ಉತ್ತರ ಪ್ರದೇಶದ ಗೋರಖ್‌ಪುರದ 28 ವರ್ಷದ ಶಿಕ್ಷಕಿ ದಿವ್ಯಾ ಸಿಂಗ್, ಮೌಂಟ್ ಎವರೆಸ್ಟ್ ಬೇಸ್ ಕ್ಯಾಂಪ್ (ಇಬಿಸಿ) ಅನ್ನು ಸೈಕಲ್‌ನಲ್ಲಿ ತಲುಪಿದ ಮೊದಲ ಭಾರತೀಯ ಮಹಿಳೆ ಮತ್ತು ಜಾಗತಿಕವಾಗಿ ಎರಡನೇ ಮಹಿಳೆ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.
ಕಠ್ಮಂಡುವಿನಿಂದ ತನ್ನ ಪ್ರಯಾಣವನ್ನು ಪ್ರಾರಂಭಿಸಿ ದಿವ್ಯಾ ಅವರು 14 ದಿನಗಳ ಕಾಲ ಸೈಕಲ್‌ನಲ್ಲೇ ಪ್ರಯಾಣಿಸಿ 17,560 ಅಡಿ ಎತ್ತರದಲ್ಲಿರುವ ಬೇಸ್ ಕ್ಯಾಂಪ್ ಅನ್ನು ಯಶಸ್ವಿಯಾಗಿ ತಲುಪಿದ್ದಾರೆ. ಈ ಮೂಲಕ ಇತಿಹಾಸ ಬರೆದಿದ್ದಾರೆ.
ಇದನ್ನು ಓದಿದ್ದೀರಾ? ಸುತ್ತಾಟ | ಎವರೆಸ್ಟ್ ಬೇಸ್ ಕ್ಯಾಂಪ್ – ಜೀವನದ ಅತ್ಯುನ್ನತ ಪಾಠ
ಈ ಪ್ರಯಾಣದ ವೇಳೆಯಲ್ಲಿ -12 ° C ವರೆಗಿನ ಕಡಿಮೆ ತಾಪಮಾನ, ಆಮ್ಲಜನಕ ಕೊರತೆ ಮೊದಲಾದ, ವೇಗವಾದ ಗಾಳಿ ಮೊದಲಾದ ಸವಾಲುಗಳನ್ನು ಎದುರಿಸಿದ್ದಾರೆ. ದಿವ್ಯಾ ಸಿಂಗ್ ಪ್ರತಿದಿನ 10 ರಿಂದ 12 ಗಂಟೆಗಳ ಕಾಲ ಸೈಕಲ್ ತುಳಿದಿದ್ದಾರೆ.
ಇನ್ನು ಪರ್ವತ ದಾರಿಯಲ್ಲಿ ಹಲವೆಡೆ ಸೈಕಲ್ ತುಳಿಯಲೂ ಸಾಧ್ಯವಾಗದ ಕಾರಣ ತಮ್ಮ ಸೈಕಲ್ ಅನ್ನು ಹೆಗಲ ಮೇಲೆ ಹೊತ್ತು ಸಾಗಿದ್ದಾರೆ. ಕಠ್ಮಂಡುವಿನಿಂದ ಸಲೇರಿ, ಸುರ್ಕೆ, ಫಾಕ್ಡಿಂಗ್, ನಾಮ್ಚೆ ಬಜಾರ್, ಲೋಬುಚೆ ಮತ್ತು ಗೋರಕ್ಷೆಪ್ ಎಂಬ ಸವಾಲಿನ ಪ್ರದೇಶಗಳನ್ನು ಸಾಗಿ ದಿವ್ಯಾ ಬಂದಿದ್ದಾರೆ ಎಂದು ವರದಿಯಾಗಿದೆ.
ದಿವ್ಯಾ ಸಿಂಗ್ ಬೇಸ್ ಕ್ಯಾಂಪ್‌ಗೆ ಆಗಮಿಸುವ ವಿಡಿಯೋವನ್ನು ಉಮಾ ಸಿಂಗ್ ಎಂಬವರು ಇನ್‌ಸ್ಟಾಗ್ರಾಮ್‌ನಲ್ಲಿ ಹಂಚಿಕೊಂಡಿದ್ದಾರೆ. ದಿವ್ಯಾ ತನ್ನ ಸೈಕಲ್ ಪಕ್ಕದಲ್ಲಿ ನಿಂತು, ತ್ರಿವರ್ಣ ಧ್ವಜವನ್ನು ಹಿಡಿದಿರುವುದು ವಿಡಿಯೋದಲ್ಲಿ ಕಂಡುಬಂದಿದೆ. ಸದ್ಯ ಸಾಮಾಜಿಕ ಜಾಲತಾಣದಲ್ಲಿ ದಿವ್ಯಾ ಅವರ ಈ ವಿಡಿಯೋ ಹರಿದಾಡುತ್ತಿದೆ, ಪ್ರಶಂಸೆ ವ್ಯಕ್ತವಾಗುತ್ತಿದೆ.
ಎವರೆಸ್ಟ್ ಬೇಸ್ ಕ್ಯಾಂಪ್ ಎಂಬುದು ವಿಶ್ವದ ಅತಿ ಎತ್ತರದ ಶಿಖರವಾದ ಮೌಂಟ್ ಎವರೆಸ್ಟ್‌ನ ಬುಡದಲ್ಲಿರುವ ಎರಡು ಶಿಬಿರಗಳಾಗಿವೆ. ಇಲ್ಲಿ ಹೆಚ್ಚಾಗಿ ಪರ್ವತಾರೋಹಿಗಳು ವಿಶ್ರಾಂತಿ ಪಡೆಯುತ್ತಾರೆ. ಸಾಮಾನ್ಯವಾಗಿ ಎತ್ತರದ ವಾತಾವರಣಕ್ಕೆ ಹೊಂದಿಕೊಳ್ಳಲು ಇಲ್ಲಿ ತಂಗುತ್ತಾರೆ. ದಕ್ಷಿಣ ಬೇಸ್ ಕ್ಯಾಂಪ್ ನೇಪಾಳದಲ್ಲಿದ್ದು ಅತ್ಯಂತ ಜನಪ್ರಿಯ ಚಾರಣ ಮಾರ್ಗವಾಗಿದೆ. ಉತ್ತರ ಬೇಸ್ ಕ್ಯಾಂಪ್ ಟಿಬೆಟ್‌ನಲ್ಲಿದೆ. ಇಲ್ಲಿಗೆ ಚಾರಣ ಹೋಗಲು ಸಾಮಾನ್ಯವಾಗಿ 12 ರಿಂದ 15 ದಿನಗಳ ಕಾಲ ತೆಗೆದುಕೊಳ್ಳುತ್ತದೆ. ಇದು ಸವಾಲಿನ ಚಾರಣವಾಗಿದ್ದು, ಉತ್ತಮ ದೈಹಿಕ ಸಾಮರ್ಥ್ಯದ ಅವಶ್ಯಕತೆಯಿದೆ.
