ವಿಶ್ವಕಪ್ ಗೆದ್ದ ಬೆನ್ನಲ್ಲೇ ಭಾರತ ಟಿ20 ತಂಡದಿಂದ ತಮ್ಮನ್ನು ದಿಢೀರನೆ ಕೈಬಿಟ್ಟ ಅಚ್ಚರಿಯ ನಿರ್ಧಾರದ ಬಗ್ಗೆ ಸೂರ್ಯಕುಮಾರ್ ಯಾದವ್ ಕೊನೆಗೂ ಮೌನ ಮುರಿದಿದ್ದಾರೆ. ಐರ್ಲೆಂಡ್ ಮತ್ತು ಇಂಗ್ಲೆಂಡ್ ವಿರುದ್ಧದ ಮುಂಬರುವ ಟಿ20 ಸರಣಿಗಳಿಗೆ ಅಜಿತ್ ಅಗರ್ಕರ್ ನೇತೃತ್ವದ ಆಯ್ಕೆ ಸಮಿತಿಯು, ವಿಶ್ವಕಪ್ ವಿಜೇತ ನಾಯಕನನ್ನು ಬದಿಗೊತ್ತಿ ಶ್ರೇಯಸ್ ಅಯ್ಯರ್ ಅವರಿಗೆ ನಾಯಕತ್ವದ ಜವಾಬ್ದಾರಿಯನ್ನು ಹಸ್ತಾಂತರಿಸಿದೆ.
ಸೂರ್ಯಕುಮಾರ್ ಅವರ ಸತತ ಕಳಪೆ ಬ್ಯಾಟಿಂಗ್ ಫಾರ್ಮ್ ಅವರನ್ನು ತಂಡದಿಂದ ಕೈಬಿಡಲು ಪ್ರಮುಖ ಕಾರಣ ಎಂದು ವಿಶ್ಲೇಷಿಸಲಾಗುತ್ತಿದೆ. ಭಾರತದ ಟಿ20 ನಾಯಕರಾಗಿ ಸೋಲಿಲ್ಲದ ದಾಖಲೆ ಹೊಂದಿದ್ದರೂ, ಬಲಗೈ ಬ್ಯಾಟರ್ ಆಗಿರುವ ಅವರು ಕಳೆದ ಎರಡು ವರ್ಷಗಳಿಂದ ರನ್ ಗಳಿಸಲು ತೀವ್ರವಾಗಿ ಪರದಾಡುತ್ತಿದ್ದರು.
ತಂಡದಿಂದ ಕೈಬಿಟ್ಟಾಗ ತಮ್ಮ ಮೊದಲ ಪ್ರತಿಕ್ರಿಯೆ ಆಶ್ಚರ್ಯಕರ ರೀತಿಯಲ್ಲಿ ಶಾಂತವಾಗಿತ್ತು ಎಂದು 35 ವರ್ಷದ ಸೂರ್ಯಕುಮಾರ್ ಹೇಳಿದ್ದಾರೆ. ಮಾಜಿ ಕ್ರಿಕೆಟಿಗ ಆಕಾಶ್ ಚೋಪ್ರಾ ಅವರ ಯೂಟ್ಯೂಬ್ ಚಾನೆಲ್‌ನಲ್ಲಿ ಮಾತನಾಡಿದ ಅವರು, “ತಂಡದಲ್ಲಿ ನನ್ನ ಹೆಸರು ಇಲ್ಲದಿದ್ದಾಗ ನಾನು ಮುಗುಳ್ನಕ್ಕೆ. ಏಕೆಂದರೆ, ಒತ್ತಡದ ಸಂದರ್ಭಗಳಲ್ಲಿ ಮತ್ತು ನನ್ನ ಪಾಲಿಗೆ ವಿಷಯಗಳು ಸರಿಯಾಗಿ ನಡೆಯದಿದ್ದಾಗ ನಾನು ಯಾವಾಗಲೂ ಮುಗುಳ್ನಗುತ್ತೇನೆ ಹಾಗೂ ನಿರಾಳವಾಗಿರುತ್ತೇನೆ” ಎಂದಿದ್ದಾರೆ. ಆಯ್ಕೆಗಾರರ ನಿರ್ಧಾರವನ್ನು ಪ್ರಶ್ನಿಸುವ ಬದಲು, ತಂಡದ ಭವಿಷ್ಯದ ಹಿತದೃಷ್ಟಿಯಿಂದ ಅವರು ಈ ನಿರ್ಧಾರ ತೆಗೆದುಕೊಂಡಿರಬಹುದು ಎಂದು ಒಪ್ಪಿಕೊಂಡಿರುವುದಾಗಿ ತಿಳಿಸಿದ್ದಾರೆ.
2026ರ ಟಿ20 ವಿಶ್ವಕಪ್ ಬಳಿಕವೂ ತಾನೇ ನಾಯಕನಾಗಿ ಮುಂದುವರಿಯುವ ನಿರೀಕ್ಷೆ ಇತ್ತು ಎಂಬುದನ್ನು ಅವರು ಇದೇ ವೇಳೆ ಒಪ್ಪಿಕೊಂಡಿದ್ದಾರೆ. ಮುಂಬರುವ ಒಲಿಂಪಿಕ್ಸ್ ಮತ್ತು ಮತ್ತೊಂದು ಟಿ20 ವಿಶ್ವಕಪ್‌ವರೆಗೂ ಕನಿಷ್ಠ ಎರಡು ವರ್ಷಗಳ ಕಾಲ ತಂಡವನ್ನು ಮುನ್ನಡೆಸುವ ವಿಶ್ವಾಸ ಅವರಿಗಿತ್ತು. “ನನ್ನ ಮತ್ತು ಆಯ್ಕೆಗಾರರ ಆಲೋಚನೆಗಳು ಭಿನ್ನವಾಗಿರಬಹುದು. ಅವರು ತೆಗೆದುಕೊಂಡ ನಿರ್ಧಾರವನ್ನು ಗೌರವಿಸುವುದು ಮುಖ್ಯ. ತಂಡ ಬೇರೊಬ್ಬನ ನಾಯಕತ್ವದಲ್ಲಿ ಉತ್ತಮ ಸಾಧನೆ ಮಾಡುವುದಾದರೆ ಅದರಲ್ಲಿ ಯಾವುದೇ ತಪ್ಪಿಲ್ಲ” ಎಂದು ಅವರು ಹೇಳಿದ್ದಾರೆ.
ಶ್ರೇಯಸ್ ಅಯ್ಯರ್ ನಾಯಕರಾಗಿದ್ದಕ್ಕೆ ತಮ್ಮದೇನೂ ತಕರಾರಿಲ್ಲ ಎಂದಿರುವ ಸೂರ್ಯಕುಮಾರ್, ಎಲ್ಲವೂ ಸರಿಯಾಗಿದ್ದಾಗ ಈ ಬದಲಾವಣೆ ಏಕೆ ಎಂಬ ಪ್ರಶ್ನೆ ತಮ್ಮನ್ನು ಕಾಡುತ್ತಿತ್ತು ಎಂದು ಬೇಸರ ವ್ಯಕ್ತಪಡಿಸಿದ್ದಾರೆ. “ನನ್ನ ನಾಯಕತ್ವದಲ್ಲಿ ತಂಡವು ಕಳೆದ ಎರಡು ವರ್ಷಗಳಲ್ಲಿ ಒಂದೇ ಒಂದು ಸರಣಿ ಸೋತಿರಲಿಲ್ಲ; ಏಷ್ಯಾಕಪ್ ಮತ್ತು ವಿಶ್ವಕಪ್ ಕೂಡ ಗೆದ್ದೆವು. ಹಾಗಿದ್ದಾಗ ಈ ಬದಲಾವಣೆ ಏಕೆ ಎಂದು ಯೋಚಿಸಿ ಒಂದೂವರೆ ತಿಂಗಳು ಮನೆಯಲ್ಲೇ ಕುಳಿತಿದ್ದೆ. ಸ್ನೇಹಿತರು, ಕುಟುಂಬದವರು ಸಮಾಧಾನಪಡಿಸಿದರೂ, ಒಂಟಿಯಾಗಿದ್ದಾಗ ಈ ಬಗ್ಗೆ ಯೋಚಿಸಿ ಬೇಸರವಾಗುತ್ತಿತ್ತು” ಎಂದು ಅವರು ತಮ್ಮ ಅಳಲು ತೋಡಿಕೊಂಡಿದ್ದಾರೆ.
ತಂಡ ಪ್ರಕಟಿಸುವ 2-3 ದಿನಗಳ ಮುನ್ನ ಆಯ್ಕೆಗಾರರು ಕರೆ ಮಾಡಿ, ‘ಮುಂದಿನ ಹೆಜ್ಜೆ ಇಡಬೇಕಾದ ಸಮಯ ಬಂದಿದೆ’ (time to move on) ಎಂದು ತಿಳಿಸಿದ್ದರು ಎಂದಿದ್ದಾರೆ. “ನಾನು ಯಾವುದೇ ಪ್ರತಿಕ್ರಿಯೆ ನೀಡಲಿಲ್ಲ, ಏಕೆಂದರೆ ಇದು ನನ್ನ ತಪ್ಪಲ್ಲ. ಅವರು ತಂಡದ ಒಳಿತಿಗಾಗಿ ಈ ನಿರ್ಧಾರ ತೆಗೆದುಕೊಂಡಿರಬಹುದು. ಆದರೆ ನನ್ನ ಆಟ ಮುಗಿದಿಲ್ಲ, ನಾನು ದೇಶೀಯ ಕ್ರಿಕೆಟ್ ಆಡುವುದನ್ನು ಮುಂದುವರಿಸುತ್ತೇನೆ. ಆಯ್ಕೆಗಾರರು ಸೂಕ್ತ ಸಮಯ ಎಂದು ಭಾವಿಸಿ ಕರೆದಾಗಲೆಲ್ಲಾ ಆಡಲು ನಾನು ಸದಾ ಸಿದ್ಧ” ಎಂದು ಸೂರ್ಯಕುಮಾರ್ ಯಾದವ್ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
