ಟಿಕೆಟ್ ಹಂಚಿಕೆ ವಿಷಯದಲ್ಲಿ ರಾಜ್ಯ ಮತ್ತು ದೇಶಾದ್ಯಂತ ಗಮನ ಸೆಳೆದಿದ್ದ ದಾವಣಗೆರೆ ದಕ್ಷಿಣ ವಿಧಾನಸಭಾ ಕ್ಷೇತ್ರದ ಉಪಚುನಾವಣೆಯ ಮತದಾನ ಇಂದು ಬೆಳಗ್ಗೆ 7ರಿಂದ ಪ್ರಾರಂಭವಾಗಿದ್ದು ಮತದಾನ ಬಿರುಸಿನಿಂದ ಸಾಗಿದೆ. 2 ಲಕ್ಷ 31 ಸಾವಿರಕ್ಕೂ ಅಧಿಕ ಮತಗಳಿರುವ 284 ಮತಗಟ್ಟೆಗಳನ್ನು ಹೊಂದಿರುವ ದಾವಣಗೆರೆ ದಕ್ಷಿಣ ವಿಧಾನಸಭಾ ಕ್ಷೇತ್ರದಲ್ಲಿ ಮತದಾನ ಇದುವರೆಗೆ ಶಾಂತಿಯುತವಾಗಿ ಸಾಗಿದ್ದು, 11 ಗಂಟೆ ಸುಮಾರಿಗೆ ದಾಖಲೆಯ ಶೇ. 22.01ರಷ್ಟು ಮತದಾನವಾಗಿದೆ. 1 ಗಂಟೆ ಸುಮಾರಿಗೆ 37.01% ಆಗಿದ್ದು, 3ಗಂಟೆ ವೇಳೆಗೆ 49.66% ಮತದಾನವಾಗಿದ್ದು, 1,14,752 ಮಂದಿ ಚಲಾಯಿಸಿದ್ದಾರೆ.
ಈ ಮುಂಚೆ ಬೆಳಿಗ್ಗೆ 9 ಗಂಟೆ ಸಮಯಕ್ಕೆ ಶೇ. 9ರಷ್ಟು ಮತದಾನ ದಾಖಲಾಗಿತ್ತು. ಮಹಿಳೆಯರು, ಯುವಕರು ವಯಸ್ಕರು ಸೇರಿದಂತೆ ಇದೇ ಮೊದಲ ಬಾರಿಗೆ ಮತ ಚಲಾಯಿಸುತ್ತಿರುವ ಹೊಸ ಪೀಳಿಗೆಯ ಮತದಾರರು ಕೂಡ ಮತಗಟ್ಟೆಗೆ ಉತ್ಸಾಹದಿಂದ ಆಗಮಿಸಿ ಮತ ಚಲಾಯಿಸುತ್ತಿದ್ದುದು ಕಂಡುಬಂದಿದೆ. ಯಾವುದೇ ಅಹಿತಕರ ಘಟನೆ ವರದಿಯಾಗಿಲ್ಲ.
ಮತದಾನದ ಆರಂಭದಲ್ಲಿ ಮತಗಟ್ಟೆ ಸಂಖ್ಯೆ 201 ಮತ್ತು 284ರಲ್ಲಿ ತಾಂತ್ರಿಕ ಕಾರಣದಿಂದ ಮತಯಂತ್ರಗಳು ಕೈಕೊಟ್ಟಿದ್ದು, ವಿಷಯ ತಿಳಿದ ಚುನಾವಣಾ ಅಧಿಕಾರಿಗಳು ಮತ್ತು ತಾಂತ್ರಿಕ ವರ್ಗ ಕೂಡಲೇ ಸ್ಥಳಕ್ಕೆ ತೆರಳಿ ಸರಿಪಡಿಸಿ ಮತದಾನ ಸುಗಮವಾಗುವಂತೆ ನೋಡಿಕೊಂಡಿವೆ. ಈ ಮತಗಟ್ಟೆಗಳಲ್ಲಿ ಮತದಾನ ಸ್ವಲ್ಪ ವಿಳಂಬವಾದ ವರದಿ ಬಂದಿದೆ.
ಇದನ್ನೂ ಓದಿ: ದಾವಣಗೆರೆ | ಜಮೀರ್ ಚುನಾವಣಾ ಪ್ರಚಾರ, ಸುದ್ದಿಗೋಷ್ಠಿ ನಡೆಸಿ ಗೊಂದಲಕ್ಕೆ ತೆರೆ ಎಳೆಯುವ ಪ್ರಯತ್ನ
ಕ್ಷೇತ್ರದಲ್ಲಿ 25 ಅಭ್ಯರ್ಥಿಗಳು ಕಣದಲ್ಲಿದ್ದು ಬಹುತೇಕ ಕಾಂಗ್ರೆಸ್ ಮತ್ತು ಬಿಜೆಪಿಯ ನಡುವೆ ನೇರ ಹಣಾಹಣಿ ಇದೆ. ಟಿಕೆಟ್ ಹಂಚಿಕೆ ವಿಷಯದಲ್ಲಿ ಮುಸ್ಲಿಮರ ವಿರೋಧ ಎದುರಿಸಿದ್ದ ಕಾಂಗ್ರೆಸ್ ಹಾಗೂ ಶಾಮನೂರು ಕುಟುಂಬಕ್ಕೆ ಈ ಚುನಾವಣೆ ಪ್ರತಿಷ್ಠೆಯ ಹಾಗೂ ಸವಾಲಿನ ವಿಷಯವಾಗಿದೆ. ಸಂಜೆ ಐದರವರೆಗೆ ಮತದಾನ ನಡೆಯಲಿದ್ದು ದಾವಣಗೆರೆ ದಕ್ಷಿಣದ ಮತದಾರರು ಉಪಚುನಾವಣೆಯಲ್ಲಿ ಯಾರ ಪರ ಮತ ಚಲಾಯಿಸಿದ್ದಾರೆ ಎಂಬುದನ್ನು ಕಾದು ನೋಡಬೇಕಿದೆ.
