ಮೀಸಲಾತಿ ನೀತಿಯ ಮರುಪರಿಶೀಲನೆ ಮತ್ತು ಒಳಮೀಸಲಾತಿ ಕುರಿತ ಕೇಂದ್ರ ಸರ್ಕಾರದ ಭಾಗವಾಗಿರುವವರು ನೀಡುತ್ತಿರುವ ಹೇಳಿಕೆಗಳು ಆಡಳಿತಾರೂಢ ಎನ್‌ಡಿಎ ಮೈತ್ರಿಕೂಟದಲ್ಲಿ ಒಳಜಗಳ ಸೃಷ್ಟಿಸಿದೆ. ಕೇಂದ್ರ ಸಂಪುಟದಲ್ಲಿ ಸಚಿವಾರಾಗಿರುವ ಇಬ್ಬರು ಹಿರಿಯ ನಾಯಕರ ನಡುವೆ ಬಹಿರಂಗ ಸಂಘರ್ಷ ತೀವ್ರಗೊಂಡಿದೆ. ಕೇಂದ್ರ ಸಚಿವ, ಲೋಕ ಜನಶಕ್ತಿ ಪಕ್ಷದ (ರಾಮ್ ವಿಲಾಸ್) ನಾಯಕ ಚಿರಾಗ್ ಪಾಸ್ವಾನ್ ಅವರು ತಮ್ಮ ಸಹೋದ್ಯೋಗಿ ಕೇಂದ್ರ ಸಚಿವ, ‘ಹಿಂದೂಸ್ತಾನಿ ಅವಾಮ್ ಮೋರ್ಚಾ’ (ಸೆಕ್ಯುಲರ್) ಮುಖ್ಯಸ್ಥ ಜಿತನ್ ರಾಮ್ ಮಾಂಝಿ ಅವರ ರಾಜೀನಾಮೆಗೆ ಪಟ್ಟು ಹಿಡಿದಿದ್ದಾರೆ.
ಪ್ರಸ್ತುತ ಇರುವ ಮೀಸಲಾತಿ ವ್ಯವಸ್ಥೆಯೊಳಗೆ ಪರಿಶಿಷ್ಟ ಜಾತಿ (SC) ಮತ್ತು ಪರಿಶಿಷ್ಟ ಪಂಗಡಗಳಿಗೆ (ST) ಒಳಮೀಸಲಾತಿ ಕಲ್ಪಿಸುವುದನ್ನು ಮಾಂಝಿ ಅವರ HAM(S) ಪಕ್ಷ ಬೆಂಬಲಿಸಿದೆ. “ಮೀಸಲಾತಿಯ ನೈಜ ಲಾಭಗಳು ಐತಿಹಾಸಿಕವಾಗಿ ವಂಚಿತರಾದ ಅತ್ಯಂತ ಹಿಂದುಳಿದ ದಲಿತ ಸಮುದಾಯಗಳಿಗೆ ತಲುಪುತ್ತಿವೆಯೇ ಎಂಬುದನ್ನು ಪರಿಶೀಲಿಸಲು ಮೀಸಲಾತಿ ನೀತಿಯನ್ನು ಮರುಪರಿಶೀಲಿಸಬೇಕು. SC/ST ಸಮುದಾಯಗಳೊಳಗೆ ಒಳಮೀಸಲಾತಿ ತರಬೇಕು” ಎಂದು ಮಾಂಝಿ ಅವರ ಪುತ್ರ, ಬಿಹಾರ ಸರ್ಕಾರದ ಸಚಿವ ಸಂತೋಷ್ ಕುಮಾರ್ ಸುಮನ್ ವಾದಿಸಿದ್ದರು.
ಈ ನಿಲುವಿಗೆ ತೀವ್ರ ಆಕ್ಷೇಪ ವ್ಯಕ್ತಪಡಿಸಿರುವ ಚಿರಾಗ್ ಪಾಸ್ವಾನ್, “ಮೀಸಲಾತಿ ನೀತಿಯನ್ನೇ ಮರುಪರಿಶೀಲಿಸುವಂತೆ ಮಾತನಾಡುವುದು ಸಾಮಾಜಿಕ ನ್ಯಾಯದ ಮೂಲಭೂತ ತತ್ವಗಳಿಗೆ ಎಸಗುವ ದ್ರೋಹ. ಇಂತಹ ಅಪಾಯಕಾರಿ ಅಭಿಪ್ರಾಯ ಹೊಂದಿರುವ ಜಿತನ್ ರಾಮ್ ಮಾಂಝಿ ಕೇಂದ್ರ ಸಚಿವ ಸಂಪುಟದಲ್ಲಿ ಮುಂದುವರಿಯುವ ಅರ್ಹತೆ ಕಳೆದುಕೊಂಡಿದ್ದಾರೆ” ಎಂದು ಹೇಳಿದ್ದಾರೆ.
ಬಿಹಾರ ರಾಜಕೀಯದಲ್ಲಿ ದಲಿತ ಮತ್ತು ಮಹಾದಲಿತ (ಅತೀ ಹಿಂದುಳಿತ ದಲಿತ) ಮತಬ್ಯಾಂಕ್‌ಗಳ ಮೇಲೆ ಭಾರಿ ಪ್ರಭಾವ ಹೊಂದಿರುವ ಈ ಇಬ್ಬರೂ ನಾಯಕರ ಕಾದಾಟವು ಎನ್‌ಡಿಎ ಮೈತ್ರಿಕೂಟಕ್ಕೆ ಹೊಸ ತಲೆನೋವಾಗಿ ಪರಿಣಮಿಸಿದೆ. ಒಳಮೀಸಲಾತಿ ಮೂಲಕ ಅತ್ಯಂತ ಹಿಂದುಳಿದವರಿಗೆ ನ್ಯಾಯ ಸಿಗಲಿ ಎಂಬುದು ಮಾಂಝಿ ವಾದವಾದರೆ, ಇದು ಮೂಲ ಮೀಸಲಾತಿ ವ್ಯವಸ್ಥೆಯನ್ನೇ ದುರ್ಬಲಗೊಳಿಸುವ ಪ್ರಯತ್ನ ಎಂದು ಪಾಸ್ವಾನ್ ವಾದಿಸಿದ್ದಾರೆ. ಲೋಕಸಭೆ ಮತ್ತು ಬಿಹಾರದ ಮುಂದಿನ ಚುನಾವಣಾ ಸಮೀಕರಣಗಳ ಮೇಲೂ ಈ ಸೈದ್ಧಾಂತಿಕ ಸಂಘರ್ಷ ದೊಡ್ಡ ಮಟ್ಟದ ಪರಿಣಾಮ ಬೀರುವ ಮುನ್ಸೂಚನೆ ನೀಡಿದೆ.
