ಕೇಂದ್ರ ಸರ್ಕಾರದ ವಿರುದ್ಧ ಹೋರಾಡಿ, ಶಿಕ್ಷಣ ಸಚಿವ ರಾಜೀನಾಮೆಗೆ ಪಟ್ಟು ಹಿಡಿದು ಜಯಿಸಿದ ಯುವಜನತೆಗೆ ಕೊಪ್ಪಳ AIDSO (ಆಲ್ ಇಂಡಿಯಾ ಡೆಮಾಕ್ರಟಿಕ್ ಸ್ಟೂಡೆಂಟ್ಸ್ ಆರ್ಗನೈಸೇಷನ್) ಹೃತ್ಪೂರ್ವಕ ಅಭಿನಂದನೆಗಳನ್ನು ಸಲ್ಲಿಸಿದೆ. ಯುವಕರ ದೃಢಸಂಕಲ್ಪದ ಮುಂದೆ ಯಾವ ಸರ್ವಾಧಿಕಾರಿ ಶಕ್ತಿಯೂ ನಿಲ್ಲದು ಎಂಬ ಸತ್ಯ ಸಾಬೀತಾಗಿದೆ ಎಂದು AIDSO ಅಭಿಪ್ರಾಯಿಸಿದೆ.
ನಿರ್ಲಕ್ಷ್ಯದ ಜವಾಬ್ದಾರಿ ತೆಗೆದುಕೊಳ್ಳುವ ಬದಲು, ಪ್ರತಿಭಟನಾಕಾರರನ್ನು ‘ರಾಷ್ಟ್ರವಿರೋಧಿಗಳು’ ನಡೆಸುತ್ತಿದ್ದಾರೆ ಎಂಬ ಪ್ರಧಾನ್ ಹೇಳಿಕೆಯನ್ನು ಖಂಡಿಸಿದ AIDSO, ವಿದ್ಯಾರ್ಥಿ ಸಮೂಹ, ದೇಶದ ಯುವಕರು ಹಾಗೂ ಸಾಮಾನ್ಯ ಜನರ ದೀರ್ಘಕಾಲದ ಅಸಮಾಧಾನ, ಅಸಹನೀಯ ನೋವಿನಿಂದ ಈ ಹೋರಾಟ ಹುಟ್ಟಿಕೊಂಡಿದೆ ಎಂದು ಅಭಿಪ್ರಾಯಪಟ್ಟಿದೆ.
ಸಾರ್ವಜನಿಕ ಶಿಕ್ಷಣ ವ್ಯವಸ್ಥೆಯನ್ನು ನಾಶಮಾಡುತ್ತಿರುವ, ನಿರುದ್ಯೋಗ ಬಿಕ್ಕಟ್ಟು ಸೃಷ್ಟಿಸುತ್ತಿರುವುದಲ್ಲದೆ ಸಂಸ್ಕೃತಿಯ ಹೆಸರಿನಲ್ಲಿ ಮಾನವೀಯ ಆಯಾಮಗಳನ್ನು ಛಿದ್ರಗೊಳಿಸುತ್ತಿರುವ ಈ ಸರ್ವಾಧಿಕಾರಿ ಕಾರ್ಪೊರೇಟ್ ಪರ ನೀತಿಗಳಿಂದಲೇ ಇಂತಹ ಪರಿಸ್ಥಿತಿ ಸೃಷ್ಟಿಯಾಗಿದೆ ಎಂದು ಎಐಡಿಎಸ್ಓ ಆರೋಪಿಸಿದೆ.
ದೆಹಲಿಯಲ್ಲಿ ಪ್ರತಿಭಟನಾಕಾರರ ಮೇಲೆ ಕ್ರೂರವಾಗಿ ಹಲ್ಲೆ ನಡೆಸಿದ ಮತ್ತು ಹೆಣ್ಣುಮಕ್ಕಳೊಂದಿಗೆ ಅಸಭ್ಯವಾಗಿ ವರ್ತಿಸಿದ ಪೊಲೀಸ್ ಸಿಬ್ಬಂದಿ ಮತ್ತು ಭಾಗಿಯಾದ ಎಲ್ಲರಿಗೂ ಕಠಿಣ ಶಿಕ್ಷೆಯಾಗಬೇಕೆಂದು ನಾವು ಆಗ್ರಹಿಸುತ್ತೇವೆ. ಆಂದೋಲನದ ವೇಳೆ ದೇಶದ ವಿವಿಧ ಭಾಗಗಳಲ್ಲಿ ಪ್ರತಿಭಟನಾಕಾರರ ಮೇಲೆ ಹಾಕಲಾದ ಎಲ್ಲಾ ಪ್ರಕರಣಗಳನ್ನು ಹಿಂಪಡೆಯಬೇಕೆಂದು AIDSO ಒತ್ತಾಯಿಸಿದೆ.
NTA ರದ್ದುಗೊಳಿಸಲು ಮತ್ತು ದುಷ್ಟ ನೀತಿಯಾದ NEP-2020 ವಿರುದ್ಧ ಹೋರಾಡಲು ಹೋರಾಟವನ್ನು ಮುಂದುವರಿಸಲು ಈ ದೇಶದ ವಿದ್ಯಾರ್ಥಿಗಳು ಮತ್ತು ಯುವಜನತೆಗೆ AIDSO ಕರೆ ನೀಡಿದೆ. ಸಾರ್ವಜನಿಕ ಶಿಕ್ಷಣವನ್ನು ಉಳಿಸಲು ಹೋರಾಟವನ್ನು ಮುಂದಕ್ಕೆ ಕೊಂಡೊಯ್ದು ತೀವ್ರಗೊಳಿಸಲು ಎಡಪಂಥೀಯ ಮತ್ತು ಪ್ರಜಾಪ್ರಭುತ್ವ ಶಕ್ತಿಗಳು – ವಿಶೇಷವಾಗಿ ದೇಶದಾದ್ಯಂತದ ವಿದ್ಯಾರ್ಥಿ ಸಂಘಟನೆಗಳು – ಒಗ್ಗೂಡಬೇಕೆಂದು AIDSO ಸಂಘಟನೆಯ ಕೊಪ್ಪಳ ಜಿಲ್ಲಾ ಸಂಚಾಲಕರಾದ ಗಂಗರಾಜ್ ಅಳ್ಳಳ್ಳಿ ಮನವಿ ಮಾಡಿದ್ದಾರೆ.
