ಇರಾನ್-ಇಸ್ರೇಲ್ ಯುದ್ಧವನ್ನು ಪೋಪ್ ಲಿಯೋ XIV ಮತ್ತೆ ತೀವ್ರವಾಗಿ ಖಂಡಿಸಿದ್ದಾರೆ. “ಇರಾನ್-ಇಸ್ರೇಲ್ ಯುದ್ಧದ ವೇಳೆ ವಸತಿ ಪ್ರದೇಶದ ಮೇಲೆ ದಾಳಿ ನಡೆಸುವುದು ಅಂತಾರಾಷ್ಟ್ರೀಯ ಕಾನೂನಿನ ಉಲ್ಲಂಘನೆಯಾಗಿದೆ. ಇವು ಮಾನವನ ದ್ವೇಷದ ಸಂಕೇತವಾಗಿದೆ” ಎಂದು ಹೇಳಿದ್ದಾರೆ.
ವ್ಯಾಟಿಕನ್‌ನಲ್ಲಿ ನಡೆದ ಸಾರ್ವಜನಿಕ ಸಭೆಯಲ್ಲಿ ಮಾತನಾಡಿದ ಪೋಪ್, “ಯಾವುದೇ ಸಂಘರ್ಷವನ್ನು ದೇವರು ಆಶೀರ್ವದಿಸುವುದಿಲ್ಲ. ಬಾಂಬ್‌ಗಳನ್ನು ಹಾಕುವವರ ಪರವಾಗಿ ದೇವರು ಇರುವುದಿಲ್ಲ. ಅಮಾಯಕ ರಕ್ತಪಾತವನ್ನು ಯಾವುದೇ ಕಾರಣಕ್ಕೂ ಸಮರ್ಥಿಸಲು ಸಾಧ್ಯವಿಲ್ಲ” ಎಂದಿದ್ದಾರೆ.
ಇದನ್ನು ಓದಿದ್ದೀರಾ? ಗಾಜಾದ ಹತ್ಯಾಕಾಂಡ ಖಂಡಿಸಿದ ವ್ಯಾಟಿಕನ್: ಅಮಾನವೀಯ ಕೃತ್ಯ ಎಂದ ಕಾರ್ಡಿನಲ್ ಪ್ಯಾರೋಲಿನ್
“ಸಂಪೂರ್ಣ ಇರಾನಿನ ನಾಗರಿಕತೆಯನ್ನು ನಾಶಮಾಡುವ ಬೆದರಿಕೆಗಳನ್ನು ನಾವು ಒಪ್ಪಲಾಗದು” ಎಂದು ಹೇಳಿರುವ ಪೋಪ್ ಯುದ್ಧದಿಂದ ಮಕ್ಕಳು, ವೃದ್ಧರು ಮತ್ತು ಅಮಾಯಕ ನಾಗರಿಕರು ಬಲಿಯಾಗುತ್ತಿರುವುದರ ಬಗ್ಗೆ ತೀವ್ರ ಕಳವಳ ವ್ಯಕ್ತಪಡಿಸಿದ್ದಾರೆ.
ಹಾಗೆಯೇ “ಕೇವಲ ಮಾತುಕತೆಯ ಮೂಲಕ ಮಾತ್ರ ಯುದ್ಧವನ್ನು ಕೊನೆಗೊಳಿಸಲು ಸಾಧ್ಯ. ಎಲ್ಲರೂ ಶಾಂತಿಗಾಗಿ ಕೆಲಸ ಮಾಡಬೇಕು. ಯುದ್ಧವನ್ನು ತಿರಸ್ಕರಿಸಬೇಕು” ಎಂದು ಮನವಿ ಮಾಡಿದರು. ಜತೆಗೆ ಇರಾನ್ ಯುದ್ಧದಲ್ಲಿ ಘೋಷಿಸಲಾದ ಎರಡು ವಾರಗಳ ಕದನ ವಿರಾಮವನ್ನು ಪೋಪ್ ಸ್ವಾಗತಿಸಿದರು. ಇದು ಜೀವಂತ ಭರವಸೆಯ ಸಂಕೇತ ಎಂದರು.
