ಬೆಳಗಾವಿ ಜಿಲ್ಲೆ ರಾಮದುರ್ಗ ತಾಲೂಕಿನ ವೀರಭದ್ರೇಶ್ವರ ಏತ ನೀರಾವರಿ ಮತ್ತು ಬಸವೇಶ್ವರ ಏತ ನೀರಾವರಿ ಯೋಜನೆಗಳ ಬಗ್ಗೆ ಈಗ ಹಳ್ಳಿ ಹಳ್ಳಿಗಳಲ್ಲಿ ಭಾರಿ ಚರ್ಚೆ ನಡೆಯುತ್ತಿದೆ. ಹಲವು ವರ್ಷಗಳಿಂದ ನಿಂತಿದ್ದ ಯೋಜನೆಗಳು ಪೂರ್ಣ ಆಗುತ್ತವೆ ಅನ್ನೋ ಭರವಸೆ ಸಿಕ್ಕಿದ್ರಿಂದ ರೈತರು ಹೊಸ ಉತ್ಸಾಹದಲ್ಲಿ ಕಾಣಿಸುತ್ತಿದ್ದಾರೆ.
ಅಶೋಕ ಪಟ್ಟಣ ಅವರು ಎರಡನೇ ಸಾರಿ ಶಾಸಕರಾದಾಗ ಈ ಯೋಜನೆಗಳಿಗೆ ಚಾಲನೆ ನೀಡಿದ್ದರು. ಕಾಮಗಾರಿ ಆರಂಭವಾದ್ರೂ ವರ್ಷ ಕಳೆದರೂ ಯೋಜನೆಗಳು ಮುಗಿಯದೇ ಇದ್ದದ್ದು ರೈತರ ಬೇಸರಕ್ಕೆ ಕಾರಣವಾಗಿತ್ತು. ವಿಶೇಷವಾಗಿ ವೀರಭದ್ರೇಶ್ವರ ಏತ ನೀರಾವರಿ ಯೋಜನೆ 9 ವರ್ಷ ಆದ್ರೂ ಪೂರ್ಣ ಆಗದೇ ಇದ್ದಕ್ಕೆ ರೈತರು ಆಕ್ರೋಶಗೊಂಡು ಮೇ 25ರಂದು ಸಾಲಹಳ್ಳಿಯಲ್ಲಿ ದೊಡ್ಡ ಪ್ರತಿಭಟನೆ ನಡೆಸಿದ್ದರು.
ಪ್ರತಿಭಟನೆ ವೇಳೆ ಸ್ಥಳಕ್ಕೆ ಬಂದ ಶಾಸಕ ಅಶೋಕ ಪಟ್ಟಣ ಅವರು ರೈತರ ಜೊತೆ ಕೂತು ಮಾತನಾಡಿ, ಬಸವೇಶ್ವರ ಏತ ನೀರಾವರಿ ಯೋಜನೆಯನ್ನು 2027ರ ಮಾರ್ಚ್‌ ಒಳಗೆ ಹಾಗೂ ವೀರಭದ್ರೇಶ್ವರ ಏತ ನೀರಾವರಿ ಯೋಜನೆಯನ್ನು 2027ರ ಡಿಸೆಂಬರ್ ಒಳಗೆ ಮುಗಿಸುತ್ತೇವೆ ಅಂತ ಭರವಸೆ ನೀಡಿದರು. ಶಾಸಕರ ಈ ಮಾತಿನ ಬಳಿಕ ಈಗ ಗ್ರಾಮೀಣ ಭಾಗದಲ್ಲಿ ನೀರಾವರಿ ಯೋಜನೆಗಳದ್ದೇ ಮಾತಾಗಿದೆ.
ಹಳ್ಳಿಯ ಕಟ್ಟೆ ಮೇಲೆ ಹಿರಿಯರು “ಈ ಸಲ ಆದ್ರೂ ನೀರು ಬರಬೇಕು”, “ನಮ್ಮ ಮಕ್ಕಳು ಊರು ಬಿಟ್ಟು ಹೋಗೋ ಪರಿಸ್ಥಿತಿ ಇರಬಾರದು” ಅಂತ ಮಾತಾಡ್ತಿದ್ದಾರೆ. ಯುವಕರು “ನೀರು ಬಂದ್ಮಲೆ ಡ್ರಿಪ್ ಹಾಕೋಣ, ಹೊಸ ಬೆಳೆ ಹಾಕೋಣ” ಅಂತ ಯೋಜನೆ ಮಾಡ್ತಿದ್ದಾರೆ. ರೈತರು ತಮ್ಮ ಹೊಲದ ಗಡಿ ತೋರಿಸಿಕೊಂಡು “ಕಾಲುವೆ ಇಲ್ಲಿ ಹಾದು ಹೋಗತ್ತಂತೆ”, “ನಮ್ಮ ಜಮೀನಿಗೂ ನೀರು ಸಿಗತ್ತೆ” ಅಂತ ಸಂತಸ ವ್ಯಕ್ತಪಡಿಸುತ್ತಿದ್ದಾರೆ.
ಟೀ ಅಂಗಡಿಗಳಲ್ಲಿ ಕೂಡ ಇದೇ ಚರ್ಚೆ ಕೇಳಿ ಬರುತ್ತಿದೆ. “ಹೋರಾಟ ಮಾಡದಿದ್ರೆ ಯಾರೂ ಕೇಳಿರಲಿಲ್ಲ”, “ಈ ಸಲ ರೈತರು ಒಂದಾಗಿ ನಿಂತದ್ದಕ್ಕೆ ಫಲ ಸಿಕ್ಕಿದೆ” ಅಂತ ಜನ ಮಾತಾಡುತ್ತಿದ್ದಾರೆ. ಕೆಲವರು ಹಳೆಯ ದಿನಗಳನ್ನು ನೆನೆದು “ಮಳೆ ಬರದ ವರ್ಷಗಳಲ್ಲಿ ಎಷ್ಟು ಕಷ್ಟ ಪಟ್ಟಿವಿ” ಅಂತ ಹೇಳ್ತಿದ್ರೆ, ಇನ್ನೂ ಕೆಲವರು “ನೀರಾವರಿ ಬಂದ್ಮಲೆ ನಮ್ಮ ಭಾಗ ಹಸಿರಾಗತ್ತೆ” ಅಂತ ಆಶಾಭಾವನೆ ವ್ಯಕ್ತಪಡಿಸುತ್ತಿದ್ದಾರೆ.
ಹೋರಾಟದಲ್ಲಿ ರೈತ ಸಂಘಟನೆಯ ರಾಜ್ಯಾಧ್ಯಕ್ಷ ಚೂನಪ್ಪ ಪೂಜೇರಿ ಮತ್ತು ಶಶಿಕಾಂತ ಗುರೂಜಿಯವರ ಭಾಷಣಗಳು ರೈತರಿಗೆ ಧೈರ್ಯ ತುಂಬಿದವು ಎನ್ನುವ ಮಾತುಗಳು ಕೇಳಿ ಬರುತ್ತಿವೆ. ಶಾಸಕ ಅಶೋಕ ಪಟ್ಟಣ ಅವರ ನಡೆ ಹಾಗೂ ರೈತರ ಜೊತೆ ನಿಂತ ರೀತಿಗೂ ಹಲವರು ಮೆಚ್ಚುಗೆ ವ್ಯಕ್ತಪಡಿಸುತ್ತಿದ್ದಾರೆ.
ಒಟ್ಟಾರೆ ಹಲವು ವರ್ಷಗಳಿಂದ ನೀರಿಗಾಗಿ ಪರದಾಡುತ್ತಿದ್ದ ರೈತರಿಗೆ ಈಗ ನೀರಾವರಿ ಯೋಜನೆಗಳ ಭರವಸೆ ಹೊಸ ಜೀವ ತುಂಬಿದಂತಾಗಿದೆ. ಹಳ್ಳಿಗಳಲ್ಲಿ ಈಗ ನೀರು, ಕಾಲುವೆ, ಬೆಳೆ ಮತ್ತು ಭವಿಷ್ಯದ ಕನಸುಗಳದ್ದೇ ಮಾತು ಕೇಳಿ ಬರುತ್ತಿದೆ.
