ಪರಿಶಿಷ್ಟ ಜಾತಿಗಳ ಮೀಸಲಾತಿ ವರ್ಗೀಕರಣ (ಒಳಮೀಸಲಾತಿ) ಪ್ರಮಾಣ ಸಂಬಂಧ ಇತ್ತೀಚೆಗೆ ಸಚಿವ ಸಂಪುಟ ಕೈಗೊಂಡ ನಿರ್ಧಾರದ ಅನ್ವಯ, 400 ಬಿಂದುಗಳ ರೋಸ್ಟರ್ ಪಟ್ಟಿಯನ್ನು ರಾಜ್ಯ ಸರ್ಕಾರ ಬಿಡುಗಡೆ ಮಾಡಿದೆ. ಜೊತೆಗೆ ಒಳಮೀಸಲಾತಿ ಬಿಂದುಗಳನ್ನು ಗುರುತಿಸಿದೆ.
ಎಸ್ಸಿ ಮೀಸಲಾತಿಯನ್ನು ಮೂರು ಭಾಗಗಳಾಗಿ ವಿಭಾಗಿಸಿರುವ ಸರ್ಕಾರ ಪ್ರವರ್ಗ ‘ಎ’ಗೆ ಶೇ. 5.25, ‘ಬಿ’ಗೆ ಶೇ. 5.25 ಮತ್ತು ‘ಸಿ’ಗೆ ಶೇ. 4.5ರಷ್ಟು ಪಾಲನ್ನು ಮೀಸಲಿರಿಸಿದೆ. ಪ್ರವರ್ಗ ‘ಸಿ’ನಲ್ಲಿ ಸ್ಪೃಶ್ಯ ಸಮುದಾಯಗಳೊಂದಿಗೆ ಅಲೆಮಾರಿಗಳನ್ನೂ ಸೇರಿಸಿರುವುದರಿಂದ ಅಲೆಮಾರಿಗಳ ಪ್ರತಿರೋಧವನ್ನು ಶಮನ ಮಾಡಲು ಶೇ. 4.5ರೊಳಗೆ ಶೇ.20ರಷ್ಟು ಪ್ರಾತಿನಿಧ್ಯವನ್ನು ಕೊಡುವುದಾಗಿ ಸರ್ಕಾರ ಹೇಳಿತ್ತು. ಅದರನ್ವಯ ಅಲೆಮಾರಿಗಳಿಗೆ ನಾಲ್ಕು ಬಿಂದುಗಳನ್ನು ಸರ್ಕಾರ ಗುರುತಿಸಿ, 56,432 ಹುದ್ದೆಗಳ ಬೃಹತ್ ನೇಮಕಾತಿ ಪ್ರಕ್ರಿಯೆಗೆ ಮುಂದಾಗಿದೆ.
ಪರಿಶಿಷ್ಟರಲ್ಲಿನ ಮೂರು ವರ್ಗಗಳಿಗೂ ಏಕಕಾಲದಲ್ಲಿ ಹುದ್ದೆಗಳು ಸಿಗದೆ ಹೋದಲ್ಲಿ, ಅಂತಹ ನೇಮಕಾತಿ ಪ್ರಕ್ರಿಯೆಯ ವೇಳೆ ಪರಿಶಿಷ್ಟ ಜಾತಿ ಮೀಸಲಾತಿಯನ್ನು ‘ಎಸ್ಸಿ ಜನರಲ್’ ಎಂದು ಪರಿಗಣಿಸಲು ಸರ್ಕಾರ ನಿರ್ಧರಿಸಿದೆ. ಸರ್ಕಾರ ಬಿಡುಗಡೆ ಮಾಡಿರುವ ಆದೇಶದ ‘ಅನುಬಂಧ-1’ರಲ್ಲಿ 400 ಬಿಂದುಗಳ ಸಾಮಾನ್ಯ ರೋಸ್ಟರ್ ಪಟ್ಟಿಯನ್ನು ತೋರಿಸಲಾಗಿದ್ದು, ‘ಅನುಬಂಧ-2’ರಲ್ಲಿ ಬೃಹತ್ ನೇಮಕಾತಿಗೆ ಅನ್ವಯವಾಗುವಂತೆ ಎಸ್ಸಿ ಒಳಮೀಸಲು ಸ್ಥಾನಗಳನ್ನು ಗುರುತಿಸಲಾಗಿದೆ.
400 ಬಿಂದುಗಳ ರೋಸ್ಟರ್ನಲ್ಲಿ ಒಟ್ಟು 60 ಹುದ್ದೆಗಳು ಎಸ್ಸಿಗೆ ಮೀಸಲಾಗಿದ್ದು, ಅದರಲ್ಲಿ ಎ, ಬಿ, ಸಿ ಪ್ರವರ್ಗಗಳಿಗೆ ಸ್ಥಾನಗಳನ್ನು ಅನುಬಂಧ-2ರಲ್ಲಿ ಗುರುತು ಹಾಕಲಾಗಿದೆ. ಪ್ರವರ್ಗ ‘ಸಿ’ನಲ್ಲಿ 59 ಅಲೆಮಾರಿಗಳಿಗೆ ಶೇ.20ರಷ್ಟು ಹುದ್ದೆಗಳನ್ನು ಕಡ್ಡಾಯವಾಗಿ ನೀಡಬೇಕಿದೆ. ಆದ್ದರಿಂದ ಅಲೆಮಾರಿಗಳಿಗೆ ಮೀಸಲಾದ ಬಿಂದುಗಳನ್ನು ಚುಕ್ಕಿ (ಸ್ಟಾರ್) ಮೂಲಕ ಗುರುತಿಸಲಾಗಿದೆ. ಹೀಗಾಗಿ ಒಳಮೀಸಲಾತಿ ಬಿಂದುಗಳಾದ 3, 20, 37, 54 ಅಲೆಮಾರಿ ಸಮುದಾಯಕ್ಕೆ ಮೀಸಲಾಗಿವೆ.
ಅಲೆಮಾರಿಗಳ ರೋಸ್ಟರ್ ಬಿಂದುಗಳು- 15, 127, 241, 353 ಆಗಿರುತ್ತವೆ. ಒಂದು ವೇಳೆ ಅಲೆಮಾರಿ ಅಭ್ಯರ್ಥಿಗಳು ಈ ಬಿಂದುಗಳಲ್ಲಿ ತುಂಬದೆ ಹೋದಲ್ಲಿ, ಈ ಸ್ಥಾನಗಳನ್ನು ‘ಸಿ’ ಗುಂಪಿನ ಇತರೆ ಜಾತಿಗಳಿಗೆ ವರ್ಗಾಯಿಸಲಾಗುತ್ತದೆ ಮತ್ತು ಅಲೆಮಾರಿಗಳಲ್ಲಿ ಬ್ಯಾಕ್ಲಾಗ್ ಸೃಷ್ಟಿಯಾಗುವುದು ಬಹುತೇಕ ಮರೀಚಿಕೆಯಾಗಿದೆ.
ಪ್ರವರ್ಗ ಎಗೆ ಮೀಸಲಾದ ರೋಸ್ಟರ್ ಬಿಂದುಗಳು: 1, 23, 41, 59, 81, 101, 115, 133, 153, 175, 193, 215, 227, 249, 267, 289, 309, 327, 341, 359, 381
ಪ್ರವರ್ಗ ಬಿಗೆ ಮೀಸಲಾದ ರೋಸ್ಟರ್ ಬಿಂದುಗಳು: 9, 27, 49, 67, 89, 109, 123, 141, 159, 181, 201, 223, 233, 253, 275, 293, 315, 333, 349, 367, 389.
ಪ್ರವರ್ಗ ಸಿಗೆ ಮೀಸಲಾದ ರೋಸ್ಟರ್ ಬಿಂದುಗಳು (ಚುಕ್ಕಿಯಲ್ಲಿ ಗುರುತಿಸಿದ ಸ್ಥಾನ ಅಲೆಮಾರಿಗಳಿಗೆ ಮೀಸಲು): 15, 33, 53, 75, 93, 127, 149, 167, 189, 209, 241, 259, 281, 301, 323, 353, 375, 393.
