ಸರಣಿ ರಜೆಗಳ ಕಾರಣದಿಂದಾಗಿ ವಹಿವಾಟು ದಿನಗಳು ಕಡಿಮೆಯಿದ್ದ ಕಳೆದ ವಾರದ ಷೇರುಪೇಟೆಯಲ್ಲಿ ನೀರಸ ಪ್ರತಿಕ್ರಿಯೆ ವ್ಯಕ್ತವಾಗಿದ್ದು, ದೇಶದ ಟಾಪ್ 10 ಮೌಲ್ಯಯುತ ಕಂಪನಿಗಳ ಪೈಕಿ ಏಳು ಕಂಪನಿಗಳ ಮಾರುಕಟ್ಟೆ ಮೌಲ್ಯದಲ್ಲಿ ಒಟ್ಟಾರೆ 1.54 ಲಕ್ಷ ಕೋಟಿ ರೂಪಾಯಿಗಳ(ಈ ಮೊತ್ತವು ಅಸ್ಸಾಂ, ಪಂಜಾಬ್ ರಾಜ್ಯಗಳ ವಾರ್ಷಿಕ ಬಜೆಟ್‌ನ ಅಂದಾಜು ಮೊತ್ತ ) ಬೃಹತ್ ಕುಸಿತ ದಾಖಲಾಗಿದೆ. ಈ ನಷ್ಟದಲ್ಲಿ ಮುಕೇಶ್ ಅಂಬಾನಿ ನೇತೃತ್ವದ ‘ರಿಲಯನ್ಸ್ ಇಂಡಸ್ಟ್ರೀಸ್’ ಅತಿ ಹೆಚ್ಚು ಹೊಡೆತ ತಿಂದಿದೆ.
ಕಳೆದ ವಾರದ ವಹಿವಾಟಿನಲ್ಲಿ ಬಾಂಬೆ ಸ್ಟಾಕ್ ಎಕ್ಸ್‌ಚೇಂಜ್ (BSE) ಸಂವೇದಿ ಸೂಚ್ಯಂಕ ಸೆನ್ಸೆಕ್ಸ್ 639.61 ಅಂಕಗಳಷ್ಟು (ಶೇ. 0.84) ಪತನಗೊಂಡಿದ್ದರೆ, ನ್ಯಾಷನಲ್ ಸ್ಟಾಕ್ ಎಕ್ಸ್‌ಚೇಂಜ್ (NSE) ಸೂಚ್ಯಂಕ ನಿಫ್ಟಿ 171.55 ಅಂಕಗಳಷ್ಟು (ಶೇ. 0.72) ಇಳಿಕೆ ಕಂಡಿದೆ. ಮಾರುಕಟ್ಟೆಯಲ್ಲಿನ ಈ ಏರಿಳಿತವು ದಿಗ್ಗಜ ಕಂಪನಿಗಳ ಮಾರುಕಟ್ಟೆ ಬಂಡವಾಳೀಕರಣದ ಮೇಲೆ ನೇರ ಮತ್ತು ತೀವ್ರ ಪರಿಣಾಮ ಬೀರಿದೆ.
ಟಾಪ್ 10 ಕಂಪನಿಗಳ ಪೈಕಿ ರಿಲಯನ್ಸ್ ಇಂಡಸ್ಟ್ರೀಸ್, ಎಚ್‌ಡಿಎಫ್‌ಸಿ ಬ್ಯಾಂಕ್, ಭಾರ್ತಿ ಏರ್‌ಟೆಲ್, ಐಸಿಐಸಿಐ ಬ್ಯಾಂಕ್, ಟಾಟಾ ಕನ್ಸಲ್ಟೆನ್ಸಿ ಸರ್ವಿಸಸ್ (TCS), ಬಜಾಜ್ ಫೈನಾನ್ಸ್ ಹಾಗೂ ಹಿಂದೂಸ್ತಾನ್ ಯೂನಿಲಿವರ್ ಸಂಸ್ಥೆಗಳ ಮಾರುಕಟ್ಟೆ ಮೌಲ್ಯ ಗಣನೀಯವಾಗಿ ಕುಸಿದಿದೆ.
ಇದನ್ನು ಓದಿದ್ದೀರಾ? ಯಾರಿಗೆ ಕೊಕ್, ಯಾರಿಗೆ ಅವಕಾಶ; ನೂತನ ಸಂಪುಟದಲ್ಲಿ ಶುರುವಾಗಲಿದೆಯೆ ಮತ್ತಷ್ಟು ಪೀಕಲಾಟ?
ರಿಲಯನ್ಸ್ ಸಂಸ್ಥೆಯು ಗರಿಷ್ಠ 46,078.3 ಕೋಟಿ ರೂ. ಮೌಲ್ಯವನ್ನು ಕಳೆದುಕೊಂಡಿದ್ದು, ಅದರ ಒಟ್ಟು ಮೌಲ್ಯ 17,87,039.40 ಕೋಟಿ ರೂ.ಗೆ ಇಳಿಕೆಯಾಗಿದೆ.
ಎಚ್‌ಡಿಎಫ್‌ಸಿ ಬ್ಯಾಂಕ್ 33,333.06 ಕೋಟಿ ರೂ. ನಷ್ಟದೊಂದಿಗೆ 11,46,641.84 ಕೋಟಿ ರೂ.ಗೆ ಕುಸಿದಿದೆ. ಭಾರ್ತಿ ಏರ್‌ಟೆಲ್ 25,408.96 ಕೋಟಿ ರೂ. ಹಾಗೂ ಟಿಸಿಎಸ್ 22,920.58 ಕೋಟಿ ರೂ. ನಷ್ಟ ಅನುಭವಿಸಿವೆ. ಉಳಿದಂತೆ, ಹಿಂದೂಸ್ತಾನ್ ಯೂನಿಲಿವರ್ (13,169.46 ಕೋಟಿ ರೂ.), ಬಜಾಜ್ ಫೈನಾನ್ಸ್ (7,253.24 ಕೋಟಿ ರೂ.) ಮತ್ತು ಐಸಿಐಸಿಐ ಬ್ಯಾಂಕ್ (6,311.41 ಕೋಟಿ ರೂ.) ತಮ್ಮ ಮೌಲ್ಯವನ್ನು ಕಳೆದುಕೊಂಡಿವೆ.
ಒಂದೆಡೆ ಏಳು ದಿಗ್ಗಜ ಕಂಪನಿಗಳು ನಷ್ಟ ಅನುಭವಿಸಿದರೆ, ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ (SBI), ಲಾರ್ಸೆನ್ ಅಂಡ್ ಟೂಬ್ರೊ (L&T) ಹಾಗೂ ಲೈಫ್ ಇನ್ಶೂರೆನ್ಸ್ ಕಾರ್ಪೊರೇಷನ್ ಆಫ್ ಇಂಡಿಯಾ (LIC) ಸಂಸ್ಥೆಗಳು ಲಾಭ ಗಳಿಸುವ ಮೂಲಕ ಹೂಡಿಕೆದಾರರಿಗೆ ತುಸು ರಿಲೀಫ್ ನೀಡಿವೆ. ಎಲ್ ಆಂಡ್ ಟಿ ಮಾರುಕಟ್ಟೆ ಮೌಲ್ಯ 20,608.43 ಕೋಟಿ ರೂ.ಗಳಷ್ಟು ಏರಿಕೆಯಾಗಿ 5,60,836.64 ಕೋಟಿ ರೂ. ತಲುಪಿದೆ. ಅದೇ ರೀತಿ, ಎಸ್‌ಬಿಐ ಮೌಲ್ಯ 13,753.62 ಕೋಟಿ ರೂ. ಹಾಗೂ ಎಲ್‌ಐಸಿ ಮೌಲ್ಯ 6,040.37 ಕೋಟಿ ರೂ.ಗಳಷ್ಟು ಹೆಚ್ಚಳ ಕಂಡಿದೆ.
