ಅಮೆರಿಕ ಮತ್ತು ಇರಾನ್ ನಡುವಿನ ಶಾಂತಿ ಮಾತುಕತೆಗೆ ಇಸ್ಲಾಮಾಬಾದ್ ವೇದಿಕೆಯಾಗುತ್ತಿರುವ ವೇಳೆಯಲ್ಲಿಯೇ, ಪಾಕಿಸ್ತಾನದ ರಕ್ಷಣಾ ಸಚಿವ ಖವಾಜಾ ಮುಹಮ್ಮದ್ ಆಸಿಫ್ ಅವರು ಇಸ್ರೇಲ್ ವಿರುದ್ಧ ಮಾಡಿದ ತೀವ್ರ ವಾಗ್ದಾಳಿಯು ದೊಡ್ಡ ರಾಜತಾಂತ್ರಿಕ ವಿವಾದಕ್ಕೆ ಕಾರಣವಾಗಿದೆ. ಆಸಿಫ್ ಅವರ ಹೇಳಿಕೆಗೆ ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಕಚೇರಿ ಕೆರಳಿದ್ದು, ತೀವ್ರ ವಿರೋಧ ವ್ಯಕ್ತಪಡಿಸಿದ ಬೆನ್ನಲ್ಲೇ ಪಾಕ್ ಸಚಿವರು ತಮ್ಮ ವಿವಾದಾತ್ಮಕ ‘ಎಕ್ಸ್’ ಪೋಸ್ಟ್ ಅನ್ನು ಡಿಲೀಟ್ ಮಾಡಿದ್ದಾರೆ.
ಮೊದಲು ತಮ್ಮ ‘ಎಕ್ಸ್’ ಖಾತೆಯಲ್ಲಿ ಪೋಸ್ಟ್ ಮಾಡಿದ್ದ ಪಾಕಿಸ್ತಾನದ ರಕ್ಷಣಾ ಸಚಿವ ಖವಾಜಾ ಆಸಿಫ್, “ಇಸ್ರೇಲ್ ಒಂದು ದುಷ್ಟ ಶಕ್ತಿ ಮತ್ತು ಮಾನವಕುಲಕ್ಕೆ ಒಂದು ಶಾಪ” ಎಂದು ಜರೆದಿದ್ದರು. “ಇಸ್ಲಾಮಾಬಾದ್‌ನಲ್ಲಿ ಶಾಂತಿ ಮಾತುಕತೆ ನಡೆಯುತ್ತಿರುವ ವೇಳೆಯಲ್ಲಿಯೇ, ಲೆಬನಾನ್‌ನಲ್ಲಿ ನರಮೇಧ ನಡೆಯುತ್ತಿದೆ. ಮೊದಲು ಗಾಜಾ, ನಂತರ ಇರಾನ್, ಮತ್ತು ಈಗ ಲೆಬನಾನ್‌ನಲ್ಲಿ ನಿರ್ದೋಷಿ ನಾಗರಿಕರನ್ನು ಇಸ್ರೇಲ್ ಕೊಲ್ಲುತ್ತಿದೆ, ರಕ್ತ ಹರಿಯುವುದು ನಿರಂತರವಾಗಿದೆ,” ಎಂದು ಆರೋಪಿಸಿದ್ದರು. ಮುಂದುವರಿದು, “ಪ್ಯಾಲೆಸ್ತೀನ್ ಭೂಮಿಯಲ್ಲಿ ಈ ಕ್ಯಾನ್ಸರ್ ರಾಜ್ಯವನ್ನು ಸೃಷ್ಟಿಸಿದ ಜನರು ನರಕದಲ್ಲಿ ಬೇಯಲಿ ಎಂದು ನಾನು ಆಶಿಸುತ್ತೇನೆ ಮತ್ತು ಪ್ರಾರ್ಥಿಸುತ್ತೇನೆ,” ಎಂದು ಅತ್ಯಂತ ವಿವಾದಾತ್ಮಕ ಪದಗಳನ್ನು ಬಳಸಿದ್ದರು.
ಇದನ್ನು ಓದಿದ್ದೀರಾ? ಸಾಮ್ರಾಜ್ಯಶಾಹಿಯ ಅಟ್ಟಹಾಸಕ್ಕೆ ಪ್ರತಿರೋಧದ ಕಿಚ್ಚು: ಅಮೆರಿಕ-ಇಸ್ರೇಲ್ ದಬ್ಬಾಳಿಕೆಯ ವಿರುದ್ಧ ಸಿಡಿದೆದ್ದ ಲೆಬನಾನ್
ಈ ಹೇಳಿಕೆಯನ್ನು ಕಂಡು ಕೆರಳಿದ ಇಸ್ರೇಲಿನ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಅವರ ಕಚೇರಿಯು, ಆಸಿಫ್ ಅವರ ಮಾತುಗಳನ್ನು “ಅಸಹ್ಯ ಮತ್ತು ಅತಿರೇಕ” ಎಂದು ಖಂಡಿಸಿದೆ. “ಇಸ್ರೇಲಿನ ವಿನಾಶಕ್ಕೆ ಕರೆ ನೀಡಿರುವ ಈ ಹೇಳಿಕೆಯನ್ನು ಯಾವ ಸರ್ಕಾರದಿಂದಲೂ ಸಹಿಸಲು ಸಾಧ್ಯವಿಲ್ಲ. ವಿಶೇಷವಾಗಿ, ಶಾಂತಿಯ ಮಧ್ಯಸ್ಥಿಕೆ ವಹಿಸುತ್ತಿರುವುದಾಗಿ ಹೇಳಿಕೊಳ್ಳುತ್ತಿರುವ ತಟಸ್ಥ ರಾಷ್ಟ್ರವೊಂದರಿಂದ ಇಂತಹ ಹೇಳಿಕೆಯನ್ನು ಖಂಡಿತವಾಗಿಯೂ ಒಪ್ಪಲು ಸಾಧ್ಯವಿಲ್ಲ,” ಎಂದು ಕಚೇರಿ ಸ್ಪಷ್ಟಪಡಿಸಿದೆ.
ಇಸ್ರೇಲ್ ವಿದೇಶಾಂಗ ನೀತಿ ಸಚಿವ ಗಿಡಿಯಾನ್ ಸಾರ್ ಅವರು ಸಹ ಇದನ್ನು “ಯಹೂದಿ ವಿರೋಧಿ ಹೇಳಿಕೆ” ಎಂದು ಜರೆದಿದ್ದು, ಇಸ್ರೇಲ್ ತನ್ನ ವಿರೋಧಿಗಳ ವಿರುದ್ಧ ತನ್ನನ್ನು ತಾನು ರಕ್ಷಿಸಿಕೊಳ್ಳಲಿದೆ ಎಂದು ಎಚ್ಚರಿಸಿದ್ದಾರೆ.
