ಅಕ್ರಮ ಹಣ ವರ್ಗಾವಣೆ ತಡೆ ಕಾಯ್ದೆ (ಪಿಎಂಎಲ್‌ಎ) ಅಡಿಯಲ್ಲಿ ಜಾರಿ ನಿರ್ದೇಶನಾಲಯಕ್ಕೆ (ಇಡಿ) ಸೀಮಿತ ಅಧಿಕಾರಗಳಿದ್ದು, ತನಗೆ ತಿಳಿದ ಪ್ರತಿಯೊಂದು ಪ್ರಕರಣವನ್ನೂ ತನಿಖೆ ಮಾಡಲು ಅದು ‘ಸೂಪರ್ ಕಾಪ್’ (Super Cop) ಅಲ್ಲ ಎಂದು ಕರ್ನಾಟಕ ಹೈಕೋರ್ಟ್ ಸ್ಪಷ್ಟಪಡಿಸಿದೆ.
ಕಾಂಗ್ರೆಸ್ ಶಾಸಕ ಕೆ. ವೈ. ನಂಜೇಗೌಡ ಮತ್ತು ಇತರರ ವಿರುದ್ಧ ಇಡಿ ಆರಂಭಿಸಿದ್ದ ಇಸಿಐಆರ್ ಹಾಗೂ ಅದಕ್ಕೆ ಸಂಬಂಧಿಸಿದ ಎಲ್ಲಾ ವಿಚಾರಣೆಗಳನ್ನು ರದ್ದುಗೊಳಿಸಿ ನ್ಯಾಯಮೂರ್ತಿ ಎಂ.ಐ. ಅರುಣ್ ಅವರಿದ್ದ ಏಕಸದಸ್ಯ ಪೀಠ ಈ ಮಹತ್ವದ ಆದೇಶ ನೀಡಿದೆ.
ಇದನ್ನೂ ಓದಿ: ಹೈಕೋರ್ಟ್‌ನಲ್ಲಿ ಹಿನ್ನಡೆ: ಜೂನ್ 16 ರಿಂದ ಕರ್ನಾಟಕದಲ್ಲಿ ಬೈಕ್‌ ಟ್ಯಾಕ್ಸಿ ಸಂಪೂರ್ಣ ನಿಷೇಧ
ಇಡಿ ಅಧಿಕಾರವು ‘ಪಡೆದುಕೊಂಡ ಅಧಿಕಾರ’ (Derivative Power) ಹೊರತು ಸ್ವತಂತ್ರ ಮೂಲ ಅಧಿಕಾರವಲ್ಲ. ಮೂಲ ಅಪರಾಧ ಅಥವಾ ಎಫ್‌ಐಆರ್ ದಾಖಲಾಗದೇ ಅಥವಾ ಆ ಪ್ರಕರಣ ರದ್ದಾಗಿದ್ದರೆ, ಇಡಿ ಪ್ರತ್ಯೇಕವಾಗಿ ಹಣ ಅಕ್ರಮ ವರ್ಗಾವಣೆ ತನಿಖೆ ನಡೆಸಲು ಬರುವುದಿಲ್ಲ ಎಂದು ಹೈಕೋರ್ಟ್ ತಿಳಿಸಿದೆ.
ಇಡಿಗೆ ಯಾವುದೇ ಅಪರಾಧದ ಮಾಹಿತಿ ದೊರೆತರೆ PMLA ಕಾಯ್ದೆಯ ಸೆಕ್ಷನ್ 66(2) ರ ಪ್ರಕಾರ ಸಂಬಂಧಪಟ್ಟ ತನಿಖಾ ಸಂಸ್ಥೆಗೆ (ಪೊಲೀಸ್ ಅಥವಾ ಲೋಕಾಯುಕ್ತ) ಆ ಮಾಹಿತಿಯನ್ನು ಹಸ್ತಾಂತರಿಸಬೇಕೇ ಹೊರತು, ತಾನೇ ಖಾಸಗಿ ದೂರು ದಾಖಲಿಸಿ ಅದರ ಆಧಾರದಲ್ಲಿ ವಿಚಾರಣೆ ಕೈಗೆತ್ತಿಕೊಳ್ಳಲು ಕಾನೂನಿನಲ್ಲಿ ಅವಕಾಶವಿಲ್ಲ ಎಂದು ಹೈಕೋರ್ಟ್ ಹೇಳಿದೆ.
ಕಾನೂನು ಸಂಸ್ಥೆಗಳ ನಡುವೆ ಅಧಿಕಾರಗಳ ಸಮತೋಲನ ಮತ್ತು ನಿಯಂತ್ರಣ ಇರಬೇಕು. ಶಾಸನಬದ್ಧ ಸಂಸ್ಥೆಗಳು ತಮಗೆ ಕಾನೂನಿನಲ್ಲಿ ನೀಡಲಾದ ವ್ಯಾಪ್ತಿಯಲ್ಲೇ ಕೆಲಸ ಮಾಡಬೇಕೇ ಹೊರತು ಸುಪ್ರೀಂ ಸಂಸ್ಥೆಯಂತೆ ವರ್ತಿಸುವಂತಿಲ್ಲ ಎಂದು ಪೀಠ ವ್ಯಾಖ್ಯಾನಿಸಿದೆ.
ಕೋಲಾರ-ಚಿಕ್ಕಬಳ್ಳಾಪುರ ಹಾಲು ಉತ್ಪಾದಕರ ಒಕ್ಕೂಟದಲ್ಲಿ (ಕೋಮುಲ್) ನಡೆದಿದೆ ಎನ್ನಲಾದ ಅಕ್ರಮಗಳಿಗೆ ಸಂಬಂಧಿಸಿದಂತೆ ಈಡಿ ಖಾಸಗಿ ದೂರು ಸಲ್ಲಿಸಿ ತನಿಖೆ ನಡೆಸಿತ್ತು. ಈ ಕ್ರಮವನ್ನು ಪ್ರಶ್ನಿಸಿ ಸಲ್ಲಿಸಲಾಗಿದ್ದ ಅರ್ಜಿಯ ವಿಚಾರಣೆ ನಡೆಸಿದ ಕೋರ್ಟ್, ಈಡಿಯ ಈ ಕ್ರಮ ಶಾಸನಬದ್ಧ ನಿಯಮಗಳಿಗೆ ವಿರುದ್ಧವಾಗಿದೆ ಎಂದು ತೀರ್ಪು ನೀಡಿದೆ.
