ಸುಮಾರು 28 ವರ್ಷದ ಮಹಿಳೆಯೊಬ್ಬರು ತನ್ನ ಐದು ತಿಂಗಳಿನಿಂದ ಏಳು ವರ್ಷದವರೆಗಿನ ನಾಲ್ವರು ಹೆಣ್ಣು ಮಕ್ಕಳನ್ನು ಬಾವಿಗೆ ತಳ್ಳಿ ಕೊಂದು ತಾನೂ ಆತ್ಮಹತ್ಯೆ ಮಾಡಿಕೊಂಡ ಘಟನೆ ಮಧ್ಯಪ್ರದೇಶದ ಬುಂದೇಲ್‌ಖಂಡ್ ಪ್ರದೇಶದ ಸಾಗರ್ ಜಿಲ್ಲೆಯಲ್ಲಿ ನಡೆದಿದೆ.
ಬುಧವಾರವಷ್ಟೇ ಮಧ್ಯಪ್ರದೇಶದ ನಿಮಾರ್ ಪ್ರದೇಶದ ಖಾರ್ಗೋನ್ ಜಿಲ್ಲೆಯಲ್ಲಿ ಮಹಿಳೆಯೊಬ್ಬರು ತನ್ನ ಎರಡು ಮತ್ತು ನಾಲ್ಕು ವರ್ಷದ ಇಬ್ಬರು ಗಂಡು ಮಕ್ಕಳನ್ನು ಬಾವಿಗೆ ತಳ್ಳಿ ನಂತರ ತಾನೂ 15 ದಿನಗಳ ಮಗುವಿನೊಂದಿಗೆ ಆತ್ಮಹತ್ಯೆಗೆ ಯತ್ನಿಸಿದ್ದಳು. ಬಾವಿಗೆ ಹಾರಿ ಬಳಿಕ ಮಹಿಳೆ ಅಲ್ಲೇ ಇದ್ದ ಹಗ್ಗದ ಏಣಿಯ ಸಹಾಯದಿಂದ ಬಾವಿಯಿಂದ ಹೊರಬಂದಿದ್ದರು. 15 ದಿನಗಳ ಮಗು ಮಾತ್ರ ಸಾವನ್ನಪ್ಪಿತ್ತು. ಇದಾದ ಒಂದು ದಿನದಲ್ಲೇ ಮತ್ತೊಂದು ಘಟನೆ ಮಧ್ಯಪ್ರದೇಶದಲ್ಲೇ ವರದಿಯಾಗಿದೆ.
ಇದನ್ನು ಓದಿದ್ದೀರಾ? ಸಾಲಬಾಧೆ: ಗಂಡ-ಮಕ್ಕಳನ್ನು ಕೊಂದು ಮಹಿಳೆ ಆತ್ಮಹತ್ಯೆಗೆ ಯತ್ನ
ಖಾರ್ಗೋನ್‌ನಲ್ಲಿನ ಮಹಿಳೆ ಪ್ರಸವಾನಂತರದ ಖಿನ್ನತೆಯಿಂದ (Postpartum Depression – PPD) ಬಳಲುತ್ತಿದ್ದು, ಇದರಿಂದಾಗಿ ಮೂರು ಮಕ್ಕಳನ್ನು ತಾನು ನೋಡಿಕೊಳ್ಳುವ ಜವಾಬ್ದಾರಿಯನ್ನು ನಿಭಾಯಿಸುವುದು ಕಷ್ಟಕರವಾಗಿತ್ತು ಎಂದು ಪ್ರಾಥಮಿಕ ತನಿಖೆಯಿಂದ ತಿಳಿದುಬಂದಿದೆ.
ಸಾಗರ ಜಿಲ್ಲೆಯ ಕೆಸ್ಲಿ ಪೊಲೀಸ್ ಠಾಣೆ ವ್ಯಾಪ್ತಿಯ ಖಮರಿಯಾ ಗ್ರಾಮದಲ್ಲಿ ಗುರುವಾರ ನಡೆದ ಘಟನೆಯಲ್ಲಿ ತಾಯಿ ಸವಿತಾ ಲೋಧಿ (28) ಮಕ್ಕಳನ್ನು ಕೊಂದು ತಾನೂ ಸಾಯಲು ಕಾರಣವೇನು ಎಂಬುದು ತಿಳಿದು ಬಂದಿಲ್ಲ ಎಂದು ಸಾಗರ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ವಿಕಾಸ್ ಕುಮಾರ್ ಸಹವಾಲ್ ಹೇಳಿದ್ದಾರೆ. ಆದರೆ ಈ ದುರ್ಘಟನೆಗೂ ಪ್ರಸವಾನಂತರದ ಖಿನ್ನತೆ ಕಾರಣವಾಗಿರಬಹುದು ಎನ್ನಲಾಗಿದೆ.
ಮುಖ್ಯವಾಗಿ, ಸವಿತಾ ಅವರ ಪತಿ ಚಂದ್ರಭಾನ್ ಲೋಧಿ ವಲಸೆ ಕಾರ್ಮಿಕರಾಗಿದ್ದು, ಕಳೆದ ಒಂದೂವರೆ ವರ್ಷಗಳಿಂದ ಗುಜರಾತ್‌ನಲ್ಲಿ ಕೆಲಸ ಮಾಡುತ್ತಿದ್ದರು. ಘಟನೆಯ ಬಗ್ಗೆ ಮಾಹಿತಿ ಪಡೆದ ನಂತರ ಸಾಗರ್‌ಗೆ ಹಿಂತಿರುಗುತ್ತಿದ್ದಾರೆ. ಸವಿತಾ ತನ್ನ ಮಾವ ಮತ್ತು ನಾಲ್ವರು ಹೆಣ್ಣುಮಕ್ಕಳೊಂದಿಗೆ ಗ್ರಾಮದಲ್ಲಿ ವಾಸಿಸುತ್ತಿದ್ದರು. ನಾಲ್ಕು ಹೆಣ್ಣುಮಕ್ಕಳ ಜನನದಿಂದಾಗಿ ಸವಿತಾ ಮತ್ತು ಅವರ ಪತಿ ನಡುವಿನ ಸಂಬಂಧ ಹದಗೆಟ್ಟಿರಬಹುದು, ಗಂಡು ಮಗುವಿಲ್ಲ ಎಂದು ಮಹಿಳೆಯ ಮೇಲೆ ಒತ್ತಡ ಹೇರಿರಬಹುದು ಎಂಬ ಸಾಧ್ಯತೆಯ ಬಗ್ಗೆಯೂ ಸದ್ಯ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.
ಇದನ್ನು ಓದಿದ್ದೀರಾ? ಬೆಂಗಳೂರು | ನೀರಿಗಾಗಿ ನೆರೆಹೊರೆಯವರೊಂದಿಗೆ ಜಗಳ ; ಮಹಿಳೆ ಆತ್ಮಹತ್ಯೆ
ಯಾರೂ ಗಮನಿಸಿದ ಪ್ರಸವಾನಂತರದ ಖಿನ್ನತೆ
ಮಗುವಿನ ಜನನದ ನಂತರ ಅನೇಕ ಮಹಿಳೆಯರು ಅನುಭವಿಸುವ ಒಂದು ಸಾಮಾನ್ಯ ಮತ್ತು ಗಂಭೀರವಾದ ಮಾನಸಿಕ ಆರೋಗ್ಯ ಸಮಸ್ಯೆ ಪ್ರಸವಾನಂತರದ ಖಿನ್ನತೆ. ಈ ಖಿನ್ನತೆ ಅತಿ ತೀವ್ರವಾಗಿದ್ದು, ದೀರ್ಘಕಾಲದವರೆಗೆ ಇರುತ್ತದೆ. ಈ ಖಿನ್ನತೆಯಿಂದಾಗಿ ಪದೇ ಪದೇ ಅಳಬೇಕೆನಿಸುತ್ತದೆ ಮತ್ತು ನಿರಾಸಕ್ತಿ ಉಂಟಾಗುತ್ತದೆ. ಮಗುವಿನ ಹತ್ತಿರ ಹೋಗಲು ಅಥವಾ ಮಗುವನ್ನು ಪ್ರೀತಿಸಲು ಕಷ್ಟವಾಗುತ್ತದೆ. ಕಾರಣವಿಲ್ಲದೆ ಸಿಟ್ಟು ಬರುವುದು ಅಥವಾ ಅತಿಯಾದ ಆತಂಕ ಉಂಟಾಗಬಹುದು. ಆದರೆ ಈ ಸಂದರ್ಭದಲ್ಲಿ ಸಮಾಜ ಮಹಿಳೆಯದ್ದೇ ತಪ್ಪು ಎಂಬಂತೆ ನೋಡುತ್ತದೆ.
ವಾಸ್ತವದಲ್ಲಿ ಇದು ತಾಯಿಯ ತಪ್ಪಿನಿಂದ ಆಗುವಂತದ್ದಲ್ಲ. ಹೆರಿಗೆಯ ನಂತರ ದೇಹದಲ್ಲಿ ಈಸ್ಟ್ರೊಜೆನ್ ಮತ್ತು ಪ್ರೊಜೆಸ್ಟರಾನ್ ಹಾರ್ಮೋನ್‌ಗಳ ಮಟ್ಟ ದಿಢೀರನೆ ಕುಸಿಯುತ್ತದೆ. ನಿದ್ರೆಯ ಕೊರತೆ, ದೈಹಿಕ ನೋವು ಮತ್ತು ಹೊಸ ಜವಾಬ್ದಾರಿಯ ಒತ್ತಡ ಇರುತ್ತದೆ. ಇವೆಲ್ಲವೂ ಖಿನ್ನತೆಗೆ ಕಾರಣವಾಗುತ್ತದೆ. ಈ ಹಿಂದೆಯೇ ಮಹಿಳೆಗೆ ಬೇರೆ ವಿಚಾರದಲ್ಲಿ ಖಿನ್ನತೆ ಇದ್ದರೆ, ಸಮಸ್ಯೆ ಇನ್ನಷ್ಟೂ ಆಳವಾಗಬಹುದು. ಆದ್ದರಿಂದ ಮನಶಾಸ್ತ್ರಜ್ಞರೊಂದಿಗೆ ಮಾತನಾಡುವುದು ಅಗತ್ಯ. ಜತೆಗೆ ಪತಿ, ಕುಟುಂಬಸ್ಥರು, ಸ್ನೇಹಿತರ ಬೆಂಬಲವೂ ಬೇಕು.
ನೆನಪಿಡಿ: ಸಮಸ್ಯೆಗಳಿಗೆ ಆತ್ಮಹತ್ಯೆ ಪರಿಹಾರವಲ್ಲ… ಆತ್ಮಹತ್ಯೆಗಳ ಕುರಿತು ಚರ್ಚಿಸುವುದು ಕೂಡ ಕೆಲವರಿಗೆ ಪ್ರಚೋದನೆ ನೀಡಬಹುದು. ಸಮಸ್ಯೆಗಳ ಬಗ್ಗೆ ಆಪ್ತರೊಂದಿಗೆ ಹಂಚಿಕೊಳ್ಳುವುದರಿಂದ, ಸಮಾಲೋಚನೆ ನಡೆಸುವುದರಿಂದ ಆತ್ಮಸ್ಥೈರ್ಯ ಹೆಚ್ಚುತ್ತದೆ. ಆತ್ಮಹತ್ಯೆಗಳನ್ನು ತಡೆಯಬಹುದು. ತುರ್ತು ಪರಿಸ್ಥಿತಿಯಿದ್ದರೆ ಕರೆ ಮೂಲಕ ವೈದ್ಯರನ್ನು ಸಂಪರ್ಕಿಸಿ. ಬೆಂಗಳೂರು ಸಹಾಯವಾಣಿ 080-25497777, ನಿಮಾನ್ಸ್ ಸಹಾಯವಾಣಿ 080-46110007, ಆರೋಗ್ಯ ಸಹಾಯವಾಣಿ 104.
