ವಿಜಯಪುರ ಜಿಲ್ಲೆಯ ಆಹೇರಿ, ಆಹೇರಿ ತಾಂಡಾ, ಜಂಬಗಿ ಹಾಗೂ ಅಂಕಲಗಿ ಕೆರೆಗಳಿಗೆ ನೀರು ಹರಿಸುವಂತೆ ಆಗ್ರಹಿಸಿ ರಾಜ್ಯ ರೈತ ಸಂಘ ಹಾಗೂ ಹಸಿರು ಸೇನೆ ಮುಖಂಡರು ಜಿಲ್ಲಾಡಳಿತಕ್ಕೆ ಮನವಿ ಸಲ್ಲಿಸಿದರು.
ಜಿಲ್ಲಾ ಅಧ್ಯಕ್ಷ ಸಂಗಮೇಶ ಸಗರ ಮಾತನಾಡಿ, “ಕಳೆದ ಹಲವು ವರ್ಷಗಳಿಂದ ಜಿಲ್ಲಾಧಿಕಾರಿಗಳು ಹಾಗೂ ಸಂಬಂಧಿತ ಅಧಿಕಾರಿಗಳಿಗೆ ಮನವಿ ಸಲ್ಲಿಸಿದ್ದರೂ ಸಮಸ್ಯೆಗೆ ಶಾಶ್ವತ ಪರಿಹಾರ ದೊರೆತಿಲ್ಲ, ಈ ಹಿಂದೆ ಜಂಬಗಿ ಕೆರೆಯಲ್ಲಿ ಏಳು ದಿನಗಳ ಕಾಲ ಅಹೋರಾತ್ರಿ ಧರಣಿ ಸತ್ಯಾಗ್ರಹ ನಡೆಸಿ ಹೋರಾಟ ಮಾಡಿದ ಬಳಿಕವೇ ಕೆರೆಗೆ ನೀರು ಬಿಡಲಾಗಿತ್ತು” ಎಂದು ಆರೋಪಿಸಿದರು.
ಜಿಲ್ಲಾ ಪ್ರಧಾನ ಕಾರ್ಯದರ್ಶಿ ರಾಮನಗೌಡ ಪಾಟೀಲ ಮಾತನಾಡಿ, “ಪ್ರಸ್ತುತ ಅಲಿಮಟ್ಟಿಯಿಂದ ನಾರಾಯಣ ಮೂಲಕ ದೇವರಹಿಪ್ಪರಗಿ ಮಾರ್ಗವಾಗಿ 170-190 ಕೀ ಮಿ ದೊರದಿಂದ ಬರಬೇಕಾಗುತ್ತದೆ. ಆದರೆ ಇದು ಅವೈಜ್ಞಾನಿಕ ಯೋಜನೆ ಎಂದು ಅಧಿಕಾರಿಗಳೇ ಹೇಳುತ್ತಿದ್ದಾರೆ” ಎಂದರು.
“ಈ ಸಮಸ್ಯೆಗೆ ಶಾಶ್ವತ ಪರಿಹಾರವಾಗಿ ಕವಲಗಿ, ಹಡಗಲಿ, ಕಗ್ಗೋಡು, ಕುಮಟಗಿ ಹಾಗೂ ಹೊನ್ನುಟಗಿ ಕೆರೆಗಳು ತುಂಬಿದ ಬಳಿಕ ಪಕ್ಕದ ಹಳ್ಳದ ಮೂಲಕ ನೀರನ್ನು ಹರಿಸಿದರೆ ಜಂಬಗಿ ಕೆರೆಯನ್ನು ಸುಲಭವಾಗಿ ತುಂಬಿಸಬಹುದು. ಅದೇ ರೀತಿ ಕಾಲುವೆಗಳ ಮೂಲಕ ಆಹೇರಿ, ಆಹೇರಿ ತಾಂಡಾ ಹಾಗೂ ಅಂಕಲಗಿ ಕೆರೆಗಳಿಗೂ ನೀರು ಹರಿಸಲು ಕ್ರಮ ಕೈಗೊಳ್ಳಬೇಕು” ಎಂದು ಒತ್ತಾಯಿಸಿದರು.
ಈ ಸಂದರ್ಭದಲ್ಲಿ,ಅಧ್ಯಕ್ಷ ಅನಮೇಶ ಜಮಖಂಡಿ, ರಾಮಸಿಂಗ್‌ ರಜಪೂತ, ಮಲ್ಲಿಕಾರ್ಜುನ ಬುಷ್ಠಿ, ಬಸಗೊಂಡಪ್ಪ ತೇಲಿ, ಶಟ್ಟು ಜಾಧವ ಹಾಗೂ ಆತ್ಮಾನಂದ ಭೈರೋಡಗಿ ಸೇರಿದಂತೆ ಹಲವರು ಇದ್ದರು.
