ಕಾವ್ಯ ಎಂಬುದು ನಿಂತ ನೀರಲ್ಲ, ಅದು ಹರಿಯುವ ನದಿ. ಹಿರಿಯ ಕವಿಗಳ ಅನುಭವದ ಗಾಂಭೀರ್ಯ ಮತ್ತು ಕಿರಿಯ ಕವಿಗಳ ಹೊಸ ಆಲೋಚನೆಗಳ ತುಡಿತ – ಈ ಎರಡೂ ಸೇರಿದಾಗ ಮಾತ್ರ ಸಾಹಿತ್ಯ ಶ್ರೀಮಂತವಾಗುತ್ತದೆ. ಒಬ್ಬ ಕವಿಯ ದೃಷ್ಟಿಕೋನ ಮತ್ತೊಬ್ಬ ಕವಿಯ ಭಾವನೆಗೆ ಪೂರಕವಾಗುವುದೇ ಈ ಗೋಷ್ಠಿಯ ಉದ್ದೇಶ. ಇಂದಿನ ವೇಗದ ಬದುಕಿನಲ್ಲಿ ಭಾವನೆಗಳು ಯಾಂತ್ರಿಕವಾಗುತ್ತಿವೆ. ಇಂತಹ ಸಂದರ್ಭದಲ್ಲಿ ಕವಿತೆಯು ಮನುಷ್ಯನ ಮನಸ್ಸನ್ನು ತಣಿಸುವ ಮಲ್ಲಿಗೆಯಂತಾಗಬೇಕು. ಸಮಾಜದ ಅಂಕುಡೊಂಕುಗಳನ್ನು ತಿದ್ದುವ ಕನ್ನಡಿಯೂ ಆಗಬೇಕು ಎಂದು ಹಿರಿಯ ಸಾಹಿತಿ ಡಾ. ಬೋರೇಗೌಡ ಚಿಕ್ಕಮರಳಿ ಅಭಿಪ್ರಾಯಪಟ್ಟರು.
ಮಂಡ್ಯದ ಕ್ಯಾತನಹಳ್ಳಿ ಗ್ರಾಮದಲ್ಲಿ ವೀರೇಶ ಬಾನುಲಿ ಸ್ವಾಮಿ ವಿವೇಕಾನಂದ ಮಂದಿರ ದಿವ್ಯಾಂಗ ಸೇವಾ ಚಾರಿಟಬಲ್ ಟ್ರಸ್ಟ್ ವತಿಯಿಂದ ಆಯೋಜಿಸಿದ್ದ ಸಮನ್ವಯ ಕವಿಗೋಷ್ಠಿಯನ್ನು ಉದ್ಘಾಟಿಸಿ ಅವರು ಮಾತನಾಡಿದರು.
ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ್ದ ಜಾನಪದ ವಿದ್ವಾಂಸ ಕ್ಯಾತನಹಳ್ಳಿ ರಾಮಣ್ಣ ಮಾತನಾಡಿ, “ಕವಿಗಳಿಗೆ ಜಾತಿ, ಧರ್ಮಗಳ ಹಂಗಿಲ್ಲ. ಮಾನವೀಯತೆಯೇ ಕವಿಯ ಧರ್ಮ. ಇಲ್ಲಿ ಹಿರಿಯರಿಂದ ಕಿರಿಯರು ಕಾವ್ಯದ ಮೌಲ್ಯಗಳನ್ನು ಕಲಿಯಬೇಕಿದೆ. ಹಾಗೆಯೇ ಕಿರಿಯರಿಂದ ಹಿರಿಯರು ಬದಲಾಗುತ್ತಿರುವ ಜಗತ್ತಿನ ನಾಡಿಮಿಡಿತವನ್ನು ಅರಿಯಬೇಕಿದೆ. ಇದೇ ನಿಜವಾದ ಸಮನ್ವಯ. ಈ ಸುಂದರ ವೇದಿಕೆಯಲ್ಲಿ ಅಕ್ಷರಗಳ ಸಂತೆ ನಡೆಯಲಿ, ಭಾವನೆಗಳ ಬೆಳೆ ಬೆಳೆಯಲಿ” ಎಂದು ಹಾರೈಸಿದರು.
ಕಾರ್ಯಕ್ರಮದಲ್ಲಿ ಸಿ ಹರೀಶ್, ಎಸ್ ಎಂ ಶಿವಕುಮಾರ್, ಸಾ ವೆ ರಾ ಸ್ವಾಮಿ, ಕೆ ಶೆಟ್ಟಹಳ್ಳಿ ಅಪ್ಪಾಜಿ, ಜಯಶಂಕರ್ ಕಡತನಾಳು, ಚಂದ್ರಶೇಖರಯ್ಯ ಕುಂತಿಬೆಟ್ಟ, ಶ್ವೇತ ಪ್ರಕಾಶ್, ಕಲ್ಕುಣಿ ಲೋಕೇಶ್, ಕ್ಯಾತನಹಳ್ಳಿ ಶ್ರೀನಿವಾಸ್, ಧನಂಜಯ ಪಾಂಡವಪುರ, ಗಾನಸುಮಾ ಪಟ್ಟ ಸೋಮನಹಳ್ಳಿ, ಸೇರಿದಂತೆ ಸುಮಾರು 25 ಕವಿಗಳು ಕಾವ್ಯ ವಾಚಿಸಿದರು.
ಕರ್ನಾಟಕ ಅಂಧರ ಸಾಹಿತ್ಯ ಪರಿಷತ್ ಅಧ್ಯಕ್ಷ ಮುಡಿಗೆರೆ ರಮೇಶ್ ಕುಮಾರ್, ಬೆಳಗೊಳ ಮೌಂಟ್ ಪೋರ್ಟ್ ಅಂಗವಿಕಲರ ಶಾಲೆ ಶಿಕ್ಷಕಿ ಶಕುಂತಲಾ ಹಾಗೂ ಮೈಸೂರು ಎನ್ ಎ ಬಿ ವೃತ್ತಿ ಬೋಧಕರಾದ ಕೆ ಎಂ ಪುಟ್ಟರಾಜು ರವರನ್ನು ಸನ್ಮಾನಿಸಲಾಯಿತು.
ಇದನ್ನೂ ಓದಿ: ಮಂಡ್ಯ | ವಿದ್ಯಾನಗರದಲ್ಲಿ ಟಿಪ್ಪು ಕಾಲದ ಸ್ಮಾರಕ; 73 ಅಡಿ ಎತ್ತರದ ಮೆಮೋರಿಯಲ್ ಪಿಲ್ಲರ್‌ಗೆ ಬೇಕಿದೆ ರಕ್ಷಣೆ
ಕಾರ್ಯಕ್ರಮದಲ್ಲಿ ದಿವ್ಯಾಂಗ ಸೇವಾ ಚಾರಿಟಬಲ್ ಟ್ರಸ್ಟ್ ನ ಅಧ್ಯಕ್ಷ ರಂಗನಾಥ್, ಕ್ಯಾತನಹಳ್ಳಿ ಡಿವೈನ್ ಸ್ಟಾರ್ಕ್ ಅಧ್ಯಕ್ಷ ಎಂ ಪಿ ಗಂಗಾಧರ್, ವಿ ಎ ಪಾಟೀಲ್, ಬನಶಂಕರಿ ಡಯಾಗ್ನೋಸ್ಟಿಕ್, ಶ್ರೀರಂಗಪಟ್ಟಣ, ಆರತಿ ಉಕ್ಕಡ ಅಹಲ್ಯಾದೇವಿ ಟ್ರಸ್ಟ್ ಅಧ್ಯಕ್ಷ ಎಂ ಚಂದ್ರು, ಸಾಂಸ್ಕೃತಿಕ ಸಂಘಟಕರು ಕೆ ಎo ಕೃಷ್ಣೇಗೌಡ ಕಿಲಾರ, ಮೈಸೂರು ಶ್ರವಣ ದೋಷವುಳ್ಳ ಮಕ್ಕಳ ಶಿಕ್ಷಕರ ಸಂಘದ ಗೌರವಾಧ್ಯಕ್ಷ ನಟರಾಜು, ಬೆಂಗಳೂರು ವಕೀಲರು ಕೆ ಜ್ಞಾನೇಶ್ ಶ್ರೀಧರ್ ಹಳೇಬೀಡು, ಶಿವರಾಜ್ ಮುಂತಾದವರು ಭಾಗಿಯಾಗಿದ್ದರು.
