ಮರಾಠಿ ಚಿತ್ರರಂಗದ ಜನಪ್ರಿಯ ನಟ ವಿಕಾಸ್ ಸಮುದ್ರೆ ಅವರು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡ ಪೋಸ್ಟ್‌ನಲ್ಲಿನ ‘ಸಣ್ಣ ಟೈಪಿಂಗ್ ತಪ್ಪು’ (Typo error) ಮುಂಬೈ ಸೈಬರ್ ಪೊಲೀಸರನ್ನು ಆತಂಕಕ್ಕೀಡುತ್ತಿದೆ. ಅವರ ಪೋಸ್ಟ್ ನೋಡಿದ ಪೊಲೀಸರು ಮಧ್ಯರಾತ್ರಿ ಇಡೀ ನಗರದಲ್ಲಿ ಹುಡುಕಾಟ ನಡೆಸಿದ್ದಾರೆ.
ನಟ ವಿಕಾಸ್ ಸಮುದ್ರೆ ತಮ್ಮ ಫೇಸ್‌ಬುಕ್ ಖಾತೆಯಲ್ಲಿ ಮರಾಠಿಯಲ್ಲಿ ‘ನಾನು ಆತ್ಮಹತ್ಯೆ ಮಾಡಿಕೊಳ್ಳುತ್ತಿದ್ದೇನೆ’ ಎಂದು ಪೋಸ್ಟ್ ಹಾಕಿದ್ದರು. ಇದನ್ನು ಕಂಡ ತಕ್ಷಣ ಸಾರ್ವಜನಿಕರು ಮತ್ತು ಅಭಿಮಾನಿಗಳು ಆತಂಕಗೊಂಡಿದ್ದು, ಮುಂಬೈ ಸೈಬರ್ ಪೊಲೀಸ್ ವಿಭಾಗಕ್ಕೆ ತಕ್ಷಣ ಮಾಹಿತಿ ರವಾನಿಸಿದ್ದಾರೆ. ವಿಷಯ ಗಂಭೀರವಾಗಿದ್ದರಿಂದ ಮುಂಬೈ ಪೊಲೀಸ್ ಕಮಿಷನರ್ ಸೇರಿದಂತೆ ಹಲವು ಉನ್ನತ ಅಧಿಕಾರಿಗಳು ತಕ್ಷಣ ಕಾರ್ಯಪ್ರವೃತ್ತರಾಗಿ, ಇಡೀ ನಗರವನ್ನು ಜಾಲಾಡಿದ್ದಾರೆ.
ರಾತ್ರಿ 11:03ಕ್ಕೆ ಸೈಬರ್ ಲ್ಯಾಬ್, ಐದು ಮಂದಿ ಸೈಬರ್ ಅಧಿಕಾರಿಗಳು ಹಾಗೂ ಕಂಟ್ರೋಲ್ ರೂಂ ಸಿಬ್ಬಂದಿ ನಟನ ಇರುವಿಕೆಯನ್ನು ಪತ್ತೆಹಚ್ಚಲು ಕಾರ್ಯಚರಣೆ ನಡೆಸಿದ್ದಾರೆ. ಮೊಬೈಲ್ ಲೊಕೇಶನ್ ಮತ್ತು ತಾಂತ್ರಿಕ ಬೆಂಬಲದೊಂದಿಗೆ ಪೊಲೀಸರು, ಅಂತಿಮವಾಗಿ ರಾತ್ರಿ 12:15ರ ವೇಳೆಗೆ ವಿಕಾಸ್ ಸಮುದ್ರೆ ಅವರನ್ನು ಸುರಕ್ಷಿತವಾಗಿ ಸಂಪರ್ಕಿಸುವಲ್ಲಿ ಯಶಸ್ವಿಯಾಗಿದ್ದಾರೆ.
ಬಳಿಕ, ಪೋಸ್ಟ್ ಕುರಿತು ಸ್ಪಷ್ಟನೆ ನೀಡಿದ ನಟ ವಿಕಾಸ್, ತಮ್ಮ ಪೋಸ್ಟ್ ಹಿಂದೆ ಯಾವುದೇ ಆತ್ಮಹತ್ಯೆಯ ಉದ್ದೇಶವಿರಲಿಲ್ಲ, ಅದು ಕೇವಲ ಟೈಪಿಂಗ್ ಎಡವಟ್ಟು ಎಂದು ತಿಳಿಸಿದ್ದಾರೆ.
ತಮ್ಮ ಮುಂದಿನ ಫೇಸ್‌ಬುಕ್ ಪೋಸ್ಟ್‌ನಲ್ಲಿ ಮರಾಠಿಯಲ್ಲಿ ಬರೆದುಕೊಂಡ ಅವರು, ‘ನಾನು ಡ್ರಾಮಾ ಮಾಡುತ್ತಿದ್ದೇನೆ’ ಎಂದು ಟೈಪ್ ಮಾಡಲು ಹೋಗಿ, ಆಟೋಕರೆಕ್ಟ್/ಟೈಪಿಂಗ್ ತಪ್ಪಿನಿಂದ ‘ನಾನು ಆತ್ಮಹತ್ಯೆ ಮಾಡಿಕೊಳ್ಳುತ್ತಿದ್ದೇನೆ’ ಎಂದು ಪೋಸ್ಟ್ ಆಗಿದೆ. ಯಾರೂ ಆತಂಕಪಡುವ ಅಗತ್ಯವಿಲ್ಲ. ನಾನು ಸಂಪೂರ್ಣ ಸುರಕ್ಷಿತವಾಗಿದ್ದೇನೆ. ನಿಮ್ಮ ಪ್ರೀತಿಗೆ ಧನ್ಯವಾದಗಳು ಎಂದು ಸ್ಪಷ್ಟಪಡಿಸಿದರು.
ತಾವು ಅಭಿನಯಿಸುತ್ತಿರುವ ನೂತನ ನಾಟಕದ ಪ್ರಚಾರಕ್ಕಾಗಿ ಈ ಪೋಸ್ಟ್ ಹಾಕಲು ಪ್ರಯತ್ನಿಸುತ್ತಿದ್ದಾಗಿ ಅವರು ವಿವರಿಸಿದ್ದಾರೆ.
ಮರಾಠಿ ರಂಗಭೂಮಿ ಮತ್ತು ಸಿನಿಮಾದಲ್ಲಿ ಹಾಸ್ಯ ನಟನೆಯ ಮೂಲಕ ಹೆಸರು ಮಾಡಿರುವ ವಿಕಾಸ್ ಸಮುದ್ರೆ, ‘ನವ್ರಾ ಮಾಝಾ ನವಸಾಚಾ’ (Navra Maza Navsacha) ಎಂಬ ಹಿಟ್ ಸಿನಿಮಾ ಮೂಲಕ ಅಪಾರ ಅಭಿಮಾನಿ ಬಳಗವನ್ನು ಗಳಿಸಿದ್ದಾರೆ.
