ಹಟ್ಟಿ ಚಿನ್ನದ ಗಣಿ ಕಂಪನಿಯು ರೈತರಿಗೆ ಉದ್ಯೋಗ ಹಾಗೂ ಭೂ ಪರಿಹಾರ ನೀಡುವಲ್ಲಿ ವಿಫಲವಾಗಿದೆ ಎಂದು ಆಗ್ರಹಿಸಿ ಭೂ ಹಕ್ಕು ವಂಚಿತ ಹೋರಾಟ ಸಮಿತಿ ಪದಾಧಿಕಾರಿಗಳು ಹಾಗೂ ರೈತರು ಶುಕ್ರವಾರ ಗಣಿ ಕಂಪನಿ ಮುಂದೆ ಪ್ರತಿಭಟನೆ ನಡೆಸಿದರು.
ರೈತರ 450 ಎಕರೆ ಭೂಮಿಯಲ್ಲಿ ಗಣಿ ಕಂಪನಿಯ ಹೆಸರು ನಮೂದಿಸಲಾಗಿದೆ. ಜಮೀನು ಮಾರಾಟ, ಬ್ಯಾಂಕ್ ಸಾಲ, ಇತರೆ ಸೌಲಭ್ಯ ಪಡೆಯಲು ರೈತರಿಗೆ ಸಾಧ್ಯವಾಗುತ್ತಿಲ್ಲ. ಅದನ್ನು ಸರಿಪಡಿಸಿ ಎಂದು ಅಧಿಕಾರಿಗಳಿಗೆ ಮನವಿ ಮಾಡಿದರೂ ಪ್ರಯೋಜನವಾಗಿಲ್ಲ ಎಂದು ರೈತರು ಆಕ್ರೋಶ ವ್ಯಕ್ತಪಡಿಸಿದರು.
ಪ್ರತಿಭಟನಾ ಸ್ಥಳಕ್ಕೆ ಪಿಐ ಶಿವಾನಂದ ಧಾವಿಸಿ, ಸಮಸ್ಯೆ ಆಲಿಸುವಾಗ ರೈತರ ಹಾಗೂ ಪೊಲೀಸರ ನಡುವೆ ವಾಗ್ವಾದ ನಡೆಯಿತು. ನಮ್ಮ ಹಕ್ಕಿಗಾಗಿ ಹೋರಾಟ ಮಾಡುತ್ತಿದ್ದೇವೆ. ಸಾವು-ನೋವು ಸಂಭವಿಸಿದರೆ ಗಣಿ ಕಂಪನಿ ಅಧಿಕಾರಿಗಳು ಹೊಣೆ’ ಎಂದರು.
ಸಂಧಾನ ವಿಫಲ-ಹೋರಾಟ ಮುಂದು ವರಿಕೆ: ಕಂಪನಿ ಹಿರಿಯ ವ್ಯವಸ್ಥಾಪಕ ಯಮನೂರಪ್ಪ ಪ್ರತಿಭಟನಾ ಸ್ಥಳಕ್ಕೆ ಬಂದು, ವ್ಯವಸ್ಥಾಪಕ ನಿರ್ದೇಶಕರಿಗೆ ಸಮಸ್ಯೆ ಬಗ್ಗೆ ತಿಳಿಸಲಾಗಿದೆ. ನಿಯೋಗ ರಚಿಸಿ, ಕಂಪನಿ ಅಧ್ಯಕ್ಷರ ನೇತೃತ್ವದಲ್ಲಿ ಮುಖ್ಯಮಂತ್ರಿ ಗಮನಕ್ಕೆ ತಂದು ಸಮಸ್ಯೆ ಪರಿಹರಿಸಲಾಗುವುದು ಎಂದರು.
ಇದಕ್ಕೆ ಒಪ್ಪದ ರೈತರು ಮೌಖಿಕವಾಗಿ ಬೇಡ, ಲಿಖಿತ ರೂಪದಲ್ಲಿ ಕೊಡಿ ಎಂದು ರೈತರು ಪಟ್ಟು ಹಿಡಿದರು. ರೈತರ ಮನವೊಲಿಸುವಲ್ಲಿ ಗಣಿಕಂಪನಿ ಅಧಿಕಾರಿಗಳು ವಿಫಲರಾದರು. ನಮ್ಮ ಹಕ್ಕು ಸಿಗುವರೆಗೂ ಹೋರಾಟ ನಿಲ್ಲದು. ಭೂಮಿ ಕಳೆದುಕೊಂಡ ರೈತರಿಗೆ ಉದ್ಯೋಗ ಹಾಗೂ ಭೂ ಪರಿಹಾರ ಒದಗಿಸಿಕೊಡಬೇಕು ಎಂದು ರೈತರು ಪಟ್ಟುಹಿಡಿದರು.
ಈ ಸುದ್ದಿ ಓದಿದ್ದೀರಾ? ರಾಯಚೂರು | ಬಸವಣ್ಣನವರ ಬಗ್ಗೆ ಅವಹೇಳನಕಾರಿ ಹೇಳಿಕೆ: ರವಿಹಂಜ ಬಂಧನಕ್ಕೆ ಲಿಂಗಾಯತ ಮಹಾಸಭಾ ಆಗ್ರಹ
ಭೂ ಹಕ್ಕು ವಂಚಿತ ಹೋರಾಟ ಸಮಿತಿ ಪದಾಧಿಕಾರಿಗಳಾದ ಶಿವಾನಂದ, ಶಿವಪುತ್ರಪ್ಪ, ಬಾಬು ನಾಯಿಕೊಡಿ, ಯಂಕೋಬ ಪವಾಡೆ, ಮಹಿಳೆಯರಾದ ಈರಮ್ಮ ಸರಸ್ವತಿ, ಸಿಂಧು, ಗಣಿ ಕಂಪನಿ ವಿವಿರ ಇಲಾಖೆ ಅಧಿಕಾರಿಗಳಾದ ವಿಧಾತ್ರಿ, ಜಗನ್ ಮೋಹನ್, ರಮೇಶ ಇತರರು ಉಪಸ್ಥಿತರಿದ್ದರು.



