ಅಂತಾರಾಷ್ಟ್ರೀಯ ಟಿ20 ಕ್ರಿಕೆಟ್ ಚರಿತ್ರೆಯಲ್ಲೇ ಅತಿಹೆಚ್ಚು ರನ್ ಬೆನ್ನಟ್ಟುವ ಮೂಲಕ ದಕ್ಷಿಣ ಆಫ್ರಿಕಾ ಹೊಸ ದಾಖಲೆ ಬರೆದಿದೆ.
ಸೆಂಚುರಿಯನ್‌ ಮೈದಾನದಲ್ಲಿ ವೆಸ್ಟ್‌ ಇಂಡೀಸ್‌ ಮುಂದಿಟ್ಟಿದ್ದ 259 ರನ್‌ಗಳ ಗುರಿಯನ್ನು ಆತಿಥೇಯ ಆಫ್ರಿಕಾ 18.5 ಓವರ್‌ಗಳಲ್ಲಿ 4 ವಿಕೆಟ್‌ ನಷ್ಟದಲ್ಲಿ ಬೆನ್ನಟ್ಟಿತು. ಆ ಮೂಲಕ ಅಂತಾರಾಷ್ಟ್ರೀಯ ಟಿ20 ಕ್ರಿಕೆಟ್‌ನಲ್ಲಿ ಅತಿಹೆಚ್ಚು ಮೊತ್ತವನ್ನು ಚೇಸ್‌ ಮಾಡಿದ ತಂಡ ಎಂಬ ದಾಖಲೆಯನ್ನು ತನ್ನದಾಗಿಸಿಕೊಂಡಿದೆ. ವಿಶೇಷವೆಂದರೆ ಏಕದಿನ ಕ್ರಿಕೆಟ್‌ನಲ್ಲೂ ಅತಿಹೆಚ್ಚು ಮೊತ್ತವನ್ನು ಬೆನ್ನಟ್ಟಿದ ಗೆಲುವಿನ ದಾಖಲೆ ಹರಿಣಗಳ ಹೆಸರಿನಲ್ಲೇ ಇದೆ. (438/9 ಆಸ್ಟ್ರೇಲಿಯ ವಿರುದ್ಧ)
2022ರಲ್ಲಿ ಸೆರ್ಬಿಯಾ ವಿರುದ್ಧ ಬಲ್ಗೇರಿಯಾ 243 ರನ್‌ಗಳನ್ನು (19.4 ಓವರ್‌) ಚೇಸ್‌ ಮಾಡಿದ್ದು ಅಂತಾರಾಷ್ಟ್ರೀಯ ಟಿ20 ಕ್ರಿಕೆಟ್‌ನ ಇದುವರೆಗಿನ ದಾಖಲೆಯಾಗಿತ್ತು.
ಮೂರು ಪಂದ್ಯಗಳ ಟಿ20 ಸರಣಿಯ ಎರಡನೇ ಪಂದ್ಯದಲ್ಲಿ ಮೊದಲು ಬ್ಯಾಟ್‌ ಮಾಡಿದ ಕೆರಿಬಿಯನ್ನರು, ಜಾನ್ಸನ್ ಚಾರ್ಲ್ಸ್ ಗಳಿಸಿದ ಚೊಚ್ಚಲ ಟಿ20 ಶತಕ (118 ರನ್, 46 ಎಸೆತ, 4X10, 6X11) ಮತ್ತು ಕೈಲ್ ಮೇಯರ್ಸ್ ಅರ್ಧಶತಕಗಳ (51 ರನ್, 27 ಎ., 4X5, 6X4) ನೆರವಿನಿಂದ ನಿಗದಿತ 20 ಓವರ್‌ಗಳಲ್ಲಿ 5 ವಿಕೆಟ್‌ ನಷ್ಟದಲ್ಲಿ 258 ರನ್‌ಗಳಿಸಿತ್ತು.
ಚೇಸಿಂಗ್‌ ವೇಳೆ ಮೊದಲನೇ ವಿಕೆಟ್‌ಗೆ ಕ್ವಿಂಟನ್‌ ಡಿಕಾಕ್‌ ಮತ್ತು ರೀಝಾ ಹೆಂಡ್ರಿಕ್ಸ್‌ ಮೊದಲ 10 ಓವರ್‌ಗಳಲ್ಲೇ 149 ರನ್ ದಾಖಲಿಸುವ ಮೂಲಕ ಅಬ್ಬರದ ಆರಂಭ ಒದಗಿಸಿದ್ದರು. ವೃತ್ತಿ ಜೀವನದ 79ನೇ ಅಂತಾರಾಷ್ಟ್ರೀಯ ಟಿ20 ಪಂದ್ಯವನ್ನಾ ಮೊದಲ ಶತಕ ಡಿ ಕಾಕ್ ಮೊದಲ ಶತಕದ ಸಂಭ್ರವನ್ನಾರಿಸಿದರು.( 100 ರನ್, 44 ಎಸೆತ, 4×9 6×8) ರೀಝಾ ಹೆಂಡ್ರಿಕ್ಸ್‌ 68 ರನ್‌ಗಳಿಸಿದರು (28 ಎಸೆತ, 4×11 6×2).
ಶನಿವಾರ ನಡೆದಿದ್ದ ಸರಣಿಯ ಮೊದಲ ಪಂದ್ಯದಲ್ಲಿ ವೆಸ್ಟ್‌ ಇಂಡೀಸ್‌ 3 ವಿಕೆಟ್‌ಗಳ ಜಯ ಸಾಧಿಸಿತ್ತು. ಸರಣಿ ನಿರ್ಧಾರಕ ಮೂರನೇ ಪಂದ್ಯ ಮಂಗಳವಾರ ಜೊಹಾನೆಸ್‌ಬರ್ಗ್‌ನಲ್ಲಿ ನಡೆಯಲಿದೆ.
