ಮತದಾರರ ಪಟ್ಟಿಯ ಮೇಲೆ ಮೋದಿ-ಶಾ ಜೋಡಿ ಮತ್ತು ಗ್ಯಾನೇಶ್ ಕುಮಾರ್ ನಡೆಸುತ್ತಿರುವ SIR ಕ್ರೌರ್ಯಕ್ಕೆ ತೆಲಂಗಾಣದಲ್ಲಿ ಸುಮಾರು 47 ಲಕ್ಷ ಮತದಾರರ ಹೆಸರುಗಳು ಬಲಿಯಾಗುವ ಆತಂಕವಿದೆ. ಎಎಸ್ಡಿಡಿಒ ಮತ್ತು ನೋಟಿಸ್ಗಳ ಅಡಿಯಲ್ಲಿ ಒಂದು ಕೋಟಿಗೂ ಅಧಿಕ ಮತದಾರರನ್ನು ಅನುಮಾನಾಸ್ಪದರಾಗಿ ನೋಡಿದ್ದ ಆಯೋಗ, ವಿಚಾರಣೆಗಳು ಮತ್ತು ಪರಿಶೀಲನೆಗಳ ನಂತರವೂ 47 ಲಕ್ಷ ಮಂದಿಯನ್ನು ಮತಪಟ್ಟಿಯಿಂದ ಹೊರಗಿಸುವ ಭೀತಿ ಎದುರಾಗಿದೆ. ಈ ನಡುವೆ, ಎಸ್ಐಆರ್ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿರುವ ತೆಲಂಗಾಣ ಮುಖ್ಯಮಂತ್ರಿ ಎ. ರೇವಂತ್ ರೆಡ್ಡಿ, ದೇಶಾದ್ಯಂತ ‘ಎಸ್ಐಆರ್ ಗೋ ಬ್ಯಾಕ್’ ಅಭಿಯಾನಕ್ಕೆ ಕರೆ ನೀಡಿದ್ದಾರೆ.
ತೆಲಂಗಾಣದಲ್ಲಿ ಎಸ್ಐಆರ್ ಅರಂಭವಾದಾಗ, ಒಟ್ಟು 3.38 ಕೋಟಿಗೂ ಹೆಚ್ಚು ನೋಂದಾಯಿತ ಮತದಾರರಿದ್ದರು. ಆದರೆ, ಕರಡು ಪಟ್ಟಿ ಸಿದ್ಧಪಡಿಸುವ ವೇಳೆಗೆ, ಒಟ್ಟು ಮತದಾರರ ಪೈಕಿ 73 ಲಕ್ಷ (ಸುಮಾರು 21.70%) ಮತದಾರರನ್ನು ಎಎಸ್ಡಿಡಿಒ (ಹಾಜರಿಲ್ಲದವರು, ವಿಳಾಸ ಬದಲಾಯಿಸಿದವರು, ಮೃತಪಟ್ಟವರು ಅಥವಾ ನಕಲಿ ಮತದಾರರು ಹಾಗೂ ಇತರೆ) ವರ್ಗದಡಿ ಗುರುತಿಸಲಾಗಿತ್ತು. ಈ ಹೆಸರುಗಳನ್ನು ಹೊರಗಿಟ್ಟು ಕರಡು ಪಟ್ಟಿಯನ್ನು ಪ್ರಕಟಿಸಲಾಗಿತ್ತು. ನಂತರ, ಎಎಸ್ಡಿಡಿಒ ಅಡಿಯಲ್ಲಿ ಹೆಸರು ಕಳೆದುಕೊಂಡಿದ್ದ ಮತದಾರರು ಸಲ್ಲಿಸಿದ್ದ ಆಕ್ಷೇಪಣೆಗಳಲ್ಲಿ ಸುಮಾರು 58 ಲಕ್ಷಕ್ಕೂ ಹೆಚ್ಚು ಅರ್ಜಿಗಳನ್ನು ಸೆಪ್ಟೆಂಬರ್ 28ರ ವೇಳೆಗೆ ಚುನಾವಣಾಧಿಕಾರಿಗಳು ವಿಚಾರಣೆ ನಡೆಸಿದ್ದಾರೆ. ಅವರಲ್ಲಿ, 45 ಲಕ್ಷಕ್ಕೂ ಅಧಿಕ ಮತದಾರರು ಅಂತಿಮ ಪಟ್ಟಿಗೆ ಸೇರ್ಪಡೆಗೊಳ್ಳಲು ಅರ್ಹರೆಂದು ಕಂಡುಕೊಂಡಿದ್ದಾರೆ.
ಆದರೆ, ಕರಡು ಪಟ್ಟಿಯಲ್ಲಿ ಹೆಸರು ಪ್ರಕಟವಾಗಿದ್ದ ಸುಮಾರು 92 ಲಕ್ಷ ಮತದಾರರಿಗೂ ಆಯೋಗ ನೋಟಿಸ್ ನೀಡಿತ್ತು. ಈ ಪೈಕಿ, 5 ಲಕ್ಷ ಮಂದಿಗೆ ಇನ್ನೂ ನೋಟಿಸ್ ವಿತರಣೆಯಾಗಿಲ್ಲ.
ಎಎಸ್ಡಿಡಿಒ ಅಡಿಯಲ್ಲಿ ಗುರುತಿಸಲ್ಪಟ್ಟು ಆಕ್ಷೇಪಣೆ ಸಲ್ಲಿಸಿರುವ ಮತದಾರರ ಪೈಕಿ 15 ಲಕ್ಷ ಆಕ್ಷೇಪಣೆಗಳು ಮತ್ತು 92 ಲಕ್ಷ ನೋಟಿಸ್ ಪಡೆದ ಮತದಾರರ ವಿಚಾರಣೆ/ಪರಿಶೀಲನೆಗಳು ಬಾಕಿ ಇವೆ. “ಅಧಿಕಾರಿಗಳು ನೀಡಿದ ನೋಟಿಸ್ಗಳಿಗೆ ಸೂಕ್ತ ರೀತಿಯಲ್ಲಿ ಸ್ಪಂದಿಸದಿದ್ದರೆ ಅಥವಾ ಅಗತ್ಯ ದಾಖಲೆಗಳ ಪರಿಶೀಲನೆ ಪೂರ್ಣಗೊಳಿಸದಿದ್ದರೆ, ಅಂತಹ ಲಕ್ಷಾಂತರ ನೈಜ ಮತದಾರರ ಹೆಸರುಗಳನ್ನು ಅಂತಿಮ ಮತದಾರರ ಪಟ್ಟಿಯಿಂದ ಸಂಪೂರ್ಣವಾಗಿ ಅಳಿಸಿಹಾಕಲಾಗುವುದು” ಎಂದು ಚುನಾವಣಾ ಸಿಬ್ಬಂದಿ ಸ್ಪಷ್ಟಪಡಿಸಿದ್ದಾರೆ.
This video cannot be played in your browser. Open the video directly
ಪರಿಣಾಮ, ಇನ್ನೂ ವಿಚಾರಣೆ/ಪರಿಶೀಲನೆ ನಡೆಯಬೇಕಿರುವ 1.07 ಕೋಟಿ ಮತದಾರರಲ್ಲಿ ಸುಮಾರು 47 ಲಕ್ಷ ಮಂದಿ ಮತದಾನದ ಹಕ್ಕು ಕಳೆದುಕೊಳ್ಳಬಹುದು ಎಂದು ವಿಶೇಷಕರು ಅಂದಾಜಿಸಿದ್ದಾರೆ.
ಈ ಎಸ್ಐಆರ್ ಕೃತ್ಯದ ವಿರುದ್ಧ ತೀವ್ರ ಆಕ್ರೋಶ ವ್ಯಕ್ತಪಡಿಸಿರುವ ಮುಖ್ಯಮಂತ್ರಿ ರೇವಂತ್ ರೆಡ್ಡಿ, ಭಾರತದ ಸ್ವಾತಂತ್ರ್ಯ ಹೋರಾಟದ ಐತಿಹಾಸಿಕ ‘ಸೈಮನ್ ಗೋ ಬ್ಯಾಕ್’ ಚಳವಳಿಯಂತೆ ‘ಎಸ್ಐಆರ್ ಗೋ ಬ್ಯಾಕ್’ ನಡೆಸಬೇಕೆಂದು ಕರೆ ನೀಡಿದ್ದಾರೆ.
ಈ ಲೇಖನ ಓದಿದ್ದೀರಾ?: SIR ಅಕ್ರಮ | ಗ್ಯಾನೇಶ್ ಕುಮಾರ್ ‘ಅಪರಾಧಿ’ಯಾದ್ರೆ, ಮೋದಿ-ಅಮಿತ್ ಶಾ ಏನು?
“1929ರಲ್ಲಿ ‘ಸೈಮನ್ ಗೋ ಬ್ಯಾಕ್’ ಘೋಷಣೆ ಮೊಳಗಿದ ರೀತಿಯಲ್ಲೇ, ಇಂದು ದೇಶದ ಪ್ರಜಾಪ್ರಭುತ್ವವನ್ನು ರಕ್ಷಿಸಲು ಎಸ್ಐಆರ್ ಹಿಂಪಡೆಯುವವರೆಗೆ ದೇಶದ ಯುವಜನತೆ ವಿಶ್ರಮಿಸುವುದಿಲ್ಲ. ಪ್ರಧಾನಿ ನರೇಂದ್ರ ಮೋದಿ ಅವರ ಆಡಳಿತವನ್ನು ವಿರೋಧಿಸುವ ನೈಜ ಮತದಾರರ ಹೆಸರುಗಳನ್ನು ಅಕ್ರಮವಾಗಿ ಪಟ್ಟಿಯಿಂದ ತೆಗೆದುಹಾಕಲು ಚುನಾವಣಾ ಆಯೋಗವನ್ನು ದುರ್ಬಳಕೆ ಮಾಡಿಕೊಳ್ಳಲಾಗುತ್ತಿದೆ” ಎಂದು ಅವರು ಆರೋಪಿಸಿದ್ದಾರೆ.
ಜೊತೆಗೆ, “ಮುಖ್ಯ ಚುನಾವಣಾ ಆಯುಕ್ತ ಗ್ಯಾನೇಶ್ ಕುಮಾರ್ ಅವರು ಇತರ ಇಬ್ಬರು ಆಯುಕ್ತರ ಗಮನಕ್ಕೆ ತರದೆ ಏಕಪಕ್ಷೀಯ ನಿರ್ಧಾರಗಳನ್ನು ತೆಗೆದುಕೊಳ್ಳುತ್ತಿದ್ದಾರೆ. ಇಂತಹ ಕೃತ್ಯಗಳು ಕೇವಲ ಕಾಂಗ್ರೆಸ್ ಪಕ್ಷದ ರಾಜಕೀಯ ಸಮಸ್ಯೆಯಲ್ಲ, ಬದಲಿಗೆ ಸಮಗ್ರ ರಾಷ್ಟ್ರದ ಪ್ರಜಾಪ್ರಭುತ್ವಕ್ಕೇ ಬಂದೊದಗಿರುವ ಬಹುದೊಡ್ಡ ಗಂಡಾಂತರ” ಎಂದು ಕಳವಳ ವ್ಯಕ್ತಪಡಿಸಿದ್ದಾರೆ.
ಸಾರ್ವಜನಿಕ ಕಳವಳ ಮತ್ತು ರಾಜಕೀಯ ವಿರೋಧಗಳ ಹಿನ್ನೆಲೆಯಲ್ಲಿ ಚುನಾವಣಾ ಆಯೋಗವು ತೆಲಂಗಾಣ ಎಸ್ಐಆರ್ ಪ್ರಕ್ರಿಯೆಯನ್ನು ವಿಸ್ತರಿಸಿದೆ. ಮತದಾರರು ತಮ್ಮ ಹಕ್ಕುಗಳು ಮತ್ತು ಆಕ್ಷೇಪಣೆಗಳನ್ನು ಸಲ್ಲಿಸಲು ಅಕ್ಟೋಬರ್ 7ರವರೆಗೆ ಅವಕಾಶ ನೀಡಲಾಗಿದೆ. ನೋಟಿಸ್ಗಳು ಮತ್ತು ಆಕ್ಷೇಪಣೆಗಳ ಅಂತಿಮ ಪರಿಶೀಲನೆಯನ್ನು ನವೆಂಬರ್ 5ರವರೆಗೆ ನಡೆಸಲು ನಿರ್ಧರಿಸಲಾಗಿದೆ. ಅಂತಿಮ ಮತದಾರರ ಪಟ್ಟಿಯು 2026ರ ನವೆಂಬರ್ 9ರಂದು ಅಧಿಕೃತವಾಗಿ ಪ್ರಕಟಗೊಳ್ಳಲಿದೆ.
