ಗುಲಾಮಗಿರಿಯು ಮಾನವೀಯತೆಯ ಮೇಲೆ ನಡೆದ ಘೋರ ಕೃತ್ಯ ಎಂಬ ವಿಶ್ವಸಂಸ್ಥೆಯ ನಿರ್ಣಯವನ್ನು ಅಮೆರಿಕ, ಇಸ್ರೇಲ್ ಅರ್ಜೆಂಟೈನಾ ದೇಶಗಳು ವಿರೋಧಿಸಿವೆ.
ಐರೋಪ್ಯ ರಾಷ್ಟ್ರಗಳ ಪ್ಲಾಂಟೇಶನ್ಗಳಲ್ಲಿ ಕೆಲಸ ಮಾಡಲು ಆಫ್ರಿಕನ್ ಜನಾಂಗದವರನ್ನು ಅವರಿದ್ದ ಜಾಗಗಳಿಗೆ ನುಗ್ಗಿ ಎಳೆದೊಯ್ದು ಬಂಧಿಸಿ ಅಮೆರಿಕದ ಹಡಗುಗಳಲ್ಲಿ ಕುರಿಮಂದೆಯಂತೆ ಸಾಗಿಸಲಾಗುತ್ತಿತ್ತು. ಯುರೋಪ್ ಮತ್ತು ಅಮೆರಿಕದ ರಾಷ್ಟ್ರಗಳಿಗೆ ಗುಂಪು ಗುಂಪಾಗಿ ಮಾರಾಟ ಮಾಡಿ ಶ್ರೀಮಂತ ಪ್ಲಾಂಟರ್ಸ್ಗಳಿಂದ ಹಣ ಪಡೆದು ಖಜಾನೆ ತುಂಬಿಸಿಕೊಳ್ಳುತ್ತಿದ್ದವು ಈ ದಯಾಹೀನ ರಾಷ್ಟ್ರಗಳು.
15 ರಿಂದ 19 ನೇ ಶತಮಾನದಲ್ಲಿ ನಡೆದ ಗುಲಾಮರ ವ್ಯಾಪಾರವನ್ನು ಮನುಕುಲದಲ್ಲಿನ ಘೋರ ಅಪರಾಧ ಎಂಬ ಘಾನ ಕೋರಿಕೆ ಮೇರೆಯ ವಿಶ್ವ ಸಂಸ್ಥೆಯ ಠರಾವನ್ನು ಯೂರೋಪ್ ಮತ್ತು ಅಮೆರಿಕದ ವಿರೋಧದ ನಡುವೆಯೂ ಹೊರಡಿಸಲಾಗಿತ್ತು.
2025 ರಲ್ಲಿ ಗುಲಾಮಗರಿಗೆ ಒಳಗಾದ 55 ದೇಶಗಳು ಒಟ್ಟುಗೂಡಿ ಆ ದೇಶಗಳ ಕಲ್ಯಾಣಕ್ಕಾಗಿ ಪರಿಹಾರ ಹಾಗೂ ಕ್ಷಮೆಯ ಪಟ್ಟು ಹಿಡಿದ ಆಫ್ರಿಕನ್ ಯೂನಿಯನ್ ಮುಖಾಂತರ ಠರಾವಿನ ನಿರ್ಧಾರ ಕೈಗೊಂಡವು.
ವಿಶ್ವಸಂಸ್ಥೆಯ ಸಾಮಾನ್ಯ ಸಭೆಯಲ್ಲಿ ಈ ವಿಷಯವಾಗಿ ನಡೆದ ಮತಾಭಿಪ್ರಾಯದಲ್ಲಿ 123 ದೇಶಗಳು ನಿರ್ಣಯವನ್ನು ಒಪ್ಪಿದರೆ. 52 ದೇಶಗಳು ಮತ ನಿರ್ಣಯದಿಂದ ದೂರ ಉಳಿದಿದ್ದು ಯುಎಸ್ ಮತ್ತು ಮತ್ತು ಇಸ್ರೇಲ್ ಅರ್ಜೆಂಟೈನಾ ಈ ಮೂರು ರಾಷ್ಟ್ರಗಳು ಠರಾವನ್ನು ತಿರಸ್ಕರಿಸಿವೆ.
15 ರಿಂದ 19 ನೇ ಶತಮಾನದ ಒಳಗೆ ಸುಮಾರು 12 ಮಿಲಿಯನ್ ಆಫ್ರಿಕರನ್ನು ಗುಲಾಮಗಿರಿಗೆ ಸಾಗಿಸಲಾಯಿತು. ಇಂದಿಗೂ ಆಫ್ರಿಕನ್ನರು ವರ್ಣ ಆಧಾರಿತ ತಾರತಮ್ಯಕ್ಕೆ ಒಳಗಾಗಿದ್ದಾರೆ, ಆದರಿಂದ ಠರಾವು ಹೊರಡಿಸಬೇಕು ಎಂದು ವಿಶ್ವಸಂಸ್ಥೆಯ ಮುಂದೆ ತನ್ನ ವಾದವನ್ನು ಘಾನ ಪ್ರಸ್ತಾಪಿಸಿತು.
ಘಾನ ಅಧ್ಯಕ್ಷ ದ್ರಮನಿ ಮಹಾಮ ಈ ನಿರ್ಣಯ ರೂಪಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು, ಈ ಠರಾವು ಹಳೆಯ ಗಾಯಗಳ ಮಾಯುವಿಕೆಗೆ, ನ್ಯಾಯದ ಪುನರ್ಸ್ಥಾಪನೆಗೆ ರಹದಾರಿ ಎಂದಿದ್ದರು.
ಪ್ರಸ್ತುತ ನಿರ್ಣಯದ ಅಂಗೀಕಾರ ಮರೆತ ಅಧ್ಯಾಯಗಳ ಪುನರ್ಮನನ ಮಾಡಲು ಸಹಾಯವಾಗಲಿದೆ. ಇತಿಹಾಸದ ಪುಟದಲ್ಲಿ ಈ ಠರಾವು ದಾಖಲಾಗಲಿ, ಘನತೆಯನ್ನು ಕಸಿದ ಗುಲಾಮಗಿರಿಯಿಂದ ನರಳಿದ ಕೋಟ್ಯಾಂತರ ಜನರ ಸ್ಮರಣೆಯಲ್ಲಿ ನಾವು ಸರಿಯಾದ ನಿರ್ಧಾರವನ್ನು ಕೈಗೆತ್ತಿಕೊಂಡಿದ್ದೇವೆ ಎಂದರು.
ಘಾನಾದ ವಿದೇಶಾಂಗ ಸಚಿವ ಸಾಮ್ಯುಯೆಲ್ ಅಬ್ಲಕ್ವ ಮಾತನಾಡಿ, “ಗುಲಾಮರ ಸಾಗಾಣೆಯ ವಿರುದ್ಧದ ಠರಾವು ಜನಾಂಗದ ಏಳಿಗೆಗೆ ಬೇಕಾದ ಪರಿಹಾರ ಕ್ರಮಗಳನ್ನು ಕಟ್ಟಿಕೊಡುವ ದಾರಿಗೆ ನಾಂದಿ ಹಾಡಿದೆ” ಎಂದಿದ್ದಾರೆ.
ತಿರಸ್ಕಾರದಿಂದ ಇತಿಹಾಸವನ್ನು ಅಳಿಸಿ ಹಾಕಲಾಗದು, ವಿಳಂಬಿಸಿದ ಮಾತ್ರಕ್ಕೆ ಸತ್ಯ ದುರ್ಬಲಗೊಳ್ಳದು, ಅಪರಾಧಗಳು ಮುಚ್ಚಿಹೋಗುವುದಿಲ್ಲ, ನ್ಯಾಯವು ಕಾಲದ ಜೊತೆಗೆ ರಾಜಿಯಾಗದು ಎಂದು ಅಬ್ಲಕ್ವ ಹೇಳಿದ್ದಾರೆ.
ಐತಿಹಾಸಿಕ ಅನ್ಯಾಯವನ್ನು ಖಂಡಿಸುವ ಸಲುವಾಗಿ ತೀಕ್ಷ್ಣ ಕ್ರಮವನ್ನು ತೆಗೆದುಕೊಳ್ಳಲು ಹೆಚ್ಚು ರಾಷ್ಟ್ರಗಳ ಸಹಮತ ಬೇಕಿದೆ ಎಂದು ವಿಶ್ವಸಂಸ್ಥೆಯ ಪ್ರಧಾನ ಕಾರ್ಯದರ್ಶಿ ಆಂಟೋನಿಯೋ ಗುಟೊರಿಸ್ ವಿಶ್ವ ಸಂಸ್ಥೆಯ ಸಾಮಾನ್ಯ ಸಭೆಗೆ ಸೂಚಿಸಿದರು.
ಠರಾವಿನಲ್ಲಿ ಉಲ್ಲೇಖಿಸಿದ ಗುಲಾಮಗಿರಿಯ ಪರಿಹಾರದಲ್ಲಿ ಗುಲಾಮಗಿರಿಗೆ ಒಳಪಟ್ಟ ದೇಶಗಳಿಗೆ ಆರ್ಥಿಕ ಭದ್ರತೆ ಒದಗಿಸುವುದು, ಕ್ಷಮಾಪಣೆ ಕೋರುವುದು ಹಾಗೂ ಭವಿಷ್ಯದಲ್ಲಿ ಇಂತಹ ಘಟನೆಗಳಿಗೆ ಆಸ್ಪದ ಕೊಡುವುದಿಲ್ಲ ಎಂಬ ಒಪ್ಪಂದವನ್ನು ಗುಲಾಮ ವ್ಯಾಪಾರ ಅನುಸರಿಸಿದ ರಾಷ್ಟ್ರಗಳು ಅಂಗೀಕರಿಸಬೇಕು ಎಂದು ಸೂಚಿಸಲಾಗಿತ್ತು.
ಹಲವು ಪಾಷ್ಚ್ಯಾತ್ಯ ದೇಶಗಳು ಈ ನೀತಿಯನ್ನು ವಿರೋಧಿಸಿದ್ದು ಘಟಿಸಿ ಹೋಗಿರುವ ಗುಲಾಮಗಿರಿ ಪದ್ದತಿಯನ್ನು ತಾವು ಸಮರ್ಥಿಸಿಕೊಳ್ಳುವುದಿಲ್ಲ, ಆದರೆ ಅಂದೆಂದೋ ನಡೆದ ಅನ್ಯಾಯಕ್ಕೆ ಈಗ ದಂಡ ತೆರುವುದು ಅಸಮಂಜಸ ಎಂಬ ತರ್ಕ ಮುಂದಿಟ್ಟವು.
ನೆದರ್ಲೆಂಡ್ ಹೊರತುಪಡಿಸಿ ಇನ್ಯಾವ ದೇಶಗಳು ಈ ಮನುಷ್ಯ ವಿರೋಧಿ ಘಟನೆಗೆ ಇಲ್ಲಿಯ ತನಕ ಕ್ಷಮೆ ಕೇಳಿಲ್ಲ. ಹಾಗೆ ನೋಡಿದರೆ ಇಡೀ ಮಾನವ ಸಂಕುಲವೇ ಈ ಹೃದಯವಿಹೀನ ಕೃತ್ಯದ ಹೊಣೆಹೊತ್ತು ಕ್ಷಮೆ ಯಾಚಿಸಬೇಕು. ಘನತೆಯ ಬದುಕನ್ನು ಕಿತ್ತುಕೊಂಡು ಆಫ್ರಿಕಾದ ಜನರನ್ನು ಹೀನಾಯವಾಗಿ ಬಳಸಿಕೊಂಡ ದೇಶಗಳು ಈಗ ಅತ್ಯಂತ ನಾಗರೀಕ, ಪ್ರಗತಿಪರ ರಾಷ್ಟ್ರಗಳು ಎಂದು ಗುರುತಿಸಿಕೊಂಡಿವೆ. ಅಸಹಾಯಕರ ಬೆವರು, ರಕ್ತದ ಮೊತ್ತ ಇಂದಿನ ಆ ದೇಶಗಳ ಸಿರಿವಂತಿಕೆಯ ಮೂಲ. ಅಮೆರಿಕ ಇಂದಿಗೂ ಅಸಹಾಯಕ ಪುಟ್ಟ ದೇಶಗಳ ಮೇಲೆ ತನ್ನ ದಬ್ಬಾಳಿಕೆ ನಡೆಸುತ್ತಲೇ ಇದೆ. ತನ್ನ ಇಂದಿನ ಹುಚ್ಚುತನಗಳಿಗೆ ಪಶ್ಚಾತ್ತಾಪ ಪಡದ ಸ್ವಾರ್ಥ ದೇಶ ದಶಕಗಳ ಹಿಂದಿನ ಕೃತ್ಯಕ್ಕೆ ಕ್ಷಮೆ ಕೇಳಬೇಕು ಪರಿಹಾರ ಒದಗಿಸಬೇಕು ಎಂದರೆ ಕೇಳುತ್ತದೆಯೇ?
ಅಮೆರಿಕ ಅಧ್ಯಕ್ಷ ಟ್ರಂಪ್ ಅಮರಿಕ ವಿರೋಧಿ ಸಿದ್ಧಾಂತದ ಹೆಸರಿನಲ್ಲಿ ಮಾಡುತ್ತಿರುವ ಪ್ರಮಾದಗಳನ್ನು ಮಹಾಮ ಟೀಕಿಸಿದ್ದಾರೆ. ಅಮೆರಿಕ ಗುಲಾಮಗಿರಿ ಪದ್ದತಿಯನ್ನು ನಿಷೇಧಿಸಿ ಶತಮಾನವೇ ಆಗಿಹೋದರು ಈಗಲೂ ಅಮೆರಿಕದಲ್ಲಿ ಕಪ್ಪು ಜನಾಂಗದವರ ಮೇಲೆ ದಬ್ಬಾಳಿಕೆಗಳು ನಡೆಯುತ್ತವೆ, ರೇಸೀಸಂ ಜೀವಂತವಾಗಿರುವ ಅಮೆರಿಕದ ಇತಿಹಾಸದಲ್ಲಿ ಘಟಿಸಿ ಮರೆಯಾದ ತಪ್ಪಿಗೆ ಈಗ ಕ್ಷಮೆ ಅಥವಾ ಪರಿಹಾರ ಕೇಳುವುದು ಅಸಂಬದ್ಧ ಎಂದು ವಾದಿಸಿದೆ. ಅಂದಿನ ಅಂತರರಾಷ್ಟ್ರೀಯ ಕಾನೂನಿನ ಪ್ರಕಾರ ಗುಲಾಮರ ವ್ಯಾಪಾರಕ್ಕೆ ಕಾನೂನು ಸಮ್ಮತವಿತ್ತು. ಆದರಿಂದ ಪರಿಹಾರ ಅಥವಾ ಇನ್ಯಾವ ಠರಾವಿಗೂ ತನ್ನ ಒಪ್ಪಿಗೆ ಇಲ್ಲ ಎಂದು ಘೋಷಿಸುತ್ತದೆ.
ಆಫ್ರಿಕಾದ ದೇಶಗಳು ತಮ್ಮ ನಾಡಿನಿಂದ ಕದ್ದೊಯ್ದ ಅಮೂಲ್ಯ ಕಲಾಕುಸುರಿಗಳನ್ನು, ಬೆಲೆಬಾಳುವ ವಸ್ತುಗಳನ್ನು ಮರಳಿಸುವಂತೆ ಮಾತ್ರ ಕೇಳಿಕೊಂಡಿಲ್ಲ ಪೀಳಿಗೆಗಳಿಂದ ನಡೆದು ಬಂದ ಹಿಂಸೆ, ದೌರ್ಜನ್ಯಕ್ಕೆ, ಕಳೆದ ತಮ್ಮ ಜನಾಂಗದ ಘನತೆಗೆ ಮರುಹುಟ್ಟು ಕೊಡಿ ಎಂದು ಕೇಳುತ್ತಿದೆ. ಸುಮಾರು 350 ವರುಷಗಳ ನಿರಂತರ ಶೋಷಣೆಗೆ ಒಳಗಾದ ದೇಶಗಳು ಈಗಲೂ ಪ್ರಬಲ ರಾಷ್ಟ್ರಗಳ ಹಿಡಿತಕ್ಕೆ ನಲುಗಿ ಹೋಗಿವೆ.
