ಜೂನ್ 21ರಂದು ನೀಟ್-ಯುಜಿ ಮರುಪರೀಕ್ಷೆ ನಡೆಯಲಿದೆ. ಇದಕ್ಕೂ ಮುನ್ನ ರಾಷ್ಟ್ರೀಯ ಪರೀಕ್ಷಾ ಸಂಸ್ಥೆ (ಎನ್ಟಿಎ) ದೇಶ ಮತ್ತು ವಿದೇಶಗಳಲ್ಲಿರುವ 22 ಲಕ್ಷಕ್ಕೂ ಹೆಚ್ಚು ಅಭ್ಯರ್ಥಿಗಳಿಗೆ ಪರೀಕ್ಷೆಗೆ ಸಂಬಂಧಿಸಿದ ಅಪ್ಡೇಟ್ಗಳನ್ನು ಮತ್ತು ಮರುಪರೀಕ್ಷಾ ಕೇಂದ್ರದ ಮಾಹಿತಿಯನ್ನು ನೇರವಾಗಿ ಕಳುಹಿಸಲು ವಾಟ್ಸಾಪ್ ಅನ್ನು ಬಳಸಲು ಪ್ರಾರಂಭಿಸಿದೆ.
ಪ್ರಶ್ನೆ ಪತ್ರಿಕೆ ಸೋರಿಕೆ ಮತ್ತು ಅಕ್ರಮಗಳು ಬೆಳಕಿಗೆ ಬಂದ ಬಳಿಕ ಮೇ 3ರಂದು ನಡೆದಿದ್ದ ನೀಟ್-ಯುಜಿ ಪರೀಕ್ಷೆಯನ್ನು ಮೇ 12ರಂದು ಅಧಿಕೃತವಾಗಿ ರದ್ದುಗೊಳಿಸಲಾಗಿದೆ. ಜೂನ್ 21ರಂದು ಮರುಪರೀಕ್ಷೆ ನಡೆಯಲಿದೆ. ಈ ಪರೀಕ್ಷೆಗೆ ಮುಂಚಿತವಾಗಿ ಐದು ದಿನಗಳವರೆಗೆ ಟೆಲಿಗ್ರಾಮ್ ತಾತ್ಕಾಲಿಕ ನಿಷೇಧಿಸಲಾಗಿದೆ. ಇದೀಗ ವಾಟ್ಸಾಪ್ ಮೂಲಕ ಅಪ್ಡೇಟ್ ನೀಡಲು ಎನ್ಟಿಎ ಆರಂಭಿಸಿದೆ.
ಇದನ್ನೂ ಓದಿ: BREAKING NEWS | ಟೆಲಿಗ್ರಾಮ್ ತಾತ್ಕಾಲಿಕ ನಿಷೇಧ ನಿರ್ಧಾರ ಎತ್ತಿಹಿಡಿದ ದೆಹಲಿ ಹೈಕೋರ್ಟ್
+91 78279 80287 ಅಂಕಿಯಿಂದ ಬರುವ ಸಂದೇಶಗಳು ಅಧಿಕೃತವಾಗಿದೆ. ಈ ವಾಟ್ಸಾಪ್ ಖಾತೆಯಿಂದಲೇ ಸಂದೇಶ ಬಂದಿದೆಯೇ ಎಂದು ಪರಿಶೀಲಿಸಬೇಕು ಎಂದು ಎನ್ಟಿಎ ಅಭ್ಯರ್ಥಿಗಳಿಗೆ ತಿಳಿಸಿದೆ.
ಅಭ್ಯರ್ಥಿಗಳಿಗೆ ನೀಲಿ ಪರಿಶೀಲನಾ ಟಿಕ್ ಮತ್ತು “ನ್ಯಾಷನಲ್ ಟೆಸ್ಟಿಂಗ್ ಏಜೆನ್ಸಿ” ಖಾತೆಯ ಹೆಸರನ್ನು ಪರಿಶೀಲಿಸುವಂತೆ ಸೂಚಿಸಲಾಗಿದೆ. ನೀಲಿ ಟಿಕ್ ಇಲ್ಲದ ಯಾವುದೇ ಸಂಖ್ಯೆಯು ಏಜೆನ್ಸಿಯ ಹೆಸರನ್ನು ಬಳಸುತ್ತಿದ್ದರೂ ಸಹ, ಅದನ್ನು ಅಧಿಕೃತ ಎನ್ಟಿಎ ಖಾತೆ ಎಂದು ಪರಿಗಣಿಸಬಾರದು ಎಂದು ಸಂಸ್ಥೆ ಎಚ್ಚರಿಸಿದೆ.
“ನಾವು ನಿಮ್ಮ ಬಳಿ ಯಾವುದೇ ಪ್ರಶ್ನೆ ಕೇಳುವುದಿಲ್ಲ, ಒಟಿಪಿ ಅಥವಾ ವೈಯಕ್ತಿಕ ವಿವರಗಳನ್ನು ಕೇಳುವುದಿಲ್ಲ ಅಥವಾ ಯಾವುದೇ ಪಾವತಿ ಮಾಡಲು ಹೇಳಲ್ಲ. ಈ ರೀತಿ ಯಾವುದೇ ಮಾಹಿತಿ ಕೇಳಿದರೆ ಅದು ಮೋಸ ಎಂದು ತಿಳಿಯಿರಿ” ಎಂದು ಎನ್ಟಿಎ ಸ್ಪಷ್ಟಪಡಿಸಿದೆ.
