ಭಾರತದಲ್ಲಿ ಇಂದಿಗೂ ಉದ್ಯೋಗದ ಭದ್ರತೆ ಮತ್ತು ಪೋಷಕರ ಸಾಂಪ್ರದಾಯಿಕ ನಿರೀಕ್ಷೆಗಳ ನಡುವಿನ ಕಂದಕ ಹಾಗೆಯೇ ಉಳಿದಿದೆ. ಇದಕ್ಕೆ ಸಾಕ್ಷಿ ಎಂಬಂತಹ ಘಟನೆಯೊಂದು ಬೆಂಗಳೂರಿನಲ್ಲಿ ನಡೆದಿದೆ. ವ್ಯಕ್ತಿಯೊಬ್ಬರು ತಮ್ಮ ಮಗನಿಗೆ ವಾರ್ಷಿಕ ಬರೋಬ್ಬರಿ 15 ಲಕ್ಷ ರೂ. ವೇತನ ಪ್ಯಾಕೇಜ್‌ನ ಖಾಸಗಿ ಉದ್ಯೋಗ ಸಿಕ್ಕಿದ್ದರೂ, ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ಸರ್ಕಾರಿ ಉದ್ಯೋಗವೇ ಮೇಲು ಎಂದಿದ್ದಾರೆ.
ಬೆಂಗಳೂರಿನ ಉದ್ಯಮಿ ಅಂಕಿತ್ ಕೇಡಿಯಾ ಅವರು ತಾವು ತಮ್ಮ ಸಂಬಂಧಿಯೊಬ್ಬರ ಮನೆಗೆ ಭೇಟಿ ನೀಡಿದ್ದ ಸಮಯದಲ್ಲಿನ ಸಂಗತಿಯನ್ನು ‘ಎಕ್ಸ್‌’ನಲ್ಲಿ ಹಂಚಿಕೊಂಡಿದ್ದಾರೆ. “ಸಂಬಂಧಿಕರ ಮಗನಿಗೆ ಬಹುರಾಷ್ಟ್ರೀಯ ಕಂಪನಿಯೊಂದರಲ್ಲಿ (MNC) ವಾರ್ಷಿಕ 15 ಲಕ್ಷ ರೂ. ವೇತನದ ಅತ್ಯುತ್ತಮ ಉದ್ಯೋಗ ಲಭಿಸಿತ್ತು. ಆದರೆ, ಇಡೀ ಮನೆಯಲ್ಲಿ ಸಂಭ್ರಮ ಆಚರಿಸುವ ಬದಲು ಒಂದು ರೀತಿಯ ನಿರಾಸೆಯ ವಾತಾವರಣ ಮನೆಮಾಡಿತ್ತು!” ಎಂದು ಅವರು ಹೇಳಿದ್ದಾರೆ.
“ಮಗನಿಗೆ ಆರಂಭದಲ್ಲೇ ಇಷ್ಟು ದೊಡ್ಡ ಮೊತ್ತದ ಸಂಬಳ ಸಿಕ್ಕಿದ್ದರೂ, ಆತನ ತಂದೆ ಮಾತ್ರ ಮಗನನ್ನು ‘ಇವೆಲ್ಲವನ್ನೂ ಬಿಟ್ಟು ಸರ್ಕಾರಿ ನೌಕರಿಯ ಪರೀಕ್ಷೆಗಳಿಗೆ ಸಿದ್ಧತೆ ನಡೆಸು’ವಂತೆ ಒತ್ತಾಯಿಸುತ್ತಿದ್ದಾರೆ. ಅವರ ಪ್ರಕಾರ, ಸರ್ಕಾರಿ ಕೆಲಸ ಮಾತ್ರವೇ ನಿಜವಾದ ಕೆಲಸ, ಉಳಿದ ಖಾಸಗಿ ಕೆಲಸಗಳೆಲ್ಲ ಇವತ್ತಿದ್ದು ನಾಳೆ ಹೋಗುವ ಅಸ್ಥಿರ ವ್ಯವಸ್ಥೆ!” ಎಂದಿದ್ದಾರೆ.
“ಖಾಸಗಿ ಉದ್ಯೋಗದ ಅಭದ್ರೆಯ ಬಗ್ಗೆ ಮಾತನಾಡಿರುವ ತಂದೆ, ಜಾಗತಿಕ ಮಟ್ಟದ ಟೆಕ್ ದೈತ್ಯ ಕಂಪನಿಗಳಾದ ಅಡೋಬ್ ಮತ್ತು ಮೈಕ್ರೋಸಾಫ್ಟ್‌ಗಳಲ್ಲಿ ಭಾರಿ ಪ್ರಮಾಣದಲ್ಲಿ ನಡೆದ ಲೇ-ಆಫ್ಸ್ (ಉದ್ಯೋಗ ಕಡಿತ) ವರದಿಗಳ ಕುರಿತು ಆತಂಕ ವ್ಯಕ್ತಪಡಿಸಿದ್ದಾರೆ. ಖಾಸಗಿ ವಲಯದಲ್ಲಿ ಎಷ್ಟೇ ದೊಡ್ಡ ಸಂಬಳ ಸಿಕ್ಕಿದರೂ ಅಲ್ಲಿ ದೀರ್ಘಕಾಲದ ಭದ್ರತೆ ಇರುವುದಿಲ್ಲ, ಮ್ಯಾನೇಜ್ಮೆಂಟ್ ಯಾವಾಗ ಬೇಕಾದರೂ ಉದ್ಯೋಗಿಗಳನ್ನು ಕೆಲಸದಿಂದ ತೆಗೆಯಬಹುದು ಎಂಬ ಭಯ ಅವರದ್ದಾಗಿದೆ” ಎಂದು ಕೇಡಿಯಾ ವಿವರಿಸಿದ್ದಾರೆ.
Went to visit a relative whose son just got placed at an MNC with a ₹15 LPA package. Instead of celebrating, his father is forcing him to prepare for government jobs because, according to him, that's the only "real" job.
— Ankit Kedia (@Ankittskedia) June 11, 2026
Apparently, he saw news about layoffs at companies like…
ಅಂಕಿತ್ ಕೇಡಿಯಾ ಅವರ ಈ ಪೋಸ್ಟ್ ವೈರಲ್ ಆಗುತ್ತಿದ್ದಂತೆ ನೆಟ್ಟಿಗರು ತಮ್ಮ ಅಭಿಪ್ರಾಯ ಹಂಚಿಕೊಂಡಿದ್ದಾರೆ. ತಂದೆಯ ವಾದವನ್ನು ಸಮರ್ಥಿಸಿರುವ ನೆಟ್ಟಿಗರು, “ಖಾಸಗಿ ಕಂಪನಿಗಳಲ್ಲಿ ಕೆಲಸದ ಒತ್ತಡ ಮತ್ತು ಟಾರ್ಗೆಟ್ ಕಿರುಕುಳ ಅತಿಯಾಗಿರುತ್ತದೆ. ಮೈಕ್ರೋಸಾಫ್ಟ್‌ನಂತಹ ಕಂಪನಿಗಳಲ್ಲೇ ಕೆಲಸಕ್ಕೆ ಗ್ಯಾರಂಟಿ ಇಲ್ಲದಿರುವಾಗ ತಂದೆಯ ಭಯ ನ್ಯಾಯಸಮ್ಮತವಾಗಿದೆ. ಸರ್ಕಾರಿ ಕೆಲಸದಲ್ಲಿ ಸಿಗುವ ಸಾಮಾಜಿಕ ಗೌರವ ಮತ್ತು ನೆಮ್ಮದಿ ಖಾಸಗಿಯಲ್ಲಿ ಸಿಗುವುದಿಲ್ಲ” ಎಂದಿದ್ದಾರೆ.
ಇನ್ನು, ಕೆಲವು ಯುವ ನೆಟ್ಟಿಗರು ತಂದೆಯ ಹಳೆಯ ನಿಲುವನ್ನು ವಿರೋಧಿಸಿದ್ದಾರೆ. “ಆರಂಭಿಕ ಹಂತದಲ್ಲೇ 15 ಲಕ್ಷ ರೂ. ಪ್ಯಾಕೇಜ್ ಸಿಗುವುದು ಸಣ್ಣ ಮಾತಲ್ಲ. ಇಂದಿನ ಜಗತ್ತಿನಲ್ಲಿ ಖಾಸಗಿ ವಲಯವು ಕೌಶಲಕ್ಕೆ ಬೆಲೆ ನೀಡುತ್ತದೆ. ಕೌಶಲವಿದ್ದರೆ ಬೆಳವಣಿಗೆಗೆ ಮಿತಿಯೇ ಇರುವುದಿಲ್ಲ. ಪೋಷಕರು ಇನ್ನುಮುಂದಾದರೂ ಹಳೆಯ ಕಾಲದ ಯೋಚನೆಗಳಿಂದ ಹೊರಬರಬೇಕು” ಎಂದು ವಾದಿಸಿದ್ದಾರೆ.
