- ವಾಷಿಂಗ್ಟನ್ ಡಿಸಿ– ಮೆರಿಲ್ಯಾಂಡ್– ವರ್ಜೀನಿಯಾ ಪ್ರದೇಶದಿಂದ ಬಂದಿದ್ದ ಪ್ರತಿಭಟನಾಕಾರರು
- ಹಿರಿಯ ಪತ್ರಕರ್ತರ ಮೇಲಿನ ದಾಳಿಯನ್ನು ಖಂಡಿಸಿದ ಭಾರತೀಯ ರಾಯಭಾರಿ ಕಚೇರಿ
ಅಮೆರಿಕದ ವಾಷಿಂಗ್ಟನ್‌ನಲ್ಲಿ ಭಾರತೀಯ ಮೂಲದ ಪತ್ರಕರ್ತ ಲಲಿತ್ ಝಾ ಅವರ ಮೇಲೆ ಖಲಿಸ್ತಾನಿ ಬೆಂಬಲಿಗರು ಹಲ್ಲೆ ನಡೆಸಿರುವ ಘಟನೆ ಭಾರತೀಯ ರಾಯಭಾರ ಕಚೇರಿ ಹೊರಗೆ ನಡೆದಿದೆ.
ಶನಿವಾರ ಮಧ್ಯಾಹ್ನ ವಾಷಿಂಗ್ಟನ್‌ನಲ್ಲಿರುವ ಭಾರತೀಯ ರಾಯಭಾರ ಕಚೇರಿಯ ಬಳಿ ಖಲಿಸ್ತಾನ ಪರ ಪ್ರತಿಭಟನೆ ಬಗ್ಗೆ ವರದಿ ಮಾಡುತ್ತಿದ್ದ ಸಂದರ್ಭದಲ್ಲಿ ಲಲಿತ್ ಝಾ ಅವರನ್ನು ಅವಾಚ್ಯ ಪದಗಳಿಂದ ನಿಂದಿಸಿದ ಪ್ರತಿಭಟನಾಕಾರರು ಹಲ್ಲೆ ನಡೆಸಿದ್ದಾರೆ.
ಖಲಿಸ್ತಾನಿ ಬೆಂಬಲಿಗರು ಎರಡು ಕೋಲುಗಳಿಂದ ನನಗೆ ಹೊಡೆದಿದ್ದಾರೆ ಎಂದು ಪತ್ರಕರ್ತ ಲಲಿತ್ ಝಾ ಆರೋಪಿಸಿದ್ದು, ಖಲಿಸ್ತಾನಿ ಬೆಂಬಲಿಗರ ವಿಡಿಯೋವೊಂದನ್ನು ಕೂಡ ಅವರು ತಮ್ಮ ಟ್ವಿಟ್ಟರ್ ಖಾತೆಯಲ್ಲಿ ಹಂಚಿಕೊಂಡಿದ್ದಾರೆ. ತಮ್ಮನ್ನು ರಕ್ಷಿಸಿದ ಹಾಗೂ ತಮ್ಮ ಕೆಲಸ ಮಾಡಲು ಸಹಾಯ ಮಾಡಿದ ಅಮೆರಿಕದ ಸೀಕ್ರೆಟ್ ಸರ್ವೀಸ್‌ಗೆ ಧನ್ಯವಾದ ತಿಳಿಸಿದ್ದಾರೆ.
ವಾಷಿಂಗ್ಟನ್ ಡಿಸಿ – ಮೆರಿಲ್ಯಾಂಡ್ – ವರ್ಜೀನಿಯಾ ಪ್ರದೇಶದ ವಿವಿಧ ಭಾಗಗಳಿಂದ ಬಂದಿದ್ದ ಪ್ರತಿಭಟನಾಕಾರರು ಖಲಿಸ್ತಾನ ಪರ ಘೋಷಣೆಗಳನ್ನು ಕೂಗಿ, ಪಂಜಾಬ್ ಪೊಲೀಸರಿಂದ ಮಾನವ ಹಕ್ಕುಗಳ ಉಲ್ಲಂಘನೆ ಮಾಡುತ್ತಿದ್ದಾರೆ ಎಂದು ಆರೋಪಿಸಿದರು.
“ನನ್ನ ಕೆಲಸ ನಿರ್ವಹಿಸಲು, ಎರಡು ದಿನಗಳಿಂದ ನನಗೆ ರಕ್ಷಣೆ ಒದಗಿಸಿರುವ ಸೀಕ್ರೆಸ್ ಸರ್ವೀಸ್‌ಗೆ ಧನ್ಯವಾದಗಳು. ಇಲ್ಲದಿದ್ದರೆ ನಾನು ಇದನ್ನು ಆಸ್ಪತ್ರೆಯಿಂದ ಬರೆಯಬೇಕಾಗುತ್ತಿತ್ತು. ಪ್ರತಿಭಟನೆ ನಡೆಸುತ್ತಿದ್ದ ವ್ಯಕ್ತಿ ಎರಡು ಕೋಲುಗಳೊಂದಿಗೆ ನನ್ನ ಎಡ ಕಿವಿಗೆ ಹೊಡೆದಿದ್ದಾನೆ. ಇದಕ್ಕೂ ಮುನ್ನ ನಾನು ಸುರಕ್ಷತೆಗಾಗಿ 9/11ಗೆ ಕರೆ ಮಾಡಬೇಕಾಗಿತ್ತು. ಎರಡು ಪೊಲೀಸ್ ವ್ಯಾನ್‌ಗಳು ಬಂದಿದ್ದವು” ಎಂದು ಲಲಿತ್ ಝಾ ಟ್ವೀಟ್‌ನಲ್ಲಿ ಬರೆದುಕೊಂಡಿದ್ದಾರೆ.
ತಮ್ಮ ಮೇಲೆ ದಾಳಿ ನಡೆಸಿದವರ ವಿರುದ್ಧ ಯಾವುದೇ ದೂರು ನೀಡದೆ ಇರಲು ಲಲಿತ್ ಝಾ ನಿರ್ಧರಿಸಿದ್ದಾರೆ. “ಪ್ರತಿಭಟನಾಕಾರರು ಖಲಿಸ್ತಾನ್ ನಾಯಕ ಅಮೃತಪಾಲ್ ಸಿಂಗ್ ಪರವಾಗಿ ಖಲಿಸ್ತಾನ ಬಾವುಟಗಳನ್ನು ಹಾರಿಸಿದರು. ಅವರು ರಾಯಭಾರ ಕಚೇರಿಯನ್ನು ಧ್ವಂಸ ಮಾಡುವುದಾಗಿ ಬಹಿರಂಗವಾಗಿ ಬೆದರಿಕೆ ಹಾಕಿದರು. ಜತೆಗೆ ಭಾರತೀಯ ರಾಯಭಾರಿ ತರಣ್‌ಜಿತ್ ಸಿಂಗ್ ಸಂಧು ಅವರನ್ನೂ ಬೆದರಿಸಿದ್ದಾರೆ” ಎಂದು ಝಾ ತಿಳಿಸಿದ್ದಾರೆ.
ಹಲ್ಲೆಯನ್ನು ಖಂಡಿಸಿರುವ ಭಾರತದ ರಾಯಭಾರ ಕಚೇರಿ, “ಹಿರಿಯ ಪತ್ರಕರ್ತರ ಮೇಲಿನ ಇಂತಹ ಕ್ರೂರ ಹಾಗೂ ಅನಗತ್ಯ ದಾಳಿಯನ್ನು ನಾವು ಖಂಡಿಸುತ್ತೇವೆ. ಹಿಂಸಾಚಾರ ಮತ್ತು ವಿಧ್ವಂಸಕ ಕೃತ್ಯಗಳಲ್ಲಿ ನಿರಂತರವಾಗಿ ಭಾಗಿಯಾಗುವ ಖಲಿಸ್ತಾನಿ ಪ್ರತಿಭಟನಾಕಾರರು ಸಮಾಜವಿರೋಧಿ ಪ್ರವೃತ್ತಿ ಹೊಂದಿರುತ್ತಾರೆ ಎಂದು ಒತ್ತಿ ಹೇಳುತ್ತೇವೆ” ಎಂದು ತಿಳಿಸಿದೆ.
