ಡೊನಾಲ್ಡ್ ಟ್ರಂಪ್ ಆಡಳಿತವು ವೀಸಾ ಹಾಗೂ ವಲಸೆ ನಿಯಮಗಳನ್ನು ನಿರಂತರವಾಗಿ ಕಠಿಣಗೊಳಿಸುತ್ತಿರುವುದರಿಂದ, ಅಮೆರಿಕದಲ್ಲಿ ಉದ್ಯೋಗ ಮಾಡುತ್ತಿರುವ ಮತ್ತು ಉನ್ನತ ಶಿಕ್ಷಣ ಪಡೆಯಲು ಬಯಸುವ ಭಾರತೀಯರಲ್ಲಿ ಹೊಸ ಆತಂಕ ಮೂಡಿದೆ. H-1B ವೀಸಾ ನವೀಕರಣದ ವಿಳಂಬ ಹಾಗೂ ಸಂದರ್ಶನದ ದಿನಾಂಕಗಳು ಸಿಗದಿರುವುದು ಹಲವರ ಪ್ರಯಾಣ ಯೋಜನೆಗಳನ್ನೂ ಅಸ್ತವ್ಯಸ್ತಗೊಳಿಸಿದೆ. ಈ ಸ್ಥಿತಿ ಕುಟುಂಬ ಭೇಟಿಗಳು, ಉದ್ಯೋಗ ಬದಲಾವಣೆ ಮತ್ತು ವಿದೇಶ ಪ್ರಯಾಣದ ನಿರ್ಧಾರಗಳ ಮೇಲೂ ನೇರ ಪರಿಣಾಮ ಬೀರಿದೆ.
ಅಮೆರಿಕದ ವಿಶ್ವವಿದ್ಯಾಲಯವೊಂದರ ಪ್ರಾಧ್ಯಾಪಕ ನಿಲೋತ್ಪಲ್ ಸನ್ಯಾಲ್ ತಮ್ಮ H-1B ವೀಸಾ ವಿಸ್ತರಣೆಗೆ ಮಾರ್ಚ್‌ನಲ್ಲೇ ಅರ್ಜಿ ಸಲ್ಲಿಸಿದ್ದರೂ, ಪ್ರಕ್ರಿಯೆಗೆ ಸುಮಾರು ಹತ್ತೂವರೆ ತಿಂಗಳು ಬೇಕಾಗಬಹುದು ಎಂದು ತಿಳಿಸಿದ್ದಾರೆ. ಭಾರತಕ್ಕೆ ಬಂದರೆ ವೀಸಾ ಮುದ್ರೆ ದೊರೆಯದೆ ಪುನಃ ಅಮೆರಿಕ ಪ್ರವೇಶಿಸಲು ಸಾಧ್ಯವಾಗದ ಅಪಾಯವಿರುವುದರಿಂದ ಕುಟುಂಬವನ್ನು ಭೇಟಿಯಾಗುವ ಯೋಜನೆಯನ್ನು ಅವರು ಮುಂದೂಡಿದ್ದಾರೆ. ಸದ್ಯ ಭಾರತದಲ್ಲಿ 2026ರ ಸಂದರ್ಶನದ ಅಪಾಯಿಂಟ್‌ಮೆಂಟ್‌ಗಳು ಲಭ್ಯವಿಲ್ಲದಿರುವುದು ಅವರ ಚಿಂತೆಯನ್ನು ಮತ್ತಷ್ಟು ಹೆಚ್ಚಿಸಿದೆ.
‘ಅಮೆರಿಕನ್ನರಿಗೆ ಹೆಚ್ಚಿನ ಉದ್ಯೋಗ’ ಎಂಬ ಘೋಷಣೆಯೊಂದಿಗೆ ಟ್ರಂಪ್ ಸರ್ಕಾರ ಅಕ್ರಮ ವಲಸೆಯ ಜೊತೆಗೆ ಕಾನೂನುಬದ್ಧ ವಲಸೆಯ ಮಾರ್ಗಗಳ ಮೇಲೂ ಹಲವು ನಿರ್ಬಂಧಗಳನ್ನು ಹೇರಿದೆ. H-1B, L-1 ವೀಸಾ ಮತ್ತು ಗ್ರೀನ್ ಕಾರ್ಡ್ ಪ್ರಕ್ರಿಯೆಗಳಲ್ಲಿ ಹೆಚ್ಚಿದ ಪರಿಶೀಲನೆ, ದೀರ್ಘ ಕಾಯುವಿಕೆ ಹಾಗೂ ಹೊಸ ಷರತ್ತುಗಳು ವಿದೇಶಿ ವೃತ್ತಿಪರರ ಜೀವನದಲ್ಲಿ ಅನಿಶ್ಚಿತತೆ ಹೆಚ್ಚಿಸಿವೆ. ಇದರಿಂದ ದೇಶದೊಳಗಿನ ವಿಮಾನ ಪ್ರಯಾಣಕ್ಕೂ ಕೆಲವರು ಹಿಂಜರಿಯುತ್ತಿದ್ದಾರೆ ಎಂದು ವಲಸೆ ವಕೀಲರು ಹೇಳಿದ್ದಾರೆ.
ಹೊಸ ಪ್ರಸ್ತಾವದಂತೆ ಕೆಲವು H-1B ಅರ್ಜಿಗಳಿಗೆ ಸಾಮಾನ್ಯ ಶುಲ್ಕದ ಜೊತೆಗೆ ಭಾರಿ ಹೆಚ್ಚುವರಿ ಮೊತ್ತ ಪಾವತಿಸಬೇಕಾಗಬಹುದು. ಎಲ್ಲ H-1B ವೀಸಾಗಳಿಗೆ 1,03,265 ಡಾಲರ್ (ಸುಮಾರು 1 ಕೋಟಿ ರೂ.) ಶುಲ್ಕ ವಿಧಿಸುವ ಯೋಜನೆಯೂ ಚರ್ಚೆಯಲ್ಲಿದೆ. ಉದ್ಯೋಗ ಕಳೆದುಕೊಂಡವರಿಗೆ ಮತ್ತೊಂದು ಕೆಲಸ ಹುಡುಕಲು ಸಿಗುವ 60 ದಿನಗಳ ಕಾಲಾವಕಾಶವನ್ನು ರದ್ದುಪಡಿಸುವ ಪ್ರಸ್ತಾವವೂ ವೀಸಾದಾರರ ಆತಂಕ ಹೆಚ್ಚಿಸಿದೆ. ಉದ್ದೇಶ ಸ್ಥಳೀಯರ ಬದಲು ವಿದೇಶಿಯರನ್ನು ನೇಮಿಸುವುದು ಕಂಪನಿಗಳಿಗೆ ದುಬಾರಿಯಾಗುವಂತೆ ಮಾಡುವುದಾಗಿದೆ ಎಂಬುದು ಸ್ಪಷ್ಟ.
ಈ ಬದಲಾವಣೆಗಳ ಪರಿಣಾಮ ವಿದ್ಯಾರ್ಥಿಗಳ ಮೇಲೂ ಬೀಳುತ್ತಿದೆ. ಐಚ್ಛಿಕ ಪ್ರಾಯೋಗಿಕ ತರಬೇತಿಗೆ ಸಂಬಂಧಿಸಿದ ದಾಖಲೆ ಸಲ್ಲಿಕೆಯ ಅವಧಿಯನ್ನು 60 ದಿನಗಳಿಂದ 30 ದಿನಗಳಿಗೆ ಇಳಿಸಲಾಗಿದೆ. ಸಾಮಾಜಿಕ ಮಾಧ್ಯಮ ಖಾತೆಗಳ ಪರಿಶೀಲನೆ, ವೀಸಾ ಸಂದರ್ಶನದ ವಿಳಂಬ, ದುಬಾರಿ ಜೀವನ ಹಾಗೂ ಉದ್ಯೋಗಾವಕಾಶಗಳ ಕುಸಿತದಿಂದ ಹಲವರು ಜರ್ಮನಿ ಸೇರಿದಂತೆ ಯುರೋಪಿನ ದೇಶಗಳನ್ನು ಪರ್ಯಾಯವಾಗಿ ಪರಿಗಣಿಸುತ್ತಿದ್ದಾರೆ. ಶಿಕ್ಷಣ ಸಾಲ ಪಡೆದ ಕುಟುಂಬಗಳಿಗೆ ಮುಂದಿನ ಉದ್ಯೋಗದ ಭರವಸೆಯೂ ಈಗ ದೊಡ್ಡ ಪ್ರಶ್ನೆಯಾಗಿದೆ.
ಅಮೆರಿಕ ನೀಡುವ H-1B ವೀಸಾಗಳಲ್ಲಿ ಸುಮಾರು ಶೇ.71ರಷ್ಟು ಭಾರತೀಯರಿಗೆ ಸಿಗುವುದರಿಂದ, ಕಠಿಣ ನಿಯಮಗಳ ಹೊಡೆತ ಭಾರತಕ್ಕೇ ಹೆಚ್ಚು ತಟ್ಟಲಿದೆ. ಟ್ರಂಪ್ ಆಡಳಿತದ ಅವಧಿ ಮುಗಿಯುವಷ್ಟರಲ್ಲಿ ಕಾನೂನುಬದ್ಧ ವಲಸಿಗರ ಸಂಖ್ಯೆ ಶೇ.33ರಿಂದ 50ರವರೆಗೆ ಕುಸಿಯಬಹುದು ಎಂದು ತಜ್ಞರು ಅಂದಾಜಿಸಿದ್ದಾರೆ. ವೀಸಾ ಅನಿಶ್ಚಿತತೆ ಮತ್ತು ಕೃತಕ ಬುದ್ಧಿಮತ್ತೆಯಿಂದ ಬದಲಾಗುತ್ತಿರುವ ಉದ್ಯೋಗ ಮಾರುಕಟ್ಟೆ ಅಮೆರಿಕದ ಕನಸನ್ನು ಇನ್ನಷ್ಟು ಕಠಿಣವಾಗಿಸಿದೆ.
