ದುಬೈನಿಂದ ಅಹಮದಾಬಾದ್‌ಗೆ ಆಗಮಿಸಿದ್ದ ಇಂಡಿಗೊ ವಿಮಾನದ ಶೌಚಾಲಯದ ಸ್ಪೀಕರ್ ಬಾಕ್ಸ್‌ನಲ್ಲಿ ಅಡಗಿಸಿಡಲಾಗಿದ್ದ ಅಂದಾಜು 4.27 ಕೋಟಿ ರೂ ಮೌಲ್ಯದ 24 ಕ್ಯಾರೆಟ್ ಶುದ್ಧತೆಯ ಚಿನ್ನವನ್ನು ಕಸ್ಟಮ್ಸ್ ಅಧಿಕಾರಿಗಳು ಭರ್ಜರಿ ಕಾರ್ಯಾಚರಣೆ ನಡೆಸಿ ವಶಪಡಿಸಿಕೊಂಡಿದ್ದಾರೆ.
ಜೂನ್ 12ರಂದು ದುಬೈನಿಂದ ಅಹಮದಾಬಾದ್‌ನ ಸರ್ದಾರ್ ವಲ್ಲಭಭಾಯಿ ಪಟೇಲ್ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಬಂದಿಳಿದ ಇಂಡಿಗೊ ವಿಮಾನದ (6E-1478) ಮುಂಭಾಗದ ಶೌಚಾಲಯದಲ್ಲಿ ಈ ಭಾರಿ ಪ್ರಮಾಣದ ಚಿನ್ನ ಪತ್ತೆಯಾಗಿದೆ. ಖಚಿತ ಮಾಹಿತಿ ಮೇರೆಗೆ ಕಸ್ಟಮ್ಸ್ ಅಧಿಕಾರಿಗಳು ವಿಮಾನಯಾನ ಎಂಜಿನಿಯರ್‌ಗಳ ನೆರವಿನೊಂದಿಗೆ ವಿಮಾನದಲ್ಲಿ ತಪಾಸಣೆ ನಡೆಸಿದ್ದರು.
ಈ ವೇಳೆ, ಗೋಡೆಗೆ ಅಳವಡಿಸಲಾಗಿದ್ದ ಸ್ಪೀಕರ್ ಬಾಕ್ಸ್‌ನೊಳಗೆ ಕಪ್ಪು ಬಣ್ಣದ ಪ್ಲಾಸ್ಟಿಕ್ ಟೇಪ್‌ನಿಂದ ಸುತ್ತಲ್ಪಟ್ಟಿದ್ದ ಎರಡು ಪೌಚ್‌ಗಳನ್ನು ಅಧಿಕಾರಿಗಳು ಹೊರತೆಗೆದಿದ್ದಾರೆ. ಇವುಗಳನ್ನು ಬಿಚ್ಚಿ ಪರಿಶೀಲಿಸಿದಾಗ, 999.0 ಶುದ್ಧತೆಯ ವಿದೇಶಿ ಮೂಲದ ಒಟ್ಟು 24 ಚಿನ್ನದ ಬಿಸ್ಕತ್ತುಗಳು ಇರುವುದು ಖಚಿತವಾಗಿದೆ. ಇದರ ಒಟ್ಟು ತೂಕ 2,799.3 ಗ್ರಾಂ (ಸುಮಾರು 2.8 ಕೆ.ಜಿ) ಆಗಿದ್ದು, ದೇಶೀಯ ಮಾರುಕಟ್ಟೆಯಲ್ಲಿ ಇದರ ನಿಖರ ಮೌಲ್ಯ 4,26,89,325 ರೂ. ಎಂದು ಅಧಿಕಾರಿಗಳು ಅಂದಾಜಿಸಿದ್ದಾರೆ.
ಭಾರತಕ್ಕೆ ಅಕ್ರಮವಾಗಿ ಸಾಗಿಸುವ ಉದ್ದೇಶದಿಂದಲೇ ಕಿಡಿಗೇಡಿಗಳು ಈ ಅತ್ಯಾಧುನಿಕ ತಂತ್ರ ಬಳಸಿದ್ದಾರೆ. ವಿಮಾನವು ನಿಲ್ದಾಣ ತಲುಪಿದ ಬಳಿಕ ವಿಮಾನದ ಸಿಬ್ಬಂದಿ ಅಥವಾ ಸ್ಥಳೀಯ ಪ್ರಯಾಣಿಕರ ಮೂಲಕ ಇದನ್ನು ಹೊರತೆಗೆಯುವ ಯೋಜನೆ ಇತ್ತೆಂಬುದು ಮೇಲ್ನೋಟಕ್ಕೆ ಕಂಡುಬಂದಿದೆ. ಆದರೆ, ನಿಲ್ದಾಣದಲ್ಲಿನ ಕಟ್ಟುನಿಟ್ಟಿನ ತಪಾಸಣೆಯ ಭಯದಿಂದ ಕಳ್ಳಸಾಗಣೆದಾರರು ಇದನ್ನು ತೆಗೆದುಕೊಳ್ಳುವ ಸಾಹಸ ಮಾಡದೆ ಅಲ್ಲಿಯೇ ಬಿಟ್ಟು ಪರಾರಿಯಾಗಿದ್ದಾರೆ.
ಈ ಚಿನ್ನಕ್ಕೆ ಯಾರೂ ವಾರಸುದಾರರು ಬಾರದ ಕಾರಣ, ಕಸ್ಟಮ್ಸ್ ಕಾಯ್ದೆ-1962ರ ಅಡಿ ಪ್ರಕರಣ ದಾಖಲಿಸಿಕೊಂಡು, ಇಡೀ ಚಿನ್ನವನ್ನು ಅನಾಥ ಸ್ವತ್ತು ಎಂದು ಪರಿಗಣಿಸಿ ಜಪ್ತಿ ಮಾಡಲಾಗಿದೆ.ಈ ಕಾರ್ಯಾಚರಣೆಯ ವಿಡಿಯೊವನ್ನು ಇಲಾಖೆ ಬಿಡುಗಡೆ ಮಾಡಿದ್ದು, ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ದುಬೈ ಮತ್ತು ಭಾರತದ ನಡುವಿನ ಬೆಲೆಯ ವ್ಯತ್ಯಾಸವನ್ನು ಬಳಸಿಕೊಂಡು, ಈ ಮಾರ್ಗದಲ್ಲಿ ಇತ್ತೀಚೆಗೆ ಕಳ್ಳಸಾಗಣೆ ಯತ್ನಗಳು ಹೆಚ್ಚಾಗುತ್ತಿವೆ. ಕಳ್ಳಸಾಗಣೆ ಜಾಲದ ಪತ್ತೆಗೆ ತನಿಖೆ ಮುಂದುವರಿದಿದೆ ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.
