“ನಾನು ಎಷ್ಟೇ ಮೂರ್ಖತನದ ಮಾತುಗಳನ್ನು ಆಡಿದರೂ ನೀವು ಚಪ್ಪಾಳೆ ತಟ್ಟುತ್ತೀರಿ” ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ತಮ್ ಬೆಂಬಲಿಗರನ್ನು ಉದ್ದೇಶಿಸಿ ಹೇಳಿದ್ದಾರೆ. ಅವರ ಹೇಳಿಕೆ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದ್ದು, ಭಾರೀ ಟ್ರೋಲ್‌ಗೆ ಗುರಿಯಾಗಿದೆ.
ಅಮೆರಿಕದ ಟೆನ್ನೆಸ್ಸಿಯ ಕ್ಲಾರ್ಕ್ಸ್‌ವಿಲ್‌ನಲ್ಲಿರುವ ‘ಎಫ್‌&ಎಮ್ ಬ್ಯಾಂಕ್ ಅರೆನಾ’ದಲ್ಲಿ ರಿಪಬ್ಲಿಕನ್ ನ್ಯಾಷನಲ್ ಕಮಿಟಿ ಆಯೋಜಿಸಿದ್ದ ಬೃಹತ್ ಸಭೆಯನ್ನು ಉದ್ದೇಶಿಸಿ ಟ್ರಂಪ್ ಮಾತನಾಡಿದ್ದಾರೆ. “ಈ ರಾಜ್ಯದಲ್ಲಿ ನಾವು ಹೆಚ್ಚಿನ ಮತಗಳ ಅಂತರದಿಂದ ಗೆಲ್ಲುವುದು ಖಚಿತ. ಆದರೂ ನಮ್ಮ ಬೆಂಬಲಿಗರಿಗೆ ಧನ್ಯವಾದ ಸಲ್ಲಿಸಲು ನಾನು ಇಲ್ಲಿಗೆ ಬಂದಿದ್ದೇನೆ” ಎಂದು ಹೇಳಿದ್ದಾರೆ.
ಇದೇ ವೇಳೆ, ತಮ್ಮ ಸಭೆಗಳಿಗೆ ಸೇರುವ ಜನಸ್ತೋಮ ಮತ್ತು ಅವರ ಪ್ರೀತಿಯ ಬಗ್ಗೆ ಪ್ರಸ್ತಾಪಿಸಿದ ಟ್ರಂಪ್, “ಸಭೆಯಲ್ಲಿ ಸೇರಿರುವ ಜನರಲ್ಲಿ ಅಪಾರ ಪ್ರೀತಿ ಇದೆ. ಹಾಗಾಗಿ ನಾನು ಎಷ್ಟೇ ಮೂರ್ಖತನದ ಮಾತುಗಳನ್ನಾಡಿದರೂ ನೀವು ಚಪ್ಪಾಳೆ ತಟ್ಟುತ್ತೀರಿ” ಎಂದು ತಮಾಷೆ ಮಾಡಿದ್ದಾರೆ.
“ದೇಶದ ಗಡಿ ಭದ್ರತೆ, ತೆರಿಗೆ ಇಳಿಕೆ ಹಾಗೂ ಬಲವಾದ ಸೇನೆಯನ್ನು ಹೊಂದುವುದು ಸಾಮಾನ್ಯ ಜ್ಞಾನದ ವಿಷಯಗಳಾಗಿವೆ. ಇಂತಹ ನಿಲುವುಗಳಿಗೇ ಜನರು ಬೆಂಬಲ ನೀಡುತ್ತಾರೆ” ಎಂದಿದ್ದಾರೆ.
ಬೆಂಬಲಿಗರ ಚಪ್ಪಾಳೆ ಕುರಿತು ಟ್ರಂಪ್ ಹೇಳಿಕೆಯ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿದೆ. ನೆಟ್ಟಿಗರು ತೀವ್ರ ವಿಮರ್ಶೆ ಮತ್ತು ಟ್ರೋಲ್ ಮಾಡುತ್ತಿದ್ದಾರೆ. ಅಂಧಾಭಿಮಾನದ ಬೆಂಬಲಿಗರ ಬಗ್ಗೆ ಟ್ರಂಪ್ ಅವರೇ ಮುಕ್ತವಾಗಿ ಮಾತನಾಡಿದ್ದಾರೆ ಎಂದು ಹಲವರು ವ್ಯಂಗ್ಯವಾಡಿದ್ದಾರೆ.
ಈ ವಿಡಿಯೋ ಭಾರತದಲ್ಲಿಯೂ ವೈರಲ್ ಆಗುತ್ತಿದ್ದು, ಹಲವರು ಮೋದಿ ಮತ್ತು ಮೋದಿ ಅವರ ಅಂಧಭಕ್ತರನ್ನು ಈ ಸನ್ನಿವೇಶಕ್ಕೆ ಹೋಲಿಸಿದ್ದಾರೆ.
