ಹಾಸನದಲ್ಲಿ ಡಿಸೆಂಬರ್‌ 6ರಂದು ಸರ್ಕಾರವು ಸಮಾವೇಶವೊಂದನ್ನು ಆಯೋಜಿಸಿದ್ದು, ಫಲಾನುಭವಿಗಳನ್ನು ಸಮಾವೇಶಕ್ಕೆ ಕರೆತರಲು ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ಸಂಸ್ಥೆಯ 1,154 ಬಸ್ಸುಗಳು ಮತ್ತು ಇತರೆ 250 ವಾಹನಗಳನ್ನು ನಿಯೋಜಿತ್ತು. ಇವೆಲ್ಲಕ್ಕೂ ಸರ್ಕಾರವೇ ಹಣವನ್ನು ಭರಿಸುವುದರಿಂದ ಸಾರಿಗೆ ವಾಹನಗಳಿಗೆ ಸುಮಾರು ಎರಡೂವರೆ ಕೋಟಿ ಮತ್ತು ಶಾಮಿಯಾನ, ಕುರ್ಚಿ, ಆಹಾರದಂತಹ ಇನ್ನಿತರೆ ಕೆಲಸಗಳಿಗೆ ಸುಮಾರು 2.5 ಕೋಟಿ ಸೇರಿ ಒಟ್ಟು 5 ಕೋಟಿ ವ್ಯಯಮಾಡಿದೆ ಎಂದು ತುಮಕೂರು ಜಿಲ್ಲೆಯ ಸಿ ಪುಟ್ಟಯ್ಯ ಹಂದನಕೆರೆ ಖಂಡನೆ ವ್ಯಕ್ತಪಡಿಸಿದ್ದಾರೆ.
ಈ ಕುರಿತು ಪತ್ರಿಕೆ ಪ್ರಕಟಣೆ ನೀಡಿರುವ ಅವರು, “ಸರ್ಕಾರಿ ಕಾರ್ಯಕ್ರಮಕ್ಕೆ 70,000 ಮಂದಿ ಸರ್ಕಾರಿ ಫಲಾನುಭವಿಗಳಿಗೆ ಸೌಲಭ್ಯ ವಿತರಿಸುವ ಕಾರ್ಯಕ್ರಮ ಹಮ್ಮಿಕೊಳ್ಳಲಾಗಿತ್ತು. ಅದರಲ್ಲಿ 12,000 ಮಂದಿಗೆ ಜಮೀನಿನ ಪಹಣಿ ಟಿಪ್ಪಣಿ ದಾಖಲೆಗಳು, 5,000 ನಿವಾಸಿಗಳಿಗೆ ಹಕ್ಕುಪತ್ರದ ದಾಖಲೆಗಳನ್ನು ನೀಡುವುದಾಗಿತ್ತು. ಈ ಕಾರ್ಯಕ್ರಮಕ್ಕೆ ಸರ್ಕಾರ ಲಕ್ಷಾನುಗಟ್ಟಲೆ ವ್ಯಯಮಾಡಲಾಗಿದೆ” ಎಂದು ಹೇಳಿದರು.
“ಫಲಾನುಭವಿಗಳಿಗೆ ಈ ದಾಖಲೆಗಳನ್ನು ಸಂಬಂಧಪಟ್ಟ ಹೋಬಳಿಗಳ ನಾಡಕಚೇರಿಗಳಲ್ಲಿ ಅಲ್ಲಿನ ಉಪ ತಹಶೀಲ್ದಾರ್ ಅವರು ನೀಡಿದ್ದರೆ, ಯಾವುದೇ ಖರ್ಚಿಲ್ಲದೆ ಫಲಾನುಭವಿಗಳಿಗೆ ದಾಖಲೆಗಳನ್ನು ಸುಲಭವಾಗಿ ಮತ್ತು ಸರಳವಾಗಿ ತಲುಪಿಸಬಹುದಿತ್ತು. 70,000 ಫಲಾನುಭವಿಗಳನ್ನು ಒಂದೆಡೆ ಸೇರಿಸಿದಾಗ ಅವರೆಲ್ಲರಿಗೂ ದಾಖಲೆಗಳನ್ನು ಅಲ್ಲಿಯೇ ನೀಡಲು ಸಾಧ್ಯವಾಗುವುದೂ ಇಲ್ಲ. ಕೆಲವರಿಗೆ ಮಾತ್ರ ಸಾಂಕೇತಿಕವಾಗಿ ನೀಡಿ, ಉಳಿದ ಫಲಾನುಭವಿಗಳು ತಮ್ಮ ತಾಲೂಕು ಕೇಂದ್ರಗಳಲ್ಲಿ ಪಡೆದುಕೊಳ್ಳಲು ತಿಳಿಸುತ್ತಾರೆ. ಇಂತಹ ಕಾರ್ಯಕ್ಕೆ ಸರ್ಕಾರದ ಹಣ ದುಂದು ವೆಚ್ಚವೇಕೆ” ಎಂದು ಪ್ರಶ್ನಿಸಿದರು.
“ಸರ್ಕಾರ ಪ್ರತಿ ವರ್ಷ ಸಾವಿರಾರು ಕೋಟಿ ಸಾಲ ಮಾಡುತ್ತಿದೆ. ಪ್ರತಿ ವರ್ಷ ಸಾಲ ಮಾಡುತ್ತಿರುವ ಸರ್ಕಾರಗಳು ಈ ರೀತಿ ಅನಗತ್ಯ ಆಡಂಬರದ ಸಮಾವೇಶಗಳನ್ನು ಏರ್ಪಡಿಸುವ ಯಾವುದೇ ಔಚಿತ್ಯವೂ ಇಲ್ಲ, ಯಾವುದೇ ಅನಿವಾರ್ಯತೆಯೂ ಇಲ್ಲ. ಯಾವುದೇ ಸರ್ಕಾರಗಳಾಗಲಿ ಖರ್ಚು ಮಾಡುವ ಪ್ರತಿಯೊಂದು ರೂಪಾಯಿ ಅಗತ್ಯವಿದ್ದರೆ ಮಾತ್ರ ಖರ್ಚು ಮಾಡಬೇಕು. ಅನಾವಶ್ಯಕವಾಗಿ ಸಾರ್ವಜನಿಕ ಹಣವನ್ನು ದುಂದುವೆಚ್ಚ ಮಾಡುವುದು ಆರ್ಥಿಕತೆಯ ಮೇಲೂ ಪರಿಣಾಮ ಉಂಟು ಮಾಡುತ್ತದೆ” ಎಂದು ಆಕ್ರೋಶ ವ್ಯಕ್ತಪಡಿಸಿದರು.
ಈ ಸುದ್ದಿ ಓದಿದ್ದೀರಾ? ಹುಬ್ಬಳ್ಳಿ | ತಾಯಿಯ ಮನಸ್ಸು ಎಷ್ಟೇ ಸುಟ್ಟರೂ ಮಕ್ಕಳ ಆನಂದದಲ್ಲಿರುತ್ತಾಳೆ: ಡಾ. ಸುಪ್ರೀಯಾ ಮಲಶೆಟ್ಟಿ
“ಯಾವುದೇ ಸರ್ಕಾರಗಳಾಗಿರಲಿ ಸಾರ್ವಜನಿಕರ ಹಣವನ್ನು ಖರ್ಚು ಮಾಡುವಾಗ ಯೋಚಿಸಿ ಅಗತ್ಯವಿದ್ದರಷ್ಟೇ ಖರ್ಚು ಮಾಡುವುದು ಒಳ್ಳೆಯದು. ಅನಾವಶ್ಯಕ ಮತ್ತು ಅನಗತ್ಯ ಖರ್ಚುಗಳನ್ನು ನಿಲ್ಲಿಸಿ ಆರ್ಥಿಕವಾಗಿ ಸದೃಢವಾಗುವ ನಿಟ್ಟಿನಲ್ಲಿ ಸರ್ಕಾರಗಳು ಕಾರ್ಯನಿರ್ವಹಿಸಲಿ” ಎಂದು ಅಭಿಪ್ರಾಯಪಟ್ಟರು.
