ಗ್ಲಾಸ್ಗೋದಲ್ಲಿ ನಡೆಯುತ್ತಿರುವ ಕಾಮನ್‌ವೆಲ್ತ್ ಕ್ರೀಡಾಕೂಟದ ವೇಟ್‌ಲಿಫ್ಟಿಂಗ್ ವಿಭಾಗದಲ್ಲಿ ಭಾರತೀಯ ಕ್ರೀಡಾಪಟುಗಳು ಮತ್ತೊಮ್ಮೆ ತಮ್ಮ ಪಾರುಪತ್ಯ ಮೆರೆದಿದ್ದಾರೆ. ಸ್ಪರ್ಧೆಯ ಆರಂಭಿಕ ದಿನವೇ ಭಾರತವು ಒಂದು ಚಿನ್ನ ಹಾಗೂ ಒಂದು ಬೆಳ್ಳಿ ಪದಕವನ್ನು ಮುಡಿಗೇರಿಸಿಕೊಳ್ಳುವ ಮೂಲಕ ಭರ್ಜರಿ ಆರಂಭ ಪಡೆದಿದೆ. ಕಳೆದ ಮೂರು ಕಾಮನ್‌ವೆಲ್ತ್ ಆವೃತ್ತಿಗಳಲ್ಲಿ ವೇಟ್‌ಲಿಫ್ಟಿಂಗ್‌ನಲ್ಲೇ ಭಾರತ ಒಟ್ಟು 33 ಪದಕಗಳನ್ನು ಗೆದ್ದಿರುವುದು ಈ ಕ್ರೀಡೆಯಲ್ಲಿ ದೇಶದ ಸಾಧನೆಯನ್ನು ಎತ್ತಿ ತೋರಿಸುತ್ತದೆ.
ಮಹಿಳೆಯರ 48 ಕೆ.ಜಿ ತೂಕದ ವಿಭಾಗದಲ್ಲಿ ಕಣಕ್ಕಿಳಿದಿದ್ದ ಮಣಿಪುರದ 31 ವರ್ಷದ ಸ್ಟಾರ್ ವೇಟ್‌ಲಿಫ್ಟರ್ ಮೀರಾಬಾಯಿ ಚಾನು, ದೇಶಕ್ಕೆ ಬಂಗಾರದ ಪದಕ ತಂದುಕೊಟ್ಟಿದ್ದಾರೆ. ಈ ಮೂಲಕ ಅವರು ಕಾಮನ್‌ವೆಲ್ತ್ ಕ್ರೀಡಾಕೂಟದಲ್ಲಿ ಸತತ ಮೂರನೇ ಬಾರಿಗೆ ಚಿನ್ನದ ಪದಕ ಗೆದ್ದ ಐತಿಹಾಸಿಕ ಸಾಧನೆ ಮಾಡಿದ್ದಾರೆ. ಇದಕ್ಕೂ ಮುನ್ನ ಅವರು 2018ರ ಗೋಲ್ಡ್ ಕೋಸ್ಟ್ ಮತ್ತು 2022ರ ಬರ್ಮಿಂಗ್‌ಹ್ಯಾಮ್ ಕ್ರೀಡಾಕೂಟದಲ್ಲೂ ಚಿನ್ನದ ಪದಕಗಳಿಗೆ ಕೊರಳೊಡ್ಡಿದ್ದರು.
ಮೀರಾಬಾಯಿ ಅವರ ಆರಂಭ ಕೊಂಚ ಆತಂಕಕಾರಿಯಾಗಿತ್ತು. ಸ್ನ್ಯಾಚ್ ವಿಭಾಗದ ಮೊದಲ ಯತ್ನದಲ್ಲಿ 82 ಕೆ.ಜಿ ಎತ್ತುವಲ್ಲಿ ವಿಫಲರಾದರೂ, ವಿಚಲಿತರಾಗದೆ ಮರಳಿ ಯಶಸ್ವಿಯಾದರು. ಮೂರನೇ ಯತ್ನದಲ್ಲಿ 85 ಕೆ.ಜಿ ಎತ್ತುವ ಮೂಲಕ ಹೊಸ ಕಾಮನ್‌ವೆಲ್ತ್ ಗೇಮ್ಸ್ ದಾಖಲೆ ಬರೆದರು. ಕ್ಲೀನ್ ಅಂಡ್ ಜರ್ಕ್ ವಿಭಾಗದಲ್ಲಿಯೂ ಮೊದಲ ಯತ್ನದಲ್ಲಿ 105 ಕೆ.ಜಿ ಎತ್ತುವಲ್ಲಿ ವಿಫಲರಾದ ಅವರು, ಎರಡನೇ ಯತ್ನದಲ್ಲಿ ಯಶಸ್ವಿಯಾಗಿ ಒಟ್ಟು 190 ಕೆ.ಜಿ ತೂಕ (ಹೊಸ ಗೇಮ್ಸ್ ದಾಖಲೆ) ಎತ್ತುವ ಮೂಲಕ ಚಿನ್ನದ ಪದಕ ತಮ್ಮದಾಗಿಸಿಕೊಂಡರು. ನೈಜೀರಿಯಾದ ರುತ್ (168 ಕೆ.ಜಿ) ಬೆಳ್ಳಿ ಮತ್ತು ಮಲೇಷ್ಯಾದ ಐರಿನಾ ಜೇನ್ (167 ಕೆ.ಜಿ) ಕಂಚು ಗೆದ್ದರು.
ಮೀರಾಬಾಯಿ ಅವರ ಐತಿಹಾಸಿಕ ಸಾಧನೆಗೂ ಕೆಲವೇ ಗಂಟೆಗಳ ಮುನ್ನ, ಪುರುಷರ 60 ಕೆ.ಜಿ ತೂಕದ ವಿಭಾಗದಲ್ಲಿ 28 ವರ್ಷದ ರಿಷಿಕಾಂತ ಸಿಂಗ್ ಚನಂಬಮ್ ಭಾರತಕ್ಕೆ ಬೆಳ್ಳಿ ಪದಕ ಗೆದ್ದುಕೊಟ್ಟರು. ಮಣಿಪುರದವರೇ ಆದ ರಿಷಿಕಾಂತ, ಕಾಮನ್‌ವೆಲ್ತ್ ಕ್ರೀಡಾಕೂಟದಲ್ಲಿ ಪದಕ ಗೆದ್ದ ಆ ರಾಜ್ಯದ ಮೊದಲ ಪುರುಷ ವೇಟ್‌ಲಿಫ್ಟರ್ ಎಂಬ ಹೆಗ್ಗಳಿಕೆಗೂ ಪಾತ್ರರಾಗಿದ್ದಾರೆ. ಕ್ರೀಡಾಕೂಟದಲ್ಲಿ ಭಾರತಕ್ಕೆ ಒಲಿದ ಎರಡನೇ ಪದಕ ಇದಾಗಿತ್ತು.
ರಿಷಿಕಾಂತ ಅವರು ಸ್ನ್ಯಾಚ್ ವಿಭಾಗದಲ್ಲಿ 116 ಕೆ.ಜಿ ಯಿಂದ ಆರಂಭಿಸಿ, ಅಂತಿಮವಾಗಿ 121 ಕೆ.ಜಿ ತೂಕವನ್ನು ಯಶಸ್ವಿಯಾಗಿ ಎತ್ತಿದರು. ಆದರೆ, ಕ್ಲೀನ್ ಅಂಡ್ ಜರ್ಕ್ ವಿಭಾಗದಲ್ಲಿ 143 ಕೆ.ಜಿ ಎತ್ತಿದ ಅವರು, ಮುಂದಿನ 148 ಕೆ.ಜಿ ಮತ್ತು 151 ಕೆ.ಜಿ ಯತ್ನಗಳಲ್ಲಿ ವಿಫಲರಾದರು. ಅಂತಿಮವಾಗಿ ಅವರು ಒಟ್ಟು 264 ಕೆ.ಜಿ ತೂಕ ಎತ್ತುವ ಮೂಲಕ ದ್ವಿತೀಯ ಸ್ಥಾನ ಪಡೆದು ಬೆಳ್ಳಿ ಪದಕಕ್ಕೆ ತೃಪ್ತಿಪಡಬೇಕಾಯಿತು.
ಪುರುಷರ ಇದೇ ವಿಭಾಗದಲ್ಲಿ ಮಲೇಷ್ಯಾದ ಮೊಹಮ್ಮದ್ ಅನಿಕ್ ಕಸ್ಡನ್ ಅವರು ಒಟ್ಟು 273 ಕೆ.ಜಿ ತೂಕ ಎತ್ತುವ ಮೂಲಕ ಹೊಸ ಗೇಮ್ಸ್ ದಾಖಲೆ ನಿರ್ಮಿಸಿ ಚಿನ್ನದ ಪದಕ ಜಯಿಸಿದರು. ಕೀನ್ಯಾದ ಜೋಶುವಾ ಅಮುಂಗಾ ಮೊಬ್ಯೆ ಕಂಚಿನ ಪದಕಕ್ಕೆ ಕೊರಳೊಡ್ಡಿದರು. ಆರಂಭಿಕ ದಿನವೇ ಮಣಿಪುರದ ಇಬ್ಬರು ವೇಟ್‌ಲಿಫ್ಟರ್‌ಗಳು ಪದಕ ಬೇಟೆಯಾಡುವ ಮೂಲಕ ಭಾರತೀಯ ಕ್ರೀಡಾಭಿಮಾನಿಗಳಿಗೆ ಅತ್ಯಂತ ಸಂತಸದ ಕ್ಷಣಗಳನ್ನು ಉಡುಗೊರೆಯಾಗಿ ನೀಡಿದರು.
