ದೇಗುಲಗಳ ಬಗ್ಗೆ ಭಕ್ತಿ ತೋರಲು ಅಥವಾ ಸ್ಥಾಪಿತ ಧಾರ್ಮಿಕ ಸಂಪ್ರದಾಯಗಳನ್ನು ಪಾಲಿಸಲು ಇಚ್ಛಿಸದ ಹಿಂದೂಯೇತರರಿಗೆ ‘ಆಗಮಿಕ’ ದೇವಾಲಯಗಳನ್ನು ಪ್ರವೇಶಿಸಲು ಅನುಮತಿ ನೀಡಬಾರದು ಎಂದು ಮದ್ರಾಸ್ ಹೈಕೋರ್ಟ್ ತೀತೀರ್ಪು ನೀಡಿದೆ. ದೇವಾಲಯಗಳ ಧಾರ್ಮಿಕ ಪಾವಿತ್ರ್ಯತೆಯನ್ನು ಕಾಪಾಡಲು ಇಂತಹ ನಿರ್ಬಂಧಗಳು ಅಗತ್ಯ ಎಂದು ನ್ಯಾಯಾಲಯ ಅಭಿಪ್ರಾಯಪಟ್ಟಿದೆ.
ತಮಿಳುನಾಡು ದೇವಾಲಯ ಪ್ರವೇಶ ದೃಢೀಕರಣ ಕಾಯ್ದೆಯನ್ನು ಪರಿಣಾಮಕಾರಿಯಾಗಿ ಜಾರಿಗೊಳಿಸಬೇಕು ಮತ್ತು ಅದರ ನಿಯಮಗಳ ಉಲ್ಲಂಘನೆಯ ವಿರುದ್ಧ ಕ್ರಮ ಕೈಗೊಳ್ಳಬೇಕು ಎಂದು ಕೋರಿ ಕೆ. ತಂಗಂ ವೆಂಕಟೇಶ್ ಅವರು ಸಲ್ಲಿಸಿದ್ದ ಸಾರ್ವಜನಿಕ ಹಿತಾಸಕ್ತಿ ಅರ್ಜಿಯ (PIL) ವಿಚಾರಣೆ ನಡೆಸಿ ನ್ಯಾಯಾಲಯ ಈ ಆದೇಶ ನೀಡಿದೆ.
ನ್ಯಾಯಮೂರ್ತಿಗಳಾದ ಜಿ.ಆರ್. ಸ್ವಾಮಿನಾಥನ್ ಮತ್ತು ಪಿ. ಮುರುಗನ್ ಅವರನ್ನೊಳಗೊಂಡ ವಿಭಾಗೀಯ ಪೀಠವು ಮಂಗಳವಾರ ಈ ಬಗ್ಗೆ ಸ್ಪಷ್ಟನೆ ನೀಡಿದ್ದು, ತನ್ನ ಈ ವೀಕ್ಷಣೆಗಳು ಮತ್ತು ನಿರ್ದೇಶನಗಳು ಕೇವಲ ‘ಆಗಮಿಕ’ ದೇವಾಲಯಗಳಿಗೆ ಮಾತ್ರ ಸೀಮಿತವಾಗಿದೆ ಎಂದು ತಿಳಿಸಿದೆ.
ಆಗಮ ಶಾಸ್ತ್ರಗಳ (ದೇವಾಲಯದ ವಾಸ್ತುಶಿಲ್ಪ, ಆಚರಣೆಗಳು ಮತ್ತು ಧಾರ್ಮಿಕ ಪದ್ಧತಿಗಳನ್ನು ನಿಯಂತ್ರಿಸುವ ಸಾಂಪ್ರದಾಯಿಕ ಗ್ರಂಥಗಳು) ಪ್ರಕಾರ ನಿರ್ಮಿಸಲಾದ, ಪ್ರತಿಷ್ಠಾಪಿಸಲಾದ ಮತ್ತು ನಿರ್ವಹಿಸಲ್ಪಡುವ ಹಿಂದೂ ಪ್ರಾರ್ಥನಾ ಮಂದಿರಗಳು ಇವಾಗಿವೆ.
ಧಾರ್ಮಿಕ ಗುರುತು ಮತ್ತು ದೇವಾಲಯದ ಸಂಪ್ರದಾಯಗಳ ಮೇಲಿನ ಗೌರವದ ನಡುವಿನ ವ್ಯತ್ಯಾಸವನ್ನು ವಿವರಿಸಿದ ನ್ಯಾಯಾಧೀಶರು, ಮುಖ್ಯಮಂತ್ರಿ ಸಿ. ಜೋಸೆಫ್ ವಿಜಯ್ ಅವರು ಪ್ರಸಿದ್ಧ ಮಧುರೈ ಮೀನಾಕ್ಷಿ ಅಮ್ಮನ್ ದೇವಸ್ಥಾನಕ್ಕೆ ಭೇಟಿ ನೀಡಿದ್ದನ್ನು ಉಲ್ಲೇಖಿಸಿದರು. ಕ್ರಿಶ್ಚಿಯನ್ ಧರ್ಮದವರಾದ ವಿಜಯ್ ಅವರು ಪ್ರಾರ್ಥನೆ ಸಲ್ಲಿಸುವ ಮೊದಲು ಅಗತ್ಯ ಮುಚ್ಚಳಿಕೆಗೆ (undertaking) ಸಹಿ ಹಾಕಿದ್ದರು ಎಂಬುದನ್ನು ನ್ಯಾಯಾಲಯ ಬೊಟ್ಟು ಮಾಡಿದೆ.
“ನಂಬಿಕೆಯಲ್ಲಿ ಕ್ರಿಶ್ಚಿಯನ್ ಆಗಿರುವ ಅವರನ್ನು ಹಿಂದೂ ಧರ್ಮಕ್ಕೆ ಮತಾಂತರಗೊಳ್ಳುವಂತೆ ಕೇಳಲಾಗಿಲ್ಲ. ದೇವತೆಯ ಮೇಲಿನ ತಮ್ಮ ಭಕ್ತಿಯನ್ನು ದೃಢೀಕರಿಸಲು ಮಾತ್ರ ಅವರನ್ನು ವಿನಂತಿಸಲಾಯಿತು. ಇದನ್ನೇ ನಾವು ಅಂತರ್ಗತ (inclusive) ವಿಧಾನ ಎಂದು ಕರೆಯುತ್ತೇವೆ,” ಎಂದು ಹೇಳಿದ ನ್ಯಾಯಾಧೀಶರು, ಸ್ಥಾಪಿತ ನಿಯಮಗಳನ್ನು ಗಾಳಿಗೆ ತೂರುವ ಘಟನೆಗಳೊಂದಿಗೆ ಇದನ್ನು ಹೋಲಿಸಿ ವಿಶ್ಲೇಷಿಸಿದರು.
ನ್ಯಾಯಾಧೀಶರು “ರಾಜಕೀಯ ಚಮಚಾಗಿರಿ” (political sycophancy) ಎಂದು ಕರೆಯಬಹುದಾದ ನಡವಳಿಕೆಗಳನ್ನು ಟೀಕಿಸಿದರು. ಚುನಾವಣಾ ಲಾಭಕ್ಕಾಗಿ ದೇವಾಲಯದ ಭೇಟಿಯ ಸಮಯದಲ್ಲಿ ಹಿಂದೂಯೇತರ ನಂಬಿಕೆಗಳ ರಾಜಕಾರಣಿಗಳು ಧಾರ್ಮಿಕ ಚಿಹ್ನೆಗಳು ಅಥವಾ ಗುರುತುಗಳನ್ನು ಪ್ರದರ್ಶಿಸುವ ಪ್ರಯತ್ನಗಳನ್ನು ನ್ಯಾಯಾಲಯ ಪ್ರಶ್ನಿಸಿತು.
