ಈ ಕ್ಷಣವು ವಿಜಯ್ ಮತ್ತು ಟಿವಿಕೆ ಪಕ್ಷದ ಏಳಿಗೆಗಿಂತ ಹೆಚ್ಚಾಗಿ ಸ್ಟ್ಯಾಲಿನ್ ಅವರ ಸುಧಾರಿತ ರಾಜಕೀಯ ವ್ಯಕ್ತಿತ್ವವನ್ನು ಎತ್ತಿ ತೋರಿಸುತ್ತದೆ. ತಂದೆ ಕರುಣಾನಿಧಿ ಅವರಂತೆ ಪ್ರತೀಕಾರಕ್ಕೆ ಅವಕಾಶ ನೀಡದೆ, ಸ್ಟ್ಯಾಲಿನ್ ಸಂಯಮದ ಮಾರ್ಗವನ್ನು ಆಯ್ಕೆ ಮಾಡಿದ್ದಾರೆ. ಇದು ಹೊಸ ಯುಗದ ಸೂಚನೆಯಾಗಿದೆ.
ಸೂಪರ್ಸ್ಟಾರ್, ಸೂಪರ್ ಡ್ಯಾನ್ಸರ್ ಜೋಸೆಫ್ ವಿಜಯ್ ಚಂದ್ರಶೇಖರ್ ಬೆಳ್ಳಿ ಪರದೆಯಿಂದ ನಿಜ ಜೀವನಕ್ಕೆ ಬಂದು ತಮಿಳುನಾಡಿನ ಮುಖ್ಯಮಂತ್ರಿಯಾಗುತ್ತಿದ್ದಂತೆ ತಮಿಳುನಾಡಿನಲ್ಲಿ ಹೊಸ ರಾಜಕೀಯ ಸಂಚಲನ ಉಂಟುಮಾಡಿದೆ.
ಇದು ಒಪ್ಪಿತ ರಾಜಕೀಯ ಅಥವಾ ಚಾಣಾಕ್ಷ ರಾಜಕೀಯದ ಆರಂಭವನ್ನು ಸೂಚಿಸುತ್ತದೆಯೇ? ಪ್ರತೀಕಾರ ರಾಜಕೀಯದ ಅಂತ್ಯವನ್ನು ಸೂಚಿಸುತ್ತದೆಯೇ? ಹಾಗಾದರೆ ಹೊಸ ನಾಯಕ ಯಾರು?
ಮಾಧ್ಯಮಗಳು ಮೊದಲು ವಿಜಯ್ ಅವರನ್ನು ತಮಿಳುನಾಡಿನ ರಾಜಕೀಯ ಅಂಗಳದಲ್ಲಿ ಗಂಭೀರ ಆಟಗಾರರನ್ನಾಗಿ ಪರಿಗಣಿಸಿರಲಿಲ್ಲ. ನಾನೂ ಸಹ ವಿಜಯ್ ಅವರ ಹೊಸ ಅಭಿಮಾನಿಯಾಗಿದ್ದೇನೆ. ವಿಜಯ್ 10-15 ಸೀಟುಗಳಿಗಿಂತ ಹೆಚ್ಚು ಗೆಲ್ಲುತ್ತಾರೆ ಎಂದು ನಾನೂ ಊಹಿಸಿರಲಿಲ್ಲ. ಏಕೆಂದರೆ ನಾನು ತಮಿಳುನಾಡಿನ ಎರಡು ಪಕ್ಷಗಳ ರಾಜಕೀಯ ಮತ್ತು ಚುನಾವಣೆಗಳನ್ನು ನೋಡಿದ್ದೇನೆ ಮತ್ತು ವರದಿ ಮಾಡಿದ್ದೇನೆ!
ವಿಜಯ್ ಅವರ ವಿಜಯವು ನಿಜವಾಗಿಯೂ ಆಶ್ಚರ್ಯಕರವಾಗಿತ್ತು. ಮಾಧ್ಯಮಗಳನ್ನು ದೂಷಿಸುವುದಕ್ಕಾಗುವುದಿಲ್ಲ. ಕಳೆದ 25 ವರ್ಷಗಳಿಂದ ತಮಿಳುನಾಡು ಚುನಾವಣೆಗಳನ್ನು ವರದಿ ಮಾಡಿದ ನನಗೂ ಸಹ ಇದು ಯಾವಾಗಲೂ ಡಿಎಂಕೆ Vs ಎಐಎಡಿಎಂಕೆ ಆಗಿಯೇ ಇತ್ತು. ಒಬ್ಬರಾದ ನಂತರ ಒಬ್ಬರು ಅಧಿಕಾರದ ಸಂಗೀತ ಕುರ್ಚಿ ಆಡುತ್ತಿದ್ದರು.
ನಮ್ಮ ತಲೆಮಾರಿನ ಪತ್ರಕರ್ತರು ತಮಿಳುನಾಡಿನ ಸುವರ್ಣ ಯುಗವನ್ನು ನೋಡಿಲ್ಲ. ಕಾಂಗ್ರೆಸ್ ಮುಖ್ಯಮಂತ್ರಿ ಕೆ. ಕಾಮರಾಜ್ ಅವರು 1954ರಿಂದ 1963ರವರೆಗೆ ಆಡಳಿತ ನಡೆಸಿದ್ದರು. ಅವರು ಕೇವಲ ರಾಜ್ಯದಲ್ಲಿ ಅಲ್ಲದೇ ದೇಶಕ್ಕೇ ಆಡಳಿತದ ಮಾದರಿಯನ್ನು ನೀಡಿದ್ದರು. ಮಧ್ಯಾಹ್ನದ ಬಿಸಿಯೂಟ ಯೋಜನೆ ಮತ್ತು ರಾಜಕೀಯ ತಂತ್ರದೊಂದಿಗೆ ಸರ್ಕಾರದಲ್ಲಿ ಕಿರಿಯರಿಗೆ ಅಧಿಕಾರ ನಡೆಸಲು ದಾರಿ ಮಾಡಿಕೊಡುವ ಅವರ ಯೋಜನೆ ʼಕಾಮರಾಜ್ ಯೋಜನೆʼ ಎಂದೇ ಕರೆಯಲಾಗುತ್ತದೆ. ನಂತರ 1967ರಲ್ಲಿ ಮೊದಲ ದ್ರಾವಿಡ ಮುಖ್ಯಮಂತ್ರಿ ಸಿ.ಎನ್. ಅನ್ನಾದುರೈ ಬಂದರು. 1972ರಲ್ಲಿ ಡಿಎಂಕೆ ಬೇರ್ಪಟ್ಟು ಎಐಎಡಿಎಂಕೆ ಹುಟ್ಟಿತು. ಶೀಘ್ರದಲ್ಲೇ ಎಂ ಜಿ ರಾಮಚಂದ್ರನ್ ಮುಖ್ಯಮಂತ್ರಿಯಾಗಿ ಮೂರು ಅವಧಿಗಳ ಕಾಲ ಅಧಿಕಾರ ನಡೆಸಿದರು. ಆದರೆ ಈಗಿನ ಕಥೆ ಅದಲ್ಲ.
ನಿಜವಾದ ಕಥೆ ನಾಲ್ಕು ದಶಕಗಳ ಕಾಲ ತಮಿಳುನಾಡು ಕಂಡ ಡಿಎಂಕೆ ಮತ್ತು ಎಐಎಡಿಎಂಕೆ ನಡುವಿನ ಪ್ರತೀಕಾರ ರಾಜಕೀಯದ್ದು. ವಿಜಯ್ ಮುಖ್ಯಮಂತ್ರಿಯಾದಾಗ ನನ್ನ ಮನಸ್ಸು ರಿವೈಂಡ್ ಆಗುತ್ತದೆ. ತಮಿಳುನಾಡಿನ ಪ್ರತೀಕಾರ ರಾಜಕೀಯಕ್ಕೆ ಅಂತ್ಯವಾಯಿತೇ?
ರಾಷ್ಟ್ರೀಯ ಮಾಧ್ಯಮಗಳ ನನ್ನ ಸಹ ಲೇಖಕರು ಮತ್ತು ನಾನು ವೃತ್ತಿಯುದ್ದಕ್ಕೂ ನನ್ನ ಸ್ವಂತ ರಾಜ್ಯ ಕರ್ನಾಟಕಕ್ಕಿಂತಲೂ ಹೆಚ್ಚು ನೆರೆಯ ರಾಜ್ಯ ತಮಿಳುನಾಡಿನಲ್ಲಿ ವರದಿ ಮಾಡಿದ್ದೇವೆ. ಏಕೆಂದರೆ ತಮಿಳುನಾಡು ರಾಜಕೀಯವು ಬಹಳ ಅಸ್ಥಿರ, ಹಿಂಸೆ, ಪ್ರತೀಕಾರ; ಮಧ್ಯರಾತ್ರಿ, ಬೀದಿ ಎಂದಿಲ್ಲ. ಸದನದೊಳಗೂ ನಾಟಕೀಯ ಬೆಳವಣಿಗೆ ನಡೆಯುತ್ತಿತ್ತು. (ನಮ್ಮ ಕರ್ನಾಟಕ ಇನ್ನೂ ರಾಜಕೀಯ ಸ್ಥಿರತೆ ಮತ್ತು ಸ್ನೇಹಪರ ನಾಯಕರಿಗೆ ಹೆಸರಾಗಿದೆ).
ಚೆನ್ನೈನ ಮೌಂಟ್ ರೋಡ್ ದಾಟುತ್ತಿರುವಾಗ ರಸ್ತೆಯ ಎದುರಿಗೆ ಕಾಣುವ ಆ ವಿಶಾಲ, ಅದ್ಭುತ ಜರ್ಮನ್ ವಿನ್ಯಾಸದ ಕಟ್ಟಡ ʼಒಮಂದೂರ್ ಸರ್ಕಾರಿ ಎಸ್ಟೇಟ್ʼ, ಹೊಸ ವಿಧಾನಸೌಧ- ಸಚಿವಾಲಯ ಕಟ್ಟಡ (1200 ಕೋಟಿ ರೂಪಯಿ) ತಮಿಳುನಾಡಿನ ಪ್ರತೀಕಾರ ರಾಜಕೀಯದ ಅತ್ಯಂತ ಪ್ರಸಿದ್ಧ ಸಂಕೇತವಾಗಿದೆ. 2010ರಲ್ಲಿ ಮುಖ್ಯಮಂತ್ರಿ ಕರುಣಾನಿಧಿ ಅವರ “ಕನಸಿನ ಯೋಜನೆ”ಯಾಗಿ ನಿರ್ಮಾಣವಾಯಿತು. ಒಂದು ವರ್ಷದ ನಂತರ ಜೆ. ಜಯಲಲಿತಾ ಅಧಿಕಾರಕ್ಕೆ ಬಂದು ಅದನ್ನು ಮಲ್ಟಿ ಸ್ಪೆಷಾಲಿಟಿ ಆಸ್ಪತ್ರೆಯಾಗಿ ಪರಿವರ್ತಿಸಿದರು. ಅದು ಸರ್ಕಸ್ ತಂತಿ ತರಹ ಕಾಣುತ್ತದೆ ಎಂದು ತಿರಸ್ಕರಿಸಿ ಹಳೆಯ ವಿಧಾನಸೌಧಕ್ಕೆ ಹಿಂತಿರುಗಿದರು.
ಇಬ್ಬರ ನಡುವಿನ ವೈರತ್ವ ಅಂತಹದ್ದು. ಪರಸ್ಪರ ನೆರಳನ್ನೂ ಬದಲಾಯಿಸಲು ಸಿದ್ಧರಾಗಿದ್ದರು. ವಿಧಾನಸೌಧದಲ್ಲಿ ಜಯಲಲಿತಾ ಅವರ ಸೀರೆ ಮತ್ತು ಕೂದಲು ಹಿಡಿದು ಎಳೆದ ಘಟನೆ, ಜಯಲಲಿತಾ ಅವರು ಮುಖ್ಯಮಂತ್ರಿಯಾಗುವವರೆಗೂ ವಿಧಾನಸೌಧಕ್ಕೆ ಹಿಂತಿರುಗುವುದಿಲ್ಲ ಎಂದು ಪ್ರತಿಜ್ಞೆ ಮಾಡಿದ್ದು, ಇವೆಲ್ಲ ಸಿನಿಮಾ ಕಥೆಯಂತಿದ್ದರೂ ನಿಜವಾಗಿ ನಡೆದವು.
ಜಯಲಲಿತಾ ಮುಖ್ಯಮಂತ್ರಿಯಾಗಿ ಮರಳಿದ ನಂತರ ಒಂದು ದಿನ ಕರುಣಾನಿಧಿ ಅವರನ್ನು ಮಧ್ಯರಾತ್ರಿ ಬಂಧಿಸಿದ್ದು, ಅದಕ್ಕೆ ಪ್ರತಿಕ್ರಿಯೆಯಾಗಿ ಕರುಣಾನಿಧಿ ಅವರ ಇಬ್ಬರು ಪತ್ನಿಯರು ರಸ್ತೆಗೆ ಬಂದು ಧರಣಿ ನಡೆಸಿದ್ದು… ಇವೆಲ್ಲ ರಾಜಕೀಯ ನಾಟಕಗಳು. ಇಬ್ಬರೂ ಒಬ್ಬರ ಯೋಜನೆಗಳನ್ನು ಇನ್ನೊಬ್ಬರು ರದ್ದುಗೊಳಿಸುತ್ತಿದ್ದರು. ಡಿಎಂಕೆಯ ಸನ್ ಟಿವಿ ಮತ್ತು ಎಐಎಡಿಎಂಕೆಯ ಜಯಾ ಟಿವಿ ಎರಡು ಪಕ್ಷಗಳಂತೆ ಕಾರ್ಯನಿರ್ವಹಿಸುತ್ತಿದ್ದವು.
ತಳ ಮಟ್ಟದ ವರದಿಗಾರರಾಗಿ ರಾಜಕೀಯ ಸುದ್ದಿ ವರದಿ ಮಾಡುವುದು ರೋಮಾಂಚಕ ಮತ್ತು ದಣಿವಿನ ಕೆಲಸವಾಗಿತ್ತು. ಅಲ್ಲಿ ಆಡಳಿತವಲ್ಲ, ವೈಯಕ್ತಿಕ ಪ್ರತೀಕಾರ ಮತ್ತು “ಟಿಟ್ ಫಾರ್ ಟ್ಯಾಟ್” ಕಥೆಗಳೇ ಪ್ರಧಾನವಾಗಿದ್ದವು. ಮಧ್ಯರಾತ್ರಿಯಲ್ಲೂ ಬ್ರೇಕಿಂಗ್ ನ್ಯೂಸ್ ಬರುತ್ತಿತ್ತು. 1995ರಿಂದ 24×7 ರಾಷ್ಟ್ರೀಯ ನ್ಯೂಸ್ ಚಾನೆಲ್ಗಳ ಆರಂಭಕ್ಕೆ ಮದ್ರಾಸ್ನ ಕಥೆಗಳು ದೊಡ್ಡ ಕಾರಣವಾದವು.
ಕರುಣಾನಿಧಿ ಮತ್ತು ಜಯಲಲಿತಾ ಇಬ್ಬರ ನಿಧನದ ನಂತರ ರಾಜಕೀಯ ನಿರ್ವಾತ ಉಂಟಾಯಿತು. ರಾಜ್ಯವು ಸಾಮಾನ್ಯ ರಾಜಕೀಯವನ್ನು ಕಂಡಿತು. ಸ್ಟ್ಯಾಲಿನ್ ಒಮ್ಮೆ ʼದಾರಿತಪ್ಪಿದ ಮಗʼ ಎಂದು ಪರಿಗಣಿತರಾಗಿದ್ದರು. ದುಬಾರಿ ಕಾರುಗಳಲ್ಲಿ, ಹಮ್ಮರ್ ಕಾರಿನಲ್ಲಿ ಚೆನ್ನೈ ಬೀದಿಗಳಲ್ಲಿ ಸುತ್ತುತ್ತಿದ್ದರು. ಆದರೆ, ಅವರು ಬದಲಾಗಿದ್ದಾರೆ! ಅಲಗಿರಿ ಅವರನ್ನು ಕರುಣಾನಿಧಿ ಅವರ ಉತ್ತರಾಧಿಕಾರಿ ಎಂದು ಎಲ್ಲರೂ ಭಾವಿಸಿದ್ದರು. ಆದರೆ ಸ್ಟ್ಯಾಲಿನ್ ಅವರು ಬದಲಾಗಿ ತಮಿಳುನಾಡಿಗೆ ಒಳ್ಳೆಯದನ್ನು ಮಾಡಿದ್ದಾರೆ.
ಚುನಾವಣೆ ನಂತರ ಸ್ಟ್ಯಾಲಿನ್ ಅವರ ನಡವಳಿಕೆ ಅವರ ರಾಜಕೀಯ ಪ್ರಬುದ್ಧತೆ ಮತ್ತು ಸಜ್ಜನಿಕೆಗೆ ಸಾಕ್ಷಿಯಾಗಿದೆ. ಸೋಲನ್ನು ಒಪ್ಪಿಕೊಂಡು ಶಾಂತರಾಗಿ ಉಳಿದರು. ತನ್ನ ಮೇಲೆ ತೀವ್ರ ವೈಯಕ್ತಿಕ ದಾಳಿ ಮಾಡಿದ್ದ ವಿಜಯ್ ಅವರೊಂದಿಗೆ ಸರ್ಕಾರ ರಚಿಸಲು ಮಿತ್ರಪಕ್ಷಗಳಿಗೆ ಅವಕಾಶ ನೀಡಿದರು. ಡಿಎಂಕೆ ಮತ್ತು ಎಐಎಡಿಎಂಕೆ ಒಕ್ಕೂಟದ ವದಂತಿಗಳಿದ್ದರೂ, ತನ್ನ ಮಗ ಉದಯನಿಧಿಯನ್ನು ಉಪ ಮುಖ್ಯಮಂತ್ರಿ ಮಾಡುವ ಅವಕಾಶವಿದ್ದರೂ ಸ್ಟ್ಯಾಲಿನ್ ಅದಕ್ಕೆ ಸೊಪ್ಪು ಹಾಕಲಿಲ್ಲ. ಅಧಿಕಾರದ ಲಾಭಕ್ಕಾಗಿ ಸಂಧಾನಕ್ಕೆ ಬಗ್ಗದೆ ತಮ್ಮ ನಿಲುವಿಗೆ ಬದ್ಧತೆಯನ್ನು ಕಾಯ್ದುಕೊಂಡರು.
ಈ ಚುನಾವಣೆಯಲ್ಲಿ ಸ್ಟ್ಯಾಲಿನ್ ಉತ್ತಮ ನಾಯಕರೇ ಅಥವಾ ವಿಜಯ್? ಇದನ್ನು ತಮಿಳುನಾಡು ನೋಡಬೇಕು.
ಸ್ಟ್ಯಾಲಿನ್ ಅವರ ಈ ಬದಲಾವಣೆ ತಮಿಳುನಾಡಿನ ರಾಜಕೀಯ ನಕಾಶೆಯನ್ನೇ ಬದಲಾಯಿಸಿದೆ. ಕೆಲವರು ಇದನ್ನು “ದ್ರಾವಿಡ ರಾಜಕೀಯದ ಅಂತ್ಯ” ಎಂದು ಹೇಳುತ್ತಿದ್ದರೆ, ನಿಜವಾದ ಚರ್ಚೆ ಪ್ರತೀಕಾರ ರಾಜಕೀಯದ ಅಂತ್ಯದ ಬಗ್ಗೆಯಾಗಬೇಕು. ರಾಜನೀತಿಯ ಉದಯವನ್ನು ನಾವು ಕಾಣುತ್ತಿದ್ದೇವೆಯೇ?
ಈ ಕ್ಷಣವು ವಿಜಯ್ ಮತ್ತು ಟಿವಿಕೆ ಪಕ್ಷದ ಏಳಿಗೆಗಿಂತ ಹೆಚ್ಚಾಗಿ ಸ್ಟ್ಯಾಲಿನ್ ಅವರ ಸುಧಾರಿತ ರಾಜಕೀಯ ವ್ಯಕ್ತಿತ್ವವನ್ನು ಎತ್ತಿ ತೋರಿಸುತ್ತದೆ. ತಂದೆ ಕರುಣಾನಿಧಿ ಅವರಂತೆ ಪ್ರತೀಕಾರಕ್ಕೆ ಅವಕಾಶ ನೀಡದೆ, ಸ್ಟ್ಯಾಲಿನ್ ಸಂಯಮದ ಮಾರ್ಗವನ್ನು ಆಯ್ಕೆ ಮಾಡಿದ್ದಾರೆ. ಇದು ಹೊಸ ಯುಗದ ಸೂಚನೆಯಾಗಿದೆ.
ಇನ್ನೊಂದು ಕಡೆ, ವಿಜಯ್ ಅವರ ಚರಿಷ್ಮಾ ಮತ್ತು ಸ್ಟಾರ್ ಪವರ್ ಜಯಲಲಿತಾ ಅವರ ಐತಿಹಾಸಿಕ ರಾಜಕೀಯ ಆಕರ್ಷಣೆಗೆ ಹೋಲುತ್ತದೆ. “ಪುರಚ್ಚಿ ತಲೈವಿ”ಯಂತೆ, ದಳಪತಿ ಶಾಂತವಾದ ಆದರೆ ಶಕ್ತಿಶಾಲಿ ವ್ಯಕ್ತಿತ್ವ ಹೊಂದಿದ್ದಾರೆ. ಲ್ಯಾಂಡ್ ಕ್ರೂಸರ್ ಮುಂಭಾಗದ ಸೀಟಿನಲ್ಲಿ ಕುಳಿತು ಕಿಟಕಿ ತೆರೆದು ಜನರಿಗೆ ಶಾಂತವಾದ ನಗುವಿನೊಂದಿಗೆ ಅಭಿವಂದನೆ ಸಲ್ಲಿಸುವುದು, ಜಯಲಲಿತಾ ಅವರೂ ಮಾಡುತ್ತಿದ್ದರು.
ವಿಜಯ್ ಜನರೊಂದಿಗೆ ಭರವಸೆಗಳ ಮೂಲಕವೇ ಸಂಪರ್ಕ ಸಾಧಿಸಿದ್ದಾರೆ. ಜಯಲಲಿತಾ ಮಾಡಿದಂತೆ ವಿವಾಹವಾಗುವ ಕನ್ಯೆಯರಿಗೆ ಸೀರೆ ಮತ್ತು 8 ಗ್ರಾಂ ಚಿನ್ನ, ಮಹಿಳೆಯರಿಗೆ ಮತ್ತು ಯುವಕರಿಗೆ ಆರ್ಥಿಕ ನೆರವು, ಆರು ಉಚಿತ ಎಲ್ಪಿಜಿ ಸಿಲಿಂಡರ್, ಸಾಲ ಮನ್ನಾ … ಎಲ್ಲವೂ ಜಯಲಲಿತಾ ಅವರ ಯೋಜನೆಗಳನ್ನು ನೆನಪಿಸುತ್ತವೆ. ಆದರೆ ಜಯಲಲಿತಾ ಅವರ ಮೇಲಿದ್ದ ಭ್ರಷ್ಟಾಚಾರದ ಆರೋಪ ವಿಜಯ್ ಮೇಲಿಲ್ಲ. ಅವರು ಸ್ವಚ್ಛ, ಭರವಸೆಯಿಂದ ಕೂಡಿದ ಸಮರ್ಪಭಾವದಿಂದ ಕೆಲಸ ಮಾಡಲು ಸಿದ್ಧರಾಗಿದ್ದಾರೆ.
ಇದನ್ನೂ ಓದಿ ಜೋಸೆಫ್ ವಿಜಯ್: ಬೆನ್ನ ಹಿಂದೆ ಜನಪ್ರಿಯತೆ- ಕಣ್ಣ ಮುಂದೆ ಸವಾಲುಗಳ ಬೆಟ್ಟ
ಮುಂದಿನ ಕಾರ್ಯ ಹೇಳಿದಷ್ಟು ಸುಲಭವಲ್ಲ. ಅವರು ತಮ್ಮನ್ನು ಜನರ ನಾಯಕ ಎಂದು ಸಾಬೀತುಪಡಿಸಬೇಕು. ಕೇವಲ ಬೆಳ್ಳಿ ಪರದೆಯ ದಳಪತಿಯಾಗಿ ಅಲ್ಲ. ಮಹಾತ್ಮ ಗಾಂಧೀಜಿ ಅವರ ಮೊಮ್ಮಗ ಗೋಪಾಲಕೃಷ್ಣ ಗಾಂಧಿ ಅವರು ವಿಜಯ್ ಅವರಿಗೆ ಬಹಿರಂಗ ಪತ್ರ ಬರೆದು ಉತ್ತಮ ಆಡಳಿತ, ಆರ್ಥಿಕ ಪ್ರಗತಿ ಮತ್ತು ದ್ವೇಷರಹಿತ ಭಾರತ ನಿರ್ಮಾಣಕ್ಕೆ ಸಲಹೆಗಳನ್ನು ನೀಡಿದ್ದಾರೆ. ಮೊದಲ ಬಾರಿಗೆ ಕ್ರಿಶ್ಚಿಯನ್ ಮುಖ್ಯಮಂತ್ರಿಯಾಗಿರುವುದನ್ನು ದೈವದ ಪ್ರೇರಣೆ ಎಂದು ಹೇಳಿದ್ದಾರೆ.
ವಿಜಯ್ ಅವರ ರಾಜಕೀಯ ಪ್ರವೇಶ ಈಗ ಸ್ಥಳೀಯ ಸುದ್ದಿಯಲ್ಲ, ರಾಷ್ಟ್ರೀಯ ಮಟ್ಟದಲ್ಲಿ ಬ್ಲಾಕ್ಬಸ್ಟರ್ ಆಗಿದೆ. ಹೊಸ ಸ್ಕ್ರಿಪ್ಟ್ ಸಿದ್ಧವಾಗಿದೆ. ಆಡಳಿತದ “ಲೈಟ್ಸ್, ಕ್ಯಾಮೆರಾ, ಆಕ್ಷನ್”ಗೆ ಸಿದ್ಧರಾಗುವ ಸಮಯ ಬಂದಿದೆ.
ವಿಜಲ್ ಪೋಡು…!
ಆಯೇಷಾ ಖಾನಂ
ಹಿರಿಯ ಪತ್ರಕರ್ತೆ, ಕರ್ನಾಟಕ ಮಾಧ್ಯಮ ಕಾಡೆಮಿ ಅಧ್ಯಕ್ಷರು
