ದು, ದಿವಾಳಿ ಎಂದು ಘೋಷಿಸುವುದಕ್ಕಿಂತ ಈ ಯೋಜನೆಯನ್ನು ಒಪ್ಪಿಕೊಳ್ಳುವುದು ಸಾಲದಾತರಿಗೆ ಉತ್ತಮ ಆಯ್ಕೆ ಎಂದು ನ್ಯಾಯಮಂಡಳಿಯು ತನ್ನ 144 ಪುಟಗಳ ಆದೇಶದಲ್ಲಿ ಅಭಿಪ್ರಾಯಪಟ್ಟಿದೆ.
If True many congratulations to my friend Subhash.Banks and Government have admitted having recovered Rs 14,100 crores from me against a Judgement debt of Rs 6203 crores. Many more borrowers have settled at a fraction. Indian Debt Resolution Justice I presume. No media questions. pic.twitter.com/5uwxYSAX8H
— Vijay Mallya (@TheVijayMallya) August 26, 2026
ಈ ಬೆಳವಣಿಗೆ ಕುರಿತು ಸಾಮಾಜಿಕ ಜಾಲತಾಣ ‘ಎಕ್ಸ್‌’ನಲ್ಲಿ ಪ್ರತಿಕ್ರಿಯಿಸಿರುವ ವಿಜಯ್ ಮಲ್ಯ, “ಇದು ನಿಜವಾಗಿದ್ದರೆ ನನ್ನ ಸ್ನೇಹಿತ ಸುಭಾಷ್‌ಗೆ ಅಭಿನಂದನೆಗಳು. ಭಾರತದ ಬ್ಯಾಂಕುಗಳು ಮತ್ತು ಸರ್ಕಾರ ನನ್ನ 6,203 ಕೋಟಿ ರೂಪಾಯಿ ಸಾಲಕ್ಕೆ ಪ್ರತಿಯಾಗಿ 14,100 ಕೋಟಿ ರೂಪಾಯಿಗಳನ್ನು ವಸೂಲಿ ಮಾಡಿರುವುದಾಗಿ ಸ್ವತಃ ಒಪ್ಪಿಕೊಂಡಿವೆ. ಆದರೆ, ಇತರ ಹಲವು ಸಾಲಗಾರರು ತೀರಾ ಅಲ್ಪ ಮೊತ್ತಕ್ಕೆ ಸಾಲ ಇತ್ಯರ್ಥಪಡಿಸಿಕೊಳ್ಳುತ್ತಿದ್ದಾರೆ. ಬಹುಶಃ ಇದೇ ‘ಭಾರತೀಯ ಸಾಲ ಪರಿಹಾರ ನ್ಯಾಯ’ ಇರಬೇಕು. ಇದರ ಬಗ್ಗೆ ಮಾಧ್ಯಮಗಳು ಯಾವುದೇ ಪ್ರಶ್ನೆ ಕೇಳುವುದಿಲ್ಲ,” ಎಂದು ಕಟುವಾಗಿ ಟೀಕಿಸಿದ್ದಾರೆ.
