ರಾಜ್ಯದಲ್ಲಿ ನಡೆಯುತ್ತಿರುವ ಮತದಾರರ ಪಟ್ಟಿಯ ವಿಶೇಷ ತೀವ್ರ ಪರಿಷ್ಕರಣೆ (SIR) ಪ್ರಕ್ರಿಯೆ ಈಗ ಮತದಾರರ ಮನೆ ಬಾಗಿಲಿಗೆ ಆತಂಕ ತಂದಿಟ್ಟಿದೆ. ರಾಜ್ಯದಲ್ಲಿದ್ದ ಒಟ್ಟು 5.54 ಕೋಟಿ ಮತದಾರರ ಪೈಕಿ 1.8 ಕೋಟಿ ಮತದಾರರನ್ನು ಎಎಸ್‌ಡಿಡಿಒ ಅಡಿಯಲ್ಲಿ ಯಾವುದೇ ನೋಟಿಸ್ ಕೊಡದೆ ಡಿಲೀಟ್ ಮಾಡಿರುವ ಚುನಾವಣಾ ಆಯೋಗ ಮತದಾರರ ಸಂಖ್ಯೆಯನ್ನು 4.46 ಕೋಟಿಗೆ ಇಳಿಸಿದೆ. ಇದೀಗ, ಈ ಮತದಾರರ ಪೈಕಿ ಬರೋಬ್ಬರಿ 43.81 ಲಕ್ಷ ಮಂದಿಯನ್ನು ಅನುಮಾನದಿಂದ ನೋಡುತ್ತಿದೆ. 43.81 ಲಕ್ಷ ಮತದಾರರಿಗೆ ನೋಟಿಸ್ ಕಳಿಸಲು ಆಯೋಗ ಮುಂದಾಗಿದೆ. ಶುಕ್ರವಾರದಿಂದಲೇ ನೋಟಿಸ್ ಕಳಿಸುವ ಪ್ರಕ್ರಿಯೆ ಆರಂಭಿಸಿರುವುದಾಗಿ ಚುನಾವಣಾ ಆಯೋಗ ಪತ್ರಿಕಾ ಪ್ರಕಟಣೆಯಲ್ಲಿ ತಿಳಿಸಿದೆ.
43.81 ಲಕ್ಷ ಮತದಾರಿಗೆ ನೋಟಿಸ್ ಕಳಿಸುವುದು ಎಂದರೆ, ರಾಜ್ಯದ 9.8%ರಷ್ಟು ಮತದಾರರನ್ನು ಆಯೋಗವು ಅತಂತ್ರಕ್ಕೆ ದೂಡಿದೆ ಎಂದರ್ಥ. ನೋಟಿಸ್ ಪಡೆಯುವ ಈ ಎಲ್ಲ ಮತದಾರರು ತಾವು ಈ ದೇಶದ ನಾಗರಿಕರು ಎಂಬುದನ್ನು ಸಾಬೀತು ಮಾಡಲು ದಾಖಲೆಗಳನ್ನು ಹೊತ್ತು ಅಧಿಕಾರಿಗಳ ಮುಂದೆ ಸರದಿ ಸಾಲಿನಲ್ಲಿ ನಿಲ್ಲಬೇಕಿದೆ.
ಆಯೋಗವು ನೋಟಿಸ್ ನೀಡಲಿರುವ ಮತದಾರರಲ್ಲಿ ಅತೀ ಹೆಚ್ಚು ಮತದಾರರು ಬೆಂಗಳೂರು ಭಾಗದವರಾಗಿದ್ದಾರೆ. ನೋಟಿಸ್ ಪಡೆಯಲಿರುವ ಒಟ್ಟು 43.81 ಲಕ್ಷ ಮತದಾರರಲ್ಲಿ ಸುಮಾರು 55%ರಷ್ಟು (ಒಟ್ಟು 24,05,717) ಮಂದಿ ಬೆಂಗಳೂರಿನವರೇ ಆಗಿದ್ದಾರೆ. ಈ ಪೈಕಿ, ಬೆಂಗಳೂರು ನಗರದಲ್ಲಿ 9,45,798, ಬಿಬಿಎಂಪಿ ಉತ್ತರದಲ್ಲಿ 6,12,963, ಬಿಬಿಎಂಪಿ ಕೇಂದ್ರದಲ್ಲಿ 4,29,345 ಹಾಗೂ ಬಿಬಿಎಂಪಿ ದಕ್ಷಿಣದಲ್ಲಿ 4,17,611 ಮತದಾರರಿಗೆ ಆಯೋಗವು ನೋಟಿಸ್ ಕಳಿಸಲಿದೆ.
ಬೆಂಗಳೂರು ನಂತರದಲ್ಲಿ ಅತಿ ಹೆಚ್ಚು ನೋಟಿಸ್‌ಗಳು ಹೋಗಲಿರುವ ಜಿಲ್ಲೆಗಳು; ಮಂಡ್ಯ – 1,50,269, ದಕ್ಷಿಣ ಕನ್ನಡ – 1,50,144, ಕೋಲಾರ – 1,42,184, ಮೈಸೂರು – 1,28,132, ತುಮಕೂರು – 1,11,874, ಕಲಬುರಗಿ – 1,05,486, ಉಡುಪಿ – 97,702, ಚಿಕ್ಕಮಗಳೂರು – 91,612, ಬೆಳಗಾವಿ – 84,415 ಹಾಗೂ ಹಾಸನದ 79,772 ಮತದಾರರಿಗೆ ಚುನಾವಣಾ ಆಯೋಗ ನೋಟಿಸ್ ನೀಡಲಿದೆ. ಈ ಜಿಲ್ಲೆಗಳು ಮಾತ್ರವಲ್ಲದೆ, ರಾಜ್ಯದ ಎಲ್ಲ ಜಿಲ್ಲೆಗಳ ಮತದಾರರೂ ನೋಟಿಸ್ ಪಡೆಯಲಿದ್ದಾರೆ.
ನೋಟಿಸ್ ನೀಡುವ ಮತ್ತು ಪರಿಶೀಲನಾ ಪ್ರಕ್ರಿಯೆಯನ್ನು ನಿರ್ವಹಿಸಲು ರಾಜ್ಯಾದ್ಯಂತ ಒಟ್ಟು 4,262 ಸಹಾಯಕ ಚುನಾವಣಾ ನೋಂದಣಾಧಿಕಾರಿಗಳು (AERO) ಮತ್ತು ಹೆಚ್ಚುವರಿ AEROಗಳನ್ನು ನಿಯೋಜಿಸಲಾಗಿದೆ. ಇದರಲ್ಲಿ 336 ನಿಯಮಿತ AEROಗಳು ಮತ್ತು 3,926 ಹೆಚ್ಚುವರಿ AEROಗಳು ಇರಲಿದ್ದಾರೆ ಎಂದು ಆಯೋಗ ತಿಳಿಸಿದೆ.
ನೋಟಿಸ್ ಪಡೆದ ಮತದಾರರು ಸಲ್ಲಿಸುವ ಆಕ್ಷೇಪಣಾ ಅರ್ಜಿಗಳನ್ನು ಈ ಎಇಆರ್‌ಒಗಳು ಪರಿಶೀಲನೆ ನಡೆಸಲಿದ್ದಾರೆ. ಮಾತ್ರವಲ್ಲದೆ, ಮತಪಟ್ಟಿಯಲ್ಲಿ ಯಾರ ಹೆಸರನ್ನು ಸೇರಿಸಬೇಕು, ಉಳಿಸಬೇಕು ಅಥವಾ ತೆಗೆದುಹಾಕಬೇಕು ಎಂಬ ನಿರ್ಣಯವನ್ನೂ ಇವರುಗಳೇ ತೆಗೆದುಕೊಳ್ಳಲಿದ್ದಾರೆ.
ಇದೆಲ್ಲದರ ನಡುವೆ, SIR ಪ್ರಕ್ರಿಯೆಯಲ್ಲಿ ಹೆಸರು ತಪ್ಪಿಹೋಗಿರುವವರು, ಹೊಸದಾಗಿ ಹೆಸರು ಸೇರಿಸಬೇಕಾದವರು ಹಾಗೂ ಮತದಾರರ ಪಟ್ಟಿಯಲ್ಲಿನ ವಿವರಗಳನ್ನು ಸರಿಪಡಿಸಿಕೊಳ್ಳಲುಆಗಸ್ಟ್ 29 ಮತ್ತು 30 ಹಾಗೂ ಸೆಪ್ಟೆಂಬರ್ 19 ಮತ್ತು 20ರಂದು ರಾಜ್ಯಾದ್ಯಂತ ವಿಶೇಷ ಮತದಾರರ ನೋಂದಣಿ ಅಭಿಯಾನ ನಡೆಸಲಾಗುತ್ತದೆ. ಈ ಸಮಯದಲ್ಲಿ ಅಗತ್ಯವಿರುವ ಮತದಾರರು ತಮ್ಮ ಬಿಎಲ್‌ಒಗಳನ್ನು ಸಂಪರ್ಕಿಸಿ ಅರ್ಜಿ, ಆಕ್ಷೇಪಣೆಗಳನ್ನು ಸಲ್ಲಿಸಬಹುದು ಆಯೋಗ ತಿಳಿಸಿದೆ.
