ಇತ್ತೀಚಿನ ದಿನಗಳಲ್ಲಿ ವಯಸ್ಸಾದವರಷ್ಟೇ ಅಲ್ಲ, ಯುವಕರು ಹಾಗೂ ಚಿಕ್ಕ ವಯಸ್ಸಿನವರಲ್ಲೂ ಹೃದಯಾಘಾತ ಪ್ರಕರಣಗಳು ಆತಂಕಕಾರಿಯಾಗಿ ಹೆಚ್ಚುತ್ತಿವೆ. ಭಾರತದಲ್ಲಿ ಸಂಭವಿಸುವ ಒಟ್ಟು ಹಾರ್ಟ್ ಅಟ್ಯಾಕ್ ಪ್ರಕರಣಗಳಲ್ಲಿ ಶೇ. 50ರಷ್ಟು ಮಂದಿ 50 ವರ್ಷಕ್ಕಿಂತ ಕಡಿಮೆ ವಯಸ್ಸಿನವರೇ ಆಗಿದ್ದಾರೆ ಎಂಬ ಆಘಾತಕಾರಿ ಅಂಶವನ್ನು ನುರಿತ ಹೃದ್ರೋಗ ತಜ್ಞರು ಬಹಿರಂಗಪಡಿಸಿದ್ದಾರೆ. ವರದಿಗಳ ಪ್ರಕಾರ ಕಳೆದ 15 ವರ್ಷಗಳಲ್ಲಿ ಹೃದಯ ಸಂಬಂಧಿ ಕಾಯಿಲೆಗಳು ಬರೋಬ್ಬರಿ ಶೇ. 200ರಷ್ಟು ಹೆಚ್ಚಾಗಿವೆ.
ಇದೇ ವಿಷಯದ ಬಗ್ಗೆ ಕಳವಳ ವ್ಯಕ್ತಪಡಿಸಿರುವ ಫೋರ್ಟಿಸ್ ಎಸ್ಕಾರ್ಟ್ಸ್ ಹಾರ್ಟ್ ಇನ್‌ಸ್ಟಿಟ್ಯೂಟ್‌ನ ಅಧ್ಯಕ್ಷ ಡಾ. ಅಶೋಕ್ ಸೇತ್, ಮಕ್ಕಳಿಗೆ 10ನೇ ವಯಸ್ಸಿನಲ್ಲೇ ಕೊಲೆಸ್ಟ್ರಾಲ್ ತಪಾಸಣೆ ಮಾಡಿಸುವುದು ಸೂಕ್ತ . ಚಿಕ್ಕ ವಯಸ್ಸಿನಲ್ಲೇ ಕೆಲವರಲ್ಲಿ ಕಾಣಿಸಿಕೊಳ್ಳುವ ಹೃದಯ ಸಮಸ್ಯೆಗಳು ಪತ್ತೆಯಾಗದೆ ಹಾಗೆಯೇ ಉಳಿದು, ಮುಂದೆ ಹಠಾತ್ ಸಾವಿಗೆ ಕಾರಣವಾಗುತ್ತಿವೆ ಎಂದು ಅವರು ಎಚ್ಚರಿಸಿದ್ದಾರೆ.
ಮಕ್ಕಳಲ್ಲಿ ಕೊಲೆಸ್ಟ್ರಾಲ್ ಮತ್ತು ಹೃದಯದ ಆರೋಗ್ಯ ಹೇಗಿರುತ್ತದೆ?
ಪೋಷಕರಿಗೆ ಅಧಿಕ ಕೊಲೆಸ್ಟ್ರಾಲ್ ಇದ್ದರೆ ಅಥವಾ ಜಂಕ್ ಫುಡ್, ಪಿಜ್ಜಾ, ಬರ್ಗರ್ ಹಾಗೂ ಎಣ್ಣೆ ಪದಾರ್ಥಗಳನ್ನು ಅತಿಯಾಗಿ ತಿನ್ನುವ ಮಕ್ಕಳಲ್ಲಿ ಚಿಕ್ಕ ವಯಸ್ಸಿನಲ್ಲೇ ‘ಫ್ಯಾಮಿಲಿಯಲ್ ಹೈಪರ್‌ಕೊಲೆಸ್ಟೆರೋನೆಮಿಯಾ’ ಅಂದರೆ ವಂಶಪಾರಂಪರ್ಯವಾಗಿ ಕೊಲೆಸ್ಟ್ರಾಲ್ ಮಟ್ಟ ಹೆಚ್ಚಾಗುವ ಅಪಾಯವಿರುತ್ತದೆ.
ಎಲ್ಲ ಮಕ್ಕಳಿಗೂ ಕೊಲೆಸ್ಟ್ರಾಲ್ ಟೆಸ್ಟ್ ಕಡ್ಡಾಯವಲ್ಲ. ಆದರೆ, ಕುಟುಂಬದಲ್ಲಿ ಯಾರಿಗಾದರೂ ಚಿಕ್ಕ ವಯಸ್ಸಿನಲ್ಲಿ ಹಾರ್ಟ್ ಅಟ್ಯಾಕ್ ಆಗಿದ್ದರೆ, ಮೈಬೊಜ್ಜು ಇದ್ದರೆ, ಅಥವಾ ಮಗುವಿಗೆ ಎದೆನೋವು, ಆಟವಾಡುವಾಗ ಸುಸ್ತು, ಉಸಿರಾಟದ ತೊಂದರೆ ಅಥವಾ ತಲೆತಿರುಗಿ ಬೀಳುವ ಲಕ್ಷಣಗಳಿದ್ದರೆ ವೈದ್ಯರ ಸಲಹೆ ಮೇರೆಗೆ ಕೊಲೆಸ್ಟ್ರಾಲ್ ತಪಾಸಣೆ ಹಾಗೂ ‘ಎಕೋಕಾರ್ಡಿಯೋಗ್ರಾಮ್’ ಮಾಡಿಸುವುದು ಒಳಿತು.
ಫೋರ್ಟಿಸ್ ಸಿ-ಡಾಕ್‌ನ ನಿರ್ದೇಶಕರಾದ ಡಾ. ಅನೂಪ್ ಮಿಶ್ರಾ ಮಾತನಾಡಿ, ಬೊಜ್ಜು ಎನ್ನುವುದು ಕೇವಲ ಹೊರನೋಟಕ್ಕೆ ಕಾಣುವ ಸೌಂದರ್ಯದ ಸಮಸ್ಯೆಯಲ್ಲ ಎಂದಿದ್ದಾರೆ.
ಮನುಷ್ಯ ನೋಡಲು ತೆಳ್ಳಗಿರಬಹುದು, ಆದರೆ ದೇಹದ ಒಳಗಡೆ, ಪ್ರಮುಖ ಅಂಗಗಳ ಸುತ್ತ ಕೊಬ್ಬು ಶೇಖರಣೆಯಾಗಿರಬಹುದು. ಹೊಟ್ಟೆಯ ಭಾಗದಲ್ಲಿ ಅಥವಾ ಅಂಗಾಂಗಗಳ ಸುತ್ತ ಬೆಳೆಯುವ ಈ ಕೊಬ್ಬು ಮಧುಮೇಹ ಮತ್ತು ಹೃದಯ ಕಾಯಿಲೆಗಳ ಅಪಾಯವನ್ನು ತರುತ್ತದೆ. ಭಾರತೀಯರಲ್ಲಿ ಸಾಮಾನ್ಯವಾಗಿ ಸ್ನಾಯುಗಳ ಪ್ರಮಾಣ ಕಡಿಮೆ ಇದ್ದು, ದೇಹದಲ್ಲಿ ಕೊಬ್ಬಿನಾಂಶ ಹೆಚ್ಚಾಗಿರುತ್ತದೆ. ಆದ್ದರಿಂದ ಕೇವಲ ದೇಹದ ತೂಕ ಒಂದನ್ನೇ ನೋಡಿ ಆರೋಗ್ಯ ಸರಿ ಇದೆ ಎಂದು ಅಂದುಕೊಳ್ಳಬಾರದು.
ಹೊಟ್ಟೆಯ ಭಾಗದಲ್ಲಿ ಕೊಬ್ಬು ಹೆಚ್ಚಾಗುವುದು ಅಪಾಯದ ಮುನ್ಸೂಚನೆ. ಸಾಮಾನ್ಯ ಅಳತೆಯ ಪ್ರಕಾರ, ಪುರುಷರಿಗೆ ಹೊಟ್ಟೆಯ ಸುತ್ತಳತೆ 36 ಇಂಚುಗಳಿಗಿಂತ ಹೆಚ್ಚು ಇರಬಾರದು. ಮಹಿಳೆಯರಿಗೆ ಹೊಟ್ಟೆಯ ಸುತ್ತಳತೆ 32 ಇಂಚುಗಳಿಗಿಂತ ಹೆಚ್ಚು ಇರಬಾರದು. ಇದಕ್ಕಿಂತ ಹೆಚ್ಚಿದ್ದರೆ ಮಧುಮೇಹ ಮತ್ತು ಹೃದಯ ಕಾಯಿಲೆಯ ಅಪಾಯ ಹೆಚ್ಚು ಎಂದರ್ಥ.
ಹೃದಯದ ರಕ್ಷಣೆಗೆ ಏನು ಮಾಡಬೇಕು?
ಜಂಕ್ ಫುಡ್‌ಗಳನ್ನು ಬಿಟ್ಟು ನಾರುಯುಕ್ತ ಆಹಾರ, ಹಣ್ಣುಗಳು, ತರಕಾರಿಗಳು, ಧಾನ್ಯಗಳು ಮತ್ತು ಪ್ರೋಟೀನ್ ಇರುವ ಸಮತೋಲಿತ ಆಹಾರ ಸೇವಿಸಿ. ಅಡುಗೆಗೆ ಸಾಸಿವೆ ಎಣ್ಣೆ ಸೇರಿದಂತೆ ಒಳ್ಳೆಯ ಎಣ್ಣೆಗಳನ್ನು ಮಿತವಾಗಿ ಬಳಸಿ.
ಕೇವಲ ಜಿಮ್‌ನಲ್ಲಿ ಭಾರೀ ತೂಕ ಎತ್ತುವುದು ಮಾತ್ರ ಸಾಕಾಗುವುದಿಲ್ಲ. ಇದರೊಂದಿಗೆ ವೇಗವಾಗಿ ನಡೆಯುವುದು, ಸೈಕ್ಲಿಂಗ್ ಅಥವಾ ಈಜುವಂತಹ ಏರೋಬಿಕ್ ವ್ಯಾಯಾಮಗಳನ್ನು ಮಾಡಬೇಕು. ವಾರದಲ್ಲಿ ಕನಿಷ್ಠ 150 ನಿಮಿಷಗಳ ಕಾಲ ಮಿತವಾದ ವ್ಯಾಯಾಮ ಅಗತ್ಯ.
ಕಳಪೆ ಆಹಾರ ಪದ್ಧತಿ, ಧೂಮಪಾನ, ಮದ್ಯಪಾನ, ದೀರ್ಘಕಾಲ ಒಂದೇ ಕಡೆ ಕುಳಿತುಕೊಳ್ಳುವುದು, ಮಾನಸಿಕ ಒತ್ತಡ, ಬೊಜ್ಜು ಮತ್ತು ವಾಯುಮಾಲಿನ್ಯ – ಈ ಏಳೂ ಅಂಶಗಳು ಹೃದಯದ ಆರೋಗ್ಯಕ್ಕೆ ಮಾರಕ.
ಸಂಕ್ಷಿಪ್ತವಾಗಿ ಹೇಳುವುದಾದರೆ, ಆರೋಗ್ಯಕರ ಹೃದಯಕ್ಕಾಗಿ ತೂಕ ಇಳಿಸುವುದೊಂದೇ ಗುರಿಯಾಗದೆ, ಜೀವನಶೈಲಿಯನ್ನು ಬದಲಾಯಿಸಿಕೊಳ್ಳುವುದು, ಸಕ್ರಿಯವಾಗಿರುವುದು ಮತ್ತು ನಿಯಮಿತ ಆರೋಗ್ಯ ತಪಾಸಣೆ ಮಾಡಿಸಿಕೊಳ್ಳುವುದು ಇಂದಿನ ಅತ್ಯಂತ ಅವಶ್ಯಕತೆಯಾಗಿದೆ.
