ಕೃತಕ ಬುದ್ಧಿಮತ್ತೆ (AI) ಮತ್ತು ಸೆಮಿಕಂಡಕ್ಟರ್ ಚಿಪ್ಗಳ ತಯಾರಿಕೆಯಲ್ಲಿ ಜಾಗತಿಕ ನಾಯಕತ್ವವನ್ನು ಗಟ್ಟಿಗೊಳಿಸುವ ನಿಟ್ಟಿನಲ್ಲಿ ದಕ್ಷಿಣ ಕೊರಿಯಾ ಐತಿಹಾಸಿಕ ಹೆಜ್ಜೆಯನ್ನಿಟ್ಟಿದೆ. ಅಧ್ಯಕ್ಷ ಲೀ ಜೇ ಮ್ಯುಂಗ್ ಅವರು ಮುಂದಿನ ಕೆಲವು ವರ್ಷಗಳಲ್ಲಿ ದೇಶದಲ್ಲಿ ನೂರಾರು ಶತಕೋಟಿ ಡಾಲರ್ಗಳ ಹೂಡಿಕೆಯನ್ನು ಘೋಷಿಸಿದ್ದು, ತಂತ್ರಜ್ಞಾನ ಕ್ಷೇತ್ರದಲ್ಲಿ ದೇಶವನ್ನು ಹೊಸ ಎತ್ತರಕ್ಕೆ ಕೊಂಡೊಯ್ಯಲು ಯೋಜನೆ ರೂಪಿಸಿದ್ದಾರೆ.
ಇಂದು (ಜೂ.29) ದೇಶವನ್ನುದ್ದೇಶಿಸಿ ಮಾತನಾಡಿರುವ ಅಧ್ಯಕ್ಷ ಲೀ ಜೇ ಮ್ಯುಂಗ್, “ಈ ಉಪಕ್ರಮವನ್ನು ಸೆಮಿಕಂಡಕ್ಟರ್, ಭೌತಿಕ AI ಮತ್ತು ಡೇಟಾ ಸೆಂಟರ್ಗಳ ‘ತ್ರಿಪಕ್ಷೀಯ ಅಕ್ಷ’ (Triple Axis) ಎಂದು ಬಣ್ಣಿಸಿದ್ದಾರೆ. “ನಾವು ಜಗತ್ತಿನ ಯಾವುದೇ ದೇಶಕ್ಕಿಂತ ವೇಗವಾಗಿ AI ತಂತ್ರಜ್ಞಾನದ ಪ್ರಮುಖ ಅಂಶಗಳನ್ನು ವಶಪಡಿಸಿಕೊಳ್ಳಬೇಕಿದೆ,” ಎಂದು ಅವರು ಕರೆ ನೀಡಿದ್ದಾರೆ.
ವಿಶ್ವದ ಅತಿದೊಡ್ಡ ಮೆಮೊರಿ ಚಿಪ್ ತಯಾರಕ ಕಂಪನಿಗಳಾದ ‘ಸ್ಯಾಮ್ಸಂಗ್ ಎಲೆಕ್ಟ್ರಾನಿಕ್ಸ್’ ಮತ್ತು ‘ಎಸ್ಕೆ ಹೈನಿಕ್ಸ್’ ಕಂಪನಿಗಳು ತಮ್ಮ ಪೂರೈಕೆದಾರರೊಂದಿಗೆ ಸೇರಿ ದಕ್ಷಿಣ ಕೊರಿಯಾದ ನೈಋತ್ಯ ಭಾಗದಲ್ಲಿ ತಲಾ ಎರಡು ಹೊಸ ಚಿಪ್ ಫ್ಯಾಬ್ರಿಕೇಶನ್ ಸೈಟ್ಗಳನ್ನು ಸ್ಥಾಪಿಸಲು 800 ಟ್ರಿಲಿಯನ್ ವೋನ್ (ಸುಮಾರು $518 ಬಿಲಿಯನ್) ಹೂಡಿಕೆ ಮಾಡಲಿವೆ ಎಂದು ಕೈಗಾರಿಕಾ ಸಚಿವ ಕಿಮ್ ಜಂಗ್-ಕ್ವಾನ್ ತಿಳಿಸಿದ್ದಾರೆ.
ಎಸ್ಕೆ ಗ್ರೂಪ್, ಜಿಎಸ್ ಗ್ರೂಪ್ ಮತ್ತು ನೇವರ ಕಂಪನಿಗಳು 550 ಟ್ರಿಲಿಯನ್ ವೋನ್ ($356 ಬಿಲಿಯನ್) ಹೂಡಿಕೆಯೊಂದಿಗೆ ಪ್ರದೇಶದಲ್ಲಿ AI ಡೇಟಾ ಸೆಂಟರ್ಗಳನ್ನು ನಿರ್ಮಿಸಲಿದ್ದು, 2035ರ ವೇಳೆಗೆ 1,000 ಟ್ರಿಲಿಯನ್ ವೋನ್ ($648 ಬಿಲಿಯನ್) ವೆಚ್ಚದಲ್ಲಿ ಬೃಹತ್ ಡೇಟಾ ಕೇಂದ್ರಗಳನ್ನು ನಿರ್ಮಿಸುವ ಗುರಿಯನ್ನು ಸರ್ಕಾರ ಹೊಂದಿದೆ.
ಜತೆಗೆ ಚುಂಗ್ಚಿಯೊಂಗ್ ಪ್ರದೇಶದಲ್ಲಿ ಚಿಪ್-ಪ್ಯಾಕೇಜಿಂಗ್ ಕ್ಲಸ್ಟರ್ ನಿರ್ಮಾಣಕ್ಕಾಗಿ ಹೆಚ್ಚುವರಿಯಾಗಿ 81 ಟ್ರಿಲಿಯನ್ ವೋನ್ ($52.5 ಬಿಲಿಯನ್) ಹೂಡಿಕೆ ಮಾಡಲಾಗುವುದು ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.
ಇದನ್ನೂ ಓದಿ: RSS ವಿರುದ್ಧ ಹೇಳಿಕೆ: ಸಚಿವ ಪ್ರಿಯಾಂಕ್ ಖರ್ಗೆ ಮತ್ತು ನಲಪಾಡ್ಗೆ ಕೋರ್ಟ್ ಸಮನ್ಸ್
ಈ ಮಹತ್ವಾಕಾಂಕ್ಷೆಯ ಯೋಜನೆಯು ದಕ್ಷಿಣ ಕೊರಿಯಾದಲ್ಲಿ ರಾಜಕೀಯ ವಿವಾದವನ್ನೂ ಹುಟ್ಟುಹಾಕಿದೆ. ಅಧ್ಯಕ್ಷ ಲೀ ಅವರ ಸರ್ಕಾರವು ನೈಋತ್ಯ ಭಾಗದ (ಹೊನಾಮ್ ಪ್ರಾಂತ್ಯ) ಅಭಿವೃದ್ಧಿಗೆ ಒತ್ತು ನೀಡುತ್ತಿರುವುದು ರಾಜಕೀಯ ಪ್ರೇರಿತವಾಗಿದೆ ಎಂದು ವಿರೋಧ ಪಕ್ಷಗಳು ಟೀಕಿಸಿವೆ. ಈ ಪ್ರದೇಶವು ಅಧ್ಯಕ್ಷರ ಡೆಮಾಕ್ರಟಿಕ್ ಪಕ್ಷದ ಭದ್ರಕೋಟೆಯಾಗಿದ್ದು, ಕೈಗಾರಿಕಾ ದೃಷ್ಟಿಯಿಂದ ಸೂಕ್ತವಲ್ಲದ ಜಾಗದಲ್ಲಿ ಹೂಡಿಕೆ ಮಾಡಲು ಕಂಪನಿಗಳ ಮೇಲೆ ಸರ್ಕಾರ ಒತ್ತಡ ಹೇರುತ್ತಿದೆ ಎಂದು ಆರೋಪಿಸುತ್ತಿವೆ.
ಆದರೆ ಈ ಟೀಕೆಗಳನ್ನು ತಳ್ಳಿಹಾಕಿರುವ ಅಧ್ಯಕ್ಷ ಲೀ, ನೈಋತ್ಯ ಭಾಗದಲ್ಲಿರುವ ಅಪಾರ ಶಕ್ತಿ ಸಂಪನ್ಮೂಲಗಳನ್ನು ಬಳಸಿಕೊಳ್ಳಲು ಮತ್ತು ಸಿಯೋಲ್ ಮೆಟ್ರೋಪಾಲಿಟನ್ ಪ್ರದೇಶದ ಹೊರತಾಗಿ ದೇಶದ ಸಮಗ್ರ ಅಭಿವೃದ್ಧಿಗಾಗಿ ಈ ತೀರ್ಮಾನ ಕೈಗೊಳ್ಳಲಾಗಿದೆ ಎಂದು ಸಮರ್ಥಿಸಿಕೊಂಡಿದ್ದಾರೆ. ಹೂಡಿಕೆಯು ದೇಶದ ಆರ್ಥಿಕತೆಯನ್ನು ಮುಂದಿನ ದಶಕಗಳಲ್ಲಿ ಯಾವ ರೀತಿ ಬದಲಾಯಿಸಲಿದೆ ಎಂಬುದನ್ನು ಕಾದು ನೋಡಬೇಕಿದೆ.
