ನೈತಿಕತೆಯ ಉತ್ತುಂಗದಲ್ಲಿದ್ದ ತೆಹಲ್ಕಾ ಸಂಸ್ಥೆ ಹಾಗೂ ಸಂಸ್ಥಾಪಕ ತರುಣ್ ತೇಜ್‌ಪಾಲ್ ಪತನ ಶುರುವಾಗಿದ್ದು 2013ರ ನವೆಂಬರ್‌ನಲ್ಲಿ. ಗೋವಾದ ಪಂಚತಾರಾ ಹೋಟೆಲ್‌ನಲ್ಲಿ ನಡೆದ ತೆಹಲ್ಕಾದ ಪ್ರತಿಷ್ಠಿತ ವಾರ್ಷಿಕ ‘ಥಿಂಕ್ ಫೆಸ್ಟ್’ (ThinkFest – ಜಾಗತಿಕ ಗಣ್ಯರು ಭಾಗವಹಿಸುತ್ತಿದ್ದ ಬೌದ್ಧಿಕ ಸಮಾವೇಶ) ಕಾರ್ಯಕ್ರಮದ ವೇಳೆ, ಕಿರಿಯ ಸಹೋದ್ಯೋಗಿಯೊಬ್ಬರ ಮೇಲೆ ಹೋಟೆಲ್ ಲಿಫ್ಟ್‌ನಲ್ಲಿ ಲೈಂಗಿಕ ದೌರ್ಜನ್ಯ ಎಸಗಿದ ಗಂಭೀರ ಆರೋಪ ತೇಜ್‌ಪಾಲ್ ಅವರನ್ನು ಸುತ್ತಿಕೊಂಡಿತು. ಸತತ ಎಂಟು ವರ್ಷಗಳ ಕಾನೂನು ಹೋರಾಟದ ನಂತರ, 2021ರಲ್ಲಿ ಗೋವಾ ಸೆಷನ್ಸ್ ನ್ಯಾಯಾಲಯ ಸಂತ್ರಸ್ತೆಯ ಹೇಳಿಕೆಗಳಲ್ಲಿ ದೋಷಗಳಿವೆ ಎಂದು ಉಲ್ಲೇಖಿಸಿ ಅವರನ್ನು ಖುಲಾಸೆಗೊಳಿಸಿತ್ತು.
ಇತ್ತೀಚೆಗೆ ತೆಹಲ್ಕಾ ಸಂಸ್ಥಾಪಕ ತರುಣ್ ತೇಜ್‌ಪಾಲ್ ಅವರಿಗೆ ಬಾಂಬೆ ಹೈಕೋರ್ಟ್ ಲೈಂಗಿಕ ದೌರ್ಜನ್ಯ ಪ್ರಕರಣದಲ್ಲಿ ದೋಷಿಯೆಂದು 10 ವರ್ಷಗಳ ಕಠಿಣ ಜೈಲು ಶಿಕ್ಷೆ ವಿಧಿಸಿದೆ. ಆದರೂ, ಈ ಶಿಕ್ಷೆ ಸಾಲದು ಎಂದು ಗೋವಾ ಸರ್ಕಾರ ಇದೀಗ ಮೇಲ್ಮನವಿ ಹೋಗಿದೆ. ಭಾರತೀಯ ಪತ್ರಿಕೋದ್ಯಮಕ್ಕೆ ಹಲವಾರು ಅತ್ಯುತ್ತಮ ತನಿಖಾ ವರದಿಗಳನ್ನು ನೀಡುವ ಮೂಲಕ ಕಾಲ ಅನಭಿಷಿಕ್ತ ದೊರೆಯಂತೆ ಮೆರೆದಿದ್ದ ತೇಜ್‌ಪಾಲ್, ತಮ್ಮದೇ ಕಿರಿಯ ಮಹಿಳಾ ಸಹೋದ್ಯೋಗಿಗೆ ಆ ರೀತಿ ಲೈಂಗಿಕ ಕಿರುಕುಳ ನೀಡಿದ್ದು ಮಾತ್ರ ಅಕ್ಷಮ್ಯ ಹಾಗೂ ಎಂದಿಗೂ ಕ್ಷಮಿಸಲಾಗದ ಅಪರಾಧ. ಇದು ಕೇವಲ ಒಬ್ಬ ಪ್ರತಿಭಾವಂತ ಸಂಪಾದಕನ ವೈಯಕ್ತಿಕ ಪತನದ ಕಥೆಯಲ್ಲ; ಬದಲಾಗಿ ದಶಕಗಳ ಕಾಲ ದೇಶದ ಪ್ರಭಾವಿ ರಾಜಕಾರಣಿಗಳ, ಭ್ರಷ್ಟ ಅಧಿಕಾರಿಗಳ ನಿದ್ದೆಗೆಡಿಸಿದ್ದ ‘ತೆಹಲ್ಕಾ’ (Tehelka) ಎಂಬ ಅಪ್ರತಿಮ ಸ್ವತಂತ್ರ ಮಾಧ್ಯಮವೊಂದರ ದುರಂತ ಅಂತ್ಯದ ಕಥೆಯೂ ಹೌದು. ವಿಶ್ವವಿಖ್ಯಾತ ಬರಹಗಾರ ವಿ.ಎಸ್. ನೈಪಾಲ್ ಅವರ ‘ಮಾನಸಪುತ್ರ’ ಎಂದೇ ಕರೆಸಿಕೊಂಡಿದ್ದ, ತರುಣ್ ತೇಜ್‌ಪಾಲ್ ಒಂದು ಕಾಲದಲ್ಲಿ ಸಮಾಜದ ನೈತಿಕ ಕಾವಲುಗಾರನಾಗಿದ್ದ ವ್ಯಕ್ತಿಯೇ ಇಂದು ಅಪರಾಧಿಯ ಸ್ಥಾನದಲ್ಲಿ ನಿಂತಿರುವುದು ಕಾಲದ ಅತಿದೊಡ್ಡ ವಿಪರ್ಯಾಸ.
ಭಾರತದಲ್ಲಿ 90ರ ದಶಕದ ಆರ್ಥಿಕ ಉದಾರೀಕರಣದ ನಂತರ ಮಾಧ್ಯಮ ಕ್ಷೇತ್ರ ಅಭೂತಪೂರ್ವ ವಿಸ್ತರಣೆಗೆ ಸಾಕ್ಷಿಯಾಯಿತು. ಕೇವಲ ಮುದ್ರಣ ಮಾಧ್ಯಮಕ್ಕೆ ಸೀಮಿತವಾಗಿದ್ದ ಪತ್ರಿಕೋದ್ಯಮ, ಖಾಸಗಿ ಸುದ್ದಿ ವಾಹಿನಿಗಳ ಉದಯದೊಂದಿಗೆ ಹೊಸ ಆಯಾಮವನ್ನು ಪಡೆದುಕೊಂಡಿತು. ಇದೇ ಕಾಲಘಟ್ಟದಲ್ಲಿ ಸ್ಟಿಂಗ್ ಆಪರೇಷನ್‌ಗಳು, ತಿಂಗಳುಗಟ್ಟಲೆ ನಡೆಯುವ ದಾಖಲೆ ಆಧಾರಿತ ತನಿಖೆಗಳು ಹಾಗೂ ಆಡಳಿತಶಾಹಿ ನಿರ್ದಾಕ್ಷಿಣ್ಯವಾಗಿ ಪ್ರಶ್ನಿಸುವ ಪತ್ರಿಕೋದ್ಯಮಕ್ಕೆ ಹೊಸ ಬಲ ಬಂದಿತು. ಈ ಎರಡು ದಶಕಗಳ ಅವಧಿಯಲ್ಲಿ ಪತ್ರಕರ್ತರು ಕೇವಲ ದೈನಂದಿನ ಘಟನೆಗಳನ್ನು ವರದಿ ಮಾಡುವವರಾಗಿ ಉಳಿಯದೆ, ಪ್ರಜಾಪ್ರಭುತ್ವದ ನಿಜವಾದ ಕಾವಲುನಾಯಿಗಳಾಗಿ ರೂಪುಗೊಂಡಿದ್ದರು. ಇದು ತನಿಖಾ ಪತ್ರಿಕೋದ್ಯಮದ ಅತ್ಯುನ್ನತ ಘಟ್ಟವಾಗಿತ್ತು.
1963, ಮಾರ್ಚ್ 15ರಂದು ಪಂಜಾಬ್‌ನ ಜಲಂಧರ್‌ನಲ್ಲಿ ಜನಿಸಿದ ತರುಣ್ ತೇಜ್‌ಪಾಲ್, ಸೇನಾ ಅಧಿಕಾರಿಯ ಮಗನಾಗಿದ್ದ ಕಾರಣ ದೇಶದ ವಿವಿಧ ನಗರಗಳಲ್ಲಿ ಬೆಳೆಯುವ ಅವಕಾಶ ಪಡೆದರು. ಪಂಜಾಬ್‌ ವಿವಿಯಲ್ಲಿ ಅರ್ಥಶಾಸ್ತ್ರ ವಿಷಯದಲ್ಲಿ ಪದವಿ ಪಡೆದರು. ಪ್ರಕಾಶನ ಸಂಸ್ಥೆಗಳಲ್ಲಿ ಸಂಪಾದಕೀಯ ಕೆಲಸದೊಂದಿಗೆ ವೃತ್ತಿಜೀವನ ಆರಂಭಿಸಿದ ಅವರು, ಬಳಿಕ ‘ಇಂಡಿಯಾ ಟುಡೇ‘, ‘ಔಟ್‌ಲುಕ್‘ ‘ಇಂಡಿಯನ್‌ ಎಕ್ಸ್‌ಪ್ರೆಸ್‌‘ನಂತಹ ಪ್ರತಿಷ್ಟಿತ ಮಾಧ್ಯಮಗಳಲ್ಲಿ ಕಾರ್ಯನಿರ್ವಹಿಸಿದರು. ತಮ್ಮ ಚೂಪಾದ ರಾಜಕೀಯ ವಿಶ್ಲೇಷಣೆ, ನಿರ್ಭೀತ ವರದಿಗಾರಿಕೆ ಮತ್ತು ಅದ್ಭುತ ಬರವಣಿಗೆಯ ಶೈಲಿಯಿಂದ ಅವರು ಕೆಲವೇ ವರ್ಷಗಳಲ್ಲಿ ರಾಷ್ಟ್ರಮಟ್ಟದಲ್ಲಿ ಗುರುತಿಸಿಕೊಂಡರು.
ತೇಜ್‌ಪಾಲ್ ಕೇವಲ ಸ್ಟಿಂಗ್ ಆಪರೇಷನ್‌ಗಳ ರೂವಾರಿ ಪತ್ರಕರ್ತರಾಗಿರಲಿಲ್ಲ; ಅವರು ಅಗಾಧ ಬೌದ್ಧಿಕ ಸಂಪನ್ನರೂ ಆಗಿದ್ದರು. ‘ದಿ ಆಲ್ಕೆಮಿ ಆಫ್ ಡಿಸೈರ್‘ (2005) ಮತ್ತು ‘ದಿ ಸ್ಟೋರಿ ಆಫ್ ಮೈ ಅಸಾಸಿನ್ಸ್’ (2009) ನಂತಹ ಅಂತರರಾಷ್ಟ್ರೀಯ ಮಟ್ಟದಲ್ಲಿ ಮೆಚ್ಚುಗೆ ಪಡೆದ ಕಾದಂಬರಿಗಳನ್ನು ರಚಿಸಿದ ಸಾಹಸಿ ಸಂಪಾದಕ ಅವರು. ನೊಬೆಲ್ ಪುರಸ್ಕೃತ ದಿಗ್ಗಜ ಲೇಖಕ ವಿ.ಎಸ್. ನೈಪಾಲ್ ಅವರೊಂದಿಗೆ ತೇಜ್‌ಪಾಲ್ ಹೊಂದಿದ್ದ ಆತ್ಮೀಯ ಬೌದ್ಧಿಕ ಒಡನಾಟ ಎಷ್ಟಿತ್ತೆಂದರೆ, ದೆಹಲಿಯ ಸಾಹಿತ್ಯ ವಲಯ ಮತ್ತು ವಿಮರ್ಶಕರು ಅವರನ್ನು ನೈಪಾಲ್ ಅವರ “ಮಾನಸಪುತ್ರ” ಎಂದೇ ಬಣ್ಣಿಸುತ್ತಿದ್ದರು. ಅವರ ಇಂಗ್ಲಿಷ್ ಗದ್ಯ ಶೈಲಿ ಮತ್ತು ವಿಚಾರಧಾರೆ ಜಾಗತಿಕ ಮಟ್ಟದ ಓದುಗರನ್ನು ಸೆಳೆದಿತ್ತು.
2000ನೇ ಇಸವಿಯಲ್ಲಿ ತಮ್ಮ ಸಹೋದ್ಯೋಗಿ ಅನಿರುದ್ಧ ಬಹಲ್ ಅವರೊಂದಿಗೆ ಸೇರಿ ‘Tehelka.com’ ಸ್ಥಾಪಿಸಿದಾಗ, ಭಾರತದಲ್ಲಿ ಇಂಟರ್‌ನೆಟ್ ಬಳಕೆ ತೀರಾ ಸೀಮಿತವಾಗಿತ್ತು. ಆದರೂ, ಆನ್‌ಲೈನ್ ಮಾಧ್ಯಮದ ಮೂಲಕ ಸಂಚಲನ ಮೂಡಿಸುವ ಸಾಹಸಕ್ಕೆ ಅವರು ಕೈಹಾಕಿದರು. “ಅಧಿಕಾರವನ್ನು ಸದಾ ಪ್ರಶ್ನಿಸಬೇಕು” (Power must always be questioned) ಎಂಬ ಕಠಿಣ ಹಾಗೂ ಸ್ಪಷ್ಟ ಧೋರಣೆಯನ್ನು ಪ್ರತಿಪಾದಿಸಿದ ತೇಜ್‌ಪಾಲ್, ಈ ಡಿಜಿಟಲ್ ವೇದಿಕೆಯ ಮೂಲಕ ಪತ್ರಿಕೋದ್ಯಮದಲ್ಲಿ ಹೊಸ ಸಂಚಲನವನ್ನೇ ಸೃಷ್ಟಿಸಿದರು. ಕೇವಲ ಪ್ರೆಸ್ ರಿಲೀಸ್‌ಗಳಿಗೆ ಸೀಮಿತವಾಗಿದ್ದ ಪತ್ರಿಕೋದ್ಯಮಕ್ಕೆ ಗುಪ್ತ ಕ್ಯಾಮೆರಾಗಳು ಮತ್ತು ರಹಸ್ಯ ಕಾರ್ಯಾಚರಣೆಗಳ (Sting Operations) ತೀಕ್ಷ್ಣತೆಯನ್ನು ಪರಿಚಯಿಸಿದರು.
2001ರಲ್ಲಿ ತೆಹಲ್ಕಾ ನಡೆಸಿದ ‘ಆಪರೇಷನ್ ವೆಸ್ಟ್ ಎಂಡ್’ (Operation West End) ಇಡೀ ದೇಶದ ರಾಜಕೀಯ ಇತಿಹಾಸದಲ್ಲೇ ಒಂದು ಮೈಲಿಗಲ್ಲು. ರಕ್ಷಣಾ ಇಲಾಖೆಯ ಉಪಕರಣಗಳ ಖರೀದಿ ಒಪ್ಪಂದಗಳಲ್ಲಿ ಲಂಚ ಸ್ವೀಕರಿಸುತ್ತಿದ್ದ ಆಗಿನ ಆಡಳಿತರೂಢ ಬಿಜೆಪಿ ಅಧ್ಯಕ್ಷ ಬಂಗಾರು ಲಕ್ಷ್ಮಣ್ ಹಾಗೂ ಉನ್ನತ ಸೇನಾ ಅಧಿಕಾರಿಗಳನ್ನು ಗುಪ್ತ ಕ್ಯಾಮೆರಾದಲ್ಲಿ ಸೆರೆಹಿಡಿಯಲಾಗಿತ್ತು. ಪಕ್ಷದ ಕಚೇರಿಯಲ್ಲೇ ಹಣದ ಕಂತೆಗಳನ್ನು ಮೇಜಿನ ಮೇಲಿಟ್ಟುಕೊಳ್ಳುವ ದೃಶ್ಯ ರಾಷ್ಟ್ರವನ್ನು ಬೆಚ್ಚಿಬೀಳಿಸಿತ್ತು. ಇದರ ನೇರ ಪರಿಣಾಮವಾಗಿ ಅಂದಿನ ರಕ್ಷಣಾ ಸಚಿವ ಜಾರ್ಜ್ ಫರ್ನಾಂಡಿಸ್ ರಾಜೀನಾಮೆ ನೀಡಬೇಕಾಯಿತು. ತರುವಾಯ 2002ರ ಗುಜರಾತ್ ಗಲಭೆಗಳ ಹಿಂದಿನ ಕರಾಳ ಸತ್ಯಗಳನ್ನು ಬಯಲಿಗೆಳೆದ ‘ಆಪರೇಷನ್ ಕಳಂಕ್’, ಅಕ್ರಮ ಗಣಿಗಾರಿಕೆ ಮತ್ತು ಮಾನವ ಹಕ್ಕುಗಳ ಉಲ್ಲಂಘನೆ ಕುರಿತ ಸರಣಿ ವರದಿಗಳು ಸರ್ಕಾರಗಳನ್ನು ನಡುಗಿಸಿದ್ದವು.
ನೈತಿಕತೆಯ ಉತ್ತುಂಗದಲ್ಲಿದ್ದ ಸಂಸ್ಥೆಯ ಪತನ ಶುರುವಾಗಿದ್ದು 2013ರ ನವೆಂಬರ್‌ನಲ್ಲಿ. ಗೋವಾದ ಪಂಚತಾರಾ ಹೋಟೆಲ್‌ನಲ್ಲಿ ನಡೆದ ತೆಹಲ್ಕಾದ ಪ್ರತಿಷ್ಠಿತ ವಾರ್ಷಿಕ ‘ಥಿಂಕ್ ಫೆಸ್ಟ್’ (ThinkFest – ಜಾಗತಿಕ ಗಣ್ಯರು ಭಾಗವಹಿಸುತ್ತಿದ್ದ ಬೌದ್ಧಿಕ ಸಮಾವೇಶ) ಕಾರ್ಯಕ್ರಮದ ವೇಳೆ, ಕಿರಿಯ ಸಹೋದ್ಯೋಗಿಯೊಬ್ಬರ ಮೇಲೆ ಹೋಟೆಲ್ ಲಿಫ್ಟ್‌ನಲ್ಲಿ ಲೈಂಗಿಕ ದೌರ್ಜನ್ಯ ಎಸಗಿದ ಗಂಭೀರ ಆರೋಪ ತೇಜ್‌ಪಾಲ್ ಅವರನ್ನು ಸುತ್ತಿಕೊಂಡಿತು. ಸತತ ಎಂಟು ವರ್ಷಗಳ ಕಾನೂನು ಹೋರಾಟದ ನಂತರ, 2021ರಲ್ಲಿ ಗೋವಾ ಸೆಷನ್ಸ್ ನ್ಯಾಯಾಲಯ ಸಂತ್ರಸ್ತೆಯ ಹೇಳಿಕೆಗಳಲ್ಲಿ ದೋಷಗಳಿವೆ ಎಂದು ಉಲ್ಲೇಖಿಸಿ ಅವರನ್ನು ಖುಲಾಸೆಗೊಳಿಸಿತ್ತು.
ಆದರೆ, ಈ ತೀರ್ಪನ್ನು ಪ್ರಶ್ನಿಸಿ ಗೋವಾ ಸರ್ಕಾರ ಸಲ್ಲಿಸಿದ್ದ ಮೇಲ್ಮನವಿಯ ಸುದೀರ್ಘ ವಿಚಾರಣೆ ನಡೆಸಿದ ಬಾಂಬೆ ಹೈಕೋರ್ಟ್‌ನ ಗೋವಾ ಪೀಠ (ನ್ಯಾ. ನೀಲಾ ಗೋಖಲೆ ಮತ್ತು ನ್ಯಾ. ಅಮಿತ್ ಜಮ್ಸಾಂಡೇಕರ್ ಅವರಿದ್ದ ವಿಭಾಗೀಯ ಪೀಠ) ಆಗಸ್ಟ್ 6, 2026ರಂದು ಐತಿಹಾಸಿಕ ತೀರ್ಪು ನೀಡಿದೆ. ಸಂಸ್ಥೆಯ ಸಂಪಾದಕನಾಗಿ, ನಂಬಿಕೆಯ ಮತ್ತು ಅಧಿಕಾರದ ಉನ್ನತ ಸ್ಥಾನದಲ್ಲಿದ್ದುಕೊಂಡು ಕಿರಿಯ ಉದ್ಯೋಗಿಯ ಮೇಲೆ ಅತ್ಯಾಚಾರ ಹಾಗೂ ಲೈಂಗಿಕ ಕಿರುಕುಳ ನೀಡಿದ ಆರೋಪಗಳಡಿ ತೇಜ್‌ಪಾಲ್ ದೋಷಿ ಎಂದು ಹೈಕೋರ್ಟ್ ತೀರ್ಮಾನಿಸಿದ್ದು, ಅವರಿಗೆ 10 ವರ್ಷಗಳ ಕಠಿಣ ಜೈಲು ಶಿಕ್ಷೆ ಹಾಗೂ ಸಂತ್ರಸ್ತೆಗೆ ಪಾವತಿಸುವಂತೆ ₹10,21,000 ರೂಪಾಯಿ ದಂಡ ವಿಧಿಸಿದೆ. ತಾವು ರಾಜಕೀಯ ಸಂತ್ರಸ್ತ ಹಾಗೂ ಇಬ್ಬರು ಹೆಣ್ಣುಮಕ್ಕಳ ತಂದೆ ಎಂಬ ಅವರ ಕರುಣೆಯ ವಾದವನ್ನು ನ್ಯಾಯಾಲಯ ಸಾರಾಸಗಟಾಗಿ ತಿರಸ್ಕರಿಸಿದೆ.
ಈ ಪ್ರಕರಣವು ಕೇವಲ ತೇಜ್‌ಪಾಲ್ ಅವರ ವೈಯಕ್ತಿಕ ಬದುಕನ್ನು ಮಾತ್ರವಲ್ಲ, ದಶಕಗಳ ಕಾಲ ಅವರು ರಕ್ತ-ಬೆವರು ಸುರಿಸಿ ಕಟ್ಟಿಬೆಳೆಸಿದ ‘ತೆಹಲ್ಕಾ’ ಸಂಸ್ಥೆಯನ್ನು ಬೇರುಸಹಿತ ಕಿತ್ತುಹಾಕಿತು. ಸಮಾಜಕ್ಕೆ ನೈತಿಕತೆಯ ಪಾಠ ಮಾಡುತ್ತಿದ್ದ, ಮಹಿಳಾ ಹಕ್ಕುಗಳ ಬಗ್ಗೆ ಪುಟಗಟ್ಟಲೆ ಬರೆಯುತ್ತಿದ್ದ ಸಂಸ್ಥೆಯ ಸಂಪಾದಕನೇ ಇಂತಹ ಕೃತ್ಯವೆಸಗಿದ್ದು ದೇಶಾದ್ಯಂತ ತೀವ್ರ ಆಕ್ರೋಶಕ್ಕೆ ಕಾರಣವಾಯಿತು. ಆರೋಪ ಹೊರಬೀಳುತ್ತಿದ್ದಂತೆ ತೆಹಲ್ಕಾದಲ್ಲಿದ್ದ ಪ್ರತಿಭಾವಂತ ಪತ್ರಕರ್ತರು ಸಾಮೂಹಿಕವಾಗಿ ರಾಜೀನಾಮೆ ನೀಡಿದರು. ಹೂಡಿಕೆದಾರರು ರಾತ್ರೋರಾತ್ರಿ ಹಿಂದೆ ಸರಿದರು. ಪರಿಣಾಮವಾಗಿ, ದಶಕಗಳ ಕಾಲ ಭಾರತದ ತನಿಖಾ ಪತ್ರಿಕೋದ್ಯಮದ ಅಪ್ರತಿಮ ಸಂಕೇತವಾಗಿದ್ದ ತೆಹಲ್ಕಾ ತನ್ನ ವಿಶ್ವಾಸಾರ್ಹತೆಯನ್ನು ಸಂಪೂರ್ಣವಾಗಿ ಕಳೆದುಕೊಂಡು ಇತಿಹಾಸದ ಪುಟ ಸೇರಿತು.
ಈ ಘಟನೆಯ ಬಳಿಕ, ತೆಹಲ್ಕಾದ ಖ್ಯಾತಿ ಕುಗ್ಗತೊಡಗಿ ಅಗ್ಗದ ಟಿವಿ ಸ್ಟುಡಿಯೋ ಚರ್ಚೆಗಳು ಹಾಗೂ ಡಿಜಿಟಲ್ ಕ್ಲಿಕ್‌ಬೇಟ್ ಸುದ್ದಿಗಳು ಆಕ್ರಮಿಸಿಕೊಂಡವು. ಇದರ ಜೊತೆಗೆ ಪತ್ರಕರ್ತರ ಮೇಲಿನ ಮಾನಹಾನಿ ಮೊಕದ್ದಮೆಗಳು ಮತ್ತು ಡಿಜಿಟಲ್ ಕಣ್ಗಾವಲು ಕೂಡ ವಿಪರೀತವಾಗಿ ಹೆಚ್ಚಾಯಿತು. ತೆಹಲ್ಕಾ ದುರ್ಬಲವಾಗಿ ಪತನಗೊಂಡಿರಬಹುದು, ಆದರೆ ಭಾರತದಲ್ಲಿ ತನಿಖಾ ಪತ್ರಿಕೋದ್ಯಮ ಸಂಪೂರ್ಣವಾಗಿ ಸತ್ತಿಲ್ಲ; ಕಳೆದ ಹನ್ನೆರಡು ವರ್ಷಗಳ ಮೋದಿ-ಶಾ ಆಡಳಿತ ಪರ್ವದಲ್ಲಿ ಪತ್ರಿಕಾ ಸ್ವಾತಂತ್ರ್ಯವು ಕ್ಷೀಣಗೊಂಡಿದ್ದು, ಅದು ತಳೆದಿರುವ ಬಂಡವಾಳಕೇಂದ್ರಿತ ರೂಪದಲ್ಲಿಯೇ ಆಳುವವರ ಬಾಲ ಬಡಿಯುವ ದೌರ್ಬಲ್ಯವನ್ನು ಅಡಗಿಸಿಕೊಂಡಿದೆ. ಹೀಗಾಗಿ ಡಿಜಿಟಲ್ ಸ್ವರೂಪದ ಕೆಲ ಸ್ವತಂತ್ರ ಮಾಧ್ಯಮ ಸಂಸ್ಥೆಗಳ ವಿನಾ ತಥಾಕಥಿತ ಮುಖ್ಯಧಾರೆಯ ಮಾಧ್ಯಮ ಆಳುವ ಸರ್ಕಾರದ ಗುಲಾಮಗಿರಿಗೆ ಬಿದ್ದಿದೆ. ಹೀಗೆ ಉಂಟಾಗಿರುವ ಪತನದ ಪೆಟ್ಟು ತನಿಖಾ ಪತ್ರಿಕೋದ್ಯಮದ ಮೇಲೆಯೂ ಸ್ವಾಭಾವಿಕವಾಗಿಯೇ ಬಿದ್ದಿದೆ. ಪತ್ರಿಕಾವೃತ್ತಿಯೇ ಹಿಂದೆಂದಿಗಿಂತ ಹೆಚ್ಚು ದಮನದ ಒತ್ತಡಕ್ಕೆ ಸಿಲುಕಿದೆ. ಇಂತಹ ಕಾಲಘಟ್ಟದಲ್ಲಿ ತನಿಖಾ ಪತ್ರಿಕೋದ್ಯಮ ನಡೆಸಲು ಅತಿ ಹೆಚ್ಚಿನ ದಿಟ್ಟತನ ಮತ್ತು ಸಂಪನ್ಮೂಲದ ಅಗತ್ಯವಿರುತ್ತದೆ. ತನಿಖಾ ಪತ್ರಿಕೋದ್ಯಮ ಸಂಪೂರ್ಣವಾಗಿ ಕಡೆಯುಸಿರೆಳೆದಿಲ್ಲ ನಿಜ. ಇಂದು ಡಿಜಿಟಲ್ ಕಣದಲ್ಲಿ ಹೊಸ ತಲೆಮಾರಿನ ಸ್ವತಂತ್ರ ಮಾಧ್ಯಮಗಳು ಸಾರ್ವಜನಿಕರ ಆರ್ಥಿಕ ನೆರವಿನೊಂದಿಗೆ ಕುಟುಕು ಜೀವ ಹಿಡಿದು ಹೋರಾಡುತ್ತಿವೆ. ಮಾಹಿತಿ ಹಕ್ಕು ಕಾಯ್ದೆ ಆಧಾರಿತ ವರದಿಗಳು ಹಾಗೂ ಡೇಟಾ ಜರ್ನಲಿಸಂ ಮೂಲಕ, ಹಾಗೆಯೇ ಪನಾಮಾ ಪೇಪರ್ಸ್ ಮತ್ತು ಪೆಗಾಸಸ್‌ ಕುರಿತ ಅಂತರರಾಷ್ಟ್ರೀಯ ಸಹಯೋಗದ ಬೃಹತ್ ತನಿಖೆಗಳಲ್ಲಿ ಈ ಪರಂಪರೆ ಕ್ಷೀಣವಾಗಿಯಾದರೂ ಮುಂದುವರಿದಿದೆ.
ಭಾರತೀಯ ತರುಣ್ ತೇಜ್‌ಪಾಲ್ ಅವರಿಗೆ ಪ್ರಕಟವಾದ 10 ವರ್ಷಗಳ ಜೈಲು ಶಿಕ್ಷೆ ಕೇವಲ ಒಬ್ಬ ಹಿರಿಯ ಪತ್ರಕರ್ತನ ದುರಂತ ಕಥೆಯಾಗಿರಬಹುದು; ಆದರೆ ತೆಹಲ್ಕಾದ ಕುಸಿತವು ಭಾರತದ ತನಿಖಾ ಪತ್ರಿಕೋದ್ಯಮದ ಒಂದು ಅತ್ಯಂತ ಪ್ರಭಾವಿ ಮತ್ತು ಮಹತ್ವದ ಅಧ್ಯಾಯ ಮುಕ್ತಾಯಗೊಂಡ ಐತಿಹಾಸಿಕ ಕ್ಷಣ. ಇಷ್ಟೆಲ್ಲಾ ಸವಾಲುಗಳ ನಡುವೆಯೂ, ಪ್ರಜಾಪ್ರಭುತ್ವದ ಉಳಿವಿಗಾಗಿ ಆಡಳಿತ ವ್ಯವಸ್ಥೆ ಮತ್ತು ಅಧಿಕಾರವನ್ನು ನಿರ್ಭಯವಾಗಿ ಪ್ರಶ್ನಿಸುವ ಪತ್ರಿಕೋದ್ಯಮದ ನೈತಿಕ ಅನಿವಾರ್ಯತೆ ಮಾತ್ರ ಎಂದಿಗೂ, ಎಲ್ಲಿಯೂ ಕಡಿಮೆಯಾಗಿಲ್ಲ.
