18 ನೇ ಶತಮಾನದಲ್ಲಿದ್ದ ಚೀನಾದ ಮಹತ್ವದ ಕವಿಗಳಲ್ಲಿ ಒಬ್ಬರಾದ ಜ಼ಾವ್ ಯಿ ಕವನವನ್ನು ಇಂಗ್ಲಿಷ್‌ನಿಂದ ಕನ್ನಡಕ್ಕೆ ತಂದಿದ್ದಾರೆ ಹಿರಿಯ ಅನುವಾದಕಿ ಸಿ ಎಚ್‌ ಭಾಗ್ಯ
ಅತಿಥಿಯೊಬ್ಬ ದಿಢೀರನೆ ಮನೆಯ ಬಾಗಿಲು ಬಡಿದ.
ಬಂದವನೇ ನನ್ನ ಕುಂಚಕ್ಕೆ ಕೆಲಸ ನೀಡಿದ.
ಲಾಂಗ್ ಹಾಗೂ ಹ್ಯುಯಾಂಗ್೧* ಆಡಳಿತವನ್ನು ಇವನ ಆಡಳಿತಕ್ಕೆ ಹೋಲಿಸಿ ಹೊಗಳಿ ಅಟ್ಟ ಕ್ಕೇರಿಸುವ ಗೋರಿ ಬರಹವನ್ನು ಸಿದ್ಧಮಾಡಲು ಹೇಳಿದ.
ಇವನ ವಿದ್ವತ್ತನ್ನು ಚೆಂಗ್ ಸೋದರರೊಡನೆ, ಝ಼ ಕ್ಸಿ೨* ಯೊಡನೆ ಹೋಲಿಸಿ ಹಾಡಿ ಕೊಂಡಾಡಲು ಹೇಳಿದ.
ನನಗೂ ಮಜವೆನಿಸಿತು. ತಮಾಷೆಯಾಗೇ ತೆಗೆದುಕೊಂಡೆ.
ಅವನು ಕೇಳಿದ್ದನ್ನೇ ತೇಪೆ ಹಾಕಿ
ಬರೆದು ಕೊಟ್ಟೆ.
ಈ ವ್ಯಕ್ತಿಯನ್ನು ಮಹಾಪುರುಷನನ್ನಾಗಿಸಿದೆ.
ಈ ಗೋರಿಬರಹಕ್ಕೂ ಇವನಿಗೂ
ಗುಲಗಂಜಿಯಷ್ಟೂ ತಾಳೆಯಾಗುತ್ತಿರಲಿಲ್ಲ.
ಈ ಬರಹವು ಗೋರಿಯನ್ನಲಂಕರಿಸಿದರೆ
ಯಾರು ಮಹಾಪುರುಷ? ಯಾರಲ್ಲ ? ಎಂದು ಯಾರಿಗೆ ತಿಳಿವುದು!
ಬಹುಶಃ ಜನ ನನ್ನ ಗೋರಿಬರಹವನ್ನೇ ಪುನರುಚ್ಚರಿಸಬಹುದು,
ಅದು ಚರಿತ್ರೆಯ ಪುಟಗಳಲ್ಲೂ ಸೇರಬಹುದು.
ನನಗೀಗ ನಿಚ್ಚಳವಾಗಿದೆ:ಕನಿಷ್ಠ ಅರ್ಧದಷ್ಟು ಚರಿತ್ರೆಯಾದರೂ ಶುದ್ಧ ಸುಳ್ಳು, ಹಸಿಹಸಿ ಸುಳ್ಳು.
೧* ಲಾಂಗ್ ಮತ್ತು ಹ್ಯುಯಾಂಗ್= ಪ್ರಖ್ಯಾತ ಹ್ಯಾನ್ ವಂಶದ ಮಂತ್ರಿಗಳು.
೨* ಚೆಂಗ್ ಸೋದರರು ಹಾಗೂ ಝ಼ ಕ್ಸಿ= ಸಾಂಗ್ ವಂಶದ ಹೆಸರಾಂತ ತತ್ವಜ್ಞಾನಿಗಳು, ವಿದ್ವಾಂಸರು.
ಟಿಪ್ಪಣಿ: ಈ ಕವಿ ತನ್ನನ್ನು ತಾನು ” ಮೂರು ಅರ್ಧಗಳ ಮುದುಕ” ಎಂದು ಕರೆದು ಕೊಳ್ಳುತ್ತಿದ್ದ- “ಅರ್ಧ ಕಾಣಿಸುವ ಕಣ್ಣು, ಅರ್ಧಂಬರ್ಧ ಕೇಳಿಸುವ ಕಿವಿ, ಹಾಗೂ ಅರೆಬರೆ ಕೇಳಿದ ದನಿ” !
