ಗೆದ್ದಲು ಹಿಡಿದು ಹಾಳಾಗಿದ್ದ ತಾಳೆಗರಿಗಳು ಹಾಗೂ ಮನೆಮನೆಗಳಲ್ಲಿ ಚದುರಿಹೋಗಿದ್ದ ವಚನಗಳನ್ನು ಸಂಗ್ರಹಿಸಿ, ಅಸಾಧ್ಯವೆನಿಸಿದ ಕಾರ್ಯವನ್ನು ಸಾಧಿಸಿದ ಮಹನೀಯರು ವಚನ ಪಿತಾಮಹ ಫ.ಗು. ಹಳಕಟ್ಟಿ ಎಂದು ರಾವಂದೂರು ಮುರುಘಾ ರಾಜೇಂದ್ರ ಮಠದ ಮೋಕ್ಷಪತಿ ಸ್ವಾಮೀಜಿ ಹೇಳಿದರು.
ಮೈಸೂರು ಜಿಲ್ಲೆ ಪಿರಿಯಾಪಟ್ಟಣ ತಾಲ್ಲೂಕಿನ ಬೆಟ್ಟದಪುರ ಗ್ರಾಮದ ಹೊರವಲಯದಲ್ಲಿರುವ ಅನಿಕೇತನ ಪಿಯು ಕಾಲೇಜಿನ ಆದಿಕವಿ ಪಂಪ ಕನ್ನಡ ಸಾಹಿತ್ಯ ಸಂಘದ ವತಿಯಿಂದ ಶನಿವಾರ ಆಯೋಜಿಸಿದ್ದ ವಚನ ಪಿತಾಮಹ ಫ.ಗು. ಹಳಕಟ್ಟಿ ಜಯಂತಿ ಕಾರ್ಯಕ್ರಮವನ್ನು ಉದ್ಘಾಟಿಸಿ ಅವರು ಮಾತನಾಡಿದರು.
ವಚನ ಸಾಹಿತ್ಯವು ಕನ್ನಡ ಸಾಹಿತ್ಯಕ್ಕೆ ದೊರೆತ ಅಮೂಲ್ಯ ಕೊಡುಗೆಯಾಗಿದ್ದು, ಅದು ಮನುಕುಲದ ನಿಜವಾದ ಸಂವಿಧಾನದಂತಿದೆ ಎಂದು ಅವರು ಹೇಳಿದರು. ಬಸವಣ್ಣನವರ ‘ಕಳಬೇಡ, ಕೊಲಬೇಡ, ಹುಸಿಯ ನುಡಿಯಲು ಬೇಡ’ ಎಂಬ ವಚನವೇ ಬದುಕಿಗೆ ಮಾರ್ಗದರ್ಶಕವಾಗಿದ್ದು, ಅದರ ಸಪ್ತಸೂತ್ರಗಳನ್ನು ಜೀವನದಲ್ಲಿ ಅಳವಡಿಸಿಕೊಂಡಾಗ ಮಾತ್ರ ನಿಜವಾದ ಮನುಷ್ಯರಾಗಲು ಸಾಧ್ಯ ಎಂದು ಪ್ರತಿಪಾದಿಸಿದರು. ವಚನಕಾರರ ಆದರ್ಶಗಳನ್ನು ಅಳವಡಿಸಿಕೊಂಡು ಅವರಂತೆ ಬದುಕುವ ಸಂಕಲ್ಪವನ್ನು ವಿದ್ಯಾರ್ಥಿಗಳು ಬೆಳೆಸಿಕೊಳ್ಳಬೇಕು ಎಂದು ಕಿವಿಮಾತು ಹೇಳಿದರು.
ಮೈಸೂರು ಮಹಾಜನ ಪದವಿ ಕಾಲೇಜಿನ ನಿವೃತ್ತ ಪ್ರಾಧ್ಯಾಪಕ ಪ್ರೊ. ಪ್ರಕಾಶ್ ಜಿ.ಎಸ್. ಹಳ್ಳಿ ಮಾತನಾಡಿ, ವಚನಕಾರರು ಅಚ್ಚ ಕನ್ನಡದ ಬೇಸಾಯಗಾರರಾಗಿದ್ದು, ಓಲೆಗರಿಗಳಲ್ಲಿ ಹಾಗೂ ಜನರ ಬಾಯಿಮಾತಿನಲ್ಲಿ ಉಳಿದಿದ್ದ ವಚನಗಳನ್ನು ಸಂಗ್ರಹಿಸಿ ಗ್ರಂಥ ರೂಪದಲ್ಲಿ ಉಳಿಸಿದ ಕೀರ್ತಿ ಫ.ಗು. ಹಳಕಟ್ಟಿಯವರದು ಎಂದರು. ಅವರು ಸೈಕಲ್‌ನಲ್ಲಿ ಮನೆಮನೆಗೆ ತೆರಳಿ ತಾಳೆಗರಿಗಳನ್ನು ಸಂಗ್ರಹಿಸಿ ವಚನ ಸಾಹಿತ್ಯವನ್ನು ಮುಂದಿನ ಪೀಳಿಗೆಗೆ ಉಳಿಸಿಕೊಟ್ಟರು ಎಂದು ಹೇಳಿದರು.
ವಚನಗಳ ಪ್ರಕಟಣೆಗೆ ಮಾಡಿದ ಸಾಲವನ್ನು ತೀರಿಸಲು ಫ.ಗು. ಹಳಕಟ್ಟಿ ತಮ್ಮ ಮನೆಯನ್ನು ಮಾರಾಟ ಮಾಡಬೇಕಾದ ಪರಿಸ್ಥಿತಿ ಎದುರಾಯಿತು. ನಂತರ ದಾವಣಗೆರೆಯ ತರಳಬಾಳು ಮಠದ ಶಿವಕುಮಾರ ಶಿವಾಚಾರ್ಯ ಸ್ವಾಮೀಜಿ ಅವರನ್ನು ಸನ್ಮಾನಿಸಿ ಚಿನ್ನವನ್ನು ನೀಡಿ, ಅದನ್ನು ಮಾರಾಟ ಮಾಡಿ ಸಾಲ ತೀರಿಸುವಂತೆ ಸಲಹೆ ನೀಡಿದ್ದರು. ಇಂತಹ ಮಹನೀಯರ ಸೇವೆಯಿಂದಲೇ ವಚನ ಸಾಹಿತ್ಯ ಉಳಿದುಕೊಂಡಿದ್ದು, ಅವರು ಇರದಿದ್ದರೆ ಅದು ಕೇವಲ ಜನಪದ ಕಥೆಯಾಗಿ ಉಳಿದು ಹೋಗುತ್ತಿತ್ತು ಎಂದು ತಿಳಿಸಿದರು.
ನಿವೃತ್ತ ಪ್ರಾಂಶುಪಾಲ ಬಿ.ಜೆ. ಜಗದೀಶ್ ಮಾತನಾಡಿ, ಸಾಮಾಜಿಕ ಹಾಗೂ ವೈಚಾರಿಕ ಚಿಂತನೆಗಳಿಂದ ವಿಶ್ವ ಸಾಹಿತ್ಯದಲ್ಲಿ ವಿಶಿಷ್ಟ ಸ್ಥಾನ ಪಡೆದಿರುವುದು ವಚನ ಸಾಹಿತ್ಯ. ಈ ಅಮೂಲ್ಯ ಸಂಪತ್ತನ್ನು ಕನ್ನಡಿಗರಿಗೆ ಪರಿಚಯಿಸಿದ ಕೀರ್ತಿ ಫ.ಗು. ಹಳಕಟ್ಟಿಯವರದು ಎಂದರು. ಅವರ ಸಾಧನೆಯನ್ನು ಮೆಚ್ಚಿದ ಕನ್ನಡದ ಕಣ್ವ ಬಿ.ಎಂ. ಶ್ರೀಕಂಠಯ್ಯ ಅವರು ಹಳಕಟ್ಟಿಯವರನ್ನು ‘ವಚನ ಗುಮ್ಮಟ’ ಎಂದು ಕರೆದಿರುವುದನ್ನು ಸ್ಮರಿಸಿದರು.
ಲೇಖಕ ಇ. ಸುಲೇಮಾನ್ ಮಾತನಾಡಿ, ಯಜ್ಞ-ಯಾಗ ಸೇರಿದಂತೆ ವೈದಿಕ ಆಚರಣೆಗಳ ವಿರುದ್ಧ ನಡೆದ ಸಾಮಾಜಿಕ ಚಳವಳಿಯೇ ವಚನ ಸಾಹಿತ್ಯ. ಇದು ಅಮೂಲ್ಯವಾದ ಚಿನ್ನದ ಗಣಿಯಂತಿದ್ದು, ಆ ಗಣಿಯನ್ನು ಹೊರತೆಗೆದು ಸಮಾಜಕ್ಕೆ ನೀಡಿದವರು ಫ.ಗು. ಹಳಕಟ್ಟಿ ಎಂದು ಹೇಳಿದರು.
ಚಿಂತಕ ಆರ್.ಎಸ್. ದೊಡ್ಡಣ್ಣ ಮಾತನಾಡಿ, ಸಮಾಜದಲ್ಲಿದ್ದ ಅಸಮಾನತೆ ಮತ್ತು ಕಲುಷಿತ ವಾತಾವರಣವನ್ನು ದೂರ ಮಾಡಿ ಸಮಸಮಾಜ ನಿರ್ಮಾಣವೇ ಬಸವಾದಿ ಶರಣರ ಪ್ರಮುಖ ಆಶಯವಾಗಿತ್ತು. ವಚನ ಸಾಹಿತ್ಯವು ಸಾಮಾಜಿಕ ಪರಿವರ್ತನೆಯ ಮಹತ್ವದ ಸಾಧನವಾಗಿದೆ ಎಂದು ಹೇಳಿದರು.
ಈ ಸುದ್ಧಿ ಓದಿದ್ದೀರಾ?ಕೊಡಗಿನಲ್ಲಿ ಮಳೆ; ಕಳೆದ ವರ್ಷಕ್ಕೆ ಹೋಲಿಸಿದರೆ ಸಾಕಷ್ಟು ಕೊರತೆ
ಕಾರ್ಯಕ್ರಮದಲ್ಲಿ ರಂಗಕರ್ಮಿ ಭರಮಣ್ಣ ಬೆಟಗೇರಿ, ಶ್ರಾವ್ಯ, ಕಾರ್ಯದರ್ಶಿ ಡಾ. ಜೆ. ಸೋಮಣ್ಣ, ಪ್ರಾಂಶುಪಾಲ ಅಭಿಜಿತ್, ಉಪನ್ಯಾಸಕರಾದ ಬಸವರಾಜು, ರಜನಿ, ಅರ್ಪಿತಾ, ಸುಧಾ, ಆರ್. ಸಿಂಚನ, ಶರೀಫ್ ಹಾಗೂ ಕನ್ನಡ ಸಾಹಿತ್ಯ ಸಂಘದ ವಿದ್ಯಾರ್ಥಿಗಳಾದ ಅರ್ಚನಾ, ಐಶ್ವರ್ಯ, ಪ್ರಕೃತಿ, ಹರ್ಷಿತಾ ಸೇರಿದಂತೆ ಹಲವರು ಇದ್ದರು.
