ವಿಜಯನಗರ ಜಿಲ್ಲೆ ಹಗರಿಬೊಮ್ಮನಹಳ್ಳಿ ಪೊಲೀಸ್ ಠಾಣೆಯಲ್ಲಿ ನಡೆದಿದೆ ಎನ್ನಲಾದ ಲಾಕಪ್ ಡೆತ್ ಖಂಡಿಸಿ ಪೊಲೀಸರ ವಿರುದ್ಧ ಎಸ್ಡಿಪಿಐ ತೀವ್ರ ಆಕ್ರೋಶ ಹೊರಹಾಕಿದೆ. ಹೊಸಪೇಟೆಯಲ್ಲಿ ಸುದ್ದಿಗೋಷ್ಠಿ ನಡೆಸಿದ ಎಸ್ಡಿಪಿಐ ಮುಖಂಡರು, ಲಾಕಪ್ಡೆತ್ ನ್ಯಾಯಾಂಗ ತನಿಖೆ ಆಗಬೇಕೆಂದು ಆಗ್ರಹಿಸಿದ್ದಾರೆ.
ಜಿಲ್ಲಾ ಕಾರ್ಯದರ್ಶಿ ಆಪ್ಸರ್ ಕೊಡ್ಲಿಪೇಟೆ ಮಾತನಾಡಿ, “ಲಾಕಪ್ ಡೆತ್ ಕೇಸ್ ತನಿಖೆಯನ್ನು ಪೊಲೀಸ್ ತಂಡದಿಂದ ಮಾಡಿಸಬಾರದು. ಪೊಲೀಸರು ತಮ್ಮ ಇಲಾಖೆಯವರೆಂದು ತಪ್ಪಿತಸ್ಥರ ಮೇಲೆ ಅನುಕಂಪ ತೋರಿಸಬಹುದು. ಹೀಗಾಗಿ, ನ್ಯಾಯಾಧೀಶರ ಸಮ್ಮುಖದಲ್ಲಿ ತನಿಖೆಯಾಗಲಿ” ಎಂದು ಆಗ್ರಹಿಸಿದರು.
ಆಗಸ್ಟ್ 1ರ ರಾತ್ರಿ ಮೃತ ಖಲೀಲ್ ಹಾಗೂ ಪತ್ನಿ ಶೈನಾಜ್ ಮಧ್ಯೆ ಜಗಳ ಆಗಿತ್ತು. ಸ್ಥಳೀಯರ ಮಾಹಿತಿ ಮೇರೆಗೆ ಖಲೀಲ್ ರನ್ನ ಪೊಲೀಸರು ಠಾಣೆಗೆ ಕರೆದುಕೊಂಡು ಹೋಗಿದ್ದರು. ರಾತ್ರಿ ವೇಳೆ ವಿಚಾರಣೆಗೆಂದು ಕರೆದಾಗ ಮಾರಣಾಂತಿಕ ಹಲ್ಲೆ ಮಾಡಿದ್ದಾರೆ. ಬಲವಾದ ಏಟು ಬಿದ್ದ ಹಿನ್ನೆಲೆಯಲ್ಲಿ ಖಲೀಲ್ ತಲೆ, ಕಿವಿಯಲ್ಲಿ ತೀವ್ರ ರಕ್ತಸ್ರಾವವಾಗಿ ಮೃತಪಟ್ಟಿದ್ದಾರೆ. ಪೊಲೀಸರೇ ಹೊಡೆದು ಕೊಂದಿದ್ದಾರೆ ಎಂದು ಆರೋಪಿಸಿ ಪತ್ನಿ ಶೈನಾಜ್ ದೂರು ನೀಡಿದ್ದರು.
ಮೃತ ಖಲೀಲ್ ಕುಟುಂಬಸ್ಥರಿಗೆ 50 ಲಕ್ಷ ರೂಪಾಯಿ ಪರಿಹಾರ ಕೊಡಬೇಕು. ಕುಟುಂಬಸ್ಥರಲ್ಲಿ ಒಬ್ಬರಿಗೆ ಸರ್ಕಾರಿ ಹುದ್ದೆ ನೀಡಬೇಕು. ಜೊತೆಗೆ ಮೃತ ಖಲೀಲ್ ಮಕ್ಕಳ ಶಿಕ್ಷಣದ ಜವಾಬ್ದಾರಿಯನ್ನು ಸರ್ಕಾರವೇ ವಹಿಸಿಕೊಳ್ಳಬೇಕು. ಮುಂದಿನ ದಿನಗಳಲ್ಲಿ ಇಂತಹ ಘಟನೆಗಳು ಜರುಗದಂತೆ ನೋಡಿಕೊಳ್ಳಬೇಕೆಂದು ಹೇಳಿದರು.
This video cannot be played in your browser. Open the video directly
ಸುದ್ದಿಗೋಷ್ಠಿ ವೇಳೆ ಮೃತ ಖಲೀಲ್ ಸೋದರ ಮಾವ ಫಯಾಜ್ ಮೌಲಾನಾ, ಎಸ್ಡಿಪಿಐ ಮುಖಂಡರಾದ ಸದ್ದಾಂ ಹಂಪಿ, ಮಹಮ್ಮದ್ ನೂರ್, ಸಲೀಂ ಮಲೀಕ್ ಸೇರಿ ಹಲವರು ಇದ್ದರು.
