ದೇಶದ ಪ್ರಮುಖ ಉದ್ಯಮಿ ಗೌತಮ್ ಅದಾನಿ ಮತ್ತು ಅವರ ಸಹವರ್ತಿಗಳ ಮೇಲಿದ್ದ ಲಂಚ ಹಾಗೂ ವಂಚನೆ ಪ್ರಕರಣವನ್ನು ಕೈಬಿಡುವ ಅಮೆರಿಕ ಸರ್ಕಾರದ ನಿರ್ಧಾರಕ್ಕೆ ಅಲ್ಲಿನ ಫೆಡರಲ್ ನ್ಯಾಯಾಲಯವೊಂದು ಹೊಸ ಟ್ವಿಸ್ಟ್ ನೀಡಿದೆ. ಪ್ರಕರಣ ಮುಚ್ಚಲು ಅಮೆರಿಕ ಸರ್ಕಾರದೊಂದಿಗೆ ‘ಕ್ವಿಡ್ ಪ್ರೊ ಕೊ’ ಅಂದರೆ ‘ಡೀಲ್’ ಆಗಿದೆಯೇ ಎಂದು ಅಮೆರಿಕ ಕೋರ್ಟ್ ಗೌತಮ್ ಅದಾನಿಯನ್ನು ಪ್ರಶ್ನಿಸಿದೆ.
ಅದಾನಿ ಮೇಲಿನ ಕ್ರಿಮಿನಲ್ ಆರೋಪಗಳನ್ನು ರದ್ದುಗೊಳಿಸುವಂತೆ ಯುಎಸ್ ನ್ಯಾಯಾಂಗ ಇಲಾಖೆ ಅರ್ಜಿ ಸಲ್ಲಿಸಿದೆ. ಈ ಅರ್ಜಿ ವಿಚಾರಣೆ ನಡೆಸಿದ ಬ್ರೂಕ್ಲಿನ್ ನ್ಯಾಯಾಲಯದ ಹಿರಿಯ ಜಿಲ್ಲಾ ನ್ಯಾಯಾಧೀಶರಾದ ನಿಕೋಲಸ್ ಗರೌಫಿಸ್, ಈ ಪ್ರಕರಣವನ್ನು ಕೈಬಿಡಲು ಯಾವುದೇ ರೀತಿಯ ‘ಕ್ವಿಡ್ ಪ್ರೊ ಕೊ’ (ಒಂದರ ಬದಲಿಗೆ ಮತ್ತೊಂದು ಪ್ರತಿಯಾಗಿ ನೀಡುವುದು ಅಥವಾ ರಹಸ್ಯ ಒಪ್ಪಂದ) ನಡೆದಿದೆಯೇ ಎಂಬುದನ್ನು ಪ್ರಮಾಣಪತ್ರದ ಮೂಲಕ ಸ್ಪಷ್ಟಪಡಿಸುವಂತೆ ಗೌತಮ್ ಅದಾನಿ ಅವರಿಗೆ ಆದೇಶಿಸಿದ್ದಾರೆ.
ಇದನ್ನೂ ಓದಿ: ಅದಾನಿ ಮೇಲಿನ ಆರೋಪ ಕೈಬಿಟ್ಟ ನಿರ್ಧಾರಕ್ಕೆ ಅಮೆರಿಕದಲ್ಲಿನ ಹೂಡಿಕೆ ಕಾರಣವಲ್ಲ: ನ್ಯಾಯಾಂಗ ಇಲಾಖೆ
ಏನಿದು ‘ಕ್ವಿಡ್ ಪ್ರೊ ಕೊ’ ಪ್ರಕರಣ?
ಕಳೆದ 2024ರ ನವೆಂಬರ್‌ನಲ್ಲಿ ಜೋ ಬೈಡನ್ ಆಡಳಿತಾವಧಿಯಲ್ಲಿ, ಭಾರತದಲ್ಲಿ ಸೌರಶಕ್ತಿ ಗುತ್ತಿಗೆ ಪಡೆಯಲು ಸುಮಾರು 250 ಮಿಲಿಯನ್ ಡಾಲರ್ ಲಂಚ ನೀಡಿದ ಆರೋಪದ ಮೇಲೆ ಗೌತಮ್ ಅದಾನಿ, ಅವರ ಸೋದರಳಿಯ ಸಾಗರ್ ಅದಾನಿ ಸೇರಿದಂತೆ ಹಲವರ ವಿರುದ್ಧ ಅಮೆರಿಕದಲ್ಲಿ ವೀಸಾ ವಂಚನೆ ಮತ್ತು ಸೆಕ್ಯೂರಿಟೀಸ್ ವಂಚನೆ ಪ್ರಕರಣ ದಾಖಲಿಸಲಾಗಿತ್ತು.
ಆದರೆ, ಪ್ರಸ್ತುತ ಡೊನಾಲ್ಡ್ ಟ್ರಂಪ್ ನೇತೃತ್ವದ ಅಮೆರಿಕ ಸರ್ಕಾರವು ಜುಲೈ ಆರಂಭದಲ್ಲಿ ನ್ಯಾಯಾಲಯಕ್ಕೆ 10 ಪುಟಗಳ ಅರ್ಜಿ ನೀಡಿ, “ಈ ಪ್ರಕರಣವು ಕಾನೂನುಬದ್ಧವಾಗಿ ದೋಷಪೂರಿತವಾಗಿದೆ ಮತ್ತು ರಾಜತಾಂತ್ರಿಕ ಸಂಘರ್ಷಕ್ಕೆ ಕಾರಣವಾಗಬಹುದು” ಎಂದು ಹೇಳಿ ಪ್ರಕರಣವನ್ನು ಸಂಪೂರ್ಣವಾಗಿ ಕೈಬಿಡಲು ಕೋರಿತ್ತು.
ಆದರೆ, ನ್ಯಾಯಾಧೀಶ ಗರೌಫಿಸ್ ಅವರು ಈ ಅರ್ಜಿಯನ್ನು ತಕ್ಷಣವೇ ಒಪ್ಪಿಕೊಳ್ಳಲು ನಿರಾಕರಿಸಿದ್ದಾರೆ. ಅದಾನಿ ಅವರ ಕಾನೂನು ತಂಡವು ಈ ಹಿಂದೆ ಅಮೆರಿಕದಲ್ಲಿ 10 ಬಿಲಿಯನ್ ಡಾಲರ್ ಹೂಡಿಕೆ ಮಾಡುವ ಕುರಿತು ಯುಎಸ್ ಅಧಿಕಾರಿಗಳೊಂದಿಗೆ ಚರ್ಚಿಸಿತ್ತು ಎಂಬ ವರದಿಗಳ ಬೆನ್ನಲ್ಲೇ ನ್ಯಾಯಾಲಯವು ಈ ಕಠಿಣ ನಿಲುವು ತಳೆದಿದೆ.
ಇದನ್ನೂ ಓದಿ: ಅಮೆರಿಕದಲ್ಲಿ ‘ವಿದೇಶಿ ಲಂಚ ಕಾನೂನು’ ರದ್ದು; ಗೌತಮ್ ಅದಾನಿ ಪಾರು?
ಹಾಗಾಗಿ ಪ್ರಕರಣ ರದ್ದುಗೊಳಿಸುವ ಸರ್ಕಾರದ ಮನವಿಯನ್ನು ಪುರಸ್ಕರಿಸುವ ಮುನ್ನ, ಗೌತಮ್ ಅದಾನಿ ಅವರು ಜುಲೈ 15ರೊಳಗೆ ಲಿಖಿತ ಪ್ರಮಾಣಪತ್ರ ಸಲ್ಲಿಸಬೇಕು ಎಂದು ಕೋರ್ಟ್ ತಿಳಿಸಿದೆ. ಹಾಗೆಯೇ “ಈ ಇಂಡಿಕ್ಟ್‌ಮೆಂಟ್ (ದೋಷಾರೋಪಣೆ) ಕೈಬಿಡುವುದರ ಹಿಂದೆ ಯಾರಿಗಾದರೂ ಏನನ್ನಾದರೂ ಭರವಸೆ ನೀಡಲಾಗಿದೆಯೇ, ಆಫರ್ ಮಾಡಲಾಗಿದೆಯೇ ಅಥವಾ ಯಾವುದೇ ರೀತಿಯ ವಿನಿಮಯ ಒಪ್ಪಂದ ನಡೆದಿದೆಯೇ?” ಎಂಬುದನ್ನು ಅದಾನಿ ಅವರು ಸ್ಪಷ್ಟಪಡಿಸಬೇಕು ಎಂದು ನ್ಯಾಯಾಧೀಶರು ಆದೇಶದಲ್ಲಿ ತಿಳಿಸಿದ್ದಾರೆ.
ಈ ನಡುವೆ ಯುಎಸ್ ನ್ಯಾಯಾಂಗ ಇಲಾಖೆಯ ಪ್ರಿನ್ಸಿಪಲ್ ಅಸೋಸಿಯೇಟ್ ಡೆಪ್ಯುಟಿ ಅಟಾರ್ನಿ ಜನರಲ್ ಆರ್. ಟ್ರೆಂಟ್ ಮೆಕ್ಕಾಟರ್, “ಪ್ರಕರಣ ಕೈಬಿಡುವ ನಿರ್ಧಾರವು ಅದಾನಿ ಅಮೆರಿಕದಲ್ಲಿ ಹೂಡಿಕೆ ಮಾಡುವ ಭರವಸೆ ನೀಡಿರುವುದರ ಕಾರಣ ಕೈಗೊಂಡಿರುವುದಲ್ಲ. ಭಾರತದಲ್ಲಿ ತನಿಖಾ ಸಂಸ್ಥೆಗಳು ಈಗಾಗಲೇ ಕ್ಲೀನ್ ಚೀಟ್ ನೀಡಿವೆ. ಅಮೆರಿಕದ ಹೂಡಿಕೆದಾರರಿಗೆ ಯಾವುದೇ ನಷ್ಟವಾಗಿಲ್ಲ” ಎಂದು ಸಮರ್ಥಿಸಿಕೊಂಡಿದೆ.
ಆದರೆ ನ್ಯಾಯಾಲಯ ಮಾತ್ರ ಯಾವುದೇ ಅಘೋಷಿತ ಅಥವಾ ರಹಸ್ಯ ಒಪ್ಪಂದ ನಡೆದಿಲ್ಲ ಎಂಬುದನ್ನು ಖಚಿತಪಡಿಸಿಕೊಳ್ಳಲು ಸ್ವತಃ ಅದಾನಿ ಅವರೇ ಉತ್ತರ ನೀಡಬೇಕು ಎಂದು ಹೇಳಿದೆ.
