ದೇಶದಲ್ಲಿ ಹೆಚ್ಚುತ್ತಿರುವ ನಿರುದ್ಯೋಗ, ಪರೀಕ್ಷೆ ಪೇಪರ್ ಲೀಕ್ ಹಾಗೂ ಭ್ರಷ್ಟಾಚಾರದ ವಿರುದ್ಧ ಹೋರಾಡಲು ಭಾರತೀಯ ಯೂತ್ ಕಾಂಗ್ರೆಸ್ (IYC) ನಿನ್ನೆ (ಮೇ.26)ಯಿಂದ ರಾಷ್ಟ್ರವ್ಯಾಪಿ ‘ಇಂಡಿಯನ್ ಯೂತ್ ಕಾಕ್ರೋಚಸ್’ (Indian Youth Cockroaches) ಎಂಬ ವಿನೂತನ ಅಭಿಯಾನಕ್ಕೆ ಚಾಲನೆ ನೀಡಿದೆ. ಡಿಜಿಟಲ್ ಲೋಕದಲ್ಲಿ ಭಾರಿ ವೈರಲ್ ಆಗಿರುವ ‘ಕಾಕ್ರೋಚ್ ಜನತಾ ಪಾರ್ಟಿ’ (CJP) ಅಭಿಯಾನದ ಜನಪ್ರಿಯತೆಯ ಬೆನ್ನಲ್ಲೇ ಕಾಂಗ್ರೆಸ್ ಈ ಹೆಜ್ಜೆ ಇಟ್ಟಿದೆ.
ಯೂತ್ ಕಾಂಗ್ರೆಸ್ ಉಸ್ತುವಾರಿ ಮನೀಶ್ ಶರ್ಮಾ ಮತ್ತು ರಾಷ್ಟ್ರೀಯ ಅಧ್ಯಕ್ಷ ಉದಯ್ ಭಾನು ಚಿಬ್ ನೇತೃತ್ವದಲ್ಲಿ ಈ ಅಭಿಯಾನ ಲಾಂಚ್ ಆಗಿದೆ. ಹಕ್ಕುಗಳಿಗಾಗಿ ಹೋರಾಡುವ ಯುವಕರನ್ನು ಮೂದಲಿಸಲು ಬಳಸಲಾಗಿದ್ದ ‘ಜಿರಳೆ’ (Cockroaches) ಎಂಬ ಪದವನ್ನೇ ತಿರುಗೇಟು ನೀಡಲು ಅಸ್ತ್ರವಾಗಿ ಬಳಸಿಕೊಳ್ಳಲಾಗುತ್ತಿದೆ ಎಂದು ಯೂತ್ ಕಾಂಗ್ರೆಸ್ ತಿಳಿಸಿದೆ.
ಸುಪ್ರೀಂ ಕೋರ್ಟ್‌ನ ಮುಖ್ಯ ನ್ಯಾಯಮೂರ್ತಿ ಸೂರ್ಯಕಾಂತ್ ಅವರು, ನಿರುದ್ಯೋಗದ ಕಾರಣದಿಂದ ಹೋರಾಟಗಾರರು ಮತ್ತು ಪತ್ರಕರ್ತರಾಗುವ ಯುವಕರನ್ನು ‘ಜಿರಳೆಗಳು’ ಹಾಗೂ ‘ಪರಾವಲಂಬಿಗಳು’ ಎಂದು ಕರೆದ ಬೆನ್ನಲ್ಲೇ, ಅಭಿಜಿತ್ ದಿಪ್ಕೆ CJP ಅಭಿಯಾನ ಆರಂಭಿಸಿದ್ದರು. ಇದೀಗ ಇದನ್ನೇ ಯೂತ್ ಕಾಂಗ್ರೆಸ್ ಬೀದಿ ಹೋರಾಟದ ರೂಪಕ್ಕೆ ತಂದಿದೆ.
ಇದನ್ನೂ ಓದಿ: ಇಂಧನ ದರ ಏರಿಕೆ ಎಫೆಕ್ಟ್: ದೇಶೀಯ ವಿಮಾನ ಹಾರಾಟ ಕಡಿತಗೊಳಿಸಿದ ಏರ್ ಇಂಡಿಯಾ!
“ದೇಶದಲ್ಲಿ ಉದ್ಯೋಗ, ನ್ಯಾಯ ಮತ್ತು ಉತ್ತರದಾಯಿತ್ವವನ್ನು ಕೇಳುವ ಯುವಕರು ಅಧಿಕಾರದಲ್ಲಿರುವವರ ಕಣ್ಣಿಗೆ ಜಿರಳೆಗಳಂತೆ ಕಂಡರೆ, ಹೌದು, ನಾವು ಅದನ್ನು ಹೆಮ್ಮೆಯಿಂದ ಒಪ್ಪಿಕೊಳ್ಳುತ್ತೇವೆ. ಈ ‘ಭಾರತೀಯ ಯುವ ಜಿರಳೆಗಳು’ ಎಫ್‌ಐಆರ್, ಜೈಲು ಅಥವಾ ಬೆದರಿಕೆಗಳಿಗೆ ಹೆದರಿ ಸುಮ್ಮನಿರುವುದಿಲ್ಲ,” ಎಂದು ಮನೀಶ್ ಶರ್ಮಾ ಗುಡುಗಿದ್ದಾರೆ.
