ಬಿಹಾರ ರಾಜಧಾನಿ ಪಟನಾದಾದ್ಯಂತ ‘ಬಿಹಾರದ ಮುಂದಿನ ಮುಖ್ಯಮಂತ್ರಿ’ ನಿಶಾಂತ್ ಕುಮಾರ್ ಎಂಬ ಪೋಸ್ಟರ್‌ಗಳು ಕಾಣಿಸಿಕೊಂಡಿದೆ. ನಿಶಾಂತ್ ಬೆಂಬಲಿಗರು, ಜನತಾ ದಳ (ಯುನೈಟೆಡ್) -ಜೆಡಿಯು ಕಾರ್ಯಕರ್ತರು ನಿಶಾಂತ್ ಅವರನ್ನೇ ಸಿಎಂ ಮಾಡಬೇಕು ಎಂದು ಆಗ್ರಹಿಸಿ ಪೋಸ್ಟರ್‌ಗಳನ್ನು ಹಾಕಿದ್ದಾರೆ.
ತಮ್ಮನ್ನು ತಾವು “ನಿತೀಶ್ ಸೇವಕರು” ಎಂದು ಗುರುತಿಸಿಕೊಂಡಿರುವ ಬೆಂಬಲಿಗರು ಭಾನುವಾರ ಮುಂಜಾನೆ ಈ ಪೋಸ್ಟರ್‌ಗಳನ್ನು ಹಾಕಿದ್ದಾರೆ. ನಿಶಾಂತ್ ನಾಯಕತ್ವದ ಪಾತ್ರವನ್ನು ವಹಿಸಿಕೊಳ್ಳಬೇಕು ಎಂದು ಈ ಪೋಸ್ಟರ್‌ಗಳ ಮೂಲಕ ಒತ್ತಾಯಿಸಲಾಗಿದೆ.
ಇದನ್ನು ಓದಿದ್ದೀರಾ? ನಿತೀಶ್ ಕುಮಾರ್ ಪುತ್ರ ನಿಶಾಂತ್ ಅಧಿಕೃತವಾಗಿ ಜೆಡಿಯು ಸೇರ್ಪಡೆ
ಹಿಂದಿಯಲ್ಲಿ ಬರೆದಿರುವ ಒಂದು ಪೋಸ್ಟರ್‌ನಲ್ಲಿ, “ನಮಗೆ ಬುಲ್ಡೋಜರ್ ಅಗತ್ಯವಿಲ್ಲ, ಬಿಹಾರದಲ್ಲಿ ಗಲಭೆ-ಅಶಾಂತಿಯೂ ಅಗತ್ಯವಿಲ್ಲ. ನಮಗೆ ಲೋಕನಾಯಕ ಬೇಕು. ಅವರು ನೆರಳಿನಿಂದ ಹೊರಬರುವ ಸಮಯ ಬಂದಿದೆ. ನಮಗೆ ಯುವ ನಾಯಕ ನಿಶಾಂತ್ ಕುಮಾರ್ ಬೇಕು” ಎಂದು ಉಲ್ಲೇಖಿಸಲಾಗಿದೆ. ಹಾಗೆಯೇ ಹಲವಾರು ಜೆಡಿಯು ನಾಯಕರ ಚಿತ್ರಗಳನ್ನೂ ಹಾಕಲಾಗಿದೆ.
ಏಪ್ರಿಲ್ 10ರಂದು ಮುಖ್ಯಮಂತ್ರಿ ನಿತೀಶ್ ಕುಮಾರ್ ರಾಜ್ಯಸಭಾ ಸದಸ್ಯರಾಗಿ ಪ್ರಮಾಣ ವಚನ ಸ್ವೀಕರಿಸಿದ ಕೆಲವು ದಿನಗಳ ನಂತರ ಈ ಪೋಸ್ಟರ್‌ಗಳು ಕಾಣಿಸಿಕೊಂಡಿದೆ. ನಿಶಾಂತ್ ಕುಮಾರ್ ಉಪಮುಖ್ಯಮಂತ್ರಿ ಹುದ್ದೆಯನ್ನು ವಹಿಸಿಕೊಳ್ಳುವ ಸಾಧ್ಯತೆಯಿದೆ. ಆದಾಗ್ಯೂ, ಸಿಎಂ ಅಥವಾ ಡಿಸಿಎಂ ಹುದ್ದೆಯ ಬಗ್ಗೆ ಇನ್ನೂ ಯಾವುದೇ ಅಧಿಕೃತ ಘೋಷಣೆಗಳಾಗಿಲ್ಲ.
ನಿತೀಶ್ ರಾಜ್ಯಸಭೆ ಸದಸ್ಯರಾಗುವುದರಿಂದಾಗಿ ಬಿಹಾರ ಸರ್ಕಾರದ ನಿಯಂತ್ರಣವು ಇದೀಗ ಸಂಪೂರ್ಣವಾಗಿ ಬಿಜೆಪಿ ಕೈಸೇರಲಿದೆ. ಈ ಹಿಂದೆ ಜೆಡಿಯು ಕೋಟೆಯಾಗಿದ್ದ ಬಿಹಾರದಲ್ಲಿ ಬಿಜೆಪಿ ವಿಸ್ತಾರಗೊಳಿಸುವ ಎಲ್ಲ ಪ್ರಯತ್ನಗಳನ್ನು ಬಿಜೆಪಿ ಹಂತಹಂತವಾಗಿ ಮಾಡಿ ಇದೀಗ ಸಫಲವಾಗುತ್ತಿದೆ ಎಂಬ ವಾದಗಳೂ ಇವೆ.
ಅಷ್ಟಕ್ಕೂ ನಿಶಾಂತ್ ಕುಮಾರ್ ಈ ಹಿಂದೆ ಹಲವು ಬಾರಿ ತಾವು ರಾಜಕೀಯದಿಂದ ದೂರ ಇರುವುದಾಗಿ ಹೇಳಿದವರು. ಹಾಗೆಯೇ ಆಧ್ಯಾತ್ಮದತ್ತ ಒಲವು ಹೊಂದಿರುವವರು. ಆದರೆ ಇತ್ತೀಚೆಗೆ ಸಾರ್ವಜನಿಕವಾಗಿ ಕಾಣಿಸಿಕೊಂಡು ರಾಜಕೀಯ ಆಸಕ್ತಿ ತೋರಿಸಿದ್ದಾರೆ. ಜೆಡಿಯು ಸೇರ್ಪಡೆಯೂ ಆಗಿದ್ದಾರೆ.
