ಅಮೆರಿಕದ ರಾಷ್ಟ್ರೀಯ ಭಯೋತ್ಪಾದನಾ ನಿಗ್ರಹ ಕೇಂದ್ರದ (NCTC) ನಿರ್ದೇಶಕರಾಗಿದ್ದ ಜೋ ಕೆಂಟ್ ಅವರು ತಮ್ಮ ಹುದ್ದೆಗೆ ರಾಜೀನಾಮೆ ನೀಡಿದ್ದಾರೆ. ಮಂಗಳವಾರ, ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರಿಗೆ ತಮ್ಮ ರಾಜೀನಾಮೆ ಪತ್ರವನ್ನು ಸಲ್ಲಿಸಿರುವ ಅವರು, ಇರಾನ್ ಜೊತೆಗೆ ಯುದ್ಧ ನಡೆಸುವ ಅಮೆರಿಕ ನಿರ್ಧಾರವನ್ನು ತೀವ್ರವಾಗಿ ವಿರೋಧಿಸಿ ರಾಜೀನಾಮೆ ನೀಡಿರುವುದಾಗಿ ಹೇಳಿಕೊಂಡಿದ್ದಾರೆ.
ಪ್ರಮುಖ ಗುಪ್ತಚರ ಸಂಸ್ಥೆಯ ಮುಖ್ಯಸ್ಥರೊಬ್ಬರು ಸರ್ಕಾರದ ಯುದ್ಧ ನೀತಿಯನ್ನೇ ಪ್ರಶ್ನಿಸಿ ಅಧಿಕಾರದಿಂದ ಕೆಳಗಿಳಿದಿರುವುದು ಈಗ ಜಾಗತಿಕ ಮಟ್ಟದಲ್ಲಿ ಚರ್ಚೆಗೆ ಕಾರಣವಾಗಿದೆ. ಇದು ಟ್ರಂಪ್ ಸರ್ಕಾರಕ್ಕೆ ಅಂತರಾಷ್ಟ್ರೀಯ ವೇದಿಕೆಯಲ್ಲಿ ತೀವ್ರ ಮುಖಭಂಗ ಉಂಟುಮಾಡಿದೆ ಎಂದು ವಿಶ್ಲೇಷಿಸಲಾಗುತ್ತಿದೆ.
ತಮ್ಮ ರಾಜೀನಾಮೆ ಪತ್ರವನ್ನು ‘ಎಕ್ಸ್‌’ನಲ್ಲಿ ಕೆಂಟ್ ಹಂಚಿಕೊಂಡಿದ್ದಾರೆ. “ಇರಾನ್ ಜೊತೆಗಿನ ಈ ಯುದ್ಧವು ನೈತಿಕವಾಗಿ ಮತ್ತು ಕಾರ್ಯತಂತ್ರದ ದೃಷ್ಟಿಯಿಂದ ಅತ್ಯಂತ ತಪ್ಪು ನಿರ್ಧಾರವಾಗಿದೆ. ಇರಾನ್‌ನಿಂದ ಅಮೆರಿಕಕ್ಕೆ ಯಾವುದೇ ರೀತಿಯ ತಕ್ಷಣದ ಅಪಾಯ ಅಥವಾ ಬೆದರಿಕೆ ಇರಲಿಲ್ಲ. ಆದರೂ, ಕೇವಲ ಇಸ್ರೇಲ್‌ನ ಒತ್ತಡಕ್ಕೆ ಮಣಿದು ಅಧ್ಯಕ್ಷ ಟ್ರಂಪ್ ಈ ಯುದ್ಧವನ್ನು ಪ್ರಾರಂಭಿಸಿದ್ದಾರೆ” ಎಂದು ಅವರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
“ನನ್ನ ಆತ್ಮಸಾಕ್ಷಿಗೆ ವಿರುದ್ಧವಾಗಿ ಈ ಸಂಘರ್ಷವನ್ನು ಬೆಂಬಲಿಸಲು ಸಾಧ್ಯವಿಲ್ಲ” ಎಂದು ಅವರು ಹೇಳಿದ್ದಾರೆ.
After much reflection, I have decided to resign from my position as Director of the National Counterterrorism Center, effective today.
— Joe Kent (@joekent16jan19) March 17, 2026
I cannot in good conscience support the ongoing war in Iran. Iran posed no imminent threat to our nation, and it is clear that we started this… pic.twitter.com/prtu86DpEr
ಜೋ ಕೆಂಟ್ ಅವರ ಈ ನಿರ್ಧಾರದ ಹಿಂದೆ ಅವರ ಸುದೀರ್ಘ ಸೇನಾ ಅನುಭವ ಮತ್ತು ವೈಯಕ್ತಿಕ ಜೀವನದ ನೋವಿನ ಕಥೆಯೂ ಇದೆ ಎಂದು ಹೇಳಲಾಗಿದೆ. ಸುಮಾರು 20 ವರ್ಷಗಳ ಕಾಲ ಅಮೆರಿಕ ಸೇನೆಯ ವಿಶೇಷ ಪಡೆಯಾದ ‘ಗ್ರೀನ್ ಬೆರೆಟ್’ನಲ್ಲಿ ಸೇವೆ ಸಲ್ಲಿಸಿದ್ದ ಕೆಂಟ್, ಇರಾಕ್, ಯೆಮನ್ ಹಾಗೂ ಉತ್ತರ ಆಫ್ರಿಕಾ ಸೇರಿದಂತೆ ಒಟ್ಟು 11 ಯುದ್ಧಭೂಮಿಗಳಲ್ಲಿ ಕಾರ್ಯಾಚರಣೆ ನಡೆಸಿದ ಅನುಭವ ಹೊಂದಿದ್ದಾರೆ. ಚೀಫ್ ವಾರಂಟ್ ಆಫೀಸರ್‌ಆಗಿ ಅಮೆರಿಕ ಸೇನೆಯಿಂದ ನಿವೃತ್ತರಾದ ಅವರು. ಬಳಿಕ ಕೇಂದ್ರ ಗುಪ್ತಚರ ಸಂಸ್ಥೆಯಲ್ಲಿ (CIA) ಪ್ಯಾರಾಮಿಲಿಟರಿ ಅಧಿಕಾರಿಯಾಗಿ ಕೆಲಸ ಮಾಡಿದ್ದರು.
2019ರಲ್ಲಿ ಸಿರಿಯಾದಲ್ಲಿ ನಡೆದ ಆತ್ಮಹತ್ಯಾ ಬಾಂಬ್ ದಾಳಿಯಲ್ಲಿ ಅವರ ಪತ್ನಿ ಶಾನನ್ ಕೆಂಟ್ ಅವರು ಮೃತಪಟ್ಟಿದ್ದು ಜೋ ಕೆಂಟ್ ಅವರ ಜೀವನದ ಮೇಲೆ ಆಳವಾದ ಪ್ರಭಾವ ಬೀರಿತ್ತು. ಈ ವೈಯಕ್ತಿಕ ದುರಂತವು ವಿದೇಶಿ ನೆಲದಲ್ಲಿ ಅಮೆರಿಕ ನಡೆಸುವ ಅನಗತ್ಯ ಯುದ್ಧಗಳ ಬಗ್ಗೆ ಕೆಂಟ್ ಅವರ ನಿಲುವನ್ನು ಮತ್ತಷ್ಟು ಪ್ರಭಾವಿಸಿದೆ. ಅಮೆರಿಕ ತನ್ನ ಸೈನಿಕರ ಪ್ರಾಣವನ್ನು ಪರಕೀಯರ ಹಿತಾಸಕ್ತಿಗಾಗಿ ಪಣಕ್ಕಿಡಬಾರದು ಎಂಬ ಸ್ಪಷ್ಟ ನಿಲುವು ಅವರದ್ದಾಗಿದೆ.
ಈ ಲೇಖನ ಓದಿದ್ದೀರಾ?: LPG ಹೊತ್ತು ಭಾರತಕ್ಕೆ ಬಂದ ‘ಶಿವಾಲಿಕ್’ ಹಡಗು; ತಣಿಯುವುದೇ ಕೊರತೆ-ಆತಂಕ?
ಇರಾನ್ ಮೇಲೆ ಅಮೆರಿಕ-ಇಸ್ರೇಲ್ ಜಂಟಿಯಾಗಿ ನಡೆಸಿದ ದಾಳಿ ಮತ್ತು ಪ್ರತಿದಾಳಿಯಾಗಿ ಇರಾನ್ ಗಲ್ಫ್ ರಾಷ್ಟ್ರಗಳ ಮೇಲೆ ಇರಾನ್ ಆರಂಭಿಸಿದ ಸರಣಿ ದಾಳಿಗಳು ಜಾಗತಿಕ ಬಿಕ್ಕಟ್ಟನ್ನು ಸೃಷ್ಟಿಸಿವೆ. ಯುದ್ಧ ಆರಂಭಿಸಿದ ಅಮೆರಿಕ ಈಗ ಸಂದಿಗ್ಧ ಪರಿಸ್ಥಿತಿಯಲ್ಲಿದೆ. ಇದೇ ಸಮಯದಲ್ಲಿ, ಕೆಂಟ್ ಅವರ ರಾಜೀನಾಮೆಯು ಟ್ರಂಪ್ ಅವರ ವಿದೇಶಾಂಗ ನೀತಿಯ ಮೇಲಿನ ಗಂಭೀರ ಪ್ರಶ್ನೆಯಾಗಿ ಹೊರಹೊಮ್ಮಿದೆ.
ರಾಜಕೀಯವಾಗಿ ಜೋ ಕೆಂಟ್ ಅವರನ್ನು ಕಟ್ಟರ್ ಬಲಪಂಥೀಯ ಮತ್ತು ಟ್ರಂಪ್ ಅವರ ‘MAGA’ (ಅಮೆರಿಕವನ್ನು ಮತ್ತೆ ಮಹಾನ್ ರಾಷ್ಟ್ರವನ್ನಾಗಿ ಮಾಡುವುದು) ಆಂದೋಲನದ ಪ್ರಬಲ ಬೆಂಬಲಿಗ ಎಂದು ಗುರುತಿಸಲಾಗಿದೆ. 2022 ಮತ್ತು 2024ರ ಅಮೆರಿಕ ಚುನಾವಣೆಗಳಲ್ಲಿ ವಾಷಿಂಗ್ಟನ್‌ನಿಂದ ಸ್ಪರ್ಧಿಸಿ ಸೋತಿದ್ದರು.
