ಚಿಕ್ಕಮಗಳೂರು ತಾಲೂಕಿನ ಮುಗುಳುವಳ್ಳಿ ಗ್ರಾಮದಲ್ಲಿ ಸಾಲ ಬಾಧೆ ಹಾಗೂ ಕೌಟುಂಬಿಕ ಕಲಹದ ಹಿನ್ನೆಲೆಯಲ್ಲಿ “ನನ್ನ ಸಾವಿಗೆ ನಾನೇ ಕಾರಣ” ಎಂದು ಡೆತ್‌ನೋಟ್ ಬರೆದಿಟ್ಟು ಗೃಹಿಣಿಯೊಬ್ಬರು ನಾಪತ್ತೆಯಾಗಿರುವ ಘಟನೆ ನಡೆದಿದೆ.
ಯೋಗೇಶ್ ಎಂಬುವರ ಪತ್ನಿ ಶೈಲಾ (45), ನಾಪತ್ತೆಯಾದ ಮಹಿಳೆ. ಗುತ್ತಿಗೆ ಕೆಲಸ ಮಾಡುತ್ತಿದ್ದ ಪತಿ ಯೋಗೇಶ್ ಅವರಿಗೆ ಇತ್ತೀಚೆಗೆ ಭಾರಿ ಹಣದ ನಷ್ಟ ಉಂಟಾಗಿತ್ತು. ಈ ಹಿನ್ನೆಲೆಯಲ್ಲಿ ಕುಟುಂಬದ ನಿರ್ವಹಣೆಗಾಗಿ ಶೈಲಾ ಅವರು ತಮಗೆ ಪರಿಚಯವಿದ್ದವರಿಂದ ಕೈಸಾಲ ಮಾಡಿಸಿ ಕೊಡುತ್ತಿದ್ದರು. ಆದರೆ, ಇತ್ತೀಚಿನ ದಿನಗಳಲ್ಲಿ ಸಾಲದ ಹಣ ಮರುಪಾವತಿ ಮಾಡುವ ವಿಷಯದಲ್ಲಿ ದಂಪತಿ ನಡುವೆ ಮನೆಯಲ್ಲಿ ತೀವ್ರ ಮಾತಿನ ಚಕಮಕಿ ಹಾಗೂ ಕೌಟುಂಬಿಕ ಕಲಹಗಳು ನಡೆಯುತ್ತಿದ್ದವು ಎನ್ನಲಾಗಿದೆ. ಇದರಿಂದ ತೀವ್ರ ಬೇಸತ್ತಿದ್ದ ಶೈಲಾ ಅವರು ಮೇ 26 ರ ಬೆಳಿಗ್ಗೆ ಮನೆಯಿಂದ ಹೊರಟು ಬಸ್ ನಿಲ್ದಾಣದ ಕಡೆಗೆ ನಡೆದುಕೊಂಡು ಹೋಗಿರುವುದು ಸಾರ್ವಜನಿಕರ ಗಮನಕ್ಕೆ ಬಂದಿದೆ.
ಇದನ್ನೂ ಓದಿದ್ದೀರಾ?ಚಿಕ್ಕಮಗಳೂರು | ಓಟ್ ಚೋರಿ: ಜಿಲ್ಲೆಯಲ್ಲಿ 1.32 ಲಕ್ಷ ಮತದಾರರು ಹೊರಕ್ಕೆ; ಅನಿಲ್ ಹೊಸಕೊಪ್ಪ ಆರೋಪ
ಮನೆಯಿಂದ ಹೊರಡುವ ಮುನ್ನ ಶೈಲಾ ಅವರು ತಮ್ಮ ಆಧಾರ್ ಕಾರ್ಡ್, 2,500 ರೂಪಾಯಿ ನಗದು ಹಾಗೂ ಸಾಲಗಾರರ ಹೆಸರು ಬರೆದಿರುವ ಚೀಟಿಯನ್ನು ತಮ್ಮೊಂದಿಗೆ ತೆಗೆದುಕೊಂಡು ಹೋಗಿದ್ದಾರೆ ಎನ್ನಲಾಗಿದೆ. ತಮ್ಮ ಮೊಬೈಲ್ ಮನೆಯಲ್ಲೇ ಬಿಟ್ಟು ಹೋಗಿರುವುದು ಹಲವು ಅನುಮಾನಗಳಿಗೆ ಕಾರಣವಾಗಿದೆ. ಪತ್ನಿಯನ್ನ ಪತ್ತೆ ಮಾಡಿಕೊಡುವಂತೆ ಪತಿ ಯೋಗೇಶ್ ಗ್ರಾಮಾಂತರ ಪೊಲೀಸ್ ಠಾಣೆಗೆ ದೂರು ನೀಡಿದ್ದು, ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ನಡೆಸುತ್ತಿದ್ದಾದೆ
