ನಾಯಕ ರೋಹಿತ್‌ ಶರ್ಮಾ ಹಾಗೂ ಇಶಾನ್‌ ಕಿಶನ್ ಅವರ ಸ್ಫೋಟಕ ಆಟದ ನೆರವಿನಿಂದ ಮುಂಬೈ ಇಂಡಿಯನ್ಸ್ ತಂಡ ಐಪಿಎಲ್ 16ನೇ ಆವೃತ್ತಿಯಲ್ಲಿ ಮೊದಲ ಗೆಲುವು ದಾಖಲಿಸಿತು.
ದೆಹಲಿಯ ಅರುಣ್‌ ಜೇಟ್ಲಿ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯದಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ನೀಡಿದ 173 ರನ್‌ಗಳ ಗುರಿಯನ್ನು 20ನೇ ಓವರ್‌ನ ರೋಚಕ ಆಟದಲ್ಲಿ ನಾಲ್ಕು ವಿಕೆಟ್ ಕಳೆದುಕೊಂಡು ಜಯದ ನಗೆ ಬೀರಿತು.
ಕಳೆದ ಹಲವು ಪಂದ್ಯಗಳಲ್ಲಿ ಫಾರ್ಮ್‌ ಕಳೆದುಕೊಂಡಿದ್ದ ನಾಯಕ ರೋಹಿತ್‌ ಶರ್ಮಾ ಇಂದು ಭರ್ಜರಿ ಬ್ಯಾಟಿಂಗ್‌ ಆಡಿವಾಡಿದರು. 45 ಚೆಂಡುಗಳಲ್ಲಿ 4 ಸಿಕ್ಸರ್ ಹಾಗೂ 6 ಬೌಂಡರಿಯೊಂದಿಗೆ 65 ರನ್‌ ಬಾರಿಸಿದರು. ತಿಲಕ್‌ ವರ್ಮಾ ಕೂಡ 29 ಎಸೆತಗಳಲ್ಲಿ 4 ಭರ್ಜರಿ ಸಿಕ್ಸರ್ ಹಾಗೂ ಒಂದು ಬೌಂಡರಿಯೊಂದಿಗೆ 41 ಸ್ಫೋಟಿಸಿ ಗೆಲುವಿನಲ್ಲಿ ನೆರವಾದರು.
ಈಗಾಗಲೇ ಮೂರು ಸೋಲುಗಳನ್ನು ಕಂಡಿದ್ದ ಡೆಲ್ಲಿ ಕ್ಯಾಪಿಟಲ್ಸ್‌ಗೆ ಟೂರ್ನಿಯ ನಾಲ್ಕನೇ ಸೋಲಾಗಿದೆ.
ಅಕ್ಸರ್ – ವಾರ್ನರ್ ಜೊತೆಯಾಟ
ಟಾಸ್‌ ಸೋತ ಡೆಲ್ಲಿ ಕ್ಯಾಪಿಟಲ್ಸ್ ತಂಡ ಆಲ್‌ರೌಂಡರ್‌ ಅಕ್ಸರ್ ಪಟೇಲ್ ಅವರ ಸಿಕ್ಸರ್, ಬೌಂಡರಿಗಳ ಭರ್ಜರಿಯಾಟ ಹಾಗೂ ನಾಯಕ ಡೇವಿಡ್‌ ವಾರ್ನರ್ ಸಮಯೋಚಿತ ಆಟದಿಂದ 172 ರನ್‌ಗಳ ಗೌರವಾನ್ವಿತ ಮೊತ್ತ ದಾಖಲಿಸಿತು.
ಡೆಲ್ಲಿ ನಾಲ್ಕನೇ ಓವರ್‌ನಲ್ಲಿಯೇ ಪೃಥ್ವಿ ಶಾ (15) ಅವರ ವಿಕೆಟ್ ಕಳೆದುಕೊಂಡಿತು. ಮನೀಶ್‌ ಪಾಂಡೆಯೊಂದಿಗೆ ಆಟವಾಡಿದ ನಾಯಕ ವಾರ್ನರ್ ಎರಡನೇ ವಿಕೆಟ್ ಜೊತೆಯಾಟಕ್ಕೆ 43 ರನ್‌ ಕಲೆಯಾಕಿದರು. ತಂಡದ ಮೊತ್ತ 81 ರನ್‌ ಆಗಿದ್ದಾಗ ಚಾವ್ಲಾ ಬೌಲಿಂಗ್‌ನಲ್ಲಿ ಪಾಂಡೆ ಔಟಾದರು.
ಇವರ ನಂತರ ಬಂದ ಯಶ್‌ ಧುಲ್‌,ರೋವಮನ್‌ ಪೋವಲ್, ಲಲಿತ್‌ ಯಾದವ್‌ ಹೆಚ್ಚು ಹೊತ್ತು ನಿಲ್ಲದೆ ಪೆವಿಲಿಯನ್‌ ಕಡೆ ಮುಖ ಮಾಡಿದರು. 7ನೇ ಕ್ರಮಾಂಕದ ಆಟಗಾರ ಆಲ್‌ರೌಂಡರ್‌ ಅಕ್ಸರ್ ಪಟೇಲ್ ಆಗಮಿಸಿದ ನಂತರ ತಂಡದ ಮೊತ್ತ ಬಿರುಸು ಪಡೆಯಿತು. ಇವರಿಬ್ಬರು 6ನೇ ವಿಕೆಟ್ ಜೊತೆಯಾಟದಲ್ಲಿ 34 ಎಸೆತಗಳಲ್ಲಿ 67 ರನ್‌ ಬಾರಿಸಿದರು.
ಅಕ್ಸರ್ ಪಟೇಲ್ 25 ಚೆಂಡುಗಳಲ್ಲಿ 5 ಸಿಕ್ಸರ್,4 ಬೌಂಡರಿಯೊಂದಿಗೆ 54 ಸಿಡಿಸಿದರೆ,ನಾಯಕ ಡೇವಿಡ್‌ ವಾರ್ನರ್ 47 ಎಸೆತಗಳಲ್ಲಿ 6 ಬೌಂಡರಿಯೊಂದಿಗೆ 51 ಪೇರಿಸಿದರು. ಅಂತಿಮವಾಗಿ ಡೆಲ್ಲಿ ತಂಡ 19.4 ಓವರ್‌ಗಳಲ್ಲಿ 172 ರನ್‌ಗೆ ಆಲೌಟ್‌ ಆಯಿತು.
ಮುಂಬೈ ಪರ ಜೇಸನ್ ಬೆಹ್ರೆನ್‌ಡಾರ್ಫ್ 23/3 ಹಾಗೂ ಪಿಯೂಶ್ ಚಾವ್ಲಾ 22/3 ಹಾಗೂ ರೈಲೀ ಮೆರೆಡಿತ್ 34/2 ವಿಕೆಟ್ ಕಬಳಿಸಿ ಯಶಸ್ವಿ ಬೌಲರ್‌ ಎನಿಸಿದರು.
